ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ସ୍ପେନର ପ୍ରଧାନମନ୍ତ୍ରୀ ପେଡ୍ରୋ ସାଞ୍ଚେଜ୍ ଆଜି ଗୁଜରାଟର ଭଦୋଦରାସ୍ଥିତ ଟାଟା ଆଡଭାନ୍ସଡ୍ ସିଷ୍ଟମ୍ ଲିମିଟେଡ୍ (ଟିଏଏସଏଲ) କ୍ୟାମ୍ପସରେ ସି- ୨୯୫ ବିମାନ ଉତ୍ପାଦନ ପାଇଁ ଟାଟା ଏୟାରକ୍ରାଫ୍ଟ କମ୍ପ୍ଲେକ୍ସକୁ ମିଳିତ ଭାବେ ଉଦଘାଟନ କରିଛନ୍ତି। ଏହି ଅବସରରେ ପ୍ରଦର୍ଶିତ ପ୍ରଦର୍ଶନୀକୁ ଉଭୟ ପ୍ରଧାନମନ୍ତ୍ରୀ ମଧ୍ୟ ବୁଲି ଦେଖିଥିଲେ।
ସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ ଏହା ସ୍ପେନର ପ୍ରଧାନମନ୍ତ୍ରୀ ପେଡ୍ରୋ ସାଞ୍ଚେଜ୍ ଙ୍କର ପ୍ରଥମ ଭାରତ ଗସ୍ତ ଏବଂ ଦୁଇ ଦେଶ ମଧ୍ୟରେ ଭାଗିଦାରୀ ଆଜି ଏକ ନୂତନ ଦିଗ ଖୋଜୁଛି। ସି – ୨୯୫ ବିମାନ ଉତ୍ପାଦନ ପାଇଁ ଟାଟା ଏୟାରକ୍ରାଫ୍ଟ କମ୍ପ୍ଲେକ୍ସର ଉଦଘାଟନ ଅବସରରେ ପ୍ରଧାନମନ୍ତ୍ରୀ କହିଥିଲେ ଯେ ଏହା କେବଳ ଦୁଇ ଦେଶ ମଧ୍ୟରେ ସମ୍ପର୍କକୁ ସୁଦୃଢ଼ କରିବ ନାହିଁ ବରଂ ‘ମେକ୍ ଇନ୍ ଇଣ୍ଡିଆ, ମେକ୍ ଫର୍ ଦି ୱାର୍ଲ୍ଡ’ (ଭାରତରେ ତିଆରି, ବିଶ୍ଵ ପାଇଁ ତିଆରି) ଅଭିଯାନକୁ ତ୍ୱରାନ୍ୱିତ କରିବ। ଏହି ଅବସରରେ ଶ୍ରୀ ମୋଦୀ ଏୟାରବସ୍ ଏବଂ ଟାଟାର ସମଗ୍ର ଟିମ୍ କୁ ଶୁଭେଚ୍ଛା ଜଣାଇଥିଲେ । ପ୍ରଧାନମନ୍ତ୍ରୀ ସ୍ୱର୍ଗତଃ ଶ୍ରୀ ରତନ ଟାଟାଜୀଙ୍କୁ ମଧ୍ୟ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ ।
ସି – ୨୯୫ ବିମାନ କାରଖାନାର ନୂତନ ଭାରତର ନୂତନ କାର୍ଯ୍ୟ ସଂସ୍କୃତିର ପ୍ରତିଫଳନ ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଏବଂ କହିଥିଲେ ଯେ ଦେଶର ଯେକୌଣସି ପ୍ରକଳ୍ପ କାର୍ଯ୍ୟକାରୀ କରିବା ପର୍ଯ୍ୟନ୍ତ ଭାରତର ଗତି ଏଠାରେ ଦେଖିବାକୁ ମିଳିଥାଏ । ଅକ୍ଟୋବର ୨୦୨୨ରେ କାରଖାନାର ଶିଳାନ୍ୟାସକୁ ମନେ ପକାଇ ପ୍ରଧାନମନ୍ତ୍ରୀ କହିଥିଲେ ଯେ ସି – ୨୯୫ ବିମାନ ଉତ୍ପାଦନ ପାଇଁ ଏହି କାରଖାନା ଏବେ ପ୍ରସ୍ତୁତ ଅଛି । ପ୍ରକଳ୍ପ ଗୁଡ଼ିକର ଯୋଜନା ଏବଂ କାର୍ଯ୍ୟକାରିତାରେ ଅହେତୁକ ବିଳମ୍ବକୁ ଦୂର କରିବା ଉପରେ ଗୁରୁତ୍ଵାରୋପ କରି ପ୍ରଧାନମନ୍ତ୍ରୀ ଗୁଜରାଟର ମୁଖ୍ୟମନ୍ତ୍ରୀ ଭାବରେ ଭଦୋଦରାରେ ବମ୍ବାର୍ଡିୟର ଟ୍ରେନ୍ କୋଚ୍ ଉତ୍ପାଦନ କାରଖାନା ସ୍ଥାପନକୁ ମନେ ପକାଇଥିଲେ ଏବଂ କହିଥିଲେ ଯେ ଉତ୍ପାଦନ ପାଇଁ କାରଖାନା ରେକର୍ଡ ସମୟରେ ପ୍ରସ୍ତୁତ ହୋଇଛି । ଏହି କାରଖାନାରେ ନିର୍ମିତ ମେଟ୍ରୋ କୋଚ୍ ଆଜି ଅନ୍ୟ ଦେଶକୁ ରପ୍ତାନି କରାଯାଉଛି ବୋଲି ସେ କହିଛନ୍ତି। ଆଜିର ଉଦଘାଟିତ କାରଖାନାରେ ନିର୍ମିତ ବିମାନ ଗୁଡ଼ିକ ରପ୍ତାନି କରାଯିବ ବୋଲି ଶ୍ରୀ ମୋଦୀ ବିଶ୍ୱାସ ବ୍ୟକ୍ତ କରିଛନ୍ତି।
ପ୍ରସିଦ୍ଧ ସ୍ପେନ୍ କବି ଆଣ୍ଟୋନିଓ ମାଚାଡୋଙ୍କ ଉଦାହରଣ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ଯେତେବେଳେ ଆମେ ଲକ୍ଷ୍ୟ ଆଡକୁ ଆଗେଇବା ଆରମ୍ଭ କରୁ, ଲକ୍ଷ୍ୟ ଆଡକୁ ମାର୍ଗ ଆପେ ଆପେ ସୃଷ୍ଟି ହୋଇଯାଏ । ଭାରତର ପ୍ରତିରକ୍ଷା ଉତ୍ପାଦନ ଇକୋସିଷ୍ଟମ ଆଜି ନୂତନ ଶୀର୍ଷରେ ପହଞ୍ଚୁଛି ବୋଲି ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ ଯଦି ୧୦ ବର୍ଷ ପୂର୍ବେ ଠୋସ୍ ପଦକ୍ଷେପ ଗ୍ରହଣ କରା ଯାଇନଥାନ୍ତା , ତେବେ ଆଜି ଏହି ଗନ୍ତବ୍ୟସ୍ଥଳରେ ପହଞ୍ଚିବା ଅସମ୍ଭବ ହୋଇଥାନ୍ତା । ସେ ଆହୁରି ମଧ୍ୟ କହିଛନ୍ତି ଯେ , ଏକ ଦଶନ୍ଧି ପୂର୍ବେ ପ୍ରତିରକ୍ଷା ଉତ୍ପାଦନର ପ୍ରାଥମିକତା ଏବଂ ପରିଚୟ ଆମଦାନୀ ଉପରେ ଆଧାରିତ ଥିଲା ଏବଂ ଭାରତରେ ପ୍ରତିରକ୍ଷା ଉତ୍ପାଦନ ଏତେ ବଡ଼ ସ୍ତରରେ ହୋଇପାରିବ ବୋଲି କେହି କଳ୍ପନା କରିପାରିବେ ନାହିଁ । ପ୍ରଧାନମନ୍ତ୍ରୀ କହିଥିଲେ ଯେ ସରକାର ଏକ ନୂତନ ମାର୍ଗରେ ଚାଲିବାକୁ ନିଷ୍ପତ୍ତି ନେଇଛନ୍ତି, ଭାରତ ପାଇଁ ନୂତନ ଲକ୍ଷ୍ୟ ଧାର୍ଯ୍ୟ କରିଛନ୍ତି, ଯାହାର ଫଳାଫଳ ଆଜି ସ୍ପଷ୍ଟ ହୋଇଛି ।
ପ୍ରଧାନମନ୍ତ୍ରୀ କହିଥିଲେ ଯେ , ପ୍ରତିରକ୍ଷା କ୍ଷେତ୍ରରେ ଭାରତର ରୂପାନ୍ତରଣ ଏକ ଉପଯୁକ୍ତ ଯୋଜନା ଏବଂ ଭାଗିଦାରୀ କିପରି ସମ୍ଭାବନାକୁ ସମୃଦ୍ଧିରେ ପରିଣତ କରିପାରିବ ତାହାର ଉଦାହରଣ । ଗତ ଦଶନ୍ଧି ମଧ୍ୟରେ ରଣନୈତିକ ନିଷ୍ପତ୍ତି ଭାରତରେ ଏକ ଜୀବନ୍ତ ପ୍ରତିରକ୍ଷା ଶିଳ୍ପର ଅଭିବୃଦ୍ଧିକୁ ପ୍ରୋତ୍ସାହିତ କରିଛି ବୋଲି ସେ ଗୁରୁତ୍ୱାରୋପ କରିଥିଲେ। “ଆମେ ପ୍ରତିରକ୍ଷା ଉତ୍ପାଦନରେ ଘରୋଇ କ୍ଷେତ୍ରର ଅଂଶଗ୍ରହଣକୁ ବିସ୍ତାର କରିଛୁ, ସରକାରୀ କ୍ଷେତ୍ରର ୟୁନିଟ୍ଗୁଡ଼ିକୁ ଅଧିକ ଦକ୍ଷ କରିଛୁ, ଗୋଳାବାରୁଦ କାରଖାନାଗୁଡ଼ିକୁ ସାତଟି ପ୍ରମୁଖ କମ୍ପାନୀରେ ପୁନର୍ଗଠନ କରିଛୁ ଏବଂ ଡିଆରଡିଓ ଏବଂ ହାଲ୍ କୁ ସଶକ୍ତ କରିଛୁ”, ବୋଲି ଶ୍ରୀ ମୋଦୀ କହିଥିଲେ। ସେ କହିଥିଲେ ଯେ ଉତ୍ତରପ୍ରଦେଶ ଏବଂ ତାମିଲନାଡୁରେ ପ୍ରତିରକ୍ଷା କରିଡର ପ୍ରତିଷ୍ଠା ଏହି କ୍ଷେତ୍ରରେ ନୂତନ ଶକ୍ତି ସୃଷ୍ଟି କରିଛି। ଆଇଡିଏକ୍ସ (ଇନୋଭେସନ ଫର୍ ଡିଫେନ୍ସ ଏକ୍ସଲେନ୍ସ) ଯୋଜନା ସମ୍ପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଏହା ଗତ ପାଞ୍ଚରୁ ଛଅ ବର୍ଷ ମଧ୍ୟରେ ପ୍ରାୟ ୧,୦୦୦ ପ୍ରତିରକ୍ଷା ଷ୍ଟାର୍ଟଅପ୍ ର ଅଭିବୃଦ୍ଧିକୁ ପ୍ରୋତ୍ସାହିତ କରିଛି । ଗତ ଏକ ଦଶନ୍ଧି ମଧ୍ୟରେ ଭାରତର ପ୍ରତିରକ୍ଷା ରପ୍ତାନି ୩୦ ଗୁଣ ବୃଦ୍ଧି ପାଇଛି ଏବଂ ଭାରତ ବର୍ତ୍ତମାନ ୧୦୦ରୁ ଅଧିକ ଦେଶକୁ ଉପକରଣ ରପ୍ତାନି କରୁଛି ବୋଲି ସେ ସୂଚନା ଦେଇଛନ୍ତି।
ପ୍ରଧାନମନ୍ତ୍ରୀ ଦକ୍ଷତା ଏବଂ ନିଯୁକ୍ତି ସୃଷ୍ଟି ଉପରେ ଗୁରୁତ୍ୱାରୋପ କରିଥିଲେ ଏବଂ କହିଥିଲେ ଯେ ଏୟାରବସ୍- ଟାଟା ଫ୍ୟାକ୍ଟ୍ରି ଭଳି ପ୍ରକଳ୍ପ ହଜାର ହଜାର ନିଯୁକ୍ତି ସୃଷ୍ଟି କରିବ । ଏହି କାରଖାନା ୧୮,୦୦୦ ଏୟାରକ୍ରାଫ୍ଟ ପାର୍ଟସ୍ ର ସ୍ୱଦେଶୀ ଉତ୍ପାଦନରେ ସହାୟତା କରିବ ଏବଂ ସମଗ୍ର ଭାରତରେ ଏମଏସଏମଇ ପାଇଁ ପ୍ରଚୁର ସୁଯୋଗ ପ୍ରଦାନ କରିବ ବୋଲି ସେ କହିଛନ୍ତି । ଭାରତ ଆଜି ବି ବିଶ୍ୱର ପ୍ରମୁଖ ବିମାନ କଂପାନୀଗୁଡ଼ିକ ପାଇଁ ବିମାନର ବିଭିନ୍ନ ପାର୍ଟସର ସବୁଠାରୁ ବଡ଼ ଯୋଗାଣକାରୀ ବୋଲି ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ ନୂତନ ବିମାନ କାରଖାନା ଭାରତରେ ନୂତନ ଦକ୍ଷତା ଏବଂ ନୂତନ ଶିଳ୍ପକୁ ଏକ ବଡ଼ ପ୍ରୋତ୍ସାହନ ଦେବ।
ପରିବହନ ବିମାନ ଉତ୍ପାଦନ ବ୍ୟତୀତ ଆଜିର କାର୍ଯ୍ୟକ୍ରମ ଉପରେ ସେ ଦୃଷ୍ଟି ରଖିଛନ୍ତି ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ । ଗତ ଦଶନ୍ଧିରେ ଭାରତର ବିମାନ ଚଳାଚଳ କ୍ଷେତ୍ରର ଅଭୂତପୂର୍ବ ଅଭିବୃଦ୍ଧି ଏବଂ ପରିବର୍ତ୍ତନ ଉପରେ ଆଲୋକପାତ କରି ଶ୍ରୀ ମୋଦୀ କହିଥିଲେ ଯେ ଭାରତ ଦେଶର ଶତାଧିକ କ୍ଷୁଦ୍ର ସହରକୁ ବିମାନ ସଂଯୋଗ ପ୍ରଦାନ କରୁଛି ଏବଂ ଏହା ସହିତ ଦେଶକୁ ବିମାନ ଚଳାଚଳ ଏବଂ ଏମଆରଓ କ୍ଷେତ୍ରର ଏକ କେନ୍ଦ୍ରରେ ପରିଣତ କରିବା ପାଇଁ କାର୍ଯ୍ୟ କରୁଛି । ଭବିଷ୍ୟତରେ ମେଡ୍ ଇନ୍ ଇଣ୍ଡିଆ ବେସାମରିକ ବିମାନ ପାଇଁ ମଧ୍ୟ ଏହି ଇକୋସିଷ୍ଟମ୍ ପଥ ପ୍ରଶସ୍ତ କରିବ ବୋଲି ସେ କହିଛନ୍ତି। ବିଭିନ୍ନ ଭାରତୀୟ ଏୟାରଲାଇନ୍ସ ୧୨୦୦ ନୂଆ ବିମାନ ଅର୍ଡର କରିଛନ୍ତି ବୋଲି ଉଲ୍ଲେଖ କରି ଶ୍ରୀ ମୋଦୀ କହିଛନ୍ତି ଯେ ଏହାର ଅର୍ଥ ହେଉଛି ନୂତନ ଭାବେ ଉଦଘାଟିତ କାରଖାନା ଭବିଷ୍ୟତରେ ଭାରତ ଏବଂ ବିଶ୍ୱର ଆବଶ୍ୟକତା ପୂରଣ କରିବା ପାଇଁ ବେସାମରିକ ବିମାନ ଡିଜାଇନ୍ ଠାରୁ ଆରମ୍ଭ କରି ଉତ୍ପାଦନ ପର୍ଯ୍ୟନ୍ତ ପ୍ରମୁଖ ଭୂମିକା ଗ୍ରହଣ କରିବ।
ଭଦୋଦରା ସହର ଏମଏସଏମଇର ଗଡ଼ ବୋଲି ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ ଏହି ସହର ଭାରତର ଏହି ପ୍ରୟାସରେ ଉତପ୍ରେରକ ଭାବରେ କାର୍ଯ୍ୟ କରିବ । ସେ ଆହୁରି ମଧ୍ୟ କହିଛନ୍ତି ଯେ ଏହି ସହରରେ ଏକ ଗତିଶକ୍ତି ବିଶ୍ୱବିଦ୍ୟାଳୟ ମଧ୍ୟ ଅଛି, ଯାହା ଭାରତର ବିଭିନ୍ନ କ୍ଷେତ୍ର ପାଇଁ ପେସାଦାରମାନଙ୍କୁ ପ୍ରସ୍ତୁତ କରୁଥିଲା । ପ୍ରଧାନମନ୍ତ୍ରୀ ଆହୁରି ମଧ୍ୟ ଉଲ୍ଲେଖ କରିଥିଲେ ଯେ ଭଦୋଦରାରେ ଫାର୍ମା କ୍ଷେତ୍ର, ଇଞ୍ଜିନିୟରିଂ ଏବଂ ଭାରୀ ଯନ୍ତ୍ରପାତି, ରସାୟନ ଏବଂ ପେଟ୍ରୋକେମିକାଲ୍ସ , ଶକ୍ତି କ୍ଷେତ୍ରର ଉପକରଣ ଭଳି ଅନେକ କ୍ଷେତ୍ର ସହ ଜଡ଼ିତ ଅନେକ କମ୍ପାନୀ ଅଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ ବର୍ତ୍ତମାନ ଏହି ସମଗ୍ର ଅଞ୍ଚଳ ମଧ୍ୟ ଭାରତରେ ବିମାନ ଚଳାଚଳ ଉତ୍ପାଦନର ଏକ ପ୍ରମୁଖ କେନ୍ଦ୍ର ହେବାକୁ ଯାଉଛି । ଆଧୁନିକ ଶିଳ୍ପ ନୀତି ଏବଂ ନିଷ୍ପତ୍ତି ପାଇଁ ଶ୍ରୀ ମୋଦୀ ଗୁଜରାଟ ସରକାର ଏବଂ ଏହାର ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲ ଏବଂ ତାଙ୍କ ସମଗ୍ର ଦଳକୁ ଅଭିନନ୍ଦନ ଜଣାଇଥିଲେ ।
ଭଦୋଦରା ମଧ୍ୟ ଭାରତର ଏକ ଗୁରୁତ୍ୱପୂର୍ଣ୍ଣ ସାଂସ୍କୃତିକ ସହର ବୋଲି ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ ସ୍ପେନର ସମସ୍ତ ବନ୍ଧୁମାନଙ୍କୁ ସ୍ୱାଗତ କରି ସେ ଆନନ୍ଦିତ । “ଭାରତ ଏବଂ ସ୍ପେନ୍ ମଧ୍ୟରେ ସାଂସ୍କୃତିକ ସମ୍ପର୍କର ଏକ ସ୍ୱତନ୍ତ୍ର ମହତ୍ତ୍ୱ ରହିଛି”, ବୋଲି ପ୍ରଧାନମନ୍ତ୍ରୀ କହିଥିଲେ । ସେ ମତ ଦେଇଥିଲେ ଯେ ଫାଦର କାର୍ଲୋସ ଭାଲେ ସ୍ପେନରୁ ଆସି ଗୁଜରାଟରେ ବସବାସ କରିଥିଲେ ଏବଂ ତାଙ୍କ ଜୀବନର ପଚାଶ ବର୍ଷ ବିତାଇଥିଲେ । ସେ ଆହୁରି ମଧ୍ୟ କହିଛନ୍ତି ଯେ ଫାଦର ଭାଲେ ତାଙ୍କ ଚିନ୍ତାଧାରା ଏବଂ ଲେଖା ଦ୍ୱାରା ସଂସ୍କୃତିକୁ ସମୃଦ୍ଧ କରିଥିଲେ । ଫାଦର ଭାଲେଙ୍କୁ ସାକ୍ଷାତ କରିବାର ସୌଭାଗ୍ୟ ମଧ୍ୟ ତାଙ୍କୁ ମିଳିଥିଲା ଏବଂ ତାଙ୍କ ମହାନ ଅବଦାନ ପାଇଁ ଭାରତ ସରକାର ତାଙ୍କୁ ପଦ୍ମଶ୍ରୀ ସମ୍ମାନରେ ସମ୍ମାନିତ କରିଥିଲେ ବୋଲି ଶ୍ରୀ ମୋଦୀ କହିଥିଲେ ।
ସ୍ପେନରେ ମଧ୍ୟ ଯୋଗ ଅତ୍ୟନ୍ତ ଲୋକପ୍ରିୟ ଏବଂ ଭାରତରେ ସ୍ପେନିଶ ଫୁଟବଲକୁ ମଧ୍ୟ ପସନ୍ଦ କରାଯାଉଛି ବୋଲି ଶ୍ରୀ ମୋଦୀ ଉଲ୍ଲେଖ କରିଥିଲେ । ରିୟଲ ମାଦ୍ରିଦ ଓ ବାର୍ସିଲୋନା କ୍ଲବ ମଧ୍ୟରେ ଗତକାଲି ଖେଳାଯାଇଥିବା ଫୁଟବଲ ମ୍ୟାଚ୍ ସମ୍ପର୍କରେ ଶ୍ରୀ ମୋଦୀ କହିଛନ୍ତି ଯେ ବାର୍ସିଲୋନାର ମହାନ ବିଜୟ ଭାରତରେ ମଧ୍ୟ ଚର୍ଚ୍ଚାର ବିଷୟ ଥିଲା ଏବଂ ସ୍ପେନ୍ ଭଳି ଭାରତରେ ମଧ୍ୟ ଉଭୟ କ୍ଲବର ପ୍ରଶଂସକଙ୍କ ଉତ୍ସାହ ସମାନ ଥିଲା। ଭାରତ ଏବଂ ସ୍ପେନର ବହୁମୁଖୀ ଭାଗିଦାରୀ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ, ଖାଦ୍ୟ, ଚଳଚ୍ଚିତ୍ର ହେଉ କିମ୍ବା ଫୁଟବଲ ହେଉ, ଆମ ଲୋକମାନଙ୍କ ମଧ୍ୟରେ ସୁଦୃଢ଼ ସମ୍ପର୍କ ସର୍ବଦା ଆମ ସମ୍ପର୍କକୁ ସୁଦୃଢ଼ କରିଛି। ୨୦୨୬କୁ ଭାରତ – ସ୍ପେନ ସଂସ୍କୃତି, ପର୍ଯ୍ୟଟନ ଏବଂ ଏଆଇ ବର୍ଷ ଭାବେ ପାଳନ କରିବାକୁ ନିଷ୍ପତ୍ତି ନେଇଥିବାରୁ ଶ୍ରୀ ମୋଦୀ ଖୁସି ବ୍ୟକ୍ତ କରିଛନ୍ତି।
ବକ୍ତବ୍ୟ ସମାପ୍ତ କରିବା ସହିତ ପ୍ରଧାନମନ୍ତ୍ରୀ ଆଜିର କାର୍ଯ୍ୟକ୍ରମ ଭାରତ ଏବଂ ସ୍ପେନ ମଧ୍ୟରେ ଅନେକ ନୂତନ ମିଳିତ ସହଯୋଗ ପ୍ରକଳ୍ପକୁ ପ୍ରେରଣା ଯୋଗାଇବ ବୋଲି ବିଶ୍ୱାସ ପ୍ରକଟ କରିଥିଲେ । ସେ ସ୍ପେନର ଶିଳ୍ପଗୁଡିକୁ ଏବଂ ଉଦ୍ଭାବକମାନଙ୍କୁ ନିମନ୍ତ୍ରଣ କରିଥିଲେ ଏବଂ ସେମାନଙ୍କୁ ଭାରତ ଆସି ଦେଶର ବିକାଶ ଯାତ୍ରାରେ ଅଂଶୀଦାର ହେବାକୁ ଉତ୍ସାହିତ କରିଥିଲେ ।
ଅନ୍ୟମାନଙ୍କ ମଧ୍ୟରେ ଗୁଜରାଟର ରାଜ୍ୟପାଳ ଶ୍ରୀ ଆଚାର୍ଯ୍ୟ ଦେବବ୍ରତ, ଗୁଜରାଟର ମୁଖ୍ୟମନ୍ତ୍ରୀ ଶ୍ରୀ ଭୂପେନ୍ଦ୍ର ପଟେଲ, କେନ୍ଦ୍ର ପ୍ରତିରକ୍ଷା ମନ୍ତ୍ରୀ ଶ୍ରୀ ରାଜନାଥ ସିଂହ ଏବଂ କେନ୍ଦ୍ର ବୈଦେଶିକ ବ୍ୟାପାର ମନ୍ତ୍ରୀ ଶ୍ରୀ ଏସ୍. ଜୈଶାକର ଉପସ୍ଥିତ ଥିଲେ ।
ପୃଷ୍ଠଭୂମି
ସି- ୨୯୫ କାର୍ଯ୍ୟକ୍ରମ ଅଧୀନରେ ସମୁଦାୟ ୫୬ଟି ବିମାନ ଯୋଗାଇ ଦିଆଯିବ, ସେଥିମଧ୍ୟରୁ ୧୬ଟି ସିଧାସଳଖ ସ୍ପେନ୍ରୁ ଏୟାରବସ୍ ଏବଂ ବାକି ୪୦ଟି ଭାରତରେ ନିର୍ମିତ ହେବ।
ଟାଟା ଆଡଭାନ୍ସଡ୍ ସିଷ୍ଟମ୍ ଲିମିଟେଡ୍ ଭାରତରେ ଏହି ୪୦ଟି ବିମାନ ନିର୍ମାଣ କରିବାର ଦାୟିତ୍ୱ ନେଇଛି। ଏହି କେନ୍ଦ୍ର ଭାରତରେ ସାମରିକ ବିମାନ ପାଇଁ ପ୍ରଥମ ଘରୋଇ କ୍ଷେତ୍ରର ଫାଇନାଲ ଆସେମ୍ବଲି ଲାଇନ୍ (ଏଫ୍ଏଏଲ୍) ପାଲଟିଛି। ଏଥିରେ ନିର୍ମାଣଠାରୁ ଆରମ୍ଭ କରି ଆସେମ୍ବଲି, ପରୀକ୍ଷା ଓ ଯୋଗ୍ୟତା ଠାରୁ ଆରମ୍ଭ କରି ବିମାନର ସମ୍ପୂର୍ଣ୍ଣ ଜୀବନଚକ୍ରର ଡେଲିଭରି ଓ ରକ୍ଷଣାବେକ୍ଷଣ ପର୍ଯ୍ୟନ୍ତ ଏକ ସମ୍ପୂର୍ଣ୍ଣ ଇକୋସିଷ୍ଟମର ସମ୍ପୂର୍ଣ୍ଣ ବିକାଶ କରାଯିବ।
ଟାଟା ବ୍ୟତୀତ ଭାରତ ଇଲେକ୍ଟ୍ରୋନିକ୍ସ ଲିମିଟେଡ୍ ଓ ଭାରତ ଡାଇନାମିକ୍ସ ଲିମିଟେଡ୍ ଭଳି ଅଗ୍ରଣୀ ପ୍ରତିରକ୍ଷା ରାଷ୍ଟ୍ରାୟତ୍ତ ଉଦ୍ୟୋଗ ଏବଂ ଘରୋଇ ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ ଏହି କାର୍ଯ୍ୟକ୍ରମରେ ଯୋଗଦାନ କରିବେ। ଏହା ପୂର୍ବରୁ ୨୦୨୨ ଅକ୍ଟୋବରରେ ପ୍ରଧାନମନ୍ତ୍ରୀ ଭଦୋଦରା ଫାଇନାଲ ଆସେମ୍ବଲି ଲାଇନ୍ (ଏଫ୍ଏଏଲ୍)ର ଶିଳାନ୍ୟାସ କରିଥିଲେ।
