ନୂଆଦିଲ୍ଲୀ: ଅଧିକରୁ ଅଧିକ ଶସ୍ତା ଋଷିଆ ତେଲ କିଣି ବିଶ୍ୱ ତୈଳ ବଜାରରେ ଭାରତ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି। ଭାରତ ଶସ୍ତା ଋଷିଆ ତେଲ କିଣୁଛି ଏବଂ ଏହାକୁ ୟୁରୋପ ଏବଂ ଆମେରିକାକୁ ଦେଉଛି। ତଥାପି କେତେକ ଦେଶ ଭାରତକୁ ସମାଲୋଚନା କରୁଛନ୍ତି। କାରଣ ସେମାନେ ବିଶ୍ୱାସ କରନ୍ତି ଯେ, ଏପରି କରିବା ଦ୍ୱାରା ସେମାନଙ୍କୁ ରୁଷର ଶକ୍ତି ରାଜସ୍ୱ ହ୍ରାସ କରିବାରେ ସଫଳତା ପାଉନାହାଁନ୍ତି।
ରୁଷ-ୟୁକ୍ରେନ ଯୁଦ୍ଧ ଆରମ୍ଭ ହେବା ପରେ ବିଶ୍ୱ ତୈଳ ବଜାରରେ ଏକ ବଡ଼ ପରିବର୍ତ୍ତନ ଦେଖିବାକୁ ମିଳିଛି। ୟୁରୋପ ଋଷ ଉପରେ ଲାଗିଥିବା ପ୍ରତିବନ୍ଧକକୁ ଆହୁରି ବୃଦ୍ଧି କରିଛି। ଏଭଳି ପରିସ୍ଥିତିରେ ଭାରତ ବିଶ୍ୱ ତୈଳ ବଜାରରେ ଏକ କେନ୍ଦ୍ର ପାଲଟିଛି। ୱାଶିଂଟନ୍ ଥିଙ୍କ ଟ୍ୟାଙ୍କ ସେଣ୍ଟର ଫର ଷ୍ଟ୍ରାଟେଜିକ୍ ଆଣ୍ଡ ଇଣ୍ଟରନ୍ୟାସନାଲ ଷ୍ଟଡିଜ୍ ର ବେନ୍ କାହିଲ୍ କହିଛନ୍ତି ଜେ, “ଆମେରିକାର ଟ୍ରେଜେରୀ ଅଧିକାରୀଙ୍କ ଦୁଇଟି ମୁଖ୍ୟ ଲକ୍ଷ୍ୟ ରହିଛି – ବଜାରକୁ ଭଲ ଯୋଗାଣ ମିଳୁ ଏବଂ ଋଷର ତୈଳ ରାଜସ୍ୱ ହ୍ରାସ କରିବା। ସେମାନେ ଜାଣନ୍ତି ଯେ, ଭାରତୀୟ ଏବଂ ଚାଇନାର ରିଫାଇନର୍ସମାନେ ଶସ୍ତା ଋଷିଆ ଅଶୋଧିତ ତୈଳ କିଣି ଏବଂ ବଜାର ମୂଲ୍ୟରେ ଉତ୍ପାଦ ରପ୍ତାନି କରି ବିପୁଳ ପରିମାଣର ଲାଭ କରିପାରିବେ। ତଥାପି ସେଥିରେ ସେମାନଙ୍କର କୌଣସି ଅସୁବିଧା ନାହିଁ। ”
ଡାଟା ଇଣ୍ଟେଲିଜେନ୍ସ ଫାର୍ମ କେପଲରଙ୍କ ଅନୁଯାୟୀ ଭାରତ ଗତ ମାସରେ ନ୍ୟୁୟର୍କକୁ ପ୍ରତିଦିନ ୮୯,୦୦୦ ବ୍ୟାରେଲ ପେଟ୍ରୋଲ ଏବଂ ଡିଜେଲ ରପ୍ତାନି କରିଛି। ୟୁରୋପରେ କମ୍ ସଲଫର୍ ଡିଜେଲ ରପ୍ତାନି ଜାନୁଆରୀରେ ୧,୭୨,୦୦୦ ବ୍ୟାରେଲ୍ ଥିଲା, ଯାହା ଅକ୍ଟୋବର ୨୦୨୧ ପରଠାରୁ ସର୍ବାଧିକ। ରବିବାର ଠାରୁ ଋଷର ପେଟ୍ରୋଲିୟମ ରପ୍ତାନି ଉପରେ ୟୁରୋପୀୟ ୟୁନିଅନର ନୂତନ ପ୍ରତିବନ୍ଧକ ଲାଗୁ ହେବା ପରେ ଭାରତର ଗୁରୁତ୍ୱ ଆହୁରି ବୃଦ୍ଧି ପାଇବ ବୋଲି ଆଶା କରାଯାଉଛି। ଅଶୋଧିତ ତୈଳ ଆବଶ୍ୟକତାର ପ୍ରାୟ ୮୫% ପୂରଣ କରିବାକୁ ଭାରତ ଆମଦାନୀ ଉପରେ ନିର୍ଭରଶୀଳ।
EU ଗାଇଡଲାଇନ ଅନୁଯାୟୀ ଭାରତ ନିୟମ ମଧ୍ୟରେ କାର୍ଯ୍ୟ କରୁଛି। ଯେତେବେଳେ ଭାରତ ଭଳି ଦେଶରେ ଋଷର ଅଶୋଧିତ ଇନ୍ଧନରେ ପ୍ରକ୍ରିୟାକରଣ କରାଯାଏ, ଏହି ଉତ୍ପାଦଗୁଡିକ ୟୁରୋପୀୟ ଦେଶମାନଙ୍କୁ ବଣ୍ଟନ କରାଯାଇପାରେ। କାରଣ ସେଗୁଡିକ ଋଷର ମୂଳ ବୋଲି ଧରାଯାଏ ନାହିଁ।
ଆମେରିକାର ଜାତୀୟ ସୁରକ୍ଷା ପରିଷଦର ମୁଖପାତ୍ର କହିଛନ୍ତି ଯେ, ଶକ୍ତି ବଜାରକୁ ସ୍ଥିର କରିବା ପାଇଁ ଭାରତ ସମେତ ଅନେକ ଦେଶ ଋଷର ଆୟକୁ ସୀମିତ କରିପାରିବେ। ଏହି ସମୟରେ ସାଉଦି ଆରବ, ସଂଯୁକ୍ତ ଆରବ ଏମିରେଟ୍ସ, ଆମେରିକା ସମେତ ଅନେକ ଦେଶର କମ୍ପାନୀର ଅଧିକାରୀମାନେ ଆଜି ବେଙ୍ଗାଲୁରୁରେ ଏକ ସମ୍ମିଳନୀ ପାଇଁ ଏକାଠି ହେବାକୁ ଯାଉଛନ୍ତି। ଏହି ତିନି ଦିନିଆ ଶକ୍ତି ସମ୍ମିଳନୀ ଭାରତର ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରଣାଳୟ ଦ୍ୱାରା ଆୟୋଜିତ ହେଉଛି।
