ସୀତାରାମ ଅଗ୍ରୱାଲ
ଟାଙ୍ଗୀ: ୧୬ ନଂ ଜାତୀୟ ରାଜପଥ ଉଗ୍ରତାରା ଛକ ନିକଟରେ ଭାରସାମ୍ୟ ହରାଇ ଓଲଟିଲା ଯାତ୍ରୀ ବାହୀ ଅଟୋ ରିକସା୍। ଏହି ଦୁର୍ଘଟଣାରେ ୬ ରୁ ଅଧିକ ମହିଳା ଆହତ ହୋଇଥିବା ବେଳେ ୪ ମହିଳା ଗୁରୁତର ଅଛନ୍ତି।
ସୂଚନା ଅନୁଯାୟୀ, ଟାଙ୍ଗୀ ଥାନା ଭୁଷଣ୍ଡପୁର ଗ୍ରାମର ମହିଳା ଶ୍ରମିକମାନେ ଚାନ୍ଦପୁର ବେଣ୍ଟ ଗ୍ରାମ ନିକଟରେ ଥିବା ଶ୍ରୀରାଗମ୍ ଏକ୍ସପର୍ଟ ପ୍ରା ଲିଃ ନାମକ ଏକ ଚିଙ୍ଗୁଡି କଂପାନୀରେ ଶ୍ରମିକ ଭାବେ କାର୍ଯ୍ୟ କରୁଥିଲେ।
ପ୍ରତିଦିନ ପରି ଗତକାଲି ସନ୍ଧ୍ୟାରେ କମ୍ପାନୀ କାମ ସାରି ୧୦ ରୁ ଉର୍ଦ୍ଧ୍ଵ ମହିଳା ଅଟୋ ରିକ୍ସାରେ ଘରକୁ ଫେରୁଥିବା ବେଳେ ଉଗ୍ରତାରା ଛକ ନିକଟରେ ଦୁର୍ଘଟଣା ହୋଇଥିଲା। ଅଟୋ ରିକ୍ସାଟି ଭାରସାମ୍ୟ ହରାଇ ରାସ୍ତା ଉପରେ ଓଲଟି ପଡିଥିଲା।
ତେବେ କୌଣସି ଏକ କାମରେ ସେହି ରାସ୍ତା ଦେଇ ବାଣପୁର ବିଡିଓ ଡ.ଶୁଭଶ୍ରୀ ତ୍ରିପାଠୀ ଯାଉଥିବା ବେଳେ ଏହି ଦୁର୍ଘଟଣାଟିକୁ ଦେଖିଥିଲେ। ଡ. ତ୍ରିପାଠୀ ତୁରନ୍ତ ସ୍ଥାନୀୟ ଲୋକଙ୍କ ସହଯୋଗରେ ଆମ୍ବୁଲାନ୍ସ ଯୋଗେ ଆହତଙ୍କୁ ଟାଙ୍ଗୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ଏହା ସହିତ ୪ ଜଣ ଗୁରୁତର ମହିଳାଙ୍କୁ ଭୁବନେଶ୍ଵର ସ୍ଥାନାନ୍ତରିତ କରାଯାଇଥିଲା। ବାଣପୁର ବିଡିଓଙ୍କ ଏପରି ବଦନ୍ୟତା ପାଇଁ ସ୍ଥାନୀୟ ଲୋକେ ପ୍ରଶଂସା କରିଛନ୍ତି।