ନୂଆଦିଲ୍ଲୀ: ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ଦିଲ୍ଲୀର ଲେଫ୍ଟନାଣ୍ଟ ଗଭର୍ଣ୍ଣର ମେୟର ନିର୍ବାଚନ ତାରିଖ ଘୋଷଣା କରିଛନ୍ତି। ଫେବୃଆରୀ ୨୨ ତାରିଖରେ ଦିଲ୍ଲୀରେ ମେୟର ନିର୍ବାଚନ ଅନୁଷ୍ଠିତ ହେବ। ପ୍ରକାଶ ଯେ, ଶୁକ୍ରବାର ଦିନ ଆମ୍ ଆଦମୀ ପାର୍ଟି ସୁପ୍ରିମକୋର୍ଟଙ୍କଠାରୁ ଏକ ବଡ ଆଶ୍ଵସ୍ତି ପାଇଥିଲା। କୋର୍ଟ କହିଥିଲେ ଯେ, ରାଜ୍ୟପାଳଙ୍କ ଦ୍ୱାରା ମନୋନୀତ ହୋଇଥିବା ୧୦ ଜଣ କାଉନସିଲର ମେୟର ନିର୍ବାଚନରେ ଭୋଟ୍ ଦେବେ ନାହିଁ। ସୁପ୍ରିମକୋର୍ଟ କହିଥିଲେ ଯେ, ଏମସିଡି ଏବଂ ଏଲଜିଙ୍କ ଯୁକ୍ତିକୁ ଆମେ ଗ୍ରହଣ କରୁନାହୁଁ, ଯାହା ମନୋନୀତ କାଉନସିଲରମାନେ ପ୍ରଥମ ବୈଠକରେ ଭୋଟ୍ ଦେଇପାରିବେ। ମେୟର ନିର୍ବାଚନ ପାଇଁ ପ୍ରଥମ ବୈଠକ ପାଇଁ ୨୪ ଘଣ୍ଟା ମଧ୍ୟରେ ନୋଟିସ୍ ଜାରି କରାଯିଉ। ମେୟର ନିର୍ବାଚନ ତାରିଖ ଏବଂ ଅନ୍ୟାନ୍ୟ ନିର୍ବାଚନରେ ବିଜ୍ଞପ୍ତିରେ ଉଲ୍ଲେଖ କରାଯିବା ଲାଗି ସୁପ୍ରିମକୋର୍ଟ କହିଥିଲେ।
ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ମେୟର ନିର୍ବାଚନରେ ସୁପ୍ରିମକୋର୍ଟଙ୍କ ଆଦେଶକୁ ଗଣତନ୍ତ୍ରର ବିଜୟ ବୋଲି କହିଥିଲେ। ଏହା ସହିତ ସେ ଅଭିଯୋଗ କରିଥିଲେ ଯେ, ସୁପ୍ରିମକୋର୍ଟଙ୍କ ଆଦେଶ ପ୍ରମାଣିତ କରିଛି ଯେ ଉଭୟ ଲେଫ୍ଟନାଣ୍ଟ ଗଭର୍ଣ୍ଣର ଏବଂ ଭାରତୀୟ ଜନତା ପାର୍ଟି ‘ବେଆଇନ ଏବଂ ଅସାମ୍ବିଧାନିକ ଆଦେଶ’ ପାସ କରୁଛନ୍ତି।
ଉଲ୍ଲେଖ ଯୋଗ୍ୟ ଯେ, ଏମସିଡି ନିର୍ବାଚନରେ ବିଜେପିକୁ ପରାଜୟର ସାମ୍ନା କରିବାକୁ ପଡିଥିଲା। ତେବେ ଏମସିଡି ସଦନରେ ଅନେକ ଥର ହଙ୍ଗାମା ହେତୁ ମେୟର ନିର୍ବାଚନ ହୋଇପାରିନଥିଲା। ଏହା ପରେ ଆମ୍ ଆଦମୀ ପାର୍ଟି କୋର୍ଟ ଦ୍ଵାରସ୍ଥ ହୋଇଥିଲା।
