ଭୁବନେଶ୍ବର: ହିନ୍ଦୀ ସ୍କ୍ରିନରେ ଦମନର ଦବଦବା। ଓଡ଼ିଆ ପରେ ଏବେ ହିନ୍ଦୀରେ ସଫଳତା ହାସଲ କରିଛି। ଦେଶବ୍ୟାପୀ ୫୦୦ ହଲରେ ରିଲିଜ୍ ହୋଇଛି ଚଳଚ୍ଚିତ୍ର। ପ୍ରଥମ ଥର ପାନ୍ ଇଣ୍ଡିଆରେ ଲେଭଲରେ ପ୍ରସ୍ତୁତ ହୋଇଛି ଓଡ଼ିଆ ଫିଲ୍ମର ହିନ୍ଦୀ ରୂପାନ୍ତର। ଯେତେବେଳେ ଦର୍ଶକ ହଲରୁ ମୁହଁ ଫେରାଇ ନେଉଥିଲେ। ସେହି ସମୟରେ ଦମନ ଦେଇଥିଲା ଦମ୍ଭ। ଓଡିଆରେ ନିର୍ମିତ ଫିଲ୍ମ ଲୋକାଦୃତ ହେବା ସହ ଓଡିଶାରେ ରେକର୍ଡ ସଂଖ୍ୟକ ସଫଳତା ହାସଲ କରିଥିଲା। ପରେ ହିନ୍ଦୀରେ ନିର୍ମାଣ କରାଯାଇଥିଲା ଚଳଚ୍ଚିତ୍ର। ଫେବୃୟାରୀ ୩ ତାରିଖରେ ମୁମ୍ବାଇର ପିଭିଆର ହଲରେ ଫିଲ୍ମ ରିଲିଜ କରାଯାଇଥିବା ବେଳେ ମିଳିଛି ଦର୍ଶକଙ୍କ ଅହେତୁକ ସମର୍ଥନ ଓ ଭଲ ପାଇବା।
ଏକ ସତ୍ୟ ଓ ବାସ୍ତବଧର୍ମୀ ଘଟଣାକୁ ନେଇ ଫିଲ୍ମ ଦମନର କାହାଣୀ ପ୍ରସ୍ତୁତ। ପ୍ରଥମ ଓଡ଼ିଆ ଚଳଚ୍ଚିତ୍ର ଭାବେ ଏହା ଯେପରି ଆଇଏମଡିବି ରେଟିଂରେ ୯ଦଶମିକ ୭ ପଏଣ୍ଟ ପାଇ RRR, କେଜିଫ୍-୨କୁ ପଛରେ ପକାଇଥିଲା। ଏବେ ହିନ୍ଦୀରେ ମଧ୍ୟ ସେହିଭଳି କିଛି ରେକର୍ଡ କରିବ ବୋଲି ମେକର୍ସ ଆଶା ରଖିଛନ୍ତି। ଉପାନ୍ତ ଅଞ୍ଚଳରେ ସ୍ୱାସ୍ଥ୍ୟସେବାକୁ ନେଇ ତିଆରି ହୋଇଛି ଫିଲ୍ମ ଦମନ। ଫିଲ୍ମ ଦେଖିବାକୁ ଦର୍ଶକଙ୍କୁ ଉତ୍କଣ୍ଠା ବଢିଛି । ଯେଉଁ ଦର୍ଶକ ଫିଲ୍ମ ଦେଖି ଫେରିଛନ୍ତି, ସେମାନେ ନୂଆ କିଛି ଆହ୍ୱାନ ନେଇ ଫେରୁଥିବା ପ୍ରତିକ୍ରିୟା ପ୍ରକାଶ କରିଛନ୍ତି। ସେପଟେ ମୁମ୍ବାଇରେ ଥିବା ସମସ୍ତ ଓଡିଆ ଲୋକଙ୍କ ଗହଳି ହଲ ଆଗରେ ଦେଖିବାକୁ ମିଳିଥିଲା। ପାନୋରମା ଭଳି ଏକ ବଡ଼ ବ୍ୟାନରରେ ଦମନ ପ୍ରସ୍ତୁତ ହୋଇଥିବାବେଳେ ସୁପରଷ୍ଟାର ଅଜୟ ଦେବଗନ ଏବଂ ବିଦ୍ୟୁତ ଜମୱାଲଙ୍କ ଭଳି ଅଭିନେତା ଫିଲ୍ମର କାହାଣୀକୁ ବେଶ ପ୍ରଂଶସା କରିବା ସହ ନିଜ ସୋସିଆଲ ସାଇଟରେ ପୋଷ୍ଟର ସେୟାର କରିଥିଲେ।
