ଦୁଷ୍ମନ୍ତ କୁମାର ପଣ୍ଡା
କଳାହାଣ୍ଡି: ସରକାର ମହିଳା ମାନଙ୍କୁ ସଶକ୍ତିକରଣ କରିବା ପାଇଁ ସମଗ୍ର ରାଜ୍ୟରେ ମହିଳା ସ୍ବୟଂ ସହାୟକ ଗୋଷ୍ଠୀ ମାନଙ୍କୁ ବିଭିନ୍ନ ସହାୟତା ପ୍ରଦାନ କରୁଛନ୍ତି। ସେଥିପାଇଁ କେନ୍ଦ୍ର ସରକାରଙ୍କ ଢାଞ୍ଚାରେ ରାଜ୍ୟ ସରକାର ମଧ୍ୟ ନୂତନ ଭାବେ ମିଶନ ଶକ୍ତି ବିଭାଗ ଆରମ୍ଭ କରି ସେହି ବିଭାଗ ଅଧୀନରେ ମହିଳା ସ୍ବୟଂ ସହାୟକ ଗୋଷ୍ଠୀ ମାନଙ୍କୁ ପରିଚାଳନା କରୁଥିବା ଜଣାପଡିଛି। ଆଗରୁ ଚାଲିଥିବା ଓଡ଼ିଶା ଜୀବିକା ମିଶନ ମଧ୍ୟ ଏହି ମିଶନ ଶକ୍ତି ବିଭାଗ ଅଧିନକୁ ଚାଳିଆସିଥିବା ପ୍ରକାଶ।
ମିଶନ ଶକ୍ତି ବିଭାଗ ଆରମ୍ଭ କରିବା ଆଗରୁ କେବଳ ସମାଜ କଲ୍ୟାଣ ବିଭାଗ ଅଧିନରେ ପରିଚାଳିତ ହେଉଥିବା ସମନ୍ଵିତ ଶିଶୁ ବିକାଶ ବିଭାଗ ଅଧିନସ୍ଥ ଅଙ୍ଗନୱାଡି କର୍ମୀ ମାନଙ୍କ ଦ୍ବାରା ମହିଳା ସ୍ବୟଂ ସହାୟକ ଗୋଷ୍ଠୀ ଗଠନ କରାଯାଉଥିଲା। ଏବେ ସେହି ଅଙ୍ଗନୱାଡି କର୍ମୀ ମାନେ ସ୍ବୟଂ ସହାୟକ ଗୋଷ୍ଠୀ ମାନଙ୍କୁ ପରିଚାଳନାରେ ଅଲୋଡା ହୋଇ ପଡିଛନ୍ତି।
ମିଶନ ଶକ୍ତି ବିଭାଗ ଗଠନ ହେବା ପରେ ମହିଳା ସ୍ବୟଂ ସହାୟକ ଗୋଷ୍ଠୀ ଗୁଡିକ ମିଶନ ଶକ୍ତି ବିଭାଗ ଅଧୀନରେ ପରିଚାଳିତ ହେବା ସହ ଜିଲ୍ଲାରେ ପ୍ରକଳ୍ପ ସଂଯୋଜକଙ୍କ ସମେତ ଅନ୍ୟାନ୍ୟ ପଦାଧିକାରୀ ଏବଂ ବ୍ଲକ ସ୍ତରରେ ବ୍ଲକ ସଂଯୋଜକଙ୍କ ସମେତ ଅନ୍ୟାନ୍ୟ ପଦାଧିକାରୀଙ୍କ ଦ୍ବାରା ମହିଳା ସ୍ବୟଂ ସହାୟକ ଗୋଷ୍ଠୀ ଗୁଡିକ ପରିଚାଳିତ ହେଉଥିବା ଜଣାପଡିଛି। ସେହିପରି ମହିଳା ସ୍ବୟଂ ସହାୟକ ଗୋଷ୍ଠୀ ଗୁଡିକୁ ନେଇ ପ୍ରତି ଗ୍ରାମ ସ୍ତରରେ କ୍ଲଷ୍ଟର, ଗ୍ରାମ ପଞ୍ଚାୟତ ସ୍ତରରେ ପଞ୍ଚାୟତ ସ୍ତରୀୟ ମହାସଂଘ, ବ୍ଲକସ୍ତରରେ ବ୍ଲକସ୍ତରୀୟ ମହାସଂଘ ଏବଂ ଜିଲ୍ଲା ସ୍ତରରେ ଜିଲ୍ଲା ସ୍ତରୀୟ ମହାସଂଘ ଗଠିତ କରାଯାଇଥିବା ବିଭାଗୀୟ ସୂତ୍ର ରୁ ପ୍ରକାଶ।
କଳାହାଣ୍ଡି ଜିଲ୍ଲାରେ ଥିବା ୨୨୫୩ ଖଣ୍ଡ ଗ୍ରାମରେ ମୋଟ ୨ ଲକ୍ଷ ୧୨ ହଜାର ୧୫୬ ଜଣ ମହିଳା ସଂଶ୍ଳିଷ୍ଟ ହୋଇ ୨୦ ହଜାର ୫୪୧ ଗୋଟି ମହିଳା ସ୍ବୟଂ ସହାୟକ ଗୋଷ୍ଠୀ ଗଠିତ ହୋଇ ଥିବା ବେଳେ ସେହି ମହିଳା ସ୍ବୟଂ ସହାୟକ ଗୋଷ୍ଠୀ ଗୁଡିକୁ ନେଇ ୨୨୫୩ ରୁ ଅଧିକ କ୍ଲଷ୍ଟର, ୩୧୦ ଗୋଟି ଗ୍ରାମ ପଞ୍ଚାୟତରେ ୩୧୦ ଗୋଟି ଗ୍ରାମପଞ୍ଚାୟତ ସ୍ତରୀୟ ମହାସଂଘ, ଜିଲ୍ଲାର ୧୩ ଟି ବ୍ଲକ ଓ ଗୋଟିଏ ସହରାଞ୍ଚଳରେ ୧୪ ଗୋଟି ବ୍ଲକ ସ୍ତରୀୟ ମହାସଂଘ ଗଠିତ ହୋଇଥିବା ସରକାରୀ ସୂତ୍ରରୁ ଜଣାପଡିଛି।
ସରକାରଙ୍କ ଯୋଜନା ଅନୁସାରେ ପ୍ରତି କ୍ଲଷ୍ଟର ମଧ୍ୟରେ ଗୋଷ୍ଠୀଗତ ସହଯୋଗ ପାଇଁ ବ୍ଲକ ସ୍ତରୀୟ ମହାସଂଘ ତରଫରୁ ସିଆରପି, ମାଷ୍ଟର ବୁକ କିପର ଓ ବ୍ୟାଙ୍କ ମିତ୍ର ଭଳି ବିଭିନ୍ନ ପଦବୀ ଗୁଡିକରେ ନିଯୁକ୍ତି ଦେବାକୁ ମିଶନ ଶକ୍ତି ଅଧିନସ୍ଥ ଓଡ଼ିଶା ଜୀବିକା ମିଶନ ତରଫରୁ ପତ୍ର ସଂଖ୍ୟା ୧୩୪୩ ତା ୨୧.୧୦.୨୦୨୨ ଯୋଗେ ବ୍ୟବସ୍ଥା ଥିବା ବେଳେ ସେସବୁ ପଦବୀ ପାଇଁ କଳାହାଣ୍ଡି ଜିଲ୍ଲାରେ ପ୍ରାର୍ଥୀ ଚୟନରେ ବ୍ୟାପକ ଅନିୟମିତତା ଓ ପ୍ରିୟାପ୍ରୀତି ତୋଷଣ କାରବାର ହୋଇଥିବା ଅଭିଯୋଗ ହେଉଛି।
ପ୍ରତି ପଦବୀ ପାଇଁ ମହିଳା ସ୍ବୟଂ ସହାୟକ ଗୋଷ୍ଠୀର ସଦସ୍ୟ ଥିବା ଜରୁରୀ ଥିବା ବେଳେ ଶିକ୍ଷାଗତ ଯୋଗ୍ୟତାକୁ ମଧ୍ୟ ଦେଖା ଯାଉଥିବା ବେଳେ ଅନେକ କ୍ଷେତ୍ରରେ ଅର୍ଥ କାରବାର ହେଉଥିବା ମଧ୍ୟ ଅଭିଯୋଗ ହେଉଛି। ବ୍ଲକ ସ୍ତରୀୟ ମହାସଂଘରେ ବିଭିନ୍ନ ଅଞ୍ଚଳରେ ଥିବା ମହିଳା ସ୍ବୟଂ ସହାୟକ ଗୋଷ୍ଠୀର ପ୍ରତିନିଧି ଏବଂ ଗ୍ରାମ ପଞ୍ଚାୟତ ସ୍ତରରେ ଥିବା କାର୍ଯ୍ୟ ନିର୍ବାହୀ ସଦସ୍ୟା ମାନେ ପ୍ରାର୍ଥୀ ମାନଙ୍କ ପାଖକୁ ଯାଇ ଅର୍ଥ ଦାବି କରୁଥିବା ଅନେକ ଅଭିଯୋଗ ହୋଇଛି।
ଅନେକ ଯୋଗ୍ୟ ପ୍ରାର୍ଥୀଙ୍କୁ ବାଦ ଦିଆଯାଇଥିବା ବେଳେ କମ ଦିନରେ ପୁରୁଣା ମହିଳା ସ୍ବୟଂ ସହାୟକ ଗୋଷ୍ଠୀ ରେ ସଦସ୍ୟା ହୋଇ ପଦବୀ ହାତେଇ ନେଇଥିବା ମଧ୍ୟ ଅଭିଯୋଗ ହୋଇଛି। ଅନ୍ୟ ପକ୍ଷରେ ମହିଳା ସ୍ବୟଂ ସହାୟକ ଗୋଷ୍ଠୀ ର ବ୍ଲକ ସ୍ତରୀୟ ମହାସଂଘ ରେ ଥିବା ସଭାପତି ଓ ସମ୍ପାଦକ ଙ୍କ ସ୍ବାକ୍ଷର ରେ ସମୁଦାୟ କାର୍ଯ୍ୟ ହେଉଥିବା କୁହାଯାଉଥିବା ବେଳେ ସେମାନଙ୍କୁ ଢାଳ କରି ବ୍ଲକ ସଂଯୋଜକ ଓ ଅନ୍ୟାନ୍ୟ ପଦାଧିକାରୀ ମାନେ ସେସବୁ କାରବାର କରୁଥିବା ଅଭିଯୋଗ ହେଉଛି। କେବଳ ନାମକୁ ମାତ୍ର ଇଂରାଜୀ ରେ ଦସ୍ତଖତ କରୁଥିବା ସେହି ମହିଳା ସ୍ବୟଂ ସହାୟକ ଗୋଷ୍ଠୀ ର ବ୍ଲକ ସ୍ତରୀୟ ମହାସଂଘ ରେ ଥିବା ସଭାପତି ଓ ସମ୍ପାଦକ କିପରି ଭାବେ ଏଟତେ ଗୁଡାଏ ଇଂରାଜୀ କାଗଜାତ ପ୍ରସ୍ତୃତ କରିବା ସହିତ ଯୁକ୍ତ ଦୁଇ ଓ ବିଏ ଇତ୍ୟାଦି ଉଚ୍ଚ ଶିକ୍ଷା ର ସାର୍ଟିଫିକେଟ ଗୁଡିକ ଯାଞ୍ଚ କଲେ ଏବଂ ପ୍ରାର୍ଥୀ ମାନଙ୍କ ଚୟନ ପ୍ରକ୍ରିୟା ସାରିଲେ ତାହା ମୁଖ୍ୟ ପ୍ରଶ୍ନବାଚୀ ସୃଷ୍ଟି ହେଉଛି।
ଏସବୁ ପ୍ରକ୍ରିୟାରୁ ସ୍ପଷ୍ଟ ଯେ, ଯାହା ସବୁ ଅଭିଯୋଗ ହେଉଛି ସେସବୁ ଯଦିଓ ସତ୍ୟ ହୋଇଥାଏ ତେବେ ନିଶ୍ଚିତ ଭାବେ ବ୍ଲକ ସ୍ତରୀୟ ମହାସଂଘର ସଭାପତି ଓ ସମ୍ପାଦକ କେବଳ ସ୍ବାକ୍ଷର ଦେଇଥିବା ବେଳେ ବ୍ଲକ ସଂଯୋଜକ ଓ ଅନ୍ୟାନ୍ୟ ପଦାଧିକାରୀ ମାନେ ସେସବୁ କାରବାର କରୁଥାଇପାରନ୍ତି। ସରକାର ମିଶନ ଶକ୍ତି ମାଧ୍ୟମରେ ମହିଳା ମାନଙ୍କୁ ସଶକ୍ତି କରଣ କରିବାକୁ ଯୋଜନା କରୁଥିବା ବେଳେ କେତେକ ସ୍ଵାର୍ଥବାଦୀ ପଦଧିକାରୀଙ୍କ ଲାଭ ଖୋର ମନୋବୃତି ଯୋଗୁ ଯୋଜନାର ସଫଳ ରୂପାୟନ ହୋଇ ପାରୁ ନଥିବା ବୁଦ୍ଧିଜୀବି ମହଲରେ ଅଭିଯୋଗ ହେଉଛି।
