ନୂଆଦିଲ୍ଲୀ: ଯେହେତୁ ଭାରତୀୟ ଦଳ ଅଷ୍ଟ୍ରେଲିଆ ବିପକ୍ଷ ପ୍ରଥମ ୨ ଟେଷ୍ଟ ମ୍ୟାଚ୍ ଜିତିଛି, ଶ୍ରୀଲଙ୍କା ଦଳ ମଧ୍ୟ ବିଶ୍ୱ ଟେଷ୍ଟ ଚାମ୍ପିଅନସିପ୍ (WTC) ୨୦୨୩ ର ଫାଇନାଲରେ ପ୍ରବେଶ କରିବାର କିଛି ସମ୍ଭାବନା ଅଛି। ଏହାକୁ ଦୃଷ୍ଟିରେ ରଖି ବର୍ତ୍ତମାନ ପାକିସ୍ତାନ ସୁପର ଲିଗ୍ (ପିଏସ୍ଏଲ୍) ର ଅଷ୍ଟମ ସିଜନରେ ଖେଳିବାକୁ ଶ୍ରୀଲଙ୍କା କ୍ରିକେଟ୍ ଏହାର ଗୁରୁତ୍ୱପୂର୍ଣ୍ଣ ସ୍ପିନର ୱାନିନ୍ଦୁ ହାସରାଙ୍ଗାଙ୍କୁ ନୋ ଅବଜେକସନ ସାର୍ଟିଫିକେଟ୍ ଦେବାକୁ ମନା କରିଦେଇଛି।
ପାକିସ୍ତାନୀ ସୁପର ଲିଗର ଅଷ୍ଟମ ସିଜନ ପାଇଁ କ୍ୱେଟା ଗ୍ଲାଡିଏଟର୍ସ ଦଳ ୱାନିନ୍ଦୁ ହାସରାଙ୍ଗାଙ୍କୁ ନିଜ ଦଳରେ ଅନ୍ତର୍ଭୁକ୍ତ କରିଥିଲା। ତେବେ ବର୍ତ୍ତମାନ ଶ୍ରୀଲଙ୍କା କ୍ରିକେଟ୍ ହାସାରଙ୍ଗାଙ୍କୁ ପ୍ରଥମ ଶ୍ରେଣୀ କ୍ରିକେଟ୍ ଖେଳିବାକୁ କହିଛି ଯାହା ଦ୍ଵାରା ସେ ନ୍ୟୁଜିଲ୍ୟାଣ୍ଡ ଗସ୍ତରେ ଟେଷ୍ଟ ସିରିଜ୍ ପୂର୍ବରୁ ନିଜକୁ ପ୍ରସ୍ତୁତ କରିପାରିବେ। କ୍ୱେଟା ଗ୍ଲାଡିଏଟର୍ସ ଦଳରୁ ଏହା ନିଶ୍ଚିତ ହୋଇଛି ଯେ, PSL ର ଏହି ସିଜନରେ ହାସାରଙ୍ଗା ଅଂଶଗ୍ରହଣ କରିପାରିବେ ନାହିଁ ଏବଂ ଫ୍ରାଞ୍ଚାଇଜ୍ ତାଙ୍କ ସ୍ଥାନରେ ଅନ୍ୟ ବିକଳ୍ପଗୁଡିକ ଉପରେ ଦୃଷ୍ଟି ରଖିଛି।
ଗତ କିଛି ବର୍ଷ ମଧ୍ୟରେ ଶ୍ରୀଲଙ୍କା କ୍ରିକେଟ୍ ଦଳ ପାଇଁ ସମସ୍ତ ତିନୋଟି ଫର୍ମାଟରେ ଚମତ୍କାର ପ୍ରଦର୍ଶନ କରିଥିବା ୱାନିନ୍ଦୁ ହାସରାଙ୍ଗା ଅନ୍ୟତମ। ଯଦିଓ ସେ ତାଙ୍କ କ୍ୟାରିୟରରେ ଏପର୍ଯ୍ୟନ୍ତ ୪ ଟି ଟେଷ୍ଟ ମ୍ୟାଚ୍ ଖେଳିଛନ୍ତି, କିନ୍ତୁ ସେ ସେହି ଖେଳାଳୀମାନଙ୍କ ମଧ୍ୟରୁ ଜଣେ ଯିଏ ବଲ୍ ସହିତ ବ୍ୟାଟ୍ ଦ୍ଵାରା ନିମ୍ନ କ୍ରମରେ ଉଲ୍ଲେଖନୀୟ ଅବଦାନ ରଖିଛନ୍ତି, ଯାହା ଦଳ ପାଇଁ ଏକ ସକାରାତ୍ମକ ବିଷୟ ବୋଲି ବିବେଚନା କରାଯାଇପାରେ।
ନ୍ୟୁଜିଲ୍ୟାଣ୍ଡ ଗସ୍ତରେ ଶ୍ରୀଲଙ୍କା ଦଳକୁ ମାର୍ଚ୍ଚ ୯ ତାରିଖରୁ ଖ୍ରୀଷ୍ଟଚର୍ଚ୍ଚ ଗ୍ରାଉଣ୍ଡରେ ୨ ମ୍ୟାଚ୍ ଟେଷ୍ଟ ସିରିଜର ପ୍ରଥମ ମ୍ୟାଚ୍ ଖେଳିବାକୁ ପଡିବ। ଏହା ପରେ ଦଳ ମାର୍ଚ୍ଚ ୧୭ ତାରିଖରେ ୱେଲିଙ୍ଗଟନ୍ ଗ୍ରାଉଣ୍ଡରେ ସିରିଜର ଦ୍ୱିତୀୟ ମ୍ୟାଚ୍ ଖେଳିବ। ଏଥି ସହିତ ଶ୍ରୀଲଙ୍କାକୁ ଏହି ଭ୍ରମଣରେ ୩ ଟି ଦିନିକିଆ ଏବଂ ୩ ଟି-୨୦ ମ୍ୟାଚ୍ ଖେଳିବାକୁ ପଡିବ।
ଏହିପରି ଶ୍ରୀଲଙ୍କା ଦଳ WTC ର ଫାଇନାଲରେ ପହଞ୍ଚିପାରିବ:
ଯଦି ଶ୍ରୀଲଙ୍କା ଦଳ ନ୍ୟୁଜିଲ୍ୟାଣ୍ଡ ବିପକ୍ଷ ୨ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜକୁ ୨-୦ ରେ ଜିତେ, ତେବେ ଏହା WTC ଫାଇନାଲରେ ପ୍ରବେଶ କରିବାର ଏକ ସୁଯୋଗ ହୋଇପାରେ। ତେବେ ଏହାପୂର୍ବରୁ ଭାରତୀୟ ଦଳକୁ ଅଷ୍ଟ୍ରେଲିଆ ବିପକ୍ଷରେ ଚାଲିଥିବା ଟେଷ୍ଟ ସିରିଜକୁ ୪-୦ ରେ ଜିତିବାକୁ ପଡ଼ିବ। ଅନ୍ୟପକ୍ଷରେ, ଯଦି ଅଷ୍ଟ୍ରେଲିଆ ଦଳ ବର୍ଡର-ଗାଭାସ୍କର ଟ୍ରଫିର ପରବର୍ତ୍ତୀ ୨ ଟି ମ୍ୟାଚ୍ ମଧ୍ୟରୁ ଗୋଟିଏ ଜିତିବା କିମ୍ବା ଡ୍ର ’କରିବାରେ ସଫଳ ହୁଏ, ତେବେ ଶ୍ରୀଲଙ୍କା ସିଧାସଳଖ ଫାଇନାଲ ପାଇଁ ଦୌଡରୁ ଦୂରେଇ ଯିବ।
ଏଥି ସହିତ, ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ୨୦୨୩ ର ଆଗାମୀ ସିଜନ୍ ମାର୍ଚ୍ଚ ୩୧ ତାରିଖରୁ ଆରମ୍ଭ ହେବାକୁ ଯାଉଛି, ଯେଉଁ କାରଣରୁ ଶ୍ରୀଲଙ୍କା କ୍ରିକେଟ୍ ୱାନିନ୍ଦୁ ହାସରାଙ୍ଗାଙ୍କୁ NOC ଦେବାକୁ ନିଷ୍ପତ୍ତି ନେଇପାରେ ବୋଲି ଆଶା କରାଯାଉଛି। ଲଙ୍କା ଦଳର କିୱି ଯାତ୍ରା ଏପ୍ରିଲ୍ ୮ ତାରିଖରେ ଟି-୨୦ ସିରିଜର ଶେଷ ମ୍ୟାଚ୍ ସହିତ ଶେଷ ହେବ।