Categories
ଆଜିର ଖବର ଆଞ୍ଚଳିକ ରାଜ୍ୟ ଖବର

ଲୋଚାପଡ଼ାରେ ପାନୀୟଜଳ ସମସ୍ୟା ନେଇ ବିଜେପିର ରାସ୍ତାରୋକ

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: କୁକୁଡ଼ାଖଣ୍ଡି ବ୍ଲକ୍‌ର ବିଭିନ୍ନ ପଞ୍ଚାୟତରେ ପାଣି ସମସ୍ୟା ଥିଲେ ମଧ୍ୟ ପ୍ରଶାସନର ଦୂରଦୃଷ୍ଟି ଅଭାବରୁ ଲୋକେ ପାଟି ମୁନ୍ଦାଏ ପାଇଁ ଡ଼ହଳବିକଳ ହେଉଛନ୍ତି। ଲୋଚାପଡ଼ା ପଞ୍ଚାୟତାରେ ଏହି ସମସ୍ୟା ଉତ୍କଟ ରୂପ ଧାରଣ କରିଥିବାବେଳେ ବିଜେପି ପକ୍ଷରୁ ବାରମ୍ବାର ପ୍ରଶାସନ ପାଖରେ ଅଭିଯୋଗ ହୋଇ ପ୍ରଶାସନ ପକ୍ଷରୁ ପ୍ରତିଶ୍ରୁତି ମଳୁଥିଲା। କିନ୍ତୁ ପ୍ରତିଶ୍ରୁତି ପାଳନ ନହେବାରୁ ଆଜି ୩ ଘଣ୍ଟା ଧରି ବ୍ରହ୍ମପୁର-ଲୋଚାପଡ଼ା ହନୁମାନ ମନ୍ଦିର ମୁଖ୍ୟରାସ୍ତାକୁ ଟାୟାର ଜାଳି ବିଜେପି ପକ୍ଷରୁ ବିଜେପି ଜିଲ୍ଲା ପରିଷଦ ଏଲ୍‌. ମୋହନ ରାଓଙ୍କ ନେତୃତ୍ୱରେ ଅବରୋଧ କରାଯାଇଥିଲା। ରାସ୍ତା ଅବରୋଧ ଫଳରେ ଉଭୟ ଦିଗରେ ଶହଶହ ଗାଡ଼ି ମଟର ଅଟକି ରହିଥିଲା। ଏହାସହ ଏହି ରାସ୍ତାଟିର ଅବସ୍ଥା ଅତି ଶୋଚନୀୟ ହୋଇନଥିବାରୁ ପ୍ରତ୍ୟେକ ଦିନ ଦୁର୍ଘଟଣାମାନ ଘଟୁଥିବା ଦେଖିବାକୁ ମିଳୁଛି।

ସୂଚନାଯୋଗ୍ୟ ଏହି ରାସ୍ତାଦେଇ ପ୍ରତ୍ୟେକ ଦିନ ଶହଶହ ଶ୍ରମିକ, ଛାତ୍ରଛାତ୍ରୀ ଏବଂ ୧୫ ଖଣ୍ଡ ଗ୍ରାମବାସୀ ନିର୍ଭର କରନ୍ତି। ତିନିଘଣ୍ଟା ରାସ୍ତାରୋକ ପରେ ମଧ୍ୟ କୌଣସି ପ୍ରଶାସନିକ ଅଧିକାରୀଙ୍କ ଦେଖା ମିଳିନଥିଲା। ଶେଷରେ ହିଂଜିଳିକାଟୁ ଆର୍‌ଡ଼ବ୍ଲ୍ୟୁଏସ୍‌ଏସ୍‌ର ନିର୍ବାହୀ ଯନ୍ତ୍ରୀ ମନସ୍ମୀନି ମହାପାତ୍ରଙ୍କ ସହ ଅତିରିକ୍ତ ନିର୍ବାହୀ ଯନ୍ତ୍ରୀ କିଶୋର ଚନ୍ଦ୍ର ବେହେରା ପହଞ୍ଚି ଟ୍ୟାଙ୍କର ଯୋଗେ ପାଣି ଯୋଗାଇବାକୁ ପ୍ରତିଶ୍ରୁତି ଦେଇଥିଲେ। କିନ୍ତୁ ବିଜେପି ପକ୍ଷରୁ ଏହାକୁ ଖଣ୍ଡନ କରି ପ୍ରତ୍ୟେକ ଦିନ ୧୦ଟି ଟ୍ୟାଙ୍କର ଯୋଗେ ଲୋଚାପଡ଼ା ପଞ୍ଚାୟତକୁ ପାଣି ଯୋଗାଇ ଦିଆଯିବା ନେଇ ଦାବି କରିବା ସହ ଏହି ପ୍ରତିଶ୍ରୁତି ମିଳିବା ପରେ ରାସ୍ତାରୋକ ହଟିଥିଲା।

ଏହି ରାସ୍ତାରୋକ କାର୍ଯ୍ୟକ୍ରମରେ ବିଜେପି କର୍ମୀ ଓ ନେତା ସୂର୍ଯ୍ୟମଣି ପାତ୍ର, ଏସ୍‌. ଶ୍ରୀନିବାସ ରାଓ, ଶିବ ପ୍ରସାଦ ପାତ୍ର, ଚିନ୍ମୟାନନ୍ଦ ମହନ୍ତ, ସିଦ୍ଧାନ୍ତ ଗଙ୍ଗଦେବ, ଏସ୍‌. ରାଣୀ, ନିମଖଣ୍ଡି ମଣ୍ଡଳର ଯୁବ ନେତା କେ. ଲକ୍ଷ୍ମଣ ପାତ୍ର, କେ. ଚନ୍ଦ୍ର ଶେଖର ଦାସ, ପ୍ରଭାତ ଷଡ଼ଙ୍ଗୀ, କିରଣ କୁମାର ପ୍ରମୁଖ ନେତାଙ୍କ ସହ ବହୁ ଅଂଚଳବାସୀ ଭାଗ ନେଇଥିଲେ।

Categories
ଆଜିର ଖବର ଆଞ୍ଚଳିକ ରାଜ୍ୟ ଖବର

ବାଚସ୍ପତି ଅଡ଼ିଓ ଭାଇରାଲ୍ ଘଟଣା: ଏସ୍‌ପିଙ୍କୁ ଅଭିଯୋଗ କଲେ ସାମାଜିକ କର୍ମୀ

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: କିଛିଦିନ ହେବ ବାଚସ୍ପତି ଡ. ସୂର୍ଯ୍ୟନାରାୟଣ ପାତ୍ରଙ୍କ ସହ କୁକୁଡ଼ାଖଣ୍ଡି ବ୍ଲକ୍ ଅଧ୍ୟକ୍ଷ କାମାକ୍ଷା ପ୍ରସାଦ ପାତ୍ରଙ୍କ ମଧ୍ୟରେ ହୋଇଥିବା ବାର୍ତ୍ତାଳାପର ଅଡ଼ିଓ ଭାଇରାଲ ହୋଇଥିବାରୁ ଏହି ଘଟଣା ନେଇ ଗଂଜାମ ରାଜନୀତିରେ ଚର୍ଚ୍ଚା ଜୋର୍ ଧରିଛି। ଏକ ସାମ୍ବିଧାନିକ ପଦବୀରେ ଥିବା ବ୍ୟକ୍ତିଙ୍କ ବ୍ୟକ୍ତିଗତ ବାର୍ତ୍ତାଳପକୁ ଯେଉଁ ବ୍ୟକ୍ତିଙ୍କ ଫୋନ୍‌ରୁ ରେକଡ଼ିଂ ହୋଇ ଭାଇରାଲ୍ ହୋଇଛି ତା’ର ନିରପେକ୍ଷ ତଦନ୍ତ କରି ଦୋଷୀ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ କିଛି ସାମାଜିକ କର୍ମୀ ଆଜି ଏସ୍‌ପିଙ୍କୁ ଅଭିଯୋଗ ପତ୍ର ପ୍ରଦାନ କରିଛନ୍ତି।

ସେମାନେ ଅଭିଯୋଗ ପତ୍ରରେ ସିଧାସଳଖ କୁକୁଡ଼ାଖଣ୍ଡି ବ୍ଲକ୍ ଅଧ୍ୟକ୍ଷ ଦୋଷୀ ବୋଲି କହିବା ସହ ବ୍ଲକ୍ ଅଧ୍ୟକ୍ଷ ନିଜର ବ୍ୟକ୍ତିଗତ ସ୍ୱାର୍ଥକୁ ହାସଲ କରିବା ତଥା ବାଚସ୍ପତିଙ୍କୁ ବଦନାମ କରିବା ପାଇଁ ଏହି ଚକ୍ରାନ୍ତ କରିଛନ୍ତି। ପ୍ରଥମେ ବ୍ଲକ୍ ଅଧ୍ୟକ୍ଷ ମେଳିକରି କୁକୁଡ଼ାଖଣ୍ଡି ତହସିଲ୍‌ଦାରଙ୍କୁ ବଦଳି ନକଲେ ସାମୁହିକ ଇସ୍ତଫା ଦେବୁ ବୋଲି ଲିଖିତ ପତ୍ର ପ୍ରଦାନ କରିଥିଲେ। ପରବର୍ତ୍ତୀ ସମୟରେ ଇସ୍ତଫା ନିଷ୍ପତ୍ତିରୁ ଓହରି ଯାଇ ବାଚସ୍ପତି ଶ୍ରୀ ପାତ୍ରଙ୍କ କୌଣସି କାର୍ଯ୍ୟକ୍ରମକୁ ସମର୍ଥନ କରିବୁ ନାହିଁ କାରଣ ବାଚସ୍ପତି ଆମକୁ ଗୁରୁତ୍ୱ ଦେଉନାହାନ୍ତି ବୋଲି ଲିଖିତ ଅଭିଯୋଗ ବିଜେଡ଼ି ସଭାପତିଙ୍କୁ ପ୍ରେରଣ କରିବା ପାଇଁ ମଧ୍ୟ ବୈଠକ ଡ଼ାକିଥିଲେ।

ତେଣୁ ଏହିଘଟଣା ଗୁଡ଼ିକ ଦିଗପହଣ୍ଡି ନିର୍ବାଚନ ମଣ୍ଡଳୀରେ ଅନ୍ତର୍ଭୁକ୍ତ ଏବଂ ବାଚସ୍ପତି ଦିଗପହଣ୍ଡି ନିର୍ବାଚନ ମଣ୍ଡଲୀର ବିଧାୟକ ହୋଇଥିବାରୁ ଏହାକୁ ସମାଧାନ କରିବା ପାଇଁ ବ୍ଲକ୍ ଅଧ୍ୟକ୍ଷଙ୍କୁ ବୁଝାଉଥିବାବେଳେ ବ୍ଲକ୍ ଅଧ୍ୟକ୍ଷ ନିଜର ସ୍ୱାର୍ଥ ପାଇଁ ଏହାକୁ ରେକଡ଼ିଂ କରି ଭାଇରାଲ୍ କରିଥିବାରୁ ତାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ସେମାନେ ଦାବି କରିଛନ୍ତି।

Categories
ଆଜିର ଖବର ଆଞ୍ଚଳିକ ରାଜ୍ୟ ଖବର

ପୁଣି ବିବାହ ବେଦୀରୁ ନାବାଳିକାକୁ ଉଦ୍ଧାର କଲେ ତହସିଲ୍‌ଦାର

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ପ୍ରଶାସନ ପକ୍ଷରୁ ବାରମ୍ବାର ତାଗିଦ୍ ସଚେତନତା ସତ୍ତ୍ୱେ କିଛି ଲୋକ ଅବୁଝା ହିଁ ରହୁଛନ୍ତି। ଝିଅକୁ ୧୮ ବର୍ଷ ପୂର୍ବରୁ ବିବାହ କରିବା ଏକ ଦଣ୍ଡନୀୟ ଅପରାଧୀ ହେଲେ ମଧ୍ୟ ଆଜିକା କମ୍ପ୍ୟୁଟର ଯୁଗରେ ମଧ୍ୟ ଝିଅକୁ ବୋଝ ଭାବି ଜଲ୍‌ଦି ବାହାଘର କରିବା ଦେଖିବାକୁ ମିଳୁଛି।

କୁକୁଡ଼ାଖଣ୍ଡି ବ୍ଲକ୍‌ର ଏଭଳି ତିନୋଟି ନାବାଳିକା ବିବାହକୁ ତହସିଲ୍‌ଦାର ଭଣ୍ଡୁର କରିବା ସହ ନାବାଳିକାକୁ ଉଦ୍ଧାର କରିଛନ୍ତି। ଆଜି ମଧ୍ୟ ଗୋଟିଏ ସ୍ଥାନରେ ନାବାଳିକା ବିବାହ ହେଉଥିବା ଖବର ପାଇ ତହସିଲ୍‌ଦାର ଡ. ଇପ୍‌ସିିତା ପ୍ରିୟଦର୍ଶିନୀ ମିଶ୍ର ଉଦ୍ଧାର କରିବାକୁ ଯାଇ ନାକେଦମ ହୋଇଥିବା ଦେଖିବାକୁ ମିଳିଥିଲା। ସପ୍ତାହ ମଧ୍ୟରେ ଏହି ବ୍ଲକ୍‌ରୁ ବିବାହ ବେଦୀରୁ ତିନିଜଣ ନାବାଳିକା ଉଦ୍ଧାର ହେଲେଣି।

