ମୁମ୍ବାଇ: ମୁମ୍ବାଇ ଇଣ୍ଡିଆନ୍ସ ପକ୍ଷରୁ ଡବ୍ଲୁପିଏଲ ୨୦୨୫ ପାଇଁ ନୂତନ ମହିଳା ଟିମକୁ ନେଇ ସନ୍ତୋଷ ବ୍ୟକ୍ତ କରିଛନ୍ତି ନୀତା ଏମ ଅମ୍ବାନୀ। ରବିବାର ବେଙ୍ଗାଲୁରୁରେ ନିଲାମ ପରେ ନୀତା ଅମ୍ବାନୀ କହିଛନ୍ତି, “ଆଜି ଆମେ ଗଠନ କରିଥିବା ଦଳକୁ ନେଇ ଆମେ ସମସ୍ତେ ବହୁତ ଖୁସି ଏବଂ ସନ୍ତୁଷ୍ଟ। କମଳିନୀ, ନାଦିନ ଡି କ୍ଲାର୍କ, ସଂସ୍କୃତି ଗୁପ୍ତା ଏବଂ ଅକ୍ଷିତା ମାହେଶ୍ୱରୀ ମୁମ୍ବାଇ ଇଣ୍ଡିଆନ୍ସ ପରିବାରର ଏକ ଅଂଶ ହୋଇଥିବାରୁ ମୁଁ ଗର୍ବିତ। ”
ମୁମ୍ବାଇ ଇଣ୍ଡିଆନ୍ସରେ ଅନ୍ତର୍ଭୁକ୍ତ ହୋଇଥିବା ଚାରିଜଣ ନୂତନ ଖେଳାଳିଙ୍କ ମଧ୍ୟରେ ତାମିଲନାଡୁର ୧୬ ବର୍ଷୀୟା କମଳିନୀ ୧୯ ବର୍ଷରୁ କମ ଏସିଆ କପରେ ପାକିସ୍ତାନ ବିପକ୍ଷରେ ଭାରତର ପ୍ରତିନିଧିତ୍ୱ କରିଛନ୍ତି। ଏହା ବ୍ୟତୀତ ଦକ୍ଷିଣ ଆଫ୍ରିକାର ଅଲରାଉଣ୍ଡର ନାଦିନ ଡି କ୍ଲାର୍କ, ମଧ୍ୟପ୍ରଦେଶର ଅଲରାଉଣ୍ଡର ସଂସ୍କୃତି ଗୁପ୍ତା ଏବଂ ରାଜସ୍ଥାନର ଦ୍ରୁତ ବୋଲର ଅକ୍ଷିତା ମାହେଶ୍ୱରୀଙ୍କୁ ସାମିଲ କରାଯାଇଛି।
ନୀତା ଅମ୍ବାନୀ ଏହି ଚାରିଜଣ ନୂତନ ଖେଳାଳିଙ୍କୁ ସ୍ୱାଗତ କରି ଏକ ବାର୍ତ୍ତାରେ କହିଛନ୍ତି, “ଆମେ ଆପଣଙ୍କୁ ମୁମ୍ବାଇ ଇଣ୍ଡିଆନ୍ସ ପରିବାରକୁ ହାର୍ଦ୍ଦିକ ସ୍ୱାଗତ କରୁଛୁ। ମୁମ୍ବାଇ ଇଣ୍ଡିଆନ୍ସ ସର୍ବଦା ଯୁବ ପ୍ରତିଭା ଚିହ୍ନଟ ଏବଂ ବିକାଶ କରିବାକୁ ପ୍ରଚେଷ୍ଟା କରିଆସୁଛି। ଗତ ବର୍ଷ ଆମେ ନିଲାମରେ ସଜାନାଙ୍କୁ ଚୟନ କରିଥିଲୁ। ସେ ଟିମ୍ ଇଣ୍ଡିଆ ପାଇଁ ଖେଳୁଥିବା ଦେଖିବା ଆମ ପାଇଁ ବାସ୍ତବରେ ଅଦ୍ଭୁତ।”
ମୁମ୍ବାଇ ଇଣ୍ଡିଆନ୍ସ ମଧ୍ୟ ଜି କମଳିନୀଙ୍କୁ ଦଳରେ ସାମିଲ କରିବାରେ ସଫଳ ହୋଇଛି। ମୁମ୍ବାଇ ଇଣ୍ଡିଆନ୍ସ ଦଳରେ କମଳିନୀଙ୍କୁ ସାମିଲ କରି ଶ୍ରୀମତୀ ଅମ୍ବାନୀ କହିଛନ୍ତି, “ଚଳିତ ବର୍ଷ ଆମେ ୧୬ ବର୍ଷ ବୟସ୍କା କମଳିନୀଙ୍କୁ ନେଇ ବେଶ ଉତ୍ସାହିତ ରହିଛୁ। ବିଗତ କିଛି ସମୟ ଧରି ଆମେ ତାଙ୍କ ଖେଳ ଉପରେ ଦୃଷ୍ଟି ରଖିଥିଲୁ ଏବଂ ସେ ଏକ ବେଶ ଉତ୍ସାହଜନକ ନୂତନ ପ୍ରତିଭା।”