ନୂଆଦିଲ୍ଲୀ: ଭାରତୀୟ ବ୍ୟାଟ୍ସମ୍ୟାନ ସୂର୍ଯ୍ୟକୁମାର ଯାଦବଙ୍କୁ ନେଇ ପାକିସ୍ତାନର ପୂର୍ବତନ କ୍ରିକେଟର ସଲମାନ ବଟ ଏକ ବଡ ବୟାନ ଦେଇଛନ୍ତି। ରାଜକୋଟରେ ଶ୍ରୀଲଙ୍କା ବିପକ୍ଷରେ ସୁର୍ଯ୍ୟକୁମାର ଯାଦବଙ୍କ ଇନିଂସରେ ସଲମାନ ବଟ ଅତ୍ୟନ୍ତ ପ୍ରଭାବିତ ହୋଇଛନ୍ତି। ଶ୍ରୀଲଙ୍କା ବିପକ୍ଷ ତୃତୀୟ ତଥା ଅନ୍ତିମ ଟି-୨୦ ଅନ୍ତର୍ଜାତୀୟରେ ରାଜକୋଟର ଏସସିଏ ଷ୍ଟାଡିୟମରେ ସୂର୍ଯ୍ୟକୁମାର ଯାଦବ ୫୧ ବଲରୁ ଅପରାଜିତ ୧୧୨ ରନ୍ କରିଥିଲେ। ଭାରତ ପାଇଁ ଏହା ତାଙ୍କର ୪୫ ତମ ମ୍ୟାଚ୍ ଥିଲା। ସର୍ବାଧିକ ଟି-୨୦ ଶତକ ହାସଲ କରିବାରେ ସୁର୍ଯ୍ୟକୁମାର ଯାଦବ ବର୍ତ୍ତମାନ ରୋହିତ ଶର୍ମାଙ୍କଠାରୁ ମାତ୍ର ଗୋଟିଏ ଶତକ ଦୂରରେ ଅଛନ୍ତି।
ସୁର୍ଯ୍ୟକୁମାର ଯାଦବଙ୍କ ଏହି ଇନିଂସକୁ ପ୍ରଶଂସା କରି ପାକିସ୍ତାନର ପୂର୍ବତନ ଅଧିନାୟକ ସଲମାନ ବଟ ତାଙ୍କ ଦେଶର କ୍ରିକେଟ୍ ବୋର୍ଡ (ପିସିବି) କଟାକ୍ଷ କରିଛନ୍ତି। ସେ କହିଛନ୍ତି ଯେ, ଯଦି ସୂର୍ଯ୍ୟ ଜଣେ ପାକିସ୍ତାନୀ କ୍ରିକେଟର ହୋଇଥାନ୍ତେ, ତେବେ ତାଙ୍କୁ ଜାତୀୟ ଦଳରେ ସ୍ଥାନ ମିଳିବା ପାଇଁ ଅନେକ ସଂଘର୍ଷ କରିବାକୁ ପଡ଼ିଥାନ୍ତା।
ସଲମାନ ବଟ ତାଙ୍କ ୟୁଟ୍ୟୁବ ଚ୍ୟାନେଲରେ କହିଛନ୍ତି ଯେ, “ମୁଁ ସବୁଆଡେ ପଢୁଥିଲି ଯେ ସେ ୩୦ ବର୍ଷ ବୟସରେ ଅନ୍ତର୍ଜାତୀୟ କ୍ରିକେଟକୁ ଆସିଛନ୍ତି। ମୁଁ ଭାବିଲି ସେ ଭାଗ୍ୟବାନ ଯେ, ସେ ଜଣେ ଭାରତୀୟ। ଯଦି ସେ ପାକିସ୍ତାନରେ ଥାଆନ୍ତେ, ତେବେ ସେ ୩୦ ରୁ ଅଧିକ ନୀତିର ଶିକାର ହୋଇଥାନ୍ତେ। (ଖବର ମୁତାବକ ରମିଜ ରାଜାଙ୍କ ନେତୃତ୍ୱାଧୀନ ପିସିବି ୩୦ କିମ୍ବା ତଦୁର୍ଦ୍ଧ୍ୱ ଖେଳାଳିଙ୍କୁ ଜାତୀୟ ଦଳରେ ପ୍ରବେଶ କରିବାକୁ ଅନୁମତି ଦେଇ ନାହିଁ।)
ଉଲ୍ଲେଖ ଯୋଗ୍ୟ ଯେ, ଏହି ମୁମ୍ବାଇ ବ୍ୟାଟ୍ସମ୍ୟାନ୍ ବର୍ତ୍ତମାନ ଜାନୁଆରୀ ୧୦ ତାରିଖ ଗୁଆହାଟୀରେ ଆରମ୍ଭ ହେବାକୁ ଥିବା ଦିନିକିଆ ସିରିଜରେ ଆକ୍ସନକୁ ଫେରିବେ। ଶ୍ରୀଲଙ୍କା ବିପକ୍ଷ ଟି-୨୦ ସିରିଜରେ ରୋହିତ ଶର୍ମା, ବିରାଟ କୋହଲି ଏବଂ କେ.ଏଲ୍ ରାହୁଲଙ୍କୁ ବିଶ୍ରାମ ଦିଆଯାଇଥିଲା, କିନ୍ତୁ ଏହି ତିନି ଖେଳାଳି ଦିନିକିଆ ସିରିଜକୁ ଫେରିବେ।