ଭୁବନେଶ୍ବର: ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପୁରୀରେ ରୋଡ ସୋ ସାରିବା ପରେ ସେ ସିଧା ଅନୁଗୁଳ ଜନସମାବେଶରେ ଯୋଗ ଦେଇଥିଲେ। ସେଠାରେ ସେ ରାଜ୍ୟର ବିଜେଡି ସରକାର ଉପରେ ପ୍ରବଳ ବର୍ଷିଥିଲେ। ସେ ଓଡିଆରେ ଭାଷଣ ଆରମ୍ଭ କରି ଓଡିଆ ଲୋକଙ୍କର ମନ ଜିଣିବା ପାଇଁ ଚେଷ୍ଠା କରିଥିଲେ। ସେ ଓଡିଆରେ ମୋର ଭାଇ ଓ ଭଉଣୀମାନଙ୍କୁ ନମସ୍କାର ବୋଲି କହିଥିଲେ।
ତେବେ ମୋଦୀ ତାଙ୍କ ଭାଷଣରେ ଶ୍ରୀଜଗନ୍ନାଥଙ୍କ ରତ୍ନ ଭଣ୍ଡାର ଚାବି ହଜିବା ନେଇ ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି। ସେ କହିଥିଲେ ଯେ ଆଜି ସକାଳେ ମୁଁ ଜଗନ୍ନାଥଙ୍କୁ ଦର୍ଶନ କରିବାର ସୌଭାଗ୍ୟ ପାଇଲି। ହେଲେ ଦୁଃଖର କଥା 6 ବର୍ଷ ଧରି ଜଗନ୍ନାଥଙ୍କ ରତ୍ନଭଣ୍ଡାରର ଚାବି କୁଆଡେ ହଜିଯାଇଛି ଯେ, ତାହା ମିଳୁ ନାହିଁ। ଲୋକଙ୍କ ଘର ଚାବି ହଜିଗଲେ ସେମାନେ ଜଗନ୍ନାଥଙ୍କୁ ପ୍ରାର୍ଥନା କରି ତାହା ପାଉଛନ୍ତି। ହେଲେ ସ୍ବୟଂ ଜଗନ୍ନାଥଙ୍କ ଚାବି ହଜିଛି ତାହା ମିଳୁ ନାହିଁ। ସେହିପରି ରତ୍ନଭଣ୍ଡାର ଯାଞ୍ଚ ରିପୋର୍ଟ ବିଜେଡି ସରକାର କାହିଁକି ସାର୍ବଜନୀନ କରୁ ନାହିଁ ବୋଲି ମୋଦୀ ଲୋକଙ୍କୁ ପ୍ରଶ୍ନ କରିଥିଲେ।
ଓଡିଶାରେ ବିଜେପି ସରକାର କରିବା ପରେ ତାହାର ପ୍ରଥମ କାମ ହେବ ରତ୍ନଭଣ୍ଡାରର ଯାଞ୍ଚ ରିପୋର୍ଟ ପ୍ରକାଶ କରାଯିବ। ଜଗନ୍ନାଥଙ୍କ କାମରୁ ଓଡିଶାରେ ବିଜେପି ସରକାରର କାମ ଆରମ୍ଭ ହେବ ବୋଲି ପ୍ରଧାନମନ୍ତ୍ରୀ କହିଥିଲେ। ସେହିପରି ସେ କହିିଲେ ଯେ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଏକ କୋଟେରୀ ଘେରି କରି ରହିଛି। ଓଡିଶାରେ କାମ ଧିର ଗତିରେ ଚାଲୁଛି। ଡବଲ ଇଂଜନ ସରକାର ଆସିଲେ ଓଡିଶାର କାମ ବେଶ କ୍ଷୀପ୍ର ହେବ ବୋଲି ପ୍ରଧାନମନ୍ତ୍ରୀ କହିଥିଲେ।
ସେହିପରି ଓଡିଶାରେ ବିଜେପି ସରକାର ଗଠନ ହେଲେ ଚାଷୀଙ୍କ ସମସ୍ତ ପ୍ରକାରର ସୁବିଧା ମିଳିବ ବୋଲି କହିଥିଲେ। ଏଠାକାର ଚାଷୀ ଧାନର ସହାୟକ ମୂଲ୍ୟ କ୍ବିଣ୍ଟାଲ ପିଛା ପାଉଛନ୍ତି ମାତ୍ର 2100 ଟଙ୍କା। ହେଲେ ଓଡିଶାରେ ବିଜେପି ସରକାର ଆସିଲେ ତାହା 3100 ଟଙ୍କା ହେବ ବୋଲି ମୋଦୀ ଘୋଷଣା କରିଥିଲେ। ଅନ୍ୟପକ୍ଷରେ ସେ ଓଡିଶାର ମହିଳାମାନଙ୍କ ପାଇଁ ବିଜେପି ସରକାର ସୁଭଦ୍ରା ଯୋଜନା ଲାଗୁ କରିବେ ବୋଲି ଜନସମାବେଶକୁ ଉଦବୋଧନ ଦେଇଥିଲେ।
ଅନୁଗୁଳ ଷ୍ଟାଡିୟମରେ ଆୟୋଜିତ ଏହି ସଭାରେ ଢେଙ୍କାନାଳ ବିଜେପି ସାଂସଦ ପ୍ରାର୍ଥୀ ରୁଦ୍ରନାରାୟଣ ପାଣି, ସମ୍ବଲପୁର ସାଂସଦ ପ୍ରାର୍ଥୀ ଧର୍ମେନ୍ଦ୍ର ପ୍ରଧାନଙ୍କ ସହିତ ଏହି ଦୁଇ ଲୋକସଭା କ୍ଷେତ୍ରରେ ବିଧାନସଭା ପ୍ରାର୍ଥୀ ଯୋଗଦେଇଥିଲେ। ସମସ୍ତଙ୍କୁ ପଦ୍ମଫୁଲରେ ଭୋଟ ଦେଇ ଜୟଯୁକ୍ତ କରାଇବା ପାଇଁ ପ୍ରଧାନମନ୍ତ୍ରୀ ଜନସମାବେଶକୁ ନିବେଦନ କରିଥିଲେ।