ଭୁବନେଶ୍ବର: ଖୋର୍ଦ୍ଧା ଜିଲ୍ଲା ଚିଲିକା ନିର୍ବାଚନ ମଣ୍ଡଳି ଅନ୍ତର୍ଗତ ବାଲୁଗାଁ ଏନଏସି ରେ ବିଜେଡି କୁ ଲାଗିଛି ବଡ଼ ଝଟକା। ବର୍ତ୍ତମାନ ଏନଏସି ଅଧ୍ୟକ୍ଷା ସୁକାନ୍ତି ପାଇକରାୟଙ୍କ ପୁତ୍ର ତଥା ବରିଷ୍ଠ ବିଜେଡି ସଂଗଠକ ସନ୍ତୋଷ ପାଇକରାୟ ନିଜର ଶତାଧିକ ସମର୍ଥକଙ୍କ ସହ ପଦ୍ମ ଧରିଛନ୍ତି।
ଆଜି ଅପରାହ୍ନରେ ସ୍ଥାନୀୟ ବିଧାୟକ ତଥା ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କ ଭୁବନେଶ୍ୱରସ୍ଥିତ ସରକାରୀ ବାସଭବନରେ ଅନୁଷ୍ଠିତ ମିଶ୍ରଣ ପର୍ବରେ ବିଜେପିରେ ଯୋଗ ଦେଇଛନ୍ତି ସନ୍ତୋଷ। ଏହି ଅବସରରେ ମନ୍ତ୍ରୀଙ୍କ ସମେତ ଖୋର୍ଦ୍ଧା ଜିଲ୍ଲା ବିଜେପି ସଭାପତି ରଶ୍ମିରଂଜନ ମହାପାତ୍ର, ବାଲୁଗାଁ ନଗର ମଣ୍ଡଳ ବିଜେପି ସଭାପତି ନିରଞ୍ଜନ ସେଠୀ, ସଂଗଠକ ରଞ୍ଜିତ ବଡ଼ଜେନା ଏବଂ ବାଲୁଗାଁ ଏନଏସିର ବିଜେପି କର୍ମୀମାନେ ଉପସ୍ଥିତ ଥିଲେ।
ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କ ବଳିଷ୍ଠ ନେତୃତ୍ୱରେ ପ୍ରଭାବିତ ହୋଇ ବିଜେପି ରେ ଯୋଗଦାନ କରିଥିବା ସନ୍ତୋଷ କହିଛନ୍ତି। ବର୍ତ୍ତମାନ ବାଲୁଗାଁ ଏନଏସିରେ ବିଜେଡି ଏକପ୍ରକାର ଶୂନ ହୋଇଯାଇଛି। ତେବେ ସନ୍ତୋଷ ଜଣେ ଦକ୍ଷ ଯୁବ ସଂଗଠକ ହୋଇଥିବାରୁ ତାଙ୍କ ସହ ବାଲୁଗାଁ ଏନଏସି ବିଜେଡି ର ସମସ୍ତ ଆଗଧାଡିର ନେତା ମଧ୍ୟ ବିଜେପି ରେ ସାମିଲ ହୋଇଛନ୍ତି।
ଏହା ଦ୍ୱାରା ଆଗାମୀ ଦିନରେ ବାଲୁଗାଁ ଏନଏସିରେ ବିଜେପି ର ଶକ୍ତି ବଢିବା ସହ ବିଜେଡି ନିଶ୍ଚିହ୍ନ ହୋଇଯିବ ବୋଲି ଜଣାପଡିଛି।
