ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଅର୍ଥନୈତିକ ବ୍ୟାପାର ସଂକ୍ରାନ୍ତ କ୍ୟାବିନେଟ୍ କମିଟି ଅରୁଣାଚଳ ପ୍ରଦେଶର ଶି ୟୋମି ଜିଲ୍ଲାରେ ହିଓ ଜଳ ବିଦ୍ୟୁତ ପ୍ରକଳ୍ପ (ଏଚଇପି) ନିର୍ମାଣ ପାଇଁ ୧୯୩୯ କୋଟି ଟଙ୍କା ନିବେଶକୁ ଅନୁମୋଦନ କରିଛି । ପ୍ରକଳ୍ପର ସମ୍ପୂର୍ଣ୍ଣତା ଅବଧି ୫୦ ମାସ ହେବ ବୋଲି ଆକଳନ କରାଯାଇଛି।
୨୪୦ ମେଗାୱାଟ (୩ x ୮୦ ମେଗାୱାଟ୍) କ୍ଷମତା ବିଶିଷ୍ଟ ଏହି ପ୍ରକଳ୍ପ ୧୦ ମିଲିୟନ୍ ୟୁନିଟ୍ (ଏମୟୁ) ଶକ୍ତି ଉତ୍ପାଦନ କରିବ। ଏହି ପ୍ରକଳ୍ପରୁ ଉତ୍ପାଦିତ ବିଦ୍ୟୁତ୍ ଅରୁଣାଚଳ ପ୍ରଦେଶ ରାଜ୍ୟରେ ବିଦ୍ୟୁତ ଯୋଗାଣ ସ୍ଥିତିରେ ଉନ୍ନତି ଆଣିବାରେ ସହାୟକ ହେବ ଏବଂ ଜାତୀୟ ଗ୍ରିଡ୍ ର ସନ୍ତୁଳନ ରକ୍ଷା କରିବାରେ ମଧ୍ୟ ସହାୟକ ହେବ।
ନର୍ଥ ଇଷ୍ଟର୍ଣ୍ଣ ଇଲେକ୍ଟ୍ରିକ୍ ପାୱାର କର୍ପୋରେସନ୍ ଲିମିଟେଡ୍ (ନିପକୋ) ଏବଂ ଅରୁଣାଚଳ ପ୍ରଦେଶ ସରକାରଙ୍କ ମିଳିତ ଉଦ୍ୟୋଗ କମ୍ପାନୀ ମାଧ୍ୟମରେ ଏହି ପ୍ରକଳ୍ପ କାର୍ଯ୍ୟକାରୀ ହେବ। ଭାରତ ସରକାର ସକ୍ଷମ ଭିତ୍ତିଭୂମି ଅଧୀନରେ ସଡ଼କ, ପୋଲ ଏବଂ ଆନୁଷଙ୍ଗିକ ଟ୍ରାନ୍ସମିସନ୍ ଲାଇନ୍ ନିର୍ମାଣ ପାଇଁ ବଜେଟ୍ ସହାୟତା ବାବଦରେ ୧୨୭.୨୮ କୋଟି ଟଙ୍କା ପ୍ରଦାନ କରିବେ ଏବଂ ରାଜ୍ୟର ଇକ୍ୱିଟି ଅଂଶ ପାଇଁ ୧୩୦.୪୩ କୋଟି ଟଙ୍କାର କେନ୍ଦ୍ରୀୟ ଆର୍ଥିକ ସହାୟତା ପ୍ରଦାନ କରିବେ।
ରାଜ୍ୟକୁ କ୍ଷେତ୍ରର ଉଲ୍ଲେଖନୀୟ ଭିତ୍ତିଭୂମି ସଂରଚନାରେ ଉନ୍ନତି ଏବଂ ସାମାଜିକ-ଅର୍ଥନୈତିକ ବିକାଶ ସହିତ ୧୨% ମାଗଣା ବିଜୁଳି ଏବଂ ସ୍ଥାନୀୟ ଅଞ୍ଚଳ ବିକାଶ ପାଣ୍ଠି (ଏଲଏଡିଏଫ୍)ରେ ଆଉ ୧% ଲାଭ ହେବ।
ଆତ୍ମନିର୍ଭର ଭାରତ ଅଭିଯାନର ଲକ୍ଷ୍ୟ ଓ ଉଦ୍ଦେଶ୍ୟ ଅନୁଯାୟୀ ଏହି ପ୍ରକଳ୍ପ ସ୍ଥାନୀୟ ଯୋଗାଣକାରୀ/ ଉଦ୍ୟୋଗ/ ଏମ୍ଏସ୍ଏମ୍ଇଗୁଡ଼ିକୁ ବିଭିନ୍ନ ସୁବିଧା ପ୍ରଦାନ କରିବ। ନିର୍ମାଣ ପର୍ଯ୍ୟାୟରେ ନିପ୍କୋର ପ୍ରାୟ ୨୦୦ କର୍ମଚାରୀ ଏବଂ ଠିକାଦାରଙ୍କ ପ୍ରାୟ ୪୦୦ ଶ୍ରମିକଙ୍କ ଆବଶ୍ୟକତା ରହିଛି। ଏହାବ୍ୟତୀତ ଏହି ପ୍ରକଳ୍ପ କାର୍ଯ୍ୟକାରୀ ସମୟରେ ବିଭିନ୍ନ କ୍ଷୁଦ୍ର ଚୁକ୍ତି ଓ ସେବା ମାଧ୍ୟମରେ ସ୍ଥାନୀୟ ସମୁଦାୟ ପାଇଁ ଉଲ୍ଲେଖନୀୟ ପରୋକ୍ଷ ନିଯୁକ୍ତି ସୁଯୋଗ ସୃଷ୍ଟି କରିବ। ଏହି ପ୍ରକଳ୍ପ ପରିଚାଳନା ଏବଂ ରକ୍ଷଣାବେକ୍ଷଣ ସମୟରେ ନିଯୁକ୍ତି ମଧ୍ୟ ପ୍ରଦାନ କରିବ । ଆହୁରି ମଧ୍ୟ ଏହାର ବିକାଶ ଦ୍ୱାରା ପରିବହନ, ପର୍ଯ୍ୟଟନ, କ୍ଷୁଦ୍ର ବ୍ୟବସାୟ ଭଳି କ୍ଷେତ୍ରରେ ନିଯୁକ୍ତି ସୁଯୋଗ ସୃଷ୍ଟି ହେବ।