ରମେଶ ମହାନ୍ତି
ଜଗତସିଂହପୁର : ତିର୍ତ୍ତୋଲ ବିଧାନସଭା ଉପନିର୍ବାଚନର ଭୋଟ ଗଣତି ଜଗତସିଂହପୁର ଏସ୍.ଭି.ଏମ୍ କଲେଜ ଠାରେ ୧୦ତାରିଖ (ଆସନ୍ତାକାଲି) ସକାଳ ୮ଟାରୁ ଆରମ୍ଭ ହେବ। ଏଥିନିମନ୍ତେ ଏସ୍.ଭି.ଏମ୍ କଲେଜ ଠାରେ ସମସ୍ତ ବ୍ୟବସ୍ଥା କରାଯାଇଛି। ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀ ସରୋଜ କୁମାର ମିଶ୍ରଙ୍କ ପ୍ରତ୍ୟକ୍ଷ ତତ୍ତ୍ବାବଧାନରେ ସମସ୍ତ ବ୍ୟବସ୍ଥା କରାଯାଉଛି।
ଇଭିଏମ୍ ଭୋଟ ଗଣତି ପାଇଁ ୨ଟି ହଲ୍ ବ୍ୟବସ୍ଥା ହୋଇଥିବା ବେଳେ ପୋଷ୍ଟାଲ୍ ବାଲାଟ୍ ଗଣତି ନିମନ୍ତେ ଗୋଟିଏ ହଲ୍ ର ବ୍ୟବସ୍ଥା ହୋଇଛି। ଇଭିଏମ୍ ଭୋଟ ଗଣତି ନିମନ୍ତେ ପ୍ରତ୍ୟେକ ହଲ୍ ରେ ୭ଟି ଲେଖା ମୋଟ୍ ୧୪ଟି ଟେବୁଲ୍ ହୋଇଥିବା ବେଳେ ପୋଷ୍ଟାଲ୍ ବାଲାଟ୍ ନିମନ୍ତେ ୨ଟି ଟେବୁଲ ବ୍ୟବସ୍ଥା କରାଯାଇଛି। ପ୍ରତ୍ୟେକ ରାଉଣ୍ଡ ଗଣତି ପରେ ରିଟର୍ଣ୍ଣିଂ ଅଧିକାରୀ ଫଳାଫଳ ଘୋଷଣା କରିବେ। ପ୍ରତ୍ୟେକ ରୁମ୍ ଓ ଟଏଲେଟ୍ ସାନିଟାଇଜ୍ କରାଯିବ।
ପ୍ରତ୍ୟେକ ଟେବୁଲ୍ ପାଇଁ ସିସିଟିଭି ଓ ଟିଭି ବ୍ୟବସ୍ଥା କରାଯାଇଛି। ଭୋଟ ଗଣତି ନିମନ୍ତେ ୨୨ଜଣ କାଉଣ୍ଟିଂ ସୁପରଭାଇଜର ,୨୨ଜଣ କାଉଣ୍ଟିଂ ଆସିଷ୍ଟାଣ୍ଟ ଓ ୨୪ଜଣ ମାଇକ୍ରୋ ଅବଜରଭର୍ ନିୟୋଜିତ ହୋଇଛନ୍ତି। ନଭେମ୍ବର ୬ ଓ ୮ତାରିଖରେ ନିୟୋଜିତ କର୍ମଚାରୀଙ୍କୁ କାଉଣ୍ଟିଂ ନିମନ୍ତେ ପ୍ରଶିକ୍ଷଣ ପ୍ରଦାନ କରାଯାଇଛି। ଜଗତସିଂହପୁର ଅତିରିକ୍ତ ଜିଲ୍ଲାପାଳ ସଚ୍ଚିଦାନନ୍ଦ ସାହୁ ,ବାଲିକୁଦା ତହସିଲଦାର ସିଦ୍ଧାର୍ଥ ଶଙ୍କର ସାହୁ ଓ ପ୍ରୀତୀଶ ନାୟକ, ସମସ୍ତ ସୁପରଭାଇଜର ,କାଉଣ୍ଟିଂ ଆସିଷ୍ଟାଣ୍ଟ ଓ ମାଇକ୍ରୋ ଅବଜରଭରଙ୍କୁ ପ୍ରଶିକ୍ଷଣ ପ୍ରଦାନ କରିଛନ୍ତି।
