କଟକ: ପୁରୁଣା ସହର କଟକରୁ ବାହାରୁ ଥିବା ଅଳିଆ ଆବର୍ଜନା ଏବେ ସେହି ଲୋକଙ୍କର କାମରେ ଆସିବ। ଏହି ବ୍ୟର୍ଜ ବସ୍ତୁରୁ ବାହାରିବ ରନ୍ଧନ ଗ୍ୟାସ। ଏଥିପାଇଁ କଟକ ମହାନଗର ନିଗମ ଏବଂ ଅଏଲ ଇଣ୍ଡିଆ ମଧ୍ୟରେ ବୁଝାମଣା ସ୍ବାକ୍ଷରିତ ହୋଇଛି। ଏଥିରେ ଗୃହ ଓ ନଗର ଉନ୍ନୟନ ମନ୍ତ୍ରୀ କୃଷ୍ଣ ଚନ୍ଦ୍ର ମହାପାତ୍ର ଯୋଗଦେଇଥିଲେ।
ଏହି ବୁଝାମଣା ଅନୁସାରେ କଟକ ମହାନଗର ଅଏଲ ଇଣ୍ଡିଆକୁ ପ୍ରତିଦିନ ଦୁଇ ଶହ ଟନ ଓଦା ଅଳିଆ ଯୋଗାଇଦେବ। ଏଥିରେ କଂପାନୀ ପ୍ରକ୍ରିୟାକରଣ କରି ଦୈନିକ ଛଅ ଶହ ଟନ ଜାଳେଣି ଗ୍ୟାସ ଉତ୍ପନ କରିବ। ଏଥିପାଇଁ କଂପାନୀକୁ ନିଗମ ଜଗତପୁର ଅଞ୍ଚଳରେ ଏଗାର ଏକର ଜାଗା ଯୋଗାଇ ଦେବ। କଂପାନୀ ଏହି ପ୍ଲାଣ୍ଟ ନିର୍ମାଣ ପାଇଁ ପ୍ରାୟ ଦେଢ ଶହ କୋଟି ଟଙ୍କା ଖର୍ଚ୍ଚ କରିବ।
ଏହି ପ୍ଲାଣ୍ଟରେ ପ୍ରାୟ ନବେ ଜଣଙ୍କୁ ନିଯୁକ୍ତି ସୁଯୋଗ ମିଳିବ। ଏହି ପ୍ଲାଣ୍ଟ ନିର୍ମାଣ ଓ ରକ୍ଷାଣବେକ୍ଷଣ ଅଏଲ ଇଣ୍ଡିଆ କରିବ। କଟକ ମହାନଗର ଆସନ୍ତା ପଚିଶ ବର୍ଷ ପାଇଁ ଆବର୍ଜନା ଯୋଗାଇବା ସହିତ ଜାଗା ପ୍ରଦାନ କରିବ। ତେବେ ବୁଝାମଣା ଅନୁସାରେ କଂପାନୀ କଟକ ମହାନଗରକୁ ଯାଗା ବାବଦରେ ପାଞ୍ଚ ଲକ୍ଷ ଟଙ୍କା ବର୍ଷକୁ ପ୍ରଦାନ କରିବ।
