ନୂଆଦିଲ୍ଲୀ: ଆଇଡିୱାଇ ୨୦୨୪ର ୧୦୦ ଦିନର କାଉଣ୍ଟଡାଉନ (ଓଲଟା ଗଣନା) ର ଏହି ଯାତ୍ରାରେ ୭ ଏପ୍ରିଲ ୨୦୨୪ରେ ମହାରାଷ୍ଟ୍ରର ପୁଣେସ୍ଥିତ ୱାଡିଆ କଲେଜ ସ୍ପୋର୍ଟସ ଗ୍ରାଉଣ୍ଡରେ ଅନୁଷ୍ଠିତ ହେବାକୁ ଥିବା ୭୫ତମ ଦିନର କାଉଣ୍ଟଡାଉନରେ ୫୦୦୦ରୁ ଅଧିକ ଯୋଗପ୍ରେମୀ ଅଂଶଗ୍ରହଣ କରିବେ।
ସାମଗ୍ରିକ ସ୍ୱାସ୍ଥ୍ୟ ଓ କଲ୍ୟାଣ ଆଭିମୁଖ୍ୟ ଉପରେ ଗୁରୁତ୍ୱାରୋପ କରିବା ସହ ଯୋଗର ଶକ୍ତିକୁ ଦୃଷ୍ଟିରେ ରଖି ଏହି ମହୋତ୍ସବରେ ଗ୍ରାମ ପ୍ରଧାନ, ଅଙ୍ଗନବାଡି କର୍ମୀ ଓ ଆଶା କର୍ମୀ / ସ୍ୱୟଂ ସହାୟକ ଗୋଷ୍ଠୀ, ଆୟୁଷ ସ୍ୱାସ୍ଥ୍ୟ ଓ କଲ୍ୟାଣ କେନ୍ଦ୍ର, ଆବାସିକ କଲ୍ୟାଣ ସଂଘ (ଆରଡବ୍ଲ୍ୟୁଏ), ମହିଳା କଲ୍ୟାଣ ସଂଗଠନ, ସ୍କୁଲ ପିଲା ଏବଂ ଅନ୍ୟମାନେ ସକ୍ରିୟ ଅଂଶଗ୍ରହଣ କରିବେ। ଏହି ଉତ୍ସବରେ ବିଶିଷ୍ଟ ମାନ୍ୟଗଣ୍ୟ ବ୍ୟକ୍ତି, ଯୋଗ ଗୁରୁ/ ଶିକ୍ଷକ ଏବଂ ଯୋଗ ଓ ଆନୁଷଙ୍ଗିକ ବିଜ୍ଞାନର ବିଶେଷଜ୍ଞ ଏବଂ ଅନୁଷ୍ଠାନର ମୁଖ୍ୟମାନେ ମଧ୍ୟ ଉପସ୍ଥିତ ରହିବେ । ଯୋଗ ମହୋତ୍ସବର ମୂଳ ଉଦ୍ଦେଶ୍ୟ ହେଉଛି ସ୍ୱାସ୍ଥ୍ୟ ଏବଂ କଲ୍ୟାଣ ପାଇଁ ଯୋଗର ବ୍ୟାପକ ପ୍ରଚାର ଏବଂ ପ୍ରଚାର ପ୍ରସାର କରିବା , ଯାହା ଦ୍ୱାରା ଉଭୟ ଜାତୀୟ ଏବଂ ଅନ୍ତର୍ଜାତୀୟ ସ୍ତରରେ ଅଧିକରୁ ଅଧିକ ଲୋକ ଉପକୃତ ହୋଇ ପାରିବେ । ଆଇଡିୱାଇ ୨୦୨୪ କାର୍ଯ୍ୟକ୍ରମରେ କାଉଂଟ ଡାଉନ୍ର ୭୫ତମ ଦିବସ ମଧ୍ୟ ୭ ଏପ୍ରିଲ ୨୦୨୪ରେ ପଡ଼ୁଥିବା ବିଶ୍ୱ ସ୍ୱାସ୍ଥ୍ୟ ଦିବସ ସହିତ ମେଳ ଖାଉଛି।
ପ୍ରତିବର୍ଷ ଜୁନ୍ ୨୧ ତାରିଖକୁ ଅନ୍ତର୍ଜାତୀୟ ଯୋଗ ଦିବସ ଭାବେ ପାଳନ କରାଯାଏ । ଚଳିତ ବର୍ଷ ମଧ୍ୟ ଯୋଗର ଉପକାରିତା ବିଷୟରେ ଜନସାଧାରଣଙ୍କୁ ସଚେତନ କରିବା ଏବଂ ସାମଗ୍ରିକ ସ୍ୱାସ୍ଥ୍ୟର ଅନ୍ତର୍ନିହିତ ବାର୍ତ୍ତା ପ୍ରସାର କରିବା ପାଇଁ ମାର୍ଚ୍ଚ ୧୩ ତାରିଖରେ ୧୦୦ ଦିନିଆ କାଉଣ୍ଟଡାଉନ ଆରମ୍ଭ କରାଯାଇଥିଲା । ଓଲଟା ଗଣନା କାର୍ଯ୍ୟକ୍ରମ ଶୃଙ୍ଖଳାର ଏକ ଅଂଶ ଭାବରେ ୭୫ତମ ଦିବସର କାଉଣ୍ଟଡାଉନ୍ ଯୋଗ ମହୋତ୍ସବ ଆକାରରେ ପାଳନ କରାଯିବ । ମୋରାରଜୀ ଦେଶାଇ ଜାତୀୟ ଯୋଗ ପ୍ରତିଷ୍ଠାନ ଏବଂ ଭାରତ ସରକାରଙ୍କ ଆୟୁଷ ମନ୍ତ୍ରଣାଳୟର ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ନେଚୁରୋପାଥି (ଏନ୍ଆଇଏନ୍)ର ମିଳିତ ଆନୁକୂଲ୍ୟରେ ଏହି କାର୍ଯ୍ୟକ୍ରମ ଆୟୋଜିତ ହୋଇଛି ।