ଉପାନ୍ତ ଅଞ୍ଚଳରେ ସ୍ୱାସ୍ଥ୍ୟସେବାକୁ ନେଇ ତିଆରି ହୋଇଛି ଫିଲ୍ମ ଦମନ। ୨୦୨୨ ନଭେମ୍ବରରେ ଡାକ୍ତରଙ୍କ କାହାଣୀକୁ ନେଇ ଓଡ଼ିଆରେ ରିଲିଜ୍ ହୋଇଥିଲା ଫିଲ୍ମ। କିଭଳି ଏକ ଅପହଞ୍ଚ ଅଞ୍ଚଳରେ ମ୍ୟାଲେରିଆ ନିରାକରଣକୁ ସରକାର ଗୁରୁତ୍ୱ ଦେଇଥିଲେ। ଏବଂ ସେଠାରେ ଡାକ୍ତର ଲୋକଙ୍କ ଠାରୁ ଅନ୍ଧ ବିଶ୍ୱାସକୁ ଦୂରୀଭୂତ କରି ସଚେତନତାକୁ ଲୋକଙ୍କ ପାଖରେ ପହଁଚାଇଥିଲେ ତାବା ପରିବେଶିତ। ଓଡିଆରେ ଫିଲ୍ମର ଲୋକପ୍ରିୟତା ଏବଂ ‘ଦମନ’ର ବାର୍ତ୍ତାକୁ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଚଳଚ୍ଚିତ୍ରର ପ୍ରଶଂସା କରିଥିଲେ।
ଅଭିନେତା ବାବୁଶାନ ମହାନ୍ତି ଡାକ୍ତର ଭୂମିକାରେ ଅଭିନୟ କରିଥିବାବେଳେ ଦ୍ୱିପାନିତ ଦାସ ଫାର୍ମାସିଷ୍ଟ ଭୂମିକାରେ ନଜର ଆସିଛନ୍ତି। କାହାଣୀ, ଚିତ୍ରନାଟ୍ୟ ପ୍ରସ୍ତୁତି ସାଙ୍ଗକୁ ନିର୍ଦ୍ଦେଶନା ଦେଇଛନ୍ତି ବିଶାଳ ମୌର୍ଯ୍ୟ ଏବଂ ଦେବୀ ପ୍ରସାଦ ଲେଙ୍କା। ଡିଓପିରେ ପ୍ରତାପ ରାଉତ, ସଙ୍ଗୀତରେ ଗୌରବ ଆନନ୍ଦ, ଗୀତ ରଚନାରେ ଦିବ୍ୟଜିତ୍ ସାହୁ ଓ ଏଡିଟିଂରେ ଦେବୀ ପ୍ରସାଦ ଲେଙ୍କା ନିଜ ଦକ୍ଷତା ଦେଖାଇଛନ୍ତି। ହିନ୍ଦୀରେ ନିର୍ମିତ ଦମନରେ ପ୍ରତିଷ୍ଠିତ କଣ୍ଠଶିଳ୍ପୀ ଦିବ୍ୟ କୁମାର କଣ୍ଠ ଦାନ କରିଥିବାବେଳେ ମୁଜ୍ୟିକ ପ୍ରସ୍ତୁତ କରିଛନ୍ତି ଗୌରବ ଆନନ୍ଦ। ଓଡ଼ିଆ ଭଳି ହିନ୍ଦୀରେ ମଧ୍ୟ ଦମନର ଦବଦବା ରହିବ ବୋଲି ଆଶା ପ୍ରକାଶ କରିଛନ୍ତି ଦମନର କ୍ରିଏଟିଭ୍ ହେଡ୍ ପ୍ରଣୟ ଜେଠୀ।
ହିନ୍ଦୀ ଫିଲ୍ମ ‘ପଠାନ୍’ ପୁରା ଭାରତରେ ଚାଲିଥିବା ବେଳେ ଏହାର ପ୍ରଭାବ ‘ଦମନ’ ଉପରେ ରହିବ କି ପଚାରିବାରୁ ବାବୁଶାନ କହିଥିଲେ ଯେ, ଏହି ଦୁଇଟି ଫିଲ୍ମ ଦୁଇ ପ୍ରକାରର ଓ ଏହାର ଦର୍ଶକ ମଧ୍ୟ ଭିନ୍ନ ତେଣୁ ସେମିତି କିଛି ଅସୁବିଧାର ସମ୍ଭାବନା ନାହିଁ ଓ ଆହୁରି କହିଥିଲେ ଯେ, ଓଡ଼ିଶାର ନିଜ ମାଟିର ଏହି ସତ୍ୟକାହାଣୀ ଉପରେ ଆଧାରିତ ଫିଲ୍ମ ଓଡିଆ ଚଳଚିତ୍ର ଜଗତକୁ ଏକ ନୂଆ ଦିଗ ଦେଖାଇବାରେ ଚେଷ୍ଟା କରିବା ନିଶ୍ଚୟ।