ନୂଆଦିଲ୍ଲୀ: ମୁଖ୍ୟ ଚୟନକର୍ତ୍ତା ଅଜିତ ଅଗରକର ଅଷ୍ଟ୍ରେଲିଆ ବିପକ୍ଷ ODI ସିରିଜ୍ ପାଇଁ ଟିମ୍ ଇଣ୍ଡିଆ ଘୋଷଣା କରିଛନ୍ତି। ପ୍ରଥମ ଦୁଇଟି ଦିନିକିଆ ପାଇଁ କେ.ଏଲ୍ ରାହୁଲ ଦଳର ଅଧିନାୟକ ଭାବରେ ନିଯୁକ୍ତ ହୋଇଥିବାବେଳେ ଅନ୍ତିମ ODI ରେ ରୋହିତ ଏବଂ କୋହଲିଙ୍କୁ ଦଳର ଅଂଶ କରାଯାଇଛି। ଏହା ବ୍ୟତୀତ କୁଲଦୀପ ଯାଦବଙ୍କୁ ମଧ୍ୟ ପ୍ରଥମ ଦୁଇଟି ଦିନିକିଆ ପାଇଁ ଦଳରେ ସ୍ଥାନ ଦିଆଯାଇ ନାହିଁ। ପ୍ରଥମ ଦୁଇଟି ଦିନିକିଆରେ କୁଲଦୀପ, ରୋହିତ, କୋହଲି, ହାର୍ଦ୍ଦିକଙ୍କ ଭଳି ଖେଳାଳିଙ୍କୁ ବିଶ୍ରାମ ଦେବାକୁ ନିଷ୍ପତ୍ତି ନିଆଯାଇଛି। ଗଣମାଧ୍ୟମ ସହିତ କଥାବାର୍ତ୍ତା ବେଳେ ମୁଖ୍ୟ ଚୟନକର୍ତ୍ତା ଅଜିତ ଅଗରକର ଜଣେ ଖେଳାଳିଙ୍କ ନାମ ନେଇଛନ୍ତି, ଯିଏକି ବିଶ୍ୱକପରେ ଭାରତ ପାଇଁ ଟ୍ରମ୍ପ କାର୍ଡ ହୋଇପାରିବେ।
ଅଗରକର କୁଲଦୀପ ଯାଦବଙ୍କୁ ଏକ ଟ୍ରମ୍ପ କାର୍ଡ ବୋଲି କହିଛନ୍ତି। ମୁଖ୍ୟ ଚୟନକର୍ତ୍ତା ବିଶ୍ୱାସ କରନ୍ତି ଯେ, ଏହି ସମୟର ବିଶ୍ୱକପରେ କୁଲଦୀପ ଭାରତ ପାଇଁ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରନ୍ତି। ସେ କହିଛନ୍ତି ଯେ, “ମୁଁ ତାଙ୍କ ସହ ଆଇପିଏଲରେ ବହୁତ ସମୟ ଅତିବାହିତ କରିଛି। ତାଙ୍କର ବିଶେଷ ଦକ୍ଷତା ଅଛି। ପ୍ରତ୍ୟେକ ଖେଳାଳିଙ୍କ ଉପରେ ବିଶ୍ୱାସ କରିବାର ଆବଶ୍ୟକତା ରହିଛି। ଭାରତୀୟ ଦଳ ପରିଚାଳନା ଏହା କରିଛି ଏବଂ ଫଳାଫଳ ମଧ୍ୟ ଅଛି। ସେ ଆମ ପାଇଁ ଏକ “ଟ୍ରମ୍ପ” କାର୍ଡ। ଅଧିକାଂଶ ଦଳ ତାଙ୍କୁ ଏକ ଆହ୍ଵାନ ଭାବରେ ବିବେଚନା କରୁଛନ୍ତି। ଆଗାମୀ ସମୟ ପାଇଁ ଆମେ ସମସ୍ତେ ଉତ୍ସାହିତ ଅଛୁ।”
