ଭୁବନେଶ୍ଵର: କଂଗ୍ରେସ ଦଳରୁ ବହିଷ୍କୃତ ହେବା ପରେ କଟକ ଜ଼ିଲ୍ଲା କଂଗ୍ରେସ ର ପୂର୍ବତନ ସଭାପତି ମାନସ ରଞ୍ଜନ ଚୌଧୁରୀ ପ୍ରଦେଶ କଂଗ୍ରେସ କାର୍ଯ୍ୟାଳୟ ରେ ଏକ ସାମ୍ବାଦିକ ସମ୍ମିଳନୀ କରି କଂଗ୍ରେସ ବିରୋଧରେ ଗର୍ଜ୍ଜନ କରିଛନ୍ତି। ସେ କହିଛନ୍ତି ଯେ ଦୀର୍ଘ ୩୦ ବର୍ଷ ଧରି କଂଗ୍ରେସ ଦଳରେ ମୁଁ ଜଣେ ଶୃଙ୍ଖଳିତ କର୍ମୀ ଭାବରେ କାର୍ଯ୍ୟ କରିଆସୁଅଛି। ବିଶୃଙ୍ଖଳା ଓ ଦଳ ବିରୋଧୀ କାର୍ଯ୍ୟ ପାଇଁ ମୋତେ ବହିଷ୍କାର କରାଯାଇଛି ବୋଲି ପିସିସି ସଭାପତି ଶ୍ରୀ ଶରତ ପଟ୍ଟନାୟକ ଉଲ୍ଲେଖ କରିଛନ୍ତି। ଦଳର ଏହି କର୍ଯ୍ୟାନୁଷ୍ଠାନ ମୋତେ ବିସ୍ମିତ କରିଛି ବୋଲି ମାନସ କହିଛନ୍ତି।
ସେ ଆହୁରି କହିଛନ୍ତି ଯେ, ଓଡିଶା ରେ ଯେଉଁ ରାଜନୈତିକ ବାତାବରଣ ଥିଲା ସେଥିରୁ ସ୍ପଷ୍ଟ ଯେ ଚାଳିଶିରୁ ଉର୍ଦ୍ଧ୍ବ ବିଧାନସଭା କ୍ଷେତ୍ର ରେ କଂଗ୍ରେସ ବିଜୟ ଲାଭ କରିଥାନ୍ତ ମାତ୍ର ପିସିସି ସଭାପତି ଶ୍ରୀ ଶରତ ପଟ୍ଟନାୟକ ଏବଂ ଓଡିଶା ପ୍ରଭାରୀ ଡ଼କ୍ଟର ଅଜୟ କୁମାର ବିଜୁ ଜନତା ଦଳ ପାଖରେ ମୁଣ୍ଡ ବିକି ଦେଇଥିବାରୁ କଂଗ୍ରେସ କୁ ମାତ୍ର ୧୪ ଟି ଆସନ ମିଳିଲା। ନିର୍ବାଚନ ପ୍ରଚାର ସମୟରେ ରାହୁଲ ଗାନ୍ଧୀ ଓ ମଲ୍ଲିକାର୍ଜୁନ ଖର୍ଗେ ଙ୍କ ସଭା ବ୍ୟତୀତ ଏହି ଦୁଇ ଜଣଙ୍କୁ କେଉଁଠାରେ ବି ଦେଖିବାକୁ ମିଳିଲାନାହିଁ।
୮୦ ଟି ବିଧାନସଭା ପ୍ରାର୍ଥୀ ଏବଂ ୧୪ ଟି ସାଂସଦ ପାର୍ଥୀ ଙ୍କୁ ଟଙ୍କାଟିଏ ବି ଦଳୀୟ ଫଣ୍ଡ ମିଳିଲା ନାହିଁ। ଯଦିବା ଏଆଇସିସି ସମସ୍ତ ପ୍ରାର୍ଥୀ ଙ୍କ ପାଇଁ ଦଳୀୟ ଫଣ୍ଡ ପଠାଇଥିଲେ।ଯେଉଁ କଂଗ୍ରେସ ପ୍ରାର୍ଥୀ କଂଗ୍ରେସ କର୍ଯ୍ୟ।ଳୟ ରେ କିମ୍ବା ଭୁବନେଶ୍ୱର ସ୍ଥିତ ଏଚଆଇଆଇ ହୋଟେଲରେ ଡ଼କ୍ଟର ଅଜୟ କୁମାରଙ୍କୁ ଭେଟି ଦଳୀୟ ଫଣ୍ଡ ପାଇଁ ନିବେଦନ କରିଥିଲେ ସେମାନଙ୍କୁ ଅଜୟ କୁମାର ଅତି ଅଭଦ୍ର ଭାଷାରେ ଗାଳିଗୁଲଜ କରିଥିଲେ।
ମୋର ଭୁଲ ଏତିକି ଥିଲା ଯେ କଂଗ୍ରେସ ପାର୍ଥୀ ଙ୍କୁ ସେମାନଙ୍କ ପ୍ରାପ୍ୟ ଦଳୀୟ ଫଣ୍ଡ ଦେବାକୁ ମୁଁ ଦୃଢ କଣ୍ଠରେ ଦାବି କରିଥିଲି। ଅନ୍ୟ ପକ୍ଷ ରେ ବହୁ ଯୋଗ୍ୟ ପାର୍ଥୀଙ୍କୁ ଟିକେଟ ଦେବାର ୧୦ ଦିନ ପରେ ସେମାନଙ୍କ ଟିକେଟ କାଟି ଅନ୍ୟମାନଙ୍କୁ ଟିକେଟ ଦବା କାର୍ଯ୍ୟକୁ ମୁଁ ପ୍ରତିବାଦ କରିଥିଲି। ଓଡିଶା ବାସୀ ଏବଂ ଗଣମାଧ୍ୟମ ପ୍ରତିନିଧି ନିଶ୍ଚିତ ଅନୁଭବ କରିଥିବେ ଯେ ପାଖାପାଖି ୧୦୦ ଟି ସିଟ ରେ କଂଗ୍ରେସ ର ଲଢେଇ ଦୃଶ୍ୟମାନ ନଥିଲା। କାରଣ ଶାସକ ଦଳ ର ଇଙ୍ଗିତ ରେ ଉଭୟ ପିସିସି ସଭାପତି ଓ ପ୍ରଭାରୀ ପରିଚାଳିତ ହୋଇ ଏ ଭଳି ପରିସ୍ଥିତି ସୃଷ୍ଟି କରିଥିଲେ। ଓଡ଼ିଶାରେ ନିର୍ବାଚନ ପ୍ରଚାରକୁ ଅବହେଳା କରି ପ୍ରଭାରୀ ଅଜୟ କୁମାର ଓଡ଼ିଶା ବାହାରେ ଘୋଡ଼ା ଚଢ଼ାରେ ବ୍ୟସ୍ତ ଥିଲେ।
ବହୁ ପ୍ରାର୍ଥୀଙ୍କ ଠାରୁ ଟିକେଟ ପାଇଁ ଟଙ୍କା ନିଆଯାଇଥିବାର ଅଭିଯୋଗ ମଧ୍ୟ ମୋ ଦୃଷ୍ଟିକୁ ଆସିଛି ବୋଲି ମାନସ କହିଛନ୍ତି। ଶାସକ ଦଳକୁ ସୁହାଇଲା ଭଳି ପ୍ରାର୍ଥୀ ଦେଲେ, ଯାହାକୁ ମୁଁ ବିରୋଧ କାଲି। ସୁତରାଂ ଓଡିଶା କଂଗ୍ରେସ କୁ ଧୂଳିସାତ କରିଥିବା ପିସିସି ସଭାପତି ଓ ପ୍ରଭାରୀ ତାଙ୍କ ନିଜ ଦୋଷ କୁ ଘୋଡାଇବା ପାଇଁ ମୋତେ ଦଳରୁ ବହିଷ୍କୃତ କରିଛନ୍ତି ବୋଲି ମାନସ କହିଛନ୍ତି।
ମୁଁ ପିସିସି ସଭାପତି ଙ୍କ ବିନା ସହଯୋଗ ରେ ସାଲେପୁର ଠାରେ ରାହୁଲ ଗାନ୍ଧୀ ଙ୍କର ନିର୍ବାଚନୀ ସଭା କରାଇଥିଲି। ଭୁବନେଶ୍ୱର ରେ ମଧ୍ୟ ଏଆଇସିସି ସଭାପତି ସମ୍ମାନନୀୟ ମଲ୍ଲିକାର୍ଜୁନ ଖର୍ଗେଙ୍କର ସଭା ମୁଁ ଆୟୋଜନ କରିବା କଥା ମଧ୍ୟ ସମସ୍ତେ ଜାଣନ୍ତି। ପିସିସି ସଭାପତି ଙ୍କର ଭାରତ ଯୋଡ଼ କାର୍ଯ୍ୟକ୍ରମ ରେ ମୋର ଭୂମିକା କଣ ଥିଲା ତାହା ମଧ୍ୟ ଓଡିଶା ର କଂଗ୍ରେସ କର୍ମୀ ଜାଣିଛନ୍ତି। ଅତଏବ ଯଦି କଂଗ୍ରେସ ପ୍ରାର୍ଥୀ , କର୍ମୀ ଓ ଦଳର ସ୍ୱାର୍ଥ ପାଇଁ ମୁହଁ ଖୋଲି ମୋତେ ବହିଷ୍କାର ହେବାକୁ ପଡେ ତେବେ ଏହି କାର୍ଯ୍ୟ କୁ ମୁଁ ବାରମ୍ବାର କରିବାକୁ ପଛେଇବି ନାହିଁ ବୋଲି ମାନସ ଚେତାବନୀ ଦେଇଛନ୍ତି।