ଆଜି କୁକୁଡ଼ାଖଣ୍ଡି ବ୍ଳକ୍ ରତ୍ନପୁର ଗ୍ରାମର ଜଣେ ୧୫ ବର୍ଷୀୟ ନାବାଳିକାର ବାହାଘର ଜଣେ ୩୫ ବର୍ଷୀୟ ବ୍ୟକ୍ତିଙ୍କ ସହ ହିଂଜିଳିକାଟୁ ଥାନା ଅନ୍ତର୍ଗତ କୁରେଇଶୁଣି ମନ୍ଦିରରେ କରିବା ପାଇଁ ପରିବାର ବର୍ଗ ଯୋଜନା ଚାଲିଥିଲା। ଏନେଇ ଘରେ ଭୋଜିଭାତ, ପରିବାର ବର୍ଗ ଉପସ୍ଥିତ ହୋଇସାରିଥିଲେ। କୌଣସି ସୂତ୍ରରୁ କୁକୁଡ଼ାଖଣ୍ଡି ତହସିଲ୍‌ଦାର ଡ. ମିଶ୍ର ପହଞ୍ଚିଥିଲେ। କିନ୍ତୁ ନାବାଳିକାକୁ ଉଦ୍ଧାର କରିବାକୁ ତାଙ୍କୁ ବହୁ କଷ୍ଟ ସ୍ୱୀକାର କରିବାକୁ ପଡ଼ିଥିଲା।

ପ୍ରଥମେ ନାବାଳିକାର ପରିବାର ବର୍ଗ ପ୍ରଶାସନକୁ ଚକମା ଦେଖାଇ ନାବାଳିକାକୁ ଘରୁ ମନ୍ଦିରକୁ ନେଇଯାଇଥିଲେ। ଅଧିକାରୀ ଓ ପୋଲିସ ପହଞ୍ଚିବା ପରେ ବାହାବେଦୀରୁ ନାବାଳିକା ସମେତ ବରକୁ ରତ୍ନପୁର ନେଇ ଆସିଥିଲେ। ଏଠାରେ କୌଣସି ବାହାରଘର ହେଉନାହିଁ ବୋଲି ମଧ୍ୟ ଦୃଢ଼ତାର ସହ କହି ତହସିଲ୍‌ଦାରଙ୍କୁ ମଧ୍ୟ ଆଇନର ପାଠ ପଢ଼ାଇଥିଲେ। କିନ୍ତୁ ଦବଙ୍ଗ ତହସିଲ୍‌ଦାର କ’ଣ ସେମାନଙ୍କୁ ଛାଡ଼ିବେ। ଶେଷରେ ତିନିଘଣ୍ଟା ପରିଶ୍ରମ କରିଲା ପରେ ନାବାଳିକାକୁ ଉଦ୍ଧାର କରି ନିଜ ଗାଡ଼ିରେ ବସାଇ ତହସିଲ୍‌ଦାର ଚାଇଲ୍ଡ ଲାଇନ୍‌କୁ ହସ୍ତାନ୍ତର କରିଥିଲେ।

ପୂର୍ବରୁ ମଧ୍ୟ ହୁଗୁଳାପଟା ଗ୍ରାମରେ ଥିବା ଠାକୁରାଣୀ ମନ୍ଦିର ସାହିରେ ଜଣେ ନାବାଳିକାକୁ ପ୍ରଶାସନ ସ୍ଥାନୀୟ ଜନପ୍ରତିନଧିଙ୍କ ସହାୟତାରେ ଉଦ୍ଧାର କରାଯାଇଥିଲା।

ସୂଚନାଯୋଗ୍ୟ ଆଜିର ଘଟଣାକୁ ମିଶାଇ କୁକୁଡ଼ାଖଣ୍ଡି ସମନ୍ୱିତ ଶିଶୁ ବିକାଶ ଯୋଜନା ଅଧିକାରିଣୀ ଅତିରିକ୍ତ ଦାୟିତ୍ୱ ବହନ କରୁôଥବା କୁକୁଡ଼ାଖଣ୍ଡି ତହସିଲ୍‌ଦାର ଡ. ମିଶ୍ର ବ୍ଲକ୍‌ରୁ ସପ୍ତାହ ମଧ୍ୟରେ ତିନିଜଣ ନାବାଳିକାକୁ ଉଦ୍ଧାର କରିଲେଣି। ତେବେ ଆଜି ମଧ୍ୟ ଲୋକଙ୍କ ମଧ୍ୟରେ ସଚେତନତାର ଅଭାବ ରହିଛି। ଫଳରେ ଏଭଳି ଘଟଣା ବାରମ୍ବାର ଦେଖିବାକୁ ମିଳୁଛି।

କୁକୁଡ଼ାଖଣ୍ଡି ବ୍ଲକ୍‌ଟି ବ୍ରହ୍ମପୁର ସହର ସଂଲଗ୍ନ ହୋଇଥିବା ସହ ଏଠାର ଲୋକେ ଉଚ୍ଚଶିକ୍ଷିତ। କିନ୍ତୁ ଏଭଳି ଘଟଣାଗୁଡ଼ିକୁ ଦେଖିବା ପରେ ନାବାଳିକା ବିବାହ ପ୍ରଥା ରୋକିବା ନେଇ ସଚେତନତା ଉପରେ ପ୍ରଶ୍ନବାଚୀ ଲାଗିଛି।

Categories
ଆଜିର ଖବର ଆଞ୍ଚଳିକ ରାଜ୍ୟ ଖବର

ବିପୁଳ ବେଆଇନ ଦେଶୀ ମଦ ଜବତ

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: କୁକୁଡ଼ାଖଣ୍ଡି ବ୍ଲକ୍ ଅନ୍ତର୍ଗତ ବିଭିନ୍ନ ଗ୍ରାମରେ ବେଆଇନ ମଦ ବିକ୍ରୀ ତଥା ପ୍ରସ୍ତୁତ ହେଉଥିବାବେଳେ ତହସିଲ୍‌ଦାର ଡ. ଇପ୍‌ସିତା ପ୍ରିୟଦର୍ଶିନୀ ମିଶ୍ର ଏହାକୁ ରୋକିବା ପାଇଁ ଠୋସ୍ ପଦକ୍ଷେପ ନେବାରେ ଲାଗିଛନ୍ତି। ଏହି ଯୋଗାଣ ଚେନ୍‌କୁ ଭାଙ୍ଗିବା ପାଇଁ ବିଭିନ୍ନ ମଦ ତିଆରି କାରଖାନା ଲୁଚା ଛପା ବେଆଇନ ମଦ ନେଉଥିବା ଅଂଚଳରେ ଚଢ଼ାଉ ଜାରି ରହିଛି।

ବର୍ତ୍ତମାନ ସୁଦ୍ଧା ୮୦ ହଜାର ଲିଟର ପୋଚକୁ ନଷ୍ଟ କରାଯାଇ ମଦ ବେପାରୀଙ୍କ ମେରୁଦଣ୍ଡ ଭାଙ୍ଗିବା ସହ ଯୋଗାଣ ଚେନ୍‌ଙ୍କୁ ଭଙ୍ଗାଯାଇଛି। ଆଜି ସକାଳ ଏହି ବ୍ଲକ୍‌ର ବାଉଁସିଆପଲ୍ଲୀ ଅଂଚଳରେ ବେଆଇନ ମଦ ପ୍ରସ୍ତୁତ ହେଉଥିବା ନେଇ କୁକୁଡ଼ାଖଣ୍ଡି ତହସିଲ୍‌ଦାରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଅବକାରୀ ଅଧିକାରୀ, ଦିଗପହଣ୍ଡି ଥାନା କର୍ମଚାରୀ ଏବଂ ଏପିଆର୍ ଫୋସ୍ ମିଳିତ ଭାବେ ଏକ ବେଆଇନ ମଦ ତିଆରି କାରଖାନା ଉପରେ ଚଢ଼ାଉ କରିଥିଲେ।

