ଭୁବନେଶ୍ୱର: ଚାଷୀଙ୍କ ପାଇଁ କେବଳ କୁମ୍ଭୀର କାନ୍ଦଣା କାନ୍ଦ ନାହିଁ। ଦେହ ଓ ମନ ଲଗାଇ କାମ କର। ଲକଡ଼ାଉନ ଓ ସଟଡ଼ାଉନ ସମୟରେ ସମସ୍ତଙ୍କ ଚକା ଜାମ୍ କରି, ମୁହଁରେ ତୁଣ୍ଡି ଲଗାଇ ଖଣିରୁ ଅପର୍ଯ୍ୟାପ୍ତ ଅର୍ଥ ପାଇଛ। ଏପରିକି ସବୁ ବିଭାଗକୁ ଖର୍ଚ୍ଚ ପାଇଁ ପଇସା ମଗାଇ ସାରିଲେଣି। ଅଥଚ ମରୁଡ଼ିରେ ଛଟପଟ ହେଉଥିବା ଚାଷୀଙ୍କ କଥା ସମ୍ପୂର୍ଣ୍ଣ ଭୁଲିଯାଇଛ। ଖଣି ଅର୍ଥରେ ପ୍ରଥମେ ଚାଷୀଙ୍କ ଜମିକୁ ଜଳ ଯୋଗାଇ ମରୁଡ଼ି ମୁକାବିଲା କର।
ସୂଚନାଯୋଗ୍ୟ ଯେ, ସାରା ଓଡ଼ିଶାର ଅଧାରୁ ଅଧିକ ଅଞ୍ଚଳରେ ମରୁଡ଼ି ପରିସ୍ଥିତି ଯୋଗୁଁ ରୁଆ ପୋତା ହୋଇପାରୁ ନାହିଁ। ରୁଆ ହୋଥିବା ଧାନ ଜଳିଗଲାଣି। ଚାଷ ପ୍ରକ୍ରିୟା ଗଭୀର ଭାବରେ ବ୍ୟାହତ ହୋଇଛି। ଏପରିକି ଚାଷୀଙ୍କ ମୁଣ୍ଡ ଗଡ଼ିଲାଣି। ତଥାପି ସରକାର ଚେତି ନାହାଁନ୍ତି। ଯାଜପୁର, କଟକ, ମୟୁରଭଞ୍ଜ, ଗଞ୍ଜାମ ଯୁଆଡ଼େ ଦେଖ ମରୁଡ଼ି ସ୍ଥିତି। ଅଧା ଓଡ଼ିଶାରେ ମରୁଡ଼ି ସ୍ଥିତି ବୋଲି ପ୍ରମୁଖ ଖବରକାଗଜରେ ସମ୍ବାଦ ପ୍ରକାଶ ପାଇସାରିଛି। ଜୁନ୍ର ଶେଷ ଭାଗରୁ ଜଣାଥିଲା ଯେ ଜୁଲାଇରେ ଅନାବୃଷ୍ଟି ହେବ। ତଥାପି ସରକାର ନାହିରେ ତେଲ ପକାଇ ଶୋଇଲେ ଓ ଏଥିଲାଗ କୌଣସି ଉଦ୍ୟମ କଲେନାହିଁ।
ସରକାର ଚାଷୀଙ୍କ କଥା ନବୁଝି ଅଲମ୍ପିକ୍ରେ ମାତି କ୍ରୀଡ଼ାଙ୍ଗନ କରିବା କଥା ଘୋଷଣା କରୁଛନ୍ତି। ସରକାର ସାଂସ୍କୃତିକ ବୈଭବ ଓ କ୍ରୀଡ଼ା ପ୍ରତି ସମ୍ବେଦନଶୀଳ ହୁଅନ୍ତୁ, କିନ୍ତୁ ଅନ୍ନଦାତାଙ୍କ କଥା ବୁଝିବେ କି ନାହିଁ। ସବୁଠାରୁ ଦୁର୍ଭାଗ୍ୟର କଥା ମୁଖ୍ୟମନ୍ତ୍ରୀ ନିଜେ ଦୀର୍ଘଦିନ ଧରି ଜଳସେଚନ ବିଭାଗର ଦାୟିତ୍ୱରେ ଅଛନ୍ତି। ଏହା ସତ୍ତ୍ୱେ ଜଳସେଚନ ପାଇଁ ସେଭଳି ଆଖିଦୃଶିଆ ପଦକ୍ଷେପ ସେ ନେଇନାହାଁନ୍ତି। କରୋନାରେ ଲୋକ ହାତ ବାନ୍ଧି ବସିଛନ୍ତି । ଦୁଇଥର କରୋନା ମାଡ଼ରେ ଚାଷ ଦେଶକୁ ବଞ୍ଚାଇଲା ବୋଲି ସମସ୍ତେ ସ୍ୱୀକାର କରୁଛନ୍ତି ହେଲେ ଚାଷକୁ ବଞ୍ଚାଇବାକୁ ସରକାର ପଦକ୍ଷେପ ନେବା ଯନ୍ତ୍ରଣାଦାୟକ।
ସରକାରଙ୍କ ଖଜଣାଖାନାରେ ଅର୍ଥର ଅଭାବ ନାହିଁ। ତୁରନ୍ତ ସରକାର ମରୁଡ଼ି ମୁକାବିଲା କରିବା ସହିତ ଧାନ କୁଇଣ୍ଟାଲ ପିଛା ୫୦୦ ଟଙ୍କା ଲେଖାଏଁ ବୋନସ ଦେବା ପାଇଁ ଅର୍ଥ ବରାଦ କରନ୍ତୁ ବୋଲି ନବନିର୍ମାଣ କୃଷକ ସଂଗଠନର ରାଜ୍ୟ ସଂଯୋଜକ ଶେଷଦେବ ଏକ ପ୍ରେସ୍ ବିବୃତ୍ତିରେ କହିଛନ୍ତି। ଯଦି ଏଥର ମରୁଡ଼ି ହୁଏ, ତେବେ ପୁରୁଣା ରିଲିଫ କୋଡ଼ ନୁହେଁ, ବରଂ ରିଲିଫ କୋଡ଼ ସଂଶୋଧନ କରି କ୍ଷତି ଯେତେ, ଦିଅ ସେତେ ଆଧାରରେ କ୍ଷତିପୂରଣ ଦାବି କରାଯିବ ବୋଲି ଶ୍ରୀ ନନ୍ଦ କହିଛନ୍ତି।
