ନୂଆଦିଲ୍ଲୀ: ମହାରାଷ୍ଟ୍ରର ଅକୋଲା ଘଟଣାରେ ଏପର୍ଯ୍ୟନ୍ତ ୪୫ ଜଣଙ୍କୁ ଗିରଫ କରାଯାଇଛି। ୩୦୦ ଲୋକଙ୍କ ବିରୋଧରେ ଏଫଆଇଆର ପଞ୍ଜିକୃତ ହୋଇଛି। ଗତକାଲି ସନ୍ଧ୍ୟା ଠାରୁ ଆଜି ରାତି ୧୨ ଟା ପର୍ଯ୍ୟନ୍ତ ଇଣ୍ଟରନେଟ୍ ସେବା ବନ୍ଦ ରହିଛି, ଏହି କାରଣରୁ ଅମ୍ରାବତୀ ବିଶ୍ୱବିଦ୍ୟାଳୟ ଅଧୀନରେ କିଛି ପରୀକ୍ଷା ସ୍ଥଗିତ ରଖାଯାଇଛି। ବର୍ତ୍ତମାନ ପରିବେଶ ଶାନ୍ତ ଅଛି। ପୋଲିସର କାର୍ଯ୍ୟାନୁଷ୍ଠାନ ଆରମ୍ଭ ହୋଇଛି। ଏହି ଘଟଣାରେ ଜଣେ ବ୍ୟକ୍ତିଙ୍କର ମୃତ୍ୟୁ ହୋଇଛି, ଯାହାଙ୍କ ପାଇଁ ସରକାରୀ ଅନୁଦାନ ଘୋଷଣା କରାଯାଇଛି। ସେଠାରେ ୨ ଜଣ ପୋଲିସ କର୍ମୀ ଏବଂ ୬ ଜଣ ଆହତ ହୋଇଛନ୍ତି। ମାର୍କେଟଗୁଡିକ ସମ୍ପୂର୍ଣ୍ଣ ବନ୍ଦ ରହିଛି।
ଶନିବାର ରାତିରେ ଦଙ୍ଗାକାରୀମାନେ ପୋଲିସ ଷ୍ଟେସନ ଉପରେ ଆକ୍ରମଣ କରୁଥିଲେ, ସେତେବେଳେ ପୋଲିସ ତିନି ରାଉଣ୍ଡ ପ୍ଲାଷ୍ଟିକ ଗୁଳି ଚଳାଇଥିଲା, ଯାହାର ଭିଡିଓ ସାମ୍ନାକୁ ଆସିଛି। ଏହି ଖବର ଅତିରିକ୍ତ ଏସପି ମୋନିକା ରାଉତଙ୍କ ଦ୍ୱାରା ନିଶ୍ଚିତ ହୋଇଛି।
ପ୍ରକାଶ ଯେ, ଅକୋଲା ସହରରେ ଏକ ସୋସିଆଲ ମିଡିଆ ପୋଷ୍ଟକୁ ନେଇ ଦୁଇ ସମ୍ପ୍ରଦାୟ ମଧ୍ୟରେ ସଂଘର୍ଷ ହେତୁ ଦୁଇ ଜଣ ପୋଲିସଙ୍କ ସମେତ ଆଠ ଜଣ ଆହତ ହୋଇଛନ୍ତି। ଜିଲ୍ଲା ମାଜିଷ୍ଟ୍ରେଟ୍ ନୀମା ଅରୋରା ସହରର ଚାରିଟି ପୋଲିସ୍ ଷ୍ଟେସନ୍ ଅଞ୍ଚଳରେ ଅପରାଧିକ ପ୍ରକ୍ରିୟା (CrPC) ର ଧାରା ୧୪୪ ଲାଗୁ କରିବାକୁ ନିର୍ଦ୍ଦେଶ ଦେଇଛନ୍ତି।
ପୋଲିସ ଅଧୀକ୍ଷକ ସନ୍ଦୀପ ଘୁଗେ କହିଛନ୍ତି ଯେ, ଏକ ଧାର୍ମିକ ପୋଷ୍ଟ ସୋସିଆଲ ମିଡିଆ ପ୍ଲାଟଫର୍ମରେ ଭାଇରାଲ ହେବା ପରେ ଏହି ହିଂସା ଘଟିଛି। ଅତିରିକ୍ତ ପୋଲିସ ଅଧୀକ୍ଷକ (ଏଏସପି) ମୋନିକା ରାଉତ କହିଛନ୍ତି ଯେ, ଉଭୟ ଗୋଷ୍ଠୀ ପରସ୍ପର ଉପରେ ପଥର ଫିଙ୍ଗିଥିଲେ। ଏହି ସମୟରେ କିଛି ଗାଡି ମଧ୍ୟ ନଷ୍ଟ ହୋଇଯାଇଥିଲା। ଶ୍ରୀମତୀ ରାଉତ କହିଛନ୍ତି ଯେ, ଦଙ୍ଗାକାରୀଙ୍କୁ ଘଉଡାଇବା ପାଇଁ ପୋଲିସ ଲୁହବୁହା ଗ୍ୟାସ ସେଲ ବ୍ୟବହାର କରିଥିଲା ଏବଂ ବର୍ତ୍ତମାନ ପରିସ୍ଥିତି ନିୟନ୍ତ୍ରଣରେ ରହିଛି।
ଗୁଗେ କହିଛନ୍ତି ଯେ, “ଜଣଙ୍କର ମୃତ୍ୟୁ ଘଟିଥିବା ବେଳେ ଅନ୍ୟ ୮ ଜଣ ଆହତ ହୋଇଛନ୍ତି। ଆହତମାନଙ୍କ ମଧ୍ୟରେ ଦୁଇଜଣ ପୋଲିସ କର୍ମୀ ଅଛନ୍ତି, ଯେଉଁମାନେ ଦଙ୍ଗାକାରୀଙ୍କ ଦ୍ୱାରା ପଥର ଫିଙ୍ଗିବା ସମୟରେ ଆହତ ହୋଇଥିଲେ।” ସ୍ଥାନୀୟ ପ୍ରଶାସନ କହିଛି ଯେ, ରାଜ୍ୟର ଉପମୁଖ୍ୟମନ୍ତ୍ରୀ ତଥା ଅକୋଲା ଜିଲ୍ଲାର ଅଭିଭାବକ ମନ୍ତ୍ରୀ ଦେବେନ୍ଦ୍ର ଫଡନାଭିସ୍ ପରିସ୍ଥିତି ଉପରେ ନଜର ରଖିଛନ୍ତି। ଶାନ୍ତି ବଜାୟ ରଖିବା ପାଇଁ ଫଡନାଭିସ୍ ଲୋକଙ୍କୁ ନିବେଦନ କରିଛନ୍ତି।
ଏହି ଘଟଣା ପରେ ସହରରେ ସୁରକ୍ଷା କଡାକଡି କରାଯାଇଛି ବୋଲି ଶ୍ରୀମତୀ ରାଉତ କହିଛନ୍ତି। ସେ କହିଛନ୍ତି ଯେ, ଅକୋଲା ସହରରେ ଅମରାବତୀରୁ ରାଜ୍ୟ ରିଜର୍ଭ ପୋଲିସର ଏକ ହଜାର ଯବାନ ନିୟୋଜିତ ହୋଇଛନ୍ତି। ଭୟଭୀତ ନହେବାକୁ ଏବଂ କୌଣସି ଗୁଜବକୁ ବିଶ୍ଵାସ ନକରିବାକୁ ରାଉତ ନାଗରିକମାନଙ୍କୁ ନିବେଦନ କରିଛନ୍ତି।