ସୀତାରାମ ଅଗ୍ରୱାଲ
ବାଣପୁର: ଦୀର୍ଘ ମାସ ଧରି ଚାଲିଥିବା ନାଟକର ପରିଶେଷରେ ଯବନିକା ପଡିଛି। ପଦ ହରାଇଛନ୍ତି ଗମ୍ଭାରୀମୁଣ୍ଡା ପଞ୍ଚାୟତର ସରପଞ୍ଚ। ଗମ୍ଭାରୀମୁଣ୍ଡା ପଞ୍ଚାୟତର ସରପଞ୍ଚଙ୍କ ବିରୁଦ୍ଧରେ ଆସିଥିବା ଅନାସ୍ଥା ପ୍ରସ୍ତାବ ଗୃହୀତ ହୋଇଛି। ଗମ୍ଭାରୀମୁଣ୍ଡା ପଞ୍ଚାୟତ ସରପଞ୍ଚ ବିମଳ ପଟ୍ଟନାୟକଙ୍କ ବିରୁଦ୍ଧରେ ଅନାସ୍ଥା ପ୍ରସ୍ତାବ ଆସିଥିଲା। ୮-୦ରେ ଏହି ଅନାସ୍ଥା ପ୍ରସ୍ତାବ ଗୃହୀତ ହୋଇଛି। ୧୧ ଜଣ ୱାର୍ଡମେମ୍ବର ମଧ୍ୟରୁ ୮ଜଣ ସରପଞ୍ଚଙ୍କ ବିରୋଧରେ ଭୋଟ୍ ଦେଇଥିଲେ। ତେବେ ଅନ୍ୟ ତିନି ଜଣ ଓ୍ବାର୍ଡମେମ୍ବର ଏହି ଅନାସ୍ଥା ପ୍ରସ୍ତାବ ଭୋଟରେ ଅନୁପସ୍ଥିତ ରହିଥିଲେ। ଫଳରେ ସରପଞ୍ଚଙ୍କୁ ତାଙ୍କ ପଦ ହରାଇବାକୁ ପଡ଼ିଛି। ସେଠାରେ ଅପ୍ରୀତିକର ପରିସ୍ଥିତିକୁ ତଥା ଉତ୍ତେଜନାକୁ ଏଡ଼ାଇବାକୁ ପାଇଁ ଜଣେ ଏସଡିପିଓ, ଦୁଇ ଜଣ ଡିଏସପି, ୫ଜଣ ଆଇଆଇସିଙ୍କ ସମେତ ଦୁଇ ପ୍ଲାଟୁନ ଫୋର୍ସ ମୁତୟନ କରାଯାଇଛି।
ଉଲ୍ଲେଖଯୋଗ୍ୟ, ୨୦୧୭ ପଞ୍ଚାୟତ ନିର୍ବାଚନରେ ବିଜେଡି ସମର୍ଥନରେ ବିଜୟୀ ହୋଇ ସରପଞ୍ଚ ହୋଇଥିଲେ ବିମଳ ପଟ୍ଟନାୟକ। ତତ୍କାଳୀନ ବିଜେପି ବିଧାୟକଙ୍କ ସମୟରେ ବିଜେଡି ସରପଞ୍ଚ ଭାବେ ବିମଳ ପଟ୍ଟନାୟକ ବିଜୟୀ ହୋଇଥିବାବେଳେ ଏବେ ଖୋର୍ଦ୍ଧା ଜିଲ୍ଲାର ଚିଲିକା ନିର୍ବାଚନ ମଣ୍ଡଳୀରେ ବିଜେଡି ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ଲୋକପ୍ରିୟତା ରହିଥିବା ସମୟରେ ସରପଞ୍ଚ ଗାଦିଚ୍ୟୁତ ହେବା ବେଶ୍ ଆଶ୍ଚର୍ଯ୍ୟଜନକ।