ମାନସ ପୂର୍ଣ୍ଣ ଆଚାର୍ଯ୍ୟ
ଆସିକା: ଗତ ୨୬ ତାରିଖ ଶନିବାର ଦିନ ୫-ଟି ସଚିବଙ୍କ ଆସିକାଗସ୍ତ ବେଳେ ବଡ଼ଖୋଲି ପଂଚାୟତର ସାନ୍ତରାପୁର ଗ୍ରାମର ଝିଅ ତଥା ବାଲିପଦର ଆଞ୍ଚଳିକ ବିଜ୍ଞାନ ଡିଗ୍ରୀ କଲେଜର ଯୁକ୍ତ ୩ ଦ୍ୱିତୀୟ ବର୍ଷ ଛାତ୍ରୀ ସୁଜାତା ଜେନା ଆସିକା କଲେଜ ଛକ ପଡ଼ିଆରେ ନିଜର ଅସୁବିଧାକୁ ୫-ଟି ସଚିବଙ୍କ ଆଗରେ ଗୁହାରି କରିଥିଲେ। ସେହିଭଳି ନିରାଳ ପଂଚାୟତ ରିସିପୁର ଗ୍ରାମର କୃପାସିନ୍ଧୁ ପଣ୍ଡାଙ୍କ ଏକ ମାତ୍ର ପୁଅ ନବମ ଶ୍ରେଣୀର ଛାତ୍ର ବାବୁଲା ପଣ୍ଡା ଗତ ବର୍ଷ କିରୋସିନ ଷ୍ଟୋଭ ଫାଟି ଶରୀରର ଅଧିକାଂଶ ଅଂଶ ପୋଡି ବହୁ ଅସୁବିଧାରେ ରହିଛନ୍ତି। ସେ ନିଜେ ତାଙ୍କ ମା’ ଙ୍କ ସହ ଆସି ୫-ଟି ସଚିବ ପାଣ୍ଡିଆନଙ୍କୁ ନିଜର ଅଭିଯୋଗ ଶୁଣାଣି କରିଥିଲେ।
ଏଭଳି ଦୁଇ ଜଣ ବିଦ୍ୟାର୍ଥୀଙ୍କ ନିବେଦନକୁ ଗୁରୁତର ଭାବେ ବିଚାର କରି ଦୁଇ ଜଣଙ୍କୁ ୬୦ ହଜାର ଟଙ୍କା ଦେବା ଲାଗି ୫-ଟି ସଚିବ ଆସିକା ବ୍ଲକର ଗୋଷ୍ଠି ଉନ୍ନୟନ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ।
ଗତକାଲି ଆସିକା ବିଧାୟକ ମଞ୍ଜୁଳା ସାଇଁ, ବି ଡି ଓ ଫକୀର ଚରଣ ପରିଡା, ଜିଲ୍ଲା ପରିଷଦ ସଦସ୍ୟା ତନ୍ମୟୀ ନାହାକ, ଅନିମା ପରିଡା, ପ୍ରମୁଖ ଉପସ୍ଥିତ ରହି ଦୁଇ ଜଣଙ୍କୁ ଆସିଥିବା ଆର୍ଥିକ ରାଶି ପ୍ରଦାନ କରିଥିଲେ।
ମୁଖ୍ୟମନ୍ତ୍ରୀ ରିଲିଫ ପାଣ୍ଠିରୁ ପ୍ରତ୍ୟେକଙ୍କୁ ୩୦ ହଜାର ଟଙ୍କା ଲେଖାଏଁ ସହାୟତା ରାଶି ପ୍ରଦାନ କରାଯାଇଛି। ଦୁଇ ପରିବାର ପକ୍ଷରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ୫-ଟି ସଚିବ ଭି.କେ.ପାଣ୍ଡିଆନ, ବିଧାୟିକା, ଜିଲ୍ଲାପରିଷଦ, ସରପଞ୍ଚ, ପଂଚାୟତ ପ୍ରତିନିଧି, ବିଡ଼ିଓଙ୍କୁ କୃତଜ୍ଞତା ଜଣାଇଛନ୍ତି।