ନୂଆଦିଲ୍ଲୀ: ସ୍ୱାମୀ ବିବେକାନନ୍ଦଙ୍କ ଜୟନ୍ତୀ ଅବସରରେ ଚଳିତ ଜାନୁୟାରୀ ମାସ ୧୨ ତାରିଖରେ କର୍ଣ୍ଣାଟକର ହୁବୁଲିଠାରେ ଆୟୋଜିତ ଜାତୀୟ ଯୁବ ଉତ୍ସବକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଉଦ୍ଘାଟନ କରିବେ। ଆଜି ନୂଆଦିଲ୍ଲୀଠାରେ କେନ୍ଦ୍ର କ୍ରୀଡା ଓ ଯୁବ ବ୍ୟାପାର ମନ୍ତ୍ରୀ ଶ୍ରୀ ଅନୁରାଗ ସିଂହ ଠାକୁର ଗଣମାଧ୍ୟମକୁ ଏହି ସୂଚନା ଦେଇଛନ୍ତି। ଷଡବିଂଶ (୨୬ତମ) ଜାତୀୟ ଯୁବ ଉତ୍ସବ ଏଥର କର୍ଣ୍ଣାଟକର ଧାରୱାଡ ଜିଲ୍ଲା ଅନ୍ତର୍ଗତ ହୁବୁଲିଠାରେ ଆୟୋଜିତ ହେଉଛି। ସ୍ୱାମିଜୀଙ୍କ ଜୟନ୍ତୀ ଜାନୁୟାରୀ ୧୨ରୁ ଏହା ଆରମ୍ଭ ହୋଇ ୧୬ତାରିଖ ପର୍ଯ୍ୟନ୍ତ ଚାଲିବ। ଏହି ଉତ୍ସବ କେନ୍ଦ୍ର କ୍ରୀଡା ଓ ଯୁବ ବ୍ୟାପାର ମନ୍ତ୍ରଣାଳୟ ଦ୍ୱାରା ଆୟୋଜିତ ହେଉଛି। କର୍ଣ୍ଣାଟକ ସରକାର ଏହି କାର୍ଯ୍ୟକ୍ରମ ଆୟୋଜନରେ ସହାୟତା ଯୋଗାଉଛନ୍ତି।
ମନ୍ତ୍ରୀ ଅନୁରାଗ ସିଂହ ଠାକୁର କହିଛନ୍ତି ଯେ ଆମେ ଏବେ ଆଜାଦିର ଅମୃତ ମହୋତ୍ସବ ପାଳନ କରୁଛୁ। ଏହି ଅମୃତ କାଳରେ ଯୁବ ସମାଜର ଭୂମିକାକୁ ବଢାଇ ସେମାନଙ୍କୁ ରାଷ୍ଟ୍ର ନିର୍ମାଣ ଦିଗରେ ବ୍ରତୀ କରିବା ଏହି ଉତ୍ସବର ଲକ୍ଷ୍ୟ। ଅତଏବ ଏହି ଅବସରରେ ପ୍ରଧାନମନ୍ତ୍ରୀଙ୍କ ‘ପଞ୍ଚପ୍ରାଣ’ ବାର୍ତ୍ତା ଯୁବବର୍ଗଙ୍କ ମଧ୍ୟରେ ପ୍ରଚାର ଓ ପ୍ରସାର କରିବା ପାଇଁ ଉଦ୍ୟମ କରାଯାଉଛି। ଏ ସମ୍ପର୍କରେ ଅଧିକ ତଥ୍ୟ ପ୍ରଦାନ କରି ସେ କହିଛନ୍ତି ଯେ ଚଳିତବର୍ଷ ଭାରତ ଜି-୨୦ ଅଧ୍ୟକ୍ଷ ପଦ ଗ୍ରହଣ କରିଛି। ଏହା ପ୍ରତ୍ୟେକ ଭାରତୀୟଙ୍କ ପାଇଁ ଏକ ଗର୍ବ ଓ ଗୌରବର ବିଷୟ। ଏଥିପାଇଁ କ୍ରୀଡା ଓ ଯୁବ ସେବା ମନ୍ତ୍ରଣାଳୟ ପକ୍ଷରୁ ଦେଶ ବ୍ୟାପୀ ‘ୱାଇ ଟକ୍ସ’ ଆୟୋଜନ କରାଯାଉଛି। ଏଥିରେ ଜି-୨୦ର ଯୁବ -୨୦ ବା ୟୁଥ-୨୦ କାର୍ଯ୍ୟକ୍ରମ ଗୁରୁତ୍ୱ ପାଇବ। ଜାତୀୟ ଯୁବ ଉତ୍ସବ ୱାଇ-୨୦ କାର୍ଯ୍ୟକ୍ରମରେ ଦେଶବ୍ୟାପୀ ଯୁବକଯୁବତୀମାନଙ୍କୁ ନିୟୋଜିତ କରିବାର ପ୍ରକ୍ରିୟା ଆରମ୍ଭ କରିବ। ଏଥିରେ ୱାଇ-୨୦ର ବିଷୟବସ୍ତୁ ସମ୍ପର୍କରେ ଯୁବ ସମାଜକୁ ସଚେତନ କରାଯିବ। ଏହି ସଚେତନତା ବାର୍ତ୍ତାକୁ ଦେଶର କୋଣ ଅନୁକୋଣରେ ପହଂଚାଇବାକୁ ଉଦ୍ୟମ ହେବ।
ମନ୍ତ୍ରୀ ଶ୍ରୀ ଠାକରୁ କହିଛନ୍ତି ଯେ ଏହି ଯୁବ ଉତ୍ସବ ଏକ ସବୁଜ ମହୋତ୍ସବ ଭାବେ ମଧ୍ୟ ପାଳିତ ହେବାକୁ ଯାଉଛି। ଏଥିରେ ବ୍ୟବହୃତ ସମସ୍ତ ସାମଗ୍ରୀ ଜୈବିକ ଉପାୟରେ ନଷ୍ଟ ହେବା ଯୋଗ୍ୟ। ଏହା ଦ୍ୱାରା ପରିବେଶ ପ୍ରଦୂଷଣର ଅବକାଶ ରହିବ ନାହିଁ। ଏଥିରେ ମଧ୍ୟ ପ୍ରଧାନମନ୍ତ୍ରୀଙ୍କ ‘ମିଶନ ଲାଇଫ’ ଏବଂ ସବୁଜ ଇନ୍ଧନ ଉପରେ ଅଗ୍ରାଧିକାର ପ୍ରଦାନ କରାଯିବ।
୨୬ତମ ଜାତୀୟ ଯୁବ ଉତ୍ସବ କାର୍ଯ୍ୟକ୍ରମର ସବିଶେଷ ବିବରଣୀ ପ୍ରଦାନ କରି କେନ୍ଦ୍ର ଯୁବସେବା ବିଭାଗର ସଚିବ ମିତା ଆର୍ ଲୋଚନ କହିଛନ୍ତି ଯେ କେନ୍ଦ୍ର କ୍ରୀଡା ଓ ଯୁବ ସେବା ମନ୍ତ୍ରଣାଳୟ କର୍ଣ୍ଣାଟକର ଧାରୱାଡ୍ ଜିଲ୍ଲା ଅନ୍ତର୍ଗତ ହୁବୁଲିରେ ଏହାକୁ ଆୟୋଜନ କରୁଛି। କର୍ଣ୍ଣାଟକ ସରକାର ଏଥିପାଇଁ ସହାୟତା ଯୋଗାଉଛନ୍ତି। ପ୍ରଧାନମନ୍ତ୍ରୀ ଏହାକୁ ଉଦ୍ଘାଟନ କରି ଉପସ୍ଥିତ ଯୁବବର୍ଗଙ୍କ ସହିତ ନିଜର ଲକ୍ଷ୍ୟକୁ ବାଣ୍ଟିବେ। ଏହି ଅନୁପମ ପାଞ୍ଚ ଦିନିଆ କାର୍ଯ୍ୟକ୍ରମରେ ଦେଶର ବିଭିନ୍ନ ପ୍ରାନ୍ତରୁ ୭୫୦୦ରୁ ଅଧିକ ଯୁବ ପ୍ରତିନିଧି ନାନାପ୍ରକାର ଶିକ୍ଷଣ କାର୍ଯ୍ୟରେ ଭାଗନେବେ। ଏହି ପ୍ରତିନିଧିମାନେ ନିଜ ନିଜ କ୍ଷେତ୍ରରେ ପ୍ରତିଷ୍ଠିତ ଏବଂ ନେତୃତ୍ୱ ଦେଉଛନ୍ତି । ଚଳିତବର୍ଷ ଉତ୍ସବର ବିଷୟବସ୍ତୁ ହେଲା “ବିକଶିତ ଯୁବ ଶକ୍ତି, ବିକଶିତ ଭାରତ।”
ଏହି ଉତ୍ସବର କାର୍ଯ୍ୟକ୍ରମରେ ଛାତ୍ର କୈନ୍ଦ୍ରିକ ଶାସନ ଓ ଡିଜିଟାଲ ଇଣ୍ଡିଆ ଉପରେ ଆଲୋଚନା, ଦୁଃସାହସିକ କ୍ରୀଡା, ବିଭିନ୍ନ ରାଜ୍ୟର ପାରମ୍ପରିକ କ୍ରୀଡା, ପ୍ରତିଯୋଗିତାମୂଳକ ସାଂସ୍କୃତିକ କାର୍ଯ୍ୟକ୍ରମ ପ୍ରଦର୍ଶନ, ଲୋକସଙ୍ଗୀତ ଗାୟନ ଆଦି ସ୍ଥାନ ପାଇଛି।
ଏଥିପାଇଁ ବିଭିନ୍ନ ରାଜ୍ୟରୁ ଯୁବ କଳାକାର ଗୋଷ୍ଠୀଙ୍କୁ ମଧ୍ୟ ନିମନ୍ତ୍ରଣ କରାଯାଇଛି। ଏହାଛଡା ଏହି ପାଞ୍ଚଦିନିଆ କାର୍ଯ୍ୟକ୍ରମର ସାମାଜିକ ବିକାଶ ମେଳା ଯୁବକୃତି, ଦୁଃସାହସିକ ଉତ୍ସବ, ସୁବିଚାର, ଯୁବ କଳାକାର ଶିବିର ଆଦି ସ୍ଥାନ ପାଇଛି।
ଯୁବ ଶିଖର ସମ୍ମିଳନୀରେ ଏକ ବିଂଶ ଶତାବ୍ଦୀର ଦକ୍ଷତା, ଜଳବାୟୁ ପରିବର୍ତ୍ତନ ଓ ବିପର୍ଯ୍ୟୟ ହ୍ରାସ, ଶାନ୍ତି ପ୍ରତିଷ୍ଠା ଓ ବୁଝାମଣା, ଗଣତନ୍ତ୍ର ଓ ଶାସନରେ ଯୁବ ସମାଜର ଭୂମିକା, ସ୍ୱାସ୍ଥ୍ୟ ଏବଂ ନିରାମୟ ଜୀବନ ଆଦି ପ୍ରସଙ୍ଗ ସ୍ଥାନିତ ହୋଇଛି। ଏହା ଉପରେ ଆଲୋଚନା କରାଯିବ। ଉତ୍ସବର ଅନେକ କାର୍ଯ୍ୟକ୍ରମର ସିଧାସଳଖ ପ୍ରସାରଣ କରାଯାଇ ଦେଶର ବିଭିନ୍ନ ଅଞ୍ଚଳର ଯୁବକଯୁବତୀଙ୍କ ପାଖରେ ପହଞ୍ଚାଯିବ। ସେମାନେ ପରୋକ୍ଷ ଭାବେ ଏହି ଉତ୍ସବ ସହିତ ଯୋଡି ହୋଇପାରିବେ। ଚଳିତବର୍ଷର ଉତ୍ସବଟିକୁ ସବୁଜ ଯୁବ ଉତ୍ସବ ଭାବେ ପାଳନ କରାଯାଉଛି। ଏଥିରେ କୌଣସି ପ୍ରଦୂଷଣକାରୀ ସାମଗ୍ରୀ ବ୍ୟବହାର କରାଯିବ ନାହିଁ।
ଜାନୁୟାରୀ ୧୫ରେ ସକାଳ ଛ’ରୁ ଆଠ ମଧ୍ୟରେ ‘ଯୋଗଥନ୍’ର ପରିକଳ୍ପନା କରାଯାଇଛି। ଏଥିରେ କର୍ଣ୍ଣାଟକର ୩୧ଟି ଜିଲ୍ଲାରୁ ୫ଲକ୍ଷ ଲୋକଙ୍କୁ ସାମିଲ କରିବାକୁ ଉଦ୍ୟମ କରାଯାଉଛି।