Categories
ଆଜିର ଖବର ଜାତୀୟ ଖବର ରାଜ୍ୟ ଖବର ସ୍ବାସ୍ଥ୍ୟ

କ୍ୟାନ୍ସରକୁ କିପରି ହରାଯାଇପାରିବ?: ସୋଆରେ ନିଜର ଅନୁଭତି ବଖାଣିଲେ ପୂର୍ବତନ କ୍ରିକେଟର ଅରୁଣ ଲାଲ

ଭୁବନେଶ୍ୱର: ଜୀବନରେ ସମସ୍ୟା ସହିତ ଲଢ଼ିବା ନିମନ୍ତେ ମଣିଷର ସକାରାତ୍ମକ ଚିନ୍ତାଧାରା ହିଁ ସବୁଠାରୁ ବଡ଼ ସମ୍ପତି। ଏହାହିଁ ବିଜୟର ପଥ ସୁଗମ କରିଥାଏ ବୋଲି କ୍ୟାନ୍ସର ରୋଗୀମାନଙ୍କ ଉଦ୍ଦେଶ୍ୟରେ ମତ ରଖିଛନ୍ତି ପୂର୍ବତନ ଭାରତୀୟ କ୍ରିକେଟର ଅରୁଣ ଲାଲ।

ମନ ଯାହାକୁ ବିଶ୍ୱାସ କରେ ଶରୀର ତାହାକୁ ହିଁ ଗ୍ରହଣ କରିଥାଏ। ଆପଣମାନେ ଯେ ବିଜୟୀ ହେବେ ସେହି ବିଶ୍ୱାସ ରଖିବା ଉଚିତ୍ ବୋଲି ଇନ୍‌ଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍‌ସେସ୍ ଆଣ୍ଡ ସମ ହସ୍ପିଟାଲ୍‌ରେ ଶନିବାର ଆୟୋଜିତ ବିଶ୍ୱ କ୍ୟାନ୍ସର ଦିବସ ଅବସରରେ ଏହା କହିଛନ୍ତି ଲାଲ।

ଦୀର୍ଘ ୮ ମାସ ଧରି କ୍ୟାନ୍ସର ସହ ଲଢ଼ି ସଫଳତାର ସହ ବିଜୟ ହାସଲ କରିଥିବା ଏହି ପୂର୍ବତନ କ୍ରିକେଟର, କୋଚ ତଥା କମେଂଟେଟର୍ ଲାଲ୍ କହିଥିଲେ ଯେ ତାଙ୍କ ଶରୀରରେ ଖୁବ୍ ବିଳମ୍ବରେ ଏକ ବିରଳ ମୁଖଗହ୍ୱର କ୍ୟାନ୍ସର ଚିହ୍ନଟ ହୋଇଥିବା ବେଳେ ତାଙ୍କର ନିରବଚ୍ଛିନ୍ନ ଚିକିତ୍ସା ଏବଂ ବଡ଼ ଅସ୍ତ୍ରୋପଚାର ମଧ୍ୟ କରାଯାଇଥିଲା। କ୍ୟାନ୍ସର ଚିହ୍ନଟ ହେବା ପରେ ମୋ ପାଇଁ ଖୁବ୍ ସମ୍ବେଦନଶୀଳ ପରିସ୍ଥିତି ସୃଷ୍ଟି ହୋଇଥିଲା। କିନ୍ତୁ ମୋ ଅସ୍ତ୍ରୋପଚାର ହେବା ପର୍ଯ୍ୟନ୍ତ ମୁଁ ଥରୁଟିଏ ମାତ୍ର ଚିନ୍ତା କରି ନଥିଲି ଯେ ମୁଁ ହାରିଯିବି କିମ୍ବା ମୃତ୍ୟୁ ମୋ ସମ୍ମୁଖରେ ଛିଡ଼ା ହୋଇଛି।

ତାଙ୍କୁ ଚିକିତ୍ସା କରିଥିବା ଡାକ୍ତର ଏବଂ ସର୍ଜନମାନଙ୍କୁ ଧନ୍ୟବାଦ ଦେଇ ଲାଲ କହିଛନ୍ତି ଯେ ବିଜ୍ଞ ଡାକ୍ତର ଏବଂ ସର୍ଜନ ଓ ଉନ୍ନତମାନର ଚିକିତ୍ସା ବିଜ୍ଞାନ କ୍ୟାନ୍ସର ଚିକିତ୍ସାରେ ସହାୟକ ହୋଇପାରିଛି। କିନ୍ତୁ ସବୁଠାରୁ ଗୁରୁତ୍ୱପୂର୍ଣ୍ଣ ହେଉଛି ଏହି ଦୁଃସାଧ୍ୟ ରୋଗକୁ ପରାସ୍ତ କରିବା ନିମନ୍ତେ ଆପଣଙ୍କର ଇଚ୍ଛାଶକ୍ତି।