ଚଢ଼ାଉରେ ୬ହଜାର ଲିଟର ପୋଚକୁ ନଷ୍ଟ କରାଯିବା ସହ ୧୩୦ ଲିଟର ଦେଶୀ ମଦ, ପ୍ରସ୍ତୁତି ପାଇଁ ସରଞ୍ଜାମ, ହାଣ୍ଡିମାଠିଆ ଜବତ ହୋଇଛି। ମଦ ବେପାରୀଙ୍କ ପାଇଁ ଏହା ଶକ୍ତ ଧକ୍କା ହୋଇଥିବାବେଳେ ଆଗକୁ ମଧ୍ୟ ଏହିଭଳି ଚଢ଼ାଉ ଜାରି ରହିବ ବୋଲି ତହସିଲ୍‌ଦାର ତଥା ଏକଜ୍ୟୁଟିଭ୍ ମାଜିଷ୍ଟ୍ରେଟ୍ ଶ୍ରୀମତୀ ମିଶ୍ର କହିଛନ୍ତି।

Categories
ଆଞ୍ଚଳିକ

ଔଷଧ ବିକଳରେ ତାଟିଆ କାମୁଡ଼ିବା ନ୍ୟାୟ..! ଦୁର୍ନୀତିକୁ ଲୁଚାଇବାକୁ ଯାଇ ତହସିଲ୍‌ଦାରଙ୍କୁ ଟାର୍ଗେଟ୍‌

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଅନେକ ଦିନ ବ୍ୟବଧାନରେ ଆଜି କୁକୁଡ଼ାଖଣ୍ଡି ବ୍ଲକ୍ ପରିସର ମଧ୍ୟରେ ସମିତି ବୈଠକ ଅନୁଷ୍ଠିତ ହୋଇଯାଇଛି। ବ୍ଲକ୍ ଅଧ୍ୟକ୍ଷ କାମାକ୍ଷା ପ୍ରସାଦ ପାତ୍ରଙ୍କ ତତ୍ତ୍ୱାବଧାନରେ ଏହି ବୈଠକ ଅନୁଷ୍ଠିତ ହୋଇଛି। କରୋନା ମହାମାରୀଠାରୁ କୌଣସି ପ୍ରକାର ବୈଠକ ହୋଇନଥିବାବେଳେ ବିଭିନ୍ନ ଉନ୍ନୟନମୂଳକ କାର୍ଯ୍ୟ ଉକ୍ତ ବ୍ଲକ୍‌ରେ ଅତି ନିମ୍ନମାନର ଏବଂ ବାଟମାରଣା ହୋଇଥିବାକୁ ନେଇ ବହୁ ଦୁର୍ନୀତି ପଦାକୁ ଆସିଛ। ଏହି ପରିପ୍ରେକ୍ଷୀରେ ବିଭିନ୍ନ ଗଣମାଧ୍ୟମରେ ମଧ୍ୟ କୁକୁଡ଼ାଖଣ୍ଡି ବ୍ଲକ୍‌ର ଦୁର୍ନିତର ଗନ୍ତାଘରକୁ ନେଇ ଉପସ୍ଥାପନ କରାଯାଇଥିଲା। କିନ୍ତୁ ଆଜିର ଏହି ସମିତି ବୈଠକରେ କୌଣସି ଉନ୍ନୟନମୂଳକ କାର୍ଯ୍ୟ କିମ୍ବା ଏହାର ଦୁର୍ନୀତି ଏବଂ ବାଟମାରଣାକୁ ନେଇ କୌଣସି ଆଲୋଚନା ହୋଇନଥିବାବେଳେ କିଛି ସରପଞ୍ଚ ସ୍ଥାନୀୟ ତହସିଲ୍‌ଦାରଙ୍କ କାର୍ଯ୍ୟକଳାପକୁ ନେଇ ପ୍ରଶ୍ନ ଉଠାଇଥିଲେ। ଯାହାକି ଏହା ଏକ ଶସ୍ତା ରାଜନୀତି କହିଲେ କିଛି ଭୁଲ୍ ହେବ ନାହିଁ।

ଏଠାରେ ଆଉ ଗୋଟିଏ କଥା ଦେଖିବାକୁ ମିଳିଲା ଯେ, ଅନେକ ଦିନ ବ୍ୟବଧାନରେ ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ ଉନ୍ନୟନ କାର୍ଯ୍ୟର ସମୀକ୍ଷା କରିବା ପାଇଁ ସମିତି ବୈଠକରେ ଯୋଗ ଦେଇଥିଲେ। ଏଠାରେ ସୂଚନାଥାଉକି କୁକୁଡ଼ାଖଣ୍ଡି ବ୍ଲକ୍ ମୁଖ୍ୟତଃ ମାନ୍ୟବର ବାଚସ୍ପତି ସୂର୍ଯ୍ୟ ପାତ୍ରଙ୍କ ଗଡ଼ କହିଲେ ଭୁଲ୍ ହେବ ନାହିଁ। କୁକୁଡ଼ାଖଣ୍ଡି ବ୍ଲକ୍‌ର କିଛି ଅଂଚଳ ଗୋପାଳପୁର ନିର୍ବାଚନ ମଣ୍ଡଳୀ ଅନ୍ତର୍ଭୁକ୍ତ। ଏହି ପରିପ୍ରେକ୍ଷୀରେ ଗୋପାଳପୁର ବିଧାୟକ ସମିତି ବୈଠକକୁ ଯାଇ ବିଭିନ୍ନ କାର୍ଯ୍ୟକୁ ନେଇ ସମୀକ୍ଷା କରିବା ଏହା ଏକ ଅଡ଼ୁଆ ସୂତା କହିଲେ ଚଳିବ ବୋଲି କୁକୁଡ଼ାଖଣ୍ଡି ବ୍ଲକ୍‌ର କିଛି ବୁଦ୍ଧିଜୀବୀ ଏବଂ କିଛି ରାଜନେତା ମତ ରଖିଛନ୍ତି। ଆଜିର ଏହି ବୈଠକରେ ଗୋପାଳପୁର ବିଧାୟକଙ୍କ ସହ କୁକୁଡ଼ାଖଣ୍ଡି ବିଡ଼ିଓ ଗଦାଧର ପାତ୍ର, ତହସିଲ୍‌ଦାର ଇପ୍‌ସିତା ମିଶ୍ର, ଏବିଡ଼ିଓ ବିଜୟ କୁମାର ପ୍ରଧାନ, ଯୋଗାଣ ଅଧିକାରୀ ଜି. ପ୍ରସାଦ କୁମାର ରାଓ, ଜିପିଓ କାହ୍ନୁଚରଣ ବେହେରା ଏବଂ କୁକୁଡ଼ାଖଣ୍ଡି ବ୍ଲକ୍‌ର ବିଭିନ୍ନ ବିଭାଗର ଅଫିସରମାନେ ଯୋଗ ଦେଇଥିଲେ। ଏବଂ କିଛି ହାତଗଣତି ସରପଞ୍ଚ, ସମିତିସଭ୍ୟମାନେ ଦେଖିବାକୁ ମିଳିଥିଲା।

ଏଠାରେ ସୂଚନାଥାଉକି କୁକୁଡ଼ାଖଣ୍ଡି ବ୍ଲକ୍ ଦୁର୍ନୀତିର ପିଛା ଛାଡ଼ୁନାହିଁ। କୁକୁଡ଼ାଖଣ୍ଡି ବ୍ଲକ୍ ଅଧିନରେ ଥିବା ପ୍ରତ୍ୟେକ ପଞ୍ଚାୟତ ବର୍ତ୍ତମାନ ଦୁର୍ନୀତିରେ ଉବୁଟୁବୁ। ଏହି କ୍ଷେତ୍ରରେ ମଧ୍ୟ ବିଜେଡ଼ିର ଗୋଷ୍ଠୀ କନ୍ଦଳ ମଧ୍ୟ ସ୍ପଷ୍ଟ ହୋଇଥିବା ବାରି ହୋଇ ପଡ଼ୁଥିଲା। ଏହି ବୈଠକରେ କୌଣସି ପ୍ରକାର ଉନ୍ନୟନମୂଳକ କାର୍ଯ୍ୟ ଏବଂ ଗଣମାଧ୍ୟମରେ ପ୍ରକାଶିତ ହୋଇଥିବା ବିଭିନ୍ନ ଦୁର୍ନୀତିକୁ ନେଇ କୌଣସି ଆଲୋଚନା ହୋଇନଥିବା ବେଳେ ମୁଖ୍ୟତଃ କୁକୁଡ଼ାଖଣ୍ଡି ତହସିଲ୍‌ଦାରଙ୍କ କାର୍ଯ୍ୟକଳାପକୁ ନେଇ ସ୍ୱର ଉତ୍ତୋଳନ କରିବା କେତେଦୂର ଯଥାର୍ଥ ତଥା ଦୁର୍ଭାଗ୍ୟଜନକ ଅଟେ।

ସୂଚନାଥାଉକି କୁକୁଡ଼ାଖଣ୍ଡି ତହସିଲ୍‌ଦାର ଜଣେ କର୍ତ୍ତବ୍ୟନିଷ୍ଠା ଅଧିକାରିଣୀ ରୂପେ ପରିଚିତ। ସେ ପୂର୍ବରୁ ପୁରୁଷୋତ୍ତମପୁର ତହସିଲ୍‌ଦାର ରୂପେ କାର୍ଯ୍ୟରତ ଥିବାବେଳେ ତାଙ୍କର କାର୍ଯ୍ୟକଳାପକୁ ଏବଂ ପାରଦର୍ଶିତାକୁ ନେଇ ବିଭିନ୍ନ ଗଣମାଧ୍ୟମରେ ଆଲୋଚନା ହୋଇଥିଲା। ସେ କିଛି ଦିନ ବ୍ରହ୍ମପୁର ମହାନଗର ନିଗମରେ ମଧ୍ୟ କିଛି ଦିନ କାର୍ଯ୍ୟ କରିଥିଲେ। ବର୍ତ୍ତମାନ ସେ କୁକୁଡ଼ାଖଣ୍ଡି ତହସିଲ୍‌ଦାର ହେବା ପରେ ମୁଖ୍ୟତଃ ମାଫିଆ ଏବଂ ଗୁଟ୍‌ଖା, ମଦ, ବାଲି, ଇଟା, ପଥର ବ୍ୟବସାୟୀମାନଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଛି। ତଳେ ଦିନେ ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ତତ୍‌କାଳୀନ ସବ୍ କଲେକ୍ଟର ଏବଂ କୁକୁଡ଼ାଖଣ୍ଡି ତହସିଲ୍‌ଦାରଙ୍କ ତତ୍ତ୍ୱାବଧାନରେ ବିିଭିନ୍ନ ନକଲି ମଦଭାଟି, କୋଟିଏ ଟଙ୍କାର ଗୁଟ୍‌ଖା କାରଖାନା ଚଢ଼ାଉ ହୋଇଥିବାକୁ ନେଇ ଜିଲ୍ଲାରେ ହଇଚଇ ସୃଷ୍ଟି ହୋଇଥିଲା। ଯାହାକି ତାଙ୍କର କାର୍ଯ୍ୟକଳାପକୁ ନେଇ ସମଗ୍ର ଜିଲ୍ଲାବାସୀ ପ୍ରଶଂସା କରିଥିଲେ।

ଯାହାଫଳରେ ମାଫିଆମାନେ କୌଣସି ବାଟନପାଇ ତାଙ୍କ ବିରୋଧରେ ଚକ୍ରାନ୍ତ କରିବା ଆରମ୍ଭ କରିଥିଲେ। ଯାହାକି ଆଜି ତାହା ହାଟରେ ଯାଇ ବାଟରେ ପଡ଼ିଲା। କାରଣ ମୁଖ୍ୟତଃ ଆଜିର ଏହି ସମିତି ବୈଠକରେ କୌଣସି ବିଷୟରେ ଆଲୋଚନା ହେବା ତ ଦୂରର କଥା ଆକ୍ରୋଶ ଭାବରେ ତହସିଲ୍‌ଦାରଙ୍କ କାର୍ଯ୍ୟକଳାପକୁ ନେଇ ଅଙ୍ଗୁଳି ନିକ୍ଷେପ କରାଯାଇଥିଲା। ଯାହାକୁ ବୁଦ୍ଧିଜୀବୀମାନେ ନିନ୍ଦା କରିଛନ୍ତି। ତହସିଲ୍‌ଦାରଙ୍କୁ ପ୍ରଶ୍ନ କରାଯାଇଥିଲା ଯେ, ଏମ୍‌ଜିଏନ୍‌ଆର୍‌ଜିଏସ୍‌, ଇନ୍ଦିରାବାସ ଯୋଜନା, ମୋ କୁଡ଼ିଆ, ଅଙ୍ଗନାୱାଡ଼ି କାର୍ଯ୍ୟ ଉପରେ ହେଉଥିବା ବାଲି ପଥର ଇଟା ଗାଡ଼ିକୁ ତହସିଲ୍‌ଦାର ସିଜ୍ କରି ଫାଇନ୍ ପକାଉଥିବାକୁ ନେଇ ହୋ ହାଲ୍ଲା କରାଯାଇଥିଲା।

କିନ୍ତୁ ଇପ୍‌ସିତା ମିଶ୍ର ଏହାର ଜବାବ ଦେଇ କହିଥିଲେ ଯେ, କୌଣସି ଗରିବ ଲୋକର ଏବଂ କୌଣସି ଉନ୍ନୟନ ମୂଳକ କାର୍ଯ୍ୟରେ ବ୍ୟବହୃତ ହେଉଥିବା ଗାଡ଼ିକୁ ସିଜ୍ କରାଯାଇନାହିଁ। ଯଦି ଆପଣମାନଙ୍କ ପାଖରେ କୌଣସି ତଥ୍ୟ ଅଛି ତେବେ ପ୍ରଦାନ କରନ୍ତୁ। ଯାହାଫଳରେ ସମସ୍ତେ ନୀରବ ହୋଇଯାଇଥିଲେ। ମୁଖ୍ୟତଃ ସେ ଯେଉଁମାନେ ଚୋରାଚାଲାଣ ଏବଂ ମାଫିଆମାନଙ୍କର କାର୍ଯ୍ୟକଳାପକୁ ଉପରେ ତୀକ୍ଷ୍ମ ଦୃଷ୍ଟି ରଖି କାର୍ଯ୍ୟାନୁଷ୍ଠାନ ଗ୍ରହଣ କରୁଛି ବୋଲି ଉକ୍ତ ବୈଠକରେ ସୂଚାଇଥିଲେ। କିନ୍ତୁ ଏହାକୁ କୌଣସି ମଂଚାସୀନ ବ୍ୟକ୍ତିବିଶେଷ ଗୁରୁତର ଭାବେ ନେଇନଥିଲେ। ସେମାନେ ଏକ ଜିଦ୍‌ରେ ଅଟଳ ତହସିଲ୍‌ଦାରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ। ଯାହାକି ଏହା ଏକ ହୀନ ଚକ୍ରାନ୍ତ ଏବଂ ଶସ୍ତା ରାଜନୀତି ବୋଲି ଅଂଚଳରେ ଚର୍ଚ୍ଚା ଜୋର୍ ଧରିଛି।

ମୁଖ୍ୟତଃ ଏହି ପରିପ୍ରେକ୍ଷୀରେ ଖୋଦ୍ ସୂର୍ଯ୍ୟ ପାତ୍ର କୌଣସି ମତ ରଖିନାହାନ୍ତି କିମ୍ବା ଏହି ସଂକ୍ରାନ୍ତରେ ଅନ୍ୟ ଗୋଷ୍ଠୀ ଏହାକୁ ତୀବ୍ର ନିନ୍ଦା କରିଛନ୍ତି ଏବଂ ତହସିଲ୍‌ଦାରଙ୍କ କାର୍ଯ୍ୟକଳାପକୁ ନେଇ ପ୍ରଶଂସା କରିଛନ୍ତି। ଏଠାରେ ସୂଚନାଥାଉକି ବାରମ୍ବାର ଗଣମାଧ୍ୟମରେ ବିିଭିନ୍ନ ଦୁର୍ନୀତିକୁ ନେଇ ଖବର ପ୍ରକାଶ ପାଉଥିଲେ ସୁଦ୍ଧା ଏଭଳିକି କିଛି କାର୍ଯ୍ୟକୁ ନେଇ ବ୍ରହ୍ମପୁର ଭିଜିଲାନସ ଅଫିସରେ କିଛି ବ୍ୟକ୍ତି ଦ୍ୱାରସ୍ଥ ହୋଇଛନ୍ତି।

ଏହି କ୍ଷେତ୍ରରେ ସ୍ଥାନୀୟ ବିଡ଼ିଓ ଗଦାଧର ପାତ୍ର ଏବଂ ବ୍ଲକ୍ ଚେୟାରମ୍ୟାନ କାମାକ୍ଷା ପ୍ରସାଦ ପାତ୍ର ଉକ୍ତ ଦୁର୍ନୀତିକୁ ନେଇ କୌଣସି ମୁହଁ ନ ଖୋଲିବାକୁ ନେଇ ସଂଦେହ ଦୃଢ଼ୀଭୂତ ହୋଇଛି। ଏଥିପାଇଁ କୁକୁଡ଼ାଖଣ୍ଡି ବ୍ଲକ୍‌ର ବିଭିନ୍ନ କାର୍ଯ୍ୟକଳାପକୁ ନେଇ ଜିଲ୍ଲାପାଳ, ପିଡ଼ି ଡ଼ିଆର୍‌ଡ଼ିଏ ପ୍ରତ୍ୟେକ ଦୃଷ୍ଟି ଦେବାକୁ ଅଂଚଳରେ ଦାବି ହୋଇଛି ଏବଂ ଉକ୍ତ ଉନ୍ନୟନମୂଳକ କାର୍ଯ୍ୟକୁ ନେଇ ଭିଜିଲାନସ ତଦନ୍ତ ଯଦି କରାଯାଏ ତେବେ ବହୁତ ତଥ୍ୟ ପଦାକୁ ଆସିବ ବୋଲି କୁକୁଡ଼ାଖଣ୍ଡି ବ୍ଳକ୍‌ର ବହୁ ବୁଦ୍ଧିଜୀବୀ ମତ ରଖିଛନ୍ତି।

Categories
ଅପରାଧ ଆଜିର ଖବର ରାଜ୍ୟ ଖବର

୩ ଲକ୍ଷ କାମ ପାଇଁ ୩୦ ହଜାର ପିସି ଘଟଣା: ରଫାଦଫା ପାଇଁ ଚାଲିଛି ଉଦ୍ୟମ

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: କୁକୁଡ଼ାଖଣ୍ଡି ବ୍ଲକ୍‌ରେ ଗତଦୁଇଦିନ ତଳେ ଗୋଟିଏ ୩ ଲକ୍ଷ ଟଙ୍କାର କାମ ପାଇଁ ୩୦ ହଜାର ପିସି କାରବାର ନେଇ ଖବର ପ୍ରସାରଣ ପରେ ଘଟଣାକୁ ରଫାଦଫା କରିବା ପାଇଁ ଉଦ୍ୟମ ଚାଲୁଥବା ନେଇ ଅଭିଯୋଗ ହୋଇଛି। ପିସି ମାଗିଥିବା କନିଷ୍ଠ ଯନ୍ତ୍ରୀକୁ ବଂଚାଇବା ପାଇଁ ବ୍ଲକ୍‌ର ସମସ୍ତେ ଚେୟାରମ୍ୟାନ, ସରପଞ୍ଚ, ସମିତିସଭ୍ୟ ଏବଂ ପଦସ୍ଥ ଅଧିକାରୀମାନେ ଚେଷ୍ଟା ଚଳାଇଛନ୍ତି।

ସୂଚନାଯୋଗ୍ୟ ପିସି ନେଇ ଅଭିଯୋଗ କରିଥିବା ଟି. ଫକୀର ପାତ୍ରକୁ ଘଟଣା ପ୍ରସାର ହେବା ପରେ ବ୍ଲକ୍ ତରଫରୁ ଚେୟାରମ୍ୟାନଙ୍କ କାର୍ଯ୍ୟାଳୟକୁ ଡ଼କାଇଥିଲେ। ସେଠାରେ ସଭାପତି, ସରପଞ୍ଚ, ସମିତିସଭ୍ୟ, ବିଡ଼ିଓ ଏହି ଘଟଣାକୁ ରଫାଦଫା କରିବାକୁ ଚେଷ୍ଟା କରି ଟି. ଫକୀର ପାତ୍ରକୁ ପ୍ରଥମେ ଲୋଭ ଦେଖାଇ ଏବଂ ନ ମାନିବାରୁ ଚାପ ପକାଇ କିଛି ଲେଖିବାକୁ ଦେଇଥିଲେ। ସମସ୍ତେ ଚାପ ପକାଇବାରୁ ଟି. ଫକୀର ପାତ୍ର ଭୟଭୀତ ହୋଇ ସେମାନେ କହିବା ପ୍ରକାରେ ଅଧାଲେଖି ଉକ୍ତ ସ୍ଥାନରୁ ଦୌଡ଼ି ପଳାଇ ଆସିଥିଲେ। ଏନେଇ ଜିଲ୍ଲା ପରିଷଦ ସଦସ୍ୟ ଏଲ୍‌.ମୋହନ ରାଓଙ୍କୁ ଜଣାଇବା ସହ ଏଭଳି ହୀନ କାର୍ଯ୍ୟ ତଥା ଭୟଭୀତ କରିବା ଭଳି ଘଟଣା ଅଭିଯୋଗ କରି ଏକ ଭିଡ଼ିଓ ଜାରି କରିଥିଲେ। ଏଭଳି ହୀନ ଉଦ୍ୟମକୁ ସମସ୍ତେ ଭର୍ସନା କରିବା ସହ ଘଟଣାର ଭିଜିଲାନସ ତଦନ୍ତ ଦାବି ଉଠିଲାଣି। ସୂଚନାଯୋଗ୍ୟ ୧୦ ନମ୍ବର ଜିଲ୍ଲା ପରିଷଦ ସଦସ୍ୟ ଏଲ୍‌.ମୋହନ ରାଓ ଅଭିଯୋଗ କରିଥିଲେ ଯେ, ନିଜ ଜିଲ୍ଲା ପରିଷଦ ପାଣ୍ଠିରୁ ଗୁରୁଣ୍ଠି ଗ୍ରାମର ଦଣ୍ଡପାଟଣା ସାହିରେ ଫେବାର ରାସ୍ତା ନିର୍ମାଣ ପାଇଁ ୩ ଲକ୍ଷ ଟଙ୍କା ପ୍ରଦାନ କରିଥିଲେ।

କନିଷ୍ଠ ଯନ୍ତ୍ରୀଙ୍କ ନାମରେ କାର୍ଯ୍ୟାଦେଶ ଥିବାବେଳେ ଉକ୍ତ ଗ୍ରାମର ଟି. ଫକୀର ପାତ୍ର କାର୍ଯ୍ୟ କରି କାର୍ଯ୍ୟଶେଷ ହେବା ପରେ ବିଲ୍ ହୋଇଥିବା ଅର୍ଥରାଶି ମାଗିବାକୁ ଗଲା ପରେ ସିକୁରିଟି ୧୮ ହଜାର ଟଙ୍କା ଏବଂ କମିଶନର ୩୦ ହଜାର ଟଙ୍କା କନିଷ୍ଠ ଯନ୍ତ୍ରୀ ମହୋଦୟ କାଟିଦେଇଥିଲେ। ଏହି ଟି. ଫକୀର ପାତ୍ର ଜିଲ୍ଲା ପରିଷଦ ଶ୍ରୀ ରାଓଙ୍କୁ ଜଣାଇବା ପରେ ଘଟଣାଟି ଲୋକଲୋଚନକୁ ଆସିଥିଲା। ଘଟଣାଟି ଚର୍ଚ୍ଚାହେବା ପରେ ବର୍ତ୍ତମାନ ଏହାକୁ ରଫାଦଫା କରିବା ପାଇଁ ଚେଷ୍ଟା ଜୋର୍‌ସୋର୍‌ରେ ଚାଲିଛି। ତେଣୁ ଯଥାଶୀଘ୍ର ଘଟଣାଟିର ଭିଜିଲାନସ ତଦନ୍ତ କରାଯାଉ ବୋଲି ଦାବି ହୋଇଛି।

Categories
ଆଜିର ଖବର ଆଞ୍ଚଳିକ ରାଜ୍ୟ ଖବର

ଦୁର୍ନୀତିରେ ଉବୁଟୁବୁ କୁକୁଡ଼ାଖଣ୍ଡି ବ୍ଲକ୍‌ ୩ ଲକ୍ଷର କାର୍ଯ୍ୟ ପାଇଁ ୩୦ ହଜାର ପିସି

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ରାଜ୍ୟ ସରକାର ପିସି କାରବାରକୁ ବନ୍ଦ କରିବା ପାଇଁ ବିଭିନ୍ନ ପ୍ରକାର ପଦକ୍ଷେପ ନେଇଥିବାବେଳେ ଗଂଜାମ ଜିଲ୍ଲାରେ ଏହା ବନ୍ଦ ହେବାର ନାମ ହିଁ ନେଉନାହିଁ। ପ୍ରତ୍ୟେକ ଉନ୍ନତିମୂଳକ କାର୍ଯ୍ୟ ପାଇଁ ପିସି ନଦେଲେ ସଂପୃକ୍ତ ଯନ୍ତ୍ରୀମାନେ ବିଲ୍ କରୁନଥିବା ନେଇ ଖବର ସବୁବେଳେ ଶୁଣିବାକୁ ମିଳୁଛି। ସବୁସ୍ଥାନରେ ୧୦ ପ୍ରତିଶତରୁ ୧୫ ପ୍ରତିଶତ ପିସି କାରବାର ହେଉଥିବା ଅଭିଯୋଗ ହେଉଛି। ମୁଖ୍ୟମନ୍ତ୍ରୀଙ୍କ ୫-ଟିରେ ଏହି ପିସି କାରବାରକୁ ସଂପୂର୍ଣ୍ଣ ନିଧେ କରାଯାଇଥିଲେ ମଧ୍ୟ ଏହା ଦୁଇଦିନିଆ ଭାଗବତ ପରି ହୋଇଛି। ଗଂଜାମ ଜିଲ୍ଲାର ଗୁଡ଼ମାଠିଆ ବ୍ଲକ୍ ଭାବେ ପରିଚିତ କୁକୁଡ଼ାଖଣ୍ଡିରେ ପ୍ରତ୍ୟେକ ଉନ୍ନୟନମୂଳକ କାର୍ଯ୍ୟରେ ବହୁ ପରିମାଣରେ ପି.ସି. କାରବାର ହେଉଛି।

ଏହିଭଳି ଏକ ଅଭିଯୋଗ ଆଣିଛନ୍ତି ୧୦ ନମ୍ବର ଜିଲ୍ଲା ପରିଷଦ ସଦସ୍ୟ ଏଲ୍‌.ମୋହନ ରାଓ। ସେ ଅଭିଯୋଗ କରିଛନ୍ତି ଯେ, ନିଜ ଜିଲ୍ଲା ପରିଷଦ ପାଣ୍ଠିରୁ ଗୁରୁଣ୍ଠି ଗ୍ରାମର ଦଣ୍ଡପାଟଣା ସାହିରେ ଫେବାର ରାସ୍ତା ନିର୍ମାଣ ପାଇଁ ୩ ଲକ୍ଷ ଟଙ୍କା ପ୍ରଦାନ କରିଥିଲେ। କନିଷ୍ଠ ଯନ୍ତ୍ରୀଙ୍କ ନାମରେ କାର୍ଯ୍ୟାଦେଶ ଥିବାବେଳେ ଉକ୍ତ ଗ୍ରାମର ଟି. ଫକୀର ପାତ୍ରଙ୍କୁ କାର୍ଯ୍ୟ ଦେଖାଶୁଣା କରିବା ଦାୟିତ୍ୱ ଦେଇଥିଲେ। କାର୍ଯ୍ୟଶେଷ ହେବା ପରେ ବିଲ୍ ହୋଇଥିବା ଅର୍ଥରାଶି ମାଗିବାକୁ ଗଲା ପରେ ସିକୁରିଟି ୧୮ ହଜାର ଟଙ୍କା ଏବଂ କମିଶନର ୩୦ ହଜାର ଟଙ୍କା କନିଷ୍ଠ ଯନ୍ତ୍ରୀ ମହୋଦୟ କାଟିଦେଇଥିବା ଅଭିଯୋଗ କରିଛନ୍ତି ଜିଲ୍ଲା ପରିଷଦ ସଦସ୍ୟ। ଟି. ଫକୀର ପାତ୍ର କାହିଁକି ଏତେଟଙ୍କା କାଟୁଛନ୍ତି ବୋଲି ପଚାରିବାରେ ଯନ୍ତ୍ରୀ କହିଥିଲେ ଏହି ପିସି କେବଳ ମୋର ନୁହେଁ ବ୍ଲକ୍‌ର ଅନ୍ୟାନ୍ୟ କର୍ମଚାରୀମାନେ ମଧ୍ୟ ଏଥିରେ ଭାଗିଦାର ଅଛନ୍ତି ବୋଲି କନିଷ୍ଠ ଯନ୍ତ୍ରୀ କହିଥିବା ନେଇ ସେ ଅଭିଯୋଗ କରିଛନ୍ତି ଏବଂ ଗୋଟିଏ ହାତଲେଖା କାଗଜରେ ସମସ୍ତ ହିସାବ କରି ବଳକା ଟଙ୍କା ଚେକ୍ ଆକାରରେ ଫକୀର ପାତ୍ରଙ୍କୁ ପ୍ରଦାନ କରିଦେଇଛନ୍ତି। ଏନେଇ ଫକୀର ଜିଲ୍ଲା ପରିଷଦ ଏଲ୍ ମୋହନ ଦାସଙ୍କୁ ଜଣାଇବା ପରେ ଶ୍ରୀ ଦାସ ଏହି ଘଟଣାର ଭିଜିଲାନସ ତଦନ୍ତ ଦାବି କରିଛନ୍ତି। ଏହି ବିଭାଗ ସଂପୂର୍ଣ୍ଣ ରୂପେ ଦୁର୍ନୀତିରେ ଜଡ଼ିତ।

ତେଣୁ ନିରପେକ୍ଷ ତଦନ୍ତ କରି ଦୃଢ଼ କାର୍ଯ୍ୟାନୁଷ୍ଠାନ ନେବା ପାଇଁ ସେ ଦାବି କରିଛନ୍ତି। ଆଗାମୀ ଦିନରେ ବ୍ଲକ୍ ପ୍ରଶାସନ ଯଦି କୌଣସି ପ୍ରକାର କାର୍ଯ୍ୟାନୁଷ୍ଠାନ ନନେଇ ପିସି କାରବାର ଚାଲୁ ରଖେ ତେବେ ବ୍ଲକ୍ ଘେରାଉ ସହ ରାଜରାସ୍ତା ଅବରୋଧ କରାଯାଇ ପ୍ରତିବାଦ କରାଯିବ। ଏନେଇ ଯନ୍ତ୍ରୀଙ୍କ କୌଣସି ପ୍ରତିକ୍ରିୟା ମିଳିପାରିନାହିଁ। ସରକାର ପିସି କାରବାରକୁ ନେଇ ରୋକ ଲଗାଇଥିବା ବେଳେ ଗଂଜାମ ଜିଲ୍ଲା ରାଜ୍ୟର ପ୍ରଥମ ଜିଲ୍ଲା ଯେଉଁଠାରେ କି ପିସି ବିନା କୌଣସି ଉନ୍ନୟନମୂଳକ କାର୍ଯ୍ୟ ହେଉନଥିବା ନଜିର ରହିଛି। ଖାସ୍ କରି ଗଂଜାମ ଜିଲ୍ଲାର କୁକୁଡ଼ାଖଣ୍ଡି ବ୍ଲକ୍ ଏବଂ ଖଲିକୋଟ, ପୁରୁଷୋତ୍ତମପୁର, ରଙ୍ଗେଇଲୁଣ୍ଡା, ଦିଗପହଣ୍ଡି, ପୋଲସରା, ବେଗୁନିଆପଡ଼ା ଆଦି ଅଂଚଳରେ ଏହା ଚରମ ସୀମାରେ ପହଞ୍ଚିଯାଇଛି।

ଏହି ପିସି କାରବାର ଯୋଗୁଁ ନିମ୍ନରୁ ଅତି ନିମ୍ନମାନର କାର୍ଯ୍ୟ ହେଉଥିବା ଅଭିଯୋଗ ହୋଇ ଆସୁଛି। ଖାସ୍ କରି କୁକୁଡ଼ାଖଣ୍ଡି ବ୍ଲକ୍‌ର ଦୁର୍ନୀତି ଚରମ ସୀମାରେ ପହଞ୍ଚି ଯାଇଥିଲେ ମଧ୍ୟ ବାରମ୍ବାର ବିଭିନ୍ନ ପଂଚାୟତରୁ ବିଭିନ୍ନ ଉନ୍ନୟନମୂଳକ କାର୍ଯ୍ୟ ନିମ୍ନମାନର ହେଉଥିବା ନେଇ ଅଭିଯୋଗ ହୋଇ ଆସୁଥିଲେ ସୁଦ୍ଧା ବିଡ଼ିଓ କିମ୍ବା ଜିଲ୍ଲାପାଳ, ପିଡ଼ି ଡ଼ିଆର୍‌ଡ଼ିଏ ଏହାକୁ ଗୁରୁତ୍ୱ ଦେଉନଥିବାକୁ ନେଇ ବିଭିନ୍ନ ମହଲରେ ଅସନ୍ତୋସ ବୃଦ୍ଧି ପାଉଛି। କାରଣ ଉକ୍ତ ବ୍ଲକ୍‌ଟି ଗୋଟିଏ ବିଜେଡ଼ିର ଆଗଧାଡ଼ିର ନେତାଙ୍କ ଛତ୍ରଛାୟା ତଳେ। କୁକୁଡ଼ାଖଣ୍ଡି ବ୍ଲକ୍‌ର ସମସ୍ତ ଉନ୍ନୟନମୂଳକ କାର୍ଯ୍ୟକୁ ଯଦି ଭିଜିଲାନସ ତଦନ୍ତ ସାପେକ୍ଷ କରାଯାଏ ତେବେ ପ୍ରକୃତ ତଥ୍ୟ ପଦାକୁ ଆସିବ ବୋଲି ଅଂଚଳର ବୁଦ୍ଧିଜୀବୀ ମତ ରଖିଛନ୍ତି।