ନୂଆଦିଲ୍ଲୀ: ଗତକାଲି ଭାରତୀୟ ମହିଳା ଦଳ ୨୦୨୩ ଟି-୨୦ ବିଶ୍ୱକପରେ ପାକିସ୍ତାନକୁ ପରାସ୍ତ କରି ଟୁର୍ଣ୍ଣାମେଣ୍ଟରେ ନିଜର ଅଭିଯାନ ଆରମ୍ଭ କରିଛି। ପ୍ରଥମେ ବ୍ୟାଟିଂ କରିବା ପରେ ପାକିସ୍ତାନ ୨୦ ଓଭରରେ ୪ ୱିକେଟ୍ ହରାଇ ୧୪୯ ରନ୍ ସଂଗ୍ରହ କରିଥିଲା। ଏହାର ଜବାବରେ ଟିମ୍ ଇଣ୍ଡିଆ ୩ ୱିକେଟ୍ ହରାଇ ଗୋଟିଏ ଓଭର ପୂର୍ବରୁ ଟାର୍ଗେଟ ପୂରଣ କରିଥିଲା। ଟି-୨୦ ବିଶ୍ୱକପ ଇତିହାସରେ ଏହା ହେଉଛି ଦ୍ୱିତୀୟ ବୃହତ୍ତମ ସଫଳ ଲକ୍ଷ୍ୟ ପୂରଣ।
ନ୍ୟୁଲାଣ୍ଡ କ୍ରିକେଟ୍ ଗ୍ରାଉଣ୍ଡରେ ଅନୁଷ୍ଠିତ ମହିଳା ଟି-୨୦ ବିଶ୍ୱକପର ପ୍ରଥମ ମ୍ୟାଚ୍ ରେ ଭାରତ ପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ସାତ ୱିକେଟରେ ପରାସ୍ତ କରିଛି। ବିସମା ମାରୁଫ (୫୫ ବଲରେ ୬୮ ରନ) ଏବଂ ଆୟେଶା ନାସିମ (୨୫ ଟି ବଲରେ ୪୩ ରନ) ଙ୍କ ଚମତ୍କାର ପ୍ରଦର୍ଶନ ଯୋଗୁଁ ପାକିସ୍ତାନ ୨୦ ଓଭରରେ ୧୪୯/୪ ସ୍କୋର କରିଥିଲା। ୧୫୦ ରନ୍ ର ଲକ୍ଷ୍ୟ ଥିବାବେଳେ ଶେଫାଲୀ ଭର୍ମା ଏବଂ ୟସ୍ତିକା ଭାଟିଆ ଭାରତ ପାଇଁ ଭଲ ବ୍ୟାଟିଂ କରିଥିଲେ। ତେବେ ପାୱାର ପ୍ଲେ ର ଶେଷ ଓଭରରେ ସାଦିଆ ଇକବାଲ ୟସ୍ତିକା (୧୭) ଙ୍କୁ ଆଉଟ କରିଥିଲେ। ଉଭୟ ପ୍ରଥମ ୱିକେଟ୍ ପାଇଁ ୩୮ ରନ୍ ଯୋଡିଥିଲେ।
ଏହା ପରେ ଶେଫାଲୀ ଏବଂ ଜେମିମା ରୋଡ୍ରିଗୁସ୍ ଇନିଂସକୁ ଆଗକୁ ନେଇଥିଲେ, କିନ୍ତୁ ପାକିସ୍ତାନ ଦଶମ ଓଭରରେ ଭାରତକୁ ଦ୍ୱିତୀୟ ଝଟକା ଦେଇଥିଲା। ତା’ପରେ ହରମାନପ୍ରୀତ କୌର ଏବଂ ଜେମିମା ଟିକେ ସଂଘର୍ଷ କରିଥିବାବେଳେ ନାଶ୍ରା ସାନ୍ଧୁ ୧୪ ତମ ଓଭରରେ ଅଧିନାୟକ କୌରଙ୍କୁ ଆଉଟ କରି ମ୍ୟାଚରେ ପାକିସ୍ତାନକୁ ଭଲ ସ୍ଥିତିରେ ରଖିଥିଲେ।
ଅବଶ୍ୟ, ଜେମିମା ରୋଡ୍ରିଗୁସ୍ ଅପରାଜିତ ଅର୍ଦ୍ଧଶତକ ହାସଲ କରିଥିଲେ (୫୩ ବଲରେ ୫୩ ରନ୍)। ଯାହା ପରେ ଭାରତ ପାଇଁ ଏକ ଶକ୍ତିଶାଳୀ ପ୍ରତ୍ୟାବର୍ତ୍ତନ ହୋଇଥିଲା ଏବଂ ରିଚା ଘୋଷଙ୍କ ୨୦ ଟି ବଲରେ ୩୧ ରନ ବଳରେ ଭାରତକୁ ୧୯ ଟି ୱିକେଟ୍ ଜିତିବାରେ ସହଜ ହୋଇଥିଲା।