ସମସ୍ତ ଅଂଶଗ୍ରହଣକାରୀ ଏପ୍ରିଲ ୭ତାରିଖ ସକାଳ ୬ଟାରୁ ଆରମ୍ଭ ହେଉଥିବା କମନ୍ ଯୋଗ ପ୍ରୋଟୋକଲ୍ (ସିୱାଇପି)ର ଅଭ୍ୟାସରେ ସକ୍ରିୟ ଭାବେ ନିୟୋଜିତ ହେବେ । ଉତ୍ସାହ ଏବଂ ଅଂଶଗ୍ରହଣର ଏହି ଉଲ୍ଲେଖନୀୟ ପ୍ରଦର୍ଶନ ବ୍ୟକ୍ତିଗତ ଏବଂ ସାମାଜିକ ଉନ୍ନତିକୁ ପ୍ରୋତ୍ସାହିତ କରିବାରେ ଯୋଗର ବୃଦ୍ଧି ପାଉଥିବା ଗୁରୁତ୍ୱକୁ ସୂଚାଇଥାଏ । ଭାରତୀୟ ଯୋଗ ସଂଘ ମଧ୍ୟ ନିଜର ମହାରାଷ୍ଟ୍ର ରାଜ୍ୟ ଶାଖା ସହିତ ଏହି ୭୫ ତମ ଦିବସର କାଉଣ୍ଟଡାଉନ୍ କାର୍ଯ୍ୟକ୍ରମ ଆଇଡିୱାଇ -୨୦୨୪ ସମ୍ବନ୍ଧିତ ଉତ୍ସବକୁ ସମର୍ଥନ କରୁଛି ।
କମନ୍ ଯୋଗ ପ୍ରୋଟୋକଲ୍ (ସିୱାଇପି) ଏହି କାର୍ଯ୍ୟକ୍ରମର କେନ୍ଦ୍ରରେ ରହିଛି । ଯୋଗର ସମସ୍ତ ଲାଭ ପାଇବା ପାଇଁ ଏଥିରେ ଦୈନନ୍ଦିନ ଯୋଗ ଅଭ୍ୟାସ ଅନ୍ତର୍ଭୁକ୍ତ ହୋଇଥିବାରୁ ବିଶେଷଜ୍ଞଙ୍କ ଠାରୁ ମତାମତ ନେଇ ସିଓପି ଡିଜାଇନ୍ କରାଯାଇଛି । ଏହି ପ୍ରୋଟୋକଲ୍ର ଉଦ୍ଦେଶ୍ୟ ହେଉଛି ପ୍ରାଣାୟାମ, ଧ୍ୟାନ ଇତ୍ୟାଦି ଯୋଗ ଅଭ୍ୟାସକୁ ଲୋକପ୍ରିୟ କରିବା । ନମନୀୟତା, ଶକ୍ତି, ସନ୍ତୁଳନ ଏବଂ ସୌହାର୍ଦ୍ଦ୍ୟ ହାସଲ କରିବା ପାଇଁ ପ୍ରତ୍ୟେକ ଯୋଗ କାର୍ଯ୍ୟକଳାପ ଏକ ଚାବିକାଠି ଅଟେ ।
ଆୟୁଷ ମନ୍ତ୍ରଣାଳୟ ମୋରାରଜୀ ଦେଶାଇ ଜାତୀୟ ଯୋଗ ପ୍ରତିଷ୍ଠାନ ସହିତ ମିଶି ୧୩ ମାର୍ଚ୍ଚ ୨୦୨୪ ରୁ ୨୧ ଜୁନ ୨୦୨୪ ପର୍ଯ୍ୟନ୍ତ ଦେଶର ବିଭିନ୍ନ ବିଶ୍ୱବିଦ୍ୟାଳୟ / ଅନୁଷ୍ଠାନ/ ମହାବିଦ୍ୟାଳୟର ମିଳିତ ସହଯୋଗରେ ‘୧୦୦ ଦିନ, ୧୦୦ ସହର ଏବଂ ୧୦୦ ସଂଗଠନ’ ଅଭିଯାନ ଆୟୋଜନ କରୁଛି । ଏହି ଅଭିଯାନରେ କମନ୍ ଯୋଗ ପ୍ରୋଟୋକଲ, କର୍ମଶାଳା ଏବଂ ବ୍ୟାଖ୍ୟାନ ଅନ୍ତର୍ଭୁକ୍ତ , ଯାହା ଦ୍ୱାରା ଲୋକଙ୍କ ମଧ୍ୟରେ ସ୍ୱାସ୍ଥ୍ୟ ଏବଂ କଲ୍ୟାଣରେ ଉନ୍ନତି ପାଇଁ ଯୋଗ ଅଭ୍ୟାସକୁ ପ୍ରୋତ୍ସାହିତ କରାଯାଇପାରିବ ।