ଚିକିତ୍ସା ବିଜ୍ଞାନରେ କ୍ରମାଗତ ଉନ୍ନତି କରି ଚାଲିଛି ବୋଲି କହି ଏହି ପୂର୍ବତନ କ୍ରିକେଟର କହିଥିଲେ ଯେ ୧୦୦ ବର୍ଷ ପରେ ଏହା ଆହୁରି ପ୍ରଗତି କରିସାରିଥିବ। ମାତ୍ର ମନୁଷ୍ୟର ଇଚ୍ଛାଶକ୍ତି ଓ ମନୋବଳ ଆମକୁ ବିଜ୍ଞାନଠାରୁ ଊର୍ଦ୍ଧ୍ୱକୁ ନେଇପାରିବ।

ଯୁବ କ୍ରିକେଟର ଥିବା ସମୟରେ ନିଜର ଅନୁଭତି ବଖାଣି ଲାଲ କହିଛନ୍ତି ଯେ ଦିଲ୍ଲୀ ବିଶ୍ୱବିଦ୍ୟାଳୟରେ ପଢ଼ୁଥିବା ସମୟରେ ଆନ୍ତଃ-ବିଶ୍ୱବିଦ୍ୟାଳୟ ରୋହିନ୍‌ଟନ୍ ବାରିଆ ଟ୍ରଫି ମ୍ୟାଚ୍ ସମୟରେ ତାଙ୍କର ଗୋଇଠି ହାଡ଼ ଭାଙ୍ଗି ଯାଇଥିଲା କିନ୍ତୁ ପ୍ଲାଷ୍ଟର ହୋଇଥିବା ତାଙ୍କ ଗୋଇଠିରେ କଷ୍ଟ ଥିବା ସତ୍ୱେ ୯ ଦିନ ପରେ ସେ ପ୍ଲାଷ୍ଟର କାଢ଼ି ଦେଇଥିଲେ। ଫାଇନାଲ ମ୍ୟାଚରେ ଓସ୍‌ମାନିଆ ବିଶ୍ୱବିଦ୍ୟାଳୟ ବିପକ୍ଷରେ ସେ ଖେଳିବା ନିମନ୍ତେ ଦୃଢ଼ ପରିକର ଥିଲେ। ଖେଳିବା ପାଇଁ ବହୁ କଷ୍ଟ ହେଉଥିଲା ଓ ମୁଁ ମୁଖ୍ୟତଃ ରନ୍ ହାସଲ କରିବା ନିମନ୍ତେ ଲୁଜ୍ ବଲ୍ ଉପରେ ନିର୍ଭର କରୁଥିଲି।

“ଆମକୁ ଜିତିବା ନିମନ୍ତେ ୮୦ ରନ୍ ଆବଶ୍ୟକତା ଥିଲା ଏବଂ ଶେଷ ବ୍ୟାଟ୍ସମ୍ୟାନ୍ ଭାବେ ୧୯୮୩ ବିଶ୍ୱକପ୍ ବିଜୟୀ ଭାରତୀୟ ଦଳର ସଦସ୍ୟ ସୁନୀଲ୍ ଭାଲ୍‌ସନ୍ ମୋ ସହିତ ଯୋଗ ଦେଲେ। କଷ୍ଟ ସତ୍ୱେ ମୁଁ ଏକୁଟିଆ ଆବଶ୍ୟକୀୟ ରନ୍ ସଂଗ୍ରହ କରିପାରିଥିଲି। ୧୬୪ ରନ୍‌ର ଏହି ଇନିଂସକୁ ମୁଁ ମୋ ଜୀବନର ଶ୍ରେଷ୍ଠ ଇନିଂସ ମନେ କରେ।”

ଆମେ ସୁସ୍ଥ ରହିବା ପାଇଁ ଡାକ୍ତରମାନଙ୍କ ଭୂମିକା ଖୁବ୍ ଗୁରୁତ୍ୱପୂର୍ଣ୍ଣ। ତେଣୁ ସମସ୍ତେ ଚିକିତ୍ସା ବିଜ୍ଞାନ ଏବଂ ପ୍ରଯୁକ୍ତି ବିଦ୍ୟାର ସାହାଯ୍ୟ ନେବା ଉଚିତ୍ ବୋଲି ଲାଲ୍ କହିଛନ୍ତି।

ଆମେରିକାର ଚାର୍ଲି ପ୍ୟାଡକଙ୍କ କାହାଣୀକୁ ମନେ ପକାଇ ଜଣେ ସ୍ପ୍ରିଂଟର ହେବା ନିମନ୍ତେ ତାଙ୍କର ଅଦମ୍ୟ ଉଦ୍ୟମ ଥିଲା କିନ୍ତୁ ସେ ଗେଡ଼ା ହୋଇଥିବାରୁ ତାଙ୍କର ଉଦ୍ୟମକୁ ଅନେକ ପରିହାସ କରିଥିଲେ। ମାତ୍ର ସେ ଏହାକୁ ଖାତିର ନ କରି ୧୯୨୦ ଆଂଟୱେର୍ପ ଅଲିମ୍ପିକ ଗେମ୍ସରେ ୧୦୦ ମିଟର ଦୌଡ଼ରେ ସ୍ୱର୍ଣ୍ଣ ହାସଲ କରିଥିଲେ। ପ୍ୟାଡକ ଜଣେ କ୍ଷୀଣ ଆଫ୍ରିକୀୟ ଯୁବକଙ୍କୁ ଭେଟି ଥିଲେ ଯିଏ କ୍ରୀଡ଼ାବିତ୍ ହେବାକୁ ଚାହୁଁଥିଲେ। ତାଙ୍କୁ ପ୍ୟାଡିକ୍ କହିଥିଲେ “ତୁମେ ଯଦି ଭାବିବ ଯେ ତୁମେ କୃତକାର୍ଯ୍ୟ ହେବ, ତେବେ ତୁମେ କରିପାରିବ।”
ଲାଲ କହିଥିଲେ କ୍ୟାନ୍ସରରୁ ସୁସ୍ଥ ହେବା ପରେ ସେ ଦ୍ୱିତୀୟ ଜୀବନ ପାଇଛନ୍ତି ଯାହାକି ପ୍ରଥମ ଠାରୁ ଖୁବ୍ ସୁନ୍ଦର।

ଶ୍ରୀ ଲାଲ୍ ୧୯୮୨ ରୁ ୧୮୯ ମଧ୍ୟରେ ଭାରତ ପାଇଁ ୧୬ ଟି ଟେଷ୍ଟ ମ୍ୟାଚ ଖେଳିଛନ୍ତି।

ଏହି କାର୍ଯ୍ୟକ୍ରମରେ ଆଇଏମ୍‌ଏସ୍ ଆଣ୍ଡ ସମ୍ ହସ୍ପିଟାଲ୍‌ର ଡିନ୍ ପ୍ରଫେସର ସଂଘମିତ୍ରା ମିଶ୍ର, ମେଡିକାଲ୍ ସୁପରିଟେଣ୍ଡେଂଟ ପ୍ରଫେସର ପୁଷ୍ପରାଜ ସାମନ୍ତସିଂହାର, ଇନ୍‌ଷ୍ଟିଚ୍ୟୁଟ୍ ଅଫ୍ ଡେଂଟାଲ୍ ସାଇନ୍‌ସେସ୍‌ର ଡିନ୍ ପ୍ରଫେସର ନୀତା ମହାନ୍ତି, ପେଡିଆଟ୍ରିକ୍ ଅଙ୍କୋଲୋଜି ବିଭାଗର ମୁଖ୍ୟ ପ୍ରଫେସର ସରୋଜ ପଣ୍ଡା ବକ୍ତବ୍ୟ ରଖିଥିଲେ। ସର୍ଜିକାଲ୍ ଅଙ୍କୋଲୋଜି ବିଭାଗର ମୁଖ୍ୟ ଡାକ୍ତର ସୁନୀଲ୍ ଅଗ୍ରୱାଲ୍ ଧନ୍ୟବାଦ ଅର୍ପଣ କରିଥିଲେ।

Categories
ଆଜିର ଖବର ଖେଳ ରାଜ୍ୟ ଖବର

ସୋଆ କପ୍ ଉଦ୍‌ଯାପିତ: ଶିକ୍ଷା ସହିତ କ୍ରିଡାକୁ ଗୁରୁତ୍ୱ ଦେବା ଜରୁରୀ ବୋଲି କହିଲେ ଅରୁଣ ଲାଲ

ଭୁବନେଶ୍ୱର: ଛାତ୍ରଛାତ୍ରୀମାନେ ପାଠପଢ଼ା ସହିତ କ୍ରିଡ଼ାରେ ମଧ୍ୟ ମନୋନିବେଶ କରିବା ଜରୁରୀ। ପାଠ ସହିତ କ୍ରିଡ଼ା ସମାନ୍ତରାଳ ଭାବେ ନ ରହିଲେ ଛାତ୍ରଛାତ୍ରୀଙ୍କୁ ଅର୍ଦ୍ଧ ଶିକ୍ଷିତ କୁହାଯିବ ବୋଲି କହିଛନ୍ତି ପୂର୍ବତନ କ୍ରୀକେଟର ତଥା କମେଂଟେଟର୍ ଅରୁଣ ଲାଲ। ଶିକ୍ଷା ଓ ଅନୁସନ୍ଧାନ (ସୋଆ)ର ବାର୍ଷିକ କ୍ରିଡ଼ା ଉତ୍ସବ ସୋଆ କପ୍‌ର ଉଦ୍‌ଯାପନୀ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇ ଛାତ୍ରଛାତ୍ରୀମାନଙ୍କ ଉଦ୍ଦେଶ୍ୟରେ ଏଭଳି ବକ୍ତବ୍ୟ ରଖିଛନ୍ତି ଲାଲ।

ପାଠପଢ଼ା ସହିତ ଶାରୀରିକ ଓ ମାନସିକ ସୁସ୍ଥତା ମଧ୍ୟ ଜରୁରୀ। ତେଣୁ ନିଜକୁ ଉନ୍ନତ କରିବାକୁ ହେଲେ ଖେଳକୁଦରେ ମଧ୍ୟ ରୁଚି ରଖିବା ଆବଶ୍ୟକ। ଯେ କୌଣସି କ୍ଷେତ୍ର ହେଉ ପଛେ କଠିନ ପରିଶ୍ରମ ଦ୍ୱାରାହିଁ ସଫଳତା ମିଳିପାରିବ ବୋଲି ଭାରତର ପୂର୍ବତନ ଟେଷ୍ଟ ଓପନର କହିଥିଲେ।

ଦକ୍ଷତା, ପାରଦର୍ଶିତା, କଠିନ ପରିଶ୍ରମ, ଅଭ୍ୟାସ ଏବଂ ଇଚ୍ଛାଶକ୍ତି ଦ୍ୱାରା ହିଁ ସଫଳତା ହାସଲ କରିହେବ। ଛାତ୍ରାବସ୍ଥାର ଏହି ସୁବର୍ଣ୍ଣ ସମୟ ଆଉ ଆଗକୁ ଆସିବନି। ତେଣୁ ଏଭଳି ସୁଯୋଗକୁ ହାତଛଡା ନ କରି ନିଜ କର୍ମ ପଥରେ ଅଗ୍ରସର ହେବା ନେଇ ଛାତ୍ରଛାତ୍ରୀଙ୍କୁ ସେ ଆହ୍ୱାନ ଦେଇଛନ୍ତି।

କାର୍ଯ୍ୟକ୍ରମରେ ସୋଆ କୁଳପତି ପ୍ରଫେସର ବିଜୟ କୁମାର ସାହୁ ଏବଂ ଛାତ୍ରମଙ୍ଗଳ ଡିନ୍ ପ୍ରଫେସର ଜ୍ୟୋତି ରଞ୍ଜନ ଦାସ ବକ୍ତବ୍ୟ ରଖିଥିବା ବେଳେ ସ୍ପୋର୍ଟ୍ସ ଅଫିସର ଶ୍ରୀମତି ସୁନୀତା ବର୍ମା ବାର୍ଷିକ କ୍ରିଡ଼ା ବିବରଣୀ ପ୍ରଦାନ କରିଥିଲେ।

ଲାଲ କୃତି ପତିଯୋଗୀମାନଙ୍କୁ ପୁରସ୍କାର ଓ ଟ୍ରଫି ପ୍ରଦାନ କରିଥିଲେ। ସୋଆ କପ ୨୦୨୨ ଜାନୁଆରୀ ୪ ତାରିଖ ଦିନ ଉଦ୍‌ଘାଟିତ ହୋଇଥିଲା।

ସୋଆର ବିଭିନ୍ନ ଅନୁଷ୍ଠାନ ଏବଂ ଇନ୍‌ଷ୍ଟିୁଚ୍ୟଟ୍ ଅଫ୍ ଟେକ୍