ନୂଆଦିଲ୍ଲୀ: ଭାରତ ଏବଂ ଶ୍ରୀଲଙ୍କା ମଧ୍ୟରେ ୩ ମ୍ୟାଚ ବିଶିଷ୍ଟ ଦିନିକିଆ ସିରିଜର ପ୍ରଥମ ମ୍ୟାଚ୍ ଜାନୁଆରୀ ୧୦ ତାରିଖରେ ଖେଳାଯିବ। ଦୁଇ ଦଳ ମଧ୍ୟରେ ଏହି ମ୍ୟାଚ୍ ଗୁଆହାଟିର ବାରସାପରା କ୍ରିକେଟ୍ ଷ୍ଟାଡିୟମରେ ଖେଳାଯିବ। ଏହି ଦିନିକିଆ ସିରିଜ୍ ମାଧ୍ୟମରେ ଭାରତ ୨୦୨୩ ବିଶ୍ୱକପ୍ ପାଇଁ ପ୍ରସ୍ତୁତି ଆରମ୍ଭ କରିବ। ଟିମ ଇଣ୍ଡିଆ ଗୁଆହାଟୀରେ ଦ୍ୱିତୀୟ ଥର ପାଇଁ ଦିନିକିଆ ଖେଳିବ। ଏଥି ସହିତ ଶ୍ରୀଲଙ୍କା ଦଳ ପ୍ରଥମ ଥର ପାଇଁ ଏହି ଗ୍ରାଉଣ୍ଡରେ ଦିନିକିଆ ମ୍ୟାଚ୍ ଖେଳିବ। ଭ୍ରମଣକାରୀ ଦଳ ବିପକ୍ଷରେ ଭାରତର ସ୍ଥିତି ଅଧିକ ମଜବୁତ ଦେଖାଯାଉଛି। ଦୁଇ ଦେଶ ମଧ୍ୟରେ ଶେଷ ହୋଇଥିବା ଟି-୨୦ ସିରିଜରେ ଭାରତ ଶ୍ରୀଲଙ୍କାକୁ ୨-୧ରେ ପରାସ୍ତ କରିଛି। ଏହା ବ୍ୟତୀତ ରୋହିତ ଶର୍ମା, ବିରାଟ କୋହଲି, କେ.ଏଲ୍ ରାହୁଲ ଏବଂ ଜସପ୍ରୀତ ବୁମ୍ରା ଟିମ୍ ଇଣ୍ଡିଆକୁ ଫେରିଛନ୍ତି। ଏଭଳି ପରିସ୍ଥିତିରେ ଭାରତ ସାମ୍ନାରେ ଶ୍ରୀଲଙ୍କାର ରାସ୍ତା ସହଜ ହେବ ନାହିଁ। ମ୍ୟାଚ୍ ପୂର୍ବରୁ ଗୁଆହାଟିର ପିଚ୍ ଏବଂ ପାଣିପାଗ ବିଷୟରେ ଆସନ୍ତୁ ଜାଣିବା…
ପିଚ୍:
ବାରସାପାର ପିଚ୍ ସାଧାରଣତଃ ଧିମା ଅଟେ। କିନ୍ତୁ ଯଦି ଆମେ ଏଠାରେ ଖେଳାଯାଇଥିବା ଶେଷ ଟି-୨୦ ଆନ୍ତର୍ଜାତୀୟ ମ୍ୟାଚ୍ କୁ ଦେଖିବା, ଏଠାରେ ଉଚ୍ଚ ସ୍କୋରିଂ ମ୍ୟାଚ୍ ଦେଖିବାକୁ ମିଳିଥିଲା। ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯାଇଥିବା ଟି-୨୦ ମ୍ୟାଚରେ ୪୦୦ ରୁ ଅଧିକ ରନ୍ ସ୍କୋର କରାଯାଇଥିଲା। ଏଠାରେ ଖେଳାଯାଇଥିବା ତିନୋଟି ଅନ୍ତର୍ଜାତୀୟ ମ୍ୟାଚରେ ପଛରେ ବ୍ୟାଟିଂ କରିଥିବା ଦଳ ଦୁଇଟି ମ୍ୟାଚରେ ଜିତିଛି। ଏହି ଗ୍ରାଉଣ୍ଡରେ ୨୦୧୮ ମସିହାରେ ଭାରତ ଏବଂ ୱେଷ୍ଟଇଣ୍ଡିଜ୍ ମଧ୍ୟରେ ଖେଳାଯାଇଥିବା ଦିନିକିଆ ମ୍ୟାଚ୍ ରେ ୬୪୫ ରୁ ଅଧିକ ରନ୍ ସ୍କୋର କରାଯାଇଥିଲା। ତା’ପରେ ଭାରତ ୩୨୨ ରନ୍ର ଲକ୍ଷ୍ୟକୁ ପୂରଣ କରି ମ୍ୟାଚ ଜିତିଥିଲା। ଭାରତ ଏବଂ ଶ୍ରୀଲଙ୍କା ମଧ୍ୟରେ ଚାଲିଥିବା ପ୍ରଥମ ଦିନିକିଆରେ ଟସ୍ ଜିତି ଫିଲ୍ଡ କରିବା ଦଳକୁ ଲାଭ ମିଳିପାରେ।
ଗୁଆହାଟିର ପାଣିପାଗ:
ଜାନୁଆରୀ ୧୦ ତାରିଖରେ ଭାରତ-ଶ୍ରୀଲଙ୍କା ଦିନିକିଆ ମ୍ୟାଚ୍ ସମୟରେ ଗୁଆହାଟୀରେ ପାଗ ଭଲ ରହିବ। ପାଣିପାଗ ବିଭାଗ ଅନୁଯାୟୀ, ମ୍ୟାଚ୍ ଦିନ ଗୁଆହାଟିର ପାଗ ୨୭ ଡିଗ୍ରୀ ସେଣ୍ଟିଗ୍ରେଡ୍ ହେବ। ଏଥି ସହିତ, ରାତିରେ ତାପମାତ୍ରା ହ୍ରାସ ପାଇବ ଏବଂ ଏହା ୧୭ ଡିଗ୍ରୀ ସେଣ୍ଟିଗ୍ରେଡକୁ ଖସିଯିବ। ଦିନସାରା ବର୍ଷା ହେବାର ଆଶଙ୍କା ନାହିଁ। ଏହାର ଅର୍ଥ ହେଉଛି ଭାରତ ଏବଂ ଶ୍ରୀଲଙ୍କା ମଧ୍ୟରେ ଖେଳାଯିବାକୁ ଥିବା ଦିନିକିଆ ମ୍ୟାଚରେ କୌଣସି ବାଧା ସୃଷ୍ଟି ହେବ ନାହିଁ।