କେଦାର ମିଶ୍ର
ଯେଉଁ ଦିନ ଜିମ୍ବାଓ୍ବେ ଖୁବ ଅଳ୍ପ ପରିଚିତ ବୋଲର ହେନେରୀ ଓଲଙ୍ଗା ଭାରତର ବିପର୍ଯ୍ୟୟ ଘଟାଇ କ୍ରିକେଟ ବିଶ୍ଵକପରେ ଭାରତକୁ ସୁପର ଲିଗ ଖେଳିବାର ସୁଯୋଗରୁ ବଞ୍ଚିତ କରିଥିଲେ, ସେଦିନ ମୁଁ ସାରାରାତି ଶୋଇ ପାରିନଥିଲି। ନବେ ଦଶକରେ କ୍ରିକେଟ ଆମ ଲାଗି ଥିଲା ସବୁଠୁ ବଡ ଧର୍ମ। ସେଦିନ ଥିଲା ୧୯ ମେ, ୧୯୯୯। ସ୍ଥାନ ଲିସେଷ୍ଟର। ଭାରତ ଜିମ୍ବାଓ୍ବେ ଠାରୁ ମାତ୍ର ତିନି ରନରେ ହାରିଥିଲା। ସୌରଭ ଗାଙ୍ଗୁଲି, ରାହୁଲ ଦ୍ରାବିଡ, ମହମ୍ମଦ ଆଝାରୁଦ୍ଦିନ, ଅଜୟ ଜାଦେଜା, ରବିନ ସିଂଙ୍କ ଭଳି ଖେଳାଳି ସେଥିରେ ପ୍ରଚଣ୍ଡ ବିଫଳ ହୋଇଥିଲେ। ଜଣେ କ୍ରିକେଟପ୍ରେମୀ ଭାବରେ ସେ ଖେଳ ସହିତ ଯେଉଁ ଭାବପ୍ରବଣ ସମ୍ପର୍କ ରହିଥିଲା, ତାହା ପରବର୍ତ୍ତୀ ସମୟରେ ଭାଙ୍ଗିଯାଇଥିଲା।
କ୍ରିକେଟ ଯେ ଖେଳ ନୁହଁ, ଏକ ଜୁଆ- ଏକଥା ବୁଝିଲା ପରେ କ୍ରିକେଟ ପ୍ରତି ଆଗ୍ରହ ମରିଯାଇଥିଲା। ବୁକିଙ୍କ ହାତରେ କ୍ରିକେଟ ଖେଳାଳୀମାନେ ବିକ୍ରୀ ହେଉଥିବାର ଖବର ଆମକୁ ଆହତ କରିଥିଲା। ପରେ ପରେ ଆଇପିଏଲ ନାଁରେ ଯେତେବେଳେ ଏହାକୁ ଭାରତର ଧନୀ କର୍ପୋରେଟମାନେ ନିଜର କ୍ୟାରମ ବୋର୍ଡ କରିବା ଆରମ୍ଭ କଲେ, ସେଇଠୁ ଏହା ପ୍ରତି ବିତୃଷ୍ଣା ବଢିଲା। ସତ କହିବାକୁ ଗଲେ, ୨୦୧୯ ବିଶ୍ଵକପ ପ୍ରତି ମୋର ବିଶେଷ କିଛି ଆଗ୍ରହ ନଥିଲା। କେବଳ କେବେ କେମିତି ଖବର ବୁଝିବା ବ୍ୟତୀତ ଗୋଟେ ବି ମ୍ୟାଚ ମୁଁ ପୁରା ଦେଖିନଥିଲି। ଏହା ସହିତ ଭାରତର ଟେଲିଭିଜନ ଚାନେଲ ଗୁଡିକ ଯେମିତି ବିଶ୍ବକପରେ ଭାରତର ଏକମାତ୍ର ବିଜୟୀ ଖେଳାଳୀ ଭାବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଦେଖାଇ ଚାଲିଥଲେ, ତାକୁ ଦେଖିଲା ପରେ ମନରେ ବିତୃଷ୍ଣା ବଦଳରେ ଘୃଣା ସୃଷ୍ଟି ହେଉଥିଲା। “କ୍ୟା ମୋଦୀ ଲାଏଙ୍ଗେ ୱାର୍ଲ୍ଡକପ’ ଭଳି ଖବରକୁ ଦେଖିବାର ବା ଶୁଣିବାର ଦୁର୍ଭାଗ୍ୟରୁ ବଞ୍ଚିବାକୁ ମୁଁ କ୍ରିକେଟକୁ ଦେଖିବାକୁ ବି ଚାହୁଁ ନଥିଲି।
ତେବେ ଏହି ବିଶ୍ଵକପର ଅନ୍ତିମ ମ୍ୟାଚ, କ୍ରିକେଟ ଇତିହାସରେ ସବୁଠୁ ରୋମାଞ୍ଚକର, ଉତ୍ତେଜନାପୂର୍ଣ୍ଣ ଓ ବିବାଦମାନ ହୋଇ ରହିବ। ଯେ କୌଣସି ନୈତିକତାର ନିୟମରେ ଦେଖିଲେ ନ୍ୟୁଜିଲାଣ୍ଡ ଓ ଇଂଲଣ୍ଡ ଏହି ବିଶ୍ଵକପର ଯୁଗ୍ମ ବିଜେତା ହେବା ଉଚିତ ଥିଲା। କେବଳ ସୁପର ଓଭରରେ ଅଧିକ ସଂଖ୍ୟକ ଚଉକା ଆଧାରରେ ଇଂଲଣ୍ଡକୁ ବିଜୟୀ ଘୋଷଣା କରିବା ଅନ୍ୟାୟ। ସ୍କୋର ଦୃଷ୍ଟିରୁ ଦେଖିଲେ ନ୍ୟୁଜିଲାଣ୍ଡର ୨୪୧/୮ ଇଂଲଣ୍ଡ ର ୨୪୧/୧୦ ଠାରୁ ଭଲ ପ୍ରଦର୍ଶନ। ସେହିପରି ସୁପର ଓଭରରେ ଉଭୟ ଦଳ ୧୫ ରନ ଲେଖାଏଁ କରିବା ପରେ ଉଭୟଙ୍କୁ ଯୁଗ୍ମ ବିଜେତା ଘୋଷଣା କରିବା ଅଧିକ ସମୀଚୀନ ହୋଇଥାନ୍ତା। ତେବେ ଆଇସିସିର ନିୟମ ଏ କ୍ଷେତ୍ରରେ ଚୂଡାନ୍ତ ହୋଇଥିବାରୁ ଓ ଯୁଗ୍ମ ବିଜେତାର ପ୍ରାବଧାନ ନଥିବାରୁ ଇଂଲଣ୍ଡକୁ ବିଶ୍ଵକପ ଟ୍ରଫି ଅଗତ୍ୟା ମିଳିଛି।
ଏ କ୍ଷେତ୍ରରେ ବିବାଦ ଅଧିକ ଘନୀଭୂତ ହେଉଛି ଯେତେବେଳେ ପୂର୍ବତନ ବିଖ୍ୟାତ ଅମ୍ପାୟାର ସିମନ ଟଫେଲ ଓଭର ଥ୍ରୋ ରୁ ମିଳିଥିବା ୬ରନ କୁ ନେଇ ପ୍ରଶ୍ନ ଉଠାଇଛନ୍ତି। ଟଫେଲଙ୍କ ମତରେ ଏହା ପାଞ୍ଚ ରନ ହେବାର ନିୟମ ରହିଛି। ଏମିତି ନିୟମ ଓ ନୈତିକତାର ପ୍ରଶ୍ନ ଭିତରେ ବିଶ୍ଵକପ କ୍ରିକେଟର ଫାଇନାଲ ଆଜି ମଧ୍ୟ ଚର୍ଚ୍ଚାରେ ରହିଛି। ଇଂଲଣ୍ଡ ଏକାକୀ ବିଶ୍ଵକପ ଜିତିବା ବିଲକୁଲ ଗ୍ରହଣୀୟ ନିୟମ ନୁହେଁ। ଯେହେତୁ ଉଭୟ ଦଳର ପ୍ରଦର୍ଶନ ସମାନ, ଏମିତି ପରିସ୍ଥିତିରେ ଯୌଥ ବିଜେତାର ପରମ୍ପରା ଆରମ୍ଭ ହେବା ଉଚିତ।
Tags:
