ବାଣପୁର: ବାଣପୁର ବ୍ଲକର ଦୁଇ ଆଦିବାସୀ ଅଧ୍ୟୁଷିତ ପାଞ୍ଚାୟତ ନୀଳାଦ୍ରିପ୍ରସାଦ ଓ ଦାମିଆ ବରବରାରେ ଅନେକ ଦିନ ହେବ ସନ୍ଧ୍ୟା ୬ ଟା ସମୟରୁ ସକାଳ ୬ ଟା ପର୍ଯ୍ୟନ୍ତ ବିଦ୍ୟୁତ କାଟକୁ ନେଇ ଦୁଇ ପାଞ୍ଚାୟତର ଅଧିବାସୀ ମାନେ ଆଜି ବିଦ୍ୟୁତ ବିଭାଗର କର୍ମଚାରୀ ଓ ଗାଡିକୁ ନୀଳାଦ୍ରିପ୍ରସାଦ ଠାରେ ଅଟକ ରଖିଛନ୍ତି। ପ୍ରକାଶ ଥାଉ କି ଅନେକ ଦିନ ହେବ ଏହି ଦୁଇ ପାଞ୍ଚାୟତ ବିଦ୍ୟୁତ ସମସ୍ୟା ଭୋଗୁଥିବାର ବିଭାଗୀୟ ଯନ୍ତ୍ରୀଙ୍କୁ ଅଭିଯୋଗ କରି ଆସୁଥିଲେ ମଧ୍ୟ କେହି ଶୁଣୁନଥିବାରୁ ଆଜି ବିଦ୍ୟୁତ ବିଭାଗୀୟ ଯନ୍ତ୍ରୀ ସମେତ କର୍ମଚାରୀ ମାନଙ୍କୁ ଅଟକ ରାଖି ନିଜର ସମସ୍ୟା ବିଷୟରେ ପ୍ରତିବାଦ କରିଛନ୍ତି।
ଉପସ୍ଥିତ ଯନ୍ତ୍ରୀଙ୍କୁ ପଚାରିବାରୁ ସେ କହିଛନ୍ତି କି ଏ ଅଞ୍ଚଳରେ ଅନେକ ଦିନ ହେବ ହାତୀ ଯାତାୟାତ କରୁଛନ୍ତି ଏଣୁ ଜଙ୍ଗଲ ବିଭାଗ ଓ ବିଦ୍ୟୁତ ବିଭାଗର ଏକ ବୈଠକରେ ଜଙ୍ଗଲ ବିଭାଗ ବିଦ୍ୟୁତ ବିଭାଗକୁ ନିର୍ଦ୍ଧେଶ ଦେଇଛନ୍ତି ଯେ, ସବୁଦିନ ସନ୍ଧ୍ୟା ସମୟରେ ବିଦ୍ୟୁତ କାଟି ସକାଳେ ଚାଲୁ ରଖିବା ପାଇଁ। ଏ ନେଇ ଲୋକ ମାନଙ୍କ ପ୍ରତିକ୍ରିୟା ନେବାରୁ ସେମାନେ କହିଲେ କି ଏବେ ଦଶମ ଓ ଯୁକ୍ତ ୨ ର ବୋର୍ଡ ପରୀକ୍ଷା ଚାଲୁ ଅଛି ଓ ଖରାଦିନ ଥିବାରୁ ଅସହ୍ୟ ଗରମ ହେଉଛି। ଏହା ସହ ମଶା ଯୋଗୁଁ ସାରା ରାତି ଶୋଇହେଉନି।
ବିଦ୍ୟୁତ ବିଭାଗ ଏହି ବିଷୟରେ ଆମକୁ ଅବଗତ କରୁ ନାହାନ୍ତି। ଏଣୁ ଆମେ ଅଟକ ରଖି ସମସ୍ୟାର ପ୍ରକୃତ କାରଣ କ’ଣ ଜାଣିବା ସହିତ ସବୁଦିନ ବିଦ୍ୟୁତ କିପରି ରହିବ ତାହାର ସମାଧାନ କରନ୍ତୁ ଏହା ଆମର ଦାବି।
