ସୀତାରାମ ଅଗ୍ରୱାଲ
ଚିଲିକା: ଖୋର୍ଦ୍ଧା ଜିଲ୍ଲା ଚିଲିକା ତହସିଲ ଅନ୍ତର୍ଗତ ମାନସିଂହପୁର ଗ୍ରାମ ଘୋଡାଦୌଡ଼ ଜେଟିଠାରେ ଦୀର୍ଘବର୍ଷ ଧରି ସରକାରୀ ଜାଗାରେ ବେପାରୀମାନେ ବେପାର ବଣିଜ ଚଳାଇ ଆସୁଥିଲେ। ଯାହାକୁ ନେଇ ଦ୍ଵନ୍ଦ ଲାଗିରହିଥିବା ବେଳେ ଗ୍ରାମବାସୀଙ୍କ ପକ୍ଷରୁ ଜବର ଦଖଲ ଉଚ୍ଛେଦ ନେଇ ଉଚ୍ଚ ନ୍ୟାୟାଳୟରେ ଅଭିଯୋଗ ହୋଇଥିଲା। ଏଥିସହିତ ବେଆଇନି ଦୋକାନ ଘର ଉଚ୍ଛେଦ କରିବା ନେଇ ଗତ ମାର୍ଚ୍ଚ ୨୫ ତାରିଖରେ ଚିଲିକା ତହସିଲଦାର ଦିଲିପି କୁମାର ଷଡ଼ଙ୍ଗୀ ଏକ ନୋଟିସ ମଧ୍ୟ ଜାରି କରିଥିଲେ।
ସରକାରୀ ଜାଗାକୁ ଦଖଲ କରି ବସିଥିବା କିଛି ବ୍ୟକ୍ତି ନିଜେ ନିଜ ପକ୍ଷରୁ କୌଣସି ପଦକ୍ଷେପ ନେଇ ନଥିବା ବେଳେ ସରକାରୀ ନୋଟିସକୁ ବେଖାତିର କରି ଆସୁଥିଲେ। ଯାହାଫଳରେ ସୋମବାର ପୂର୍ବାହ୍ନରେ ଉଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶ କ୍ରମେ ଖୋର୍ଦ୍ଧା ଉପଜିଲ୍ଲାପାଳଙ୍କ ତତ୍ୱବାଧାନରେ ଚିଲିକା ତହସିଲଦାର ଶ୍ରୀ ଷଡ଼ଙ୍ଗୀ ମାନସିଂହପୁର ଗ୍ରାମ ଘୋଡାଦୌଡ଼ ଚିଲିକା କୁଳ ଜେଟି ଠାରେ ବେଆଇନି ଭାବେ ଗଢି ଉଠିଥିବା ଦୋକାନ ଘର ଗୁଡିକୁ ଉଚ୍ଛେଦ କରିଛନ୍ତି।
ଉକ୍ତ ଉଚ୍ଛେଦ କାର୍ଯ୍ୟକ୍ରମରେ ମାନସିଂହପୁର ଗ୍ରାମର ସରପଞ୍ଚଙ୍କ ପ୍ରତିନିଧି ରତ୍ନାକର ବେହେରା, ଟାଙ୍ଗି ଥାନା ଓ କୁହୁଡ଼ି ଫାଣ୍ଡି ପୋଲିସ କର୍ମଚାରୀଙ୍କ ସମେତ ଗ୍ରାମବାସୀ ମାନେ ଉପସ୍ଥିତ ଥିଲେ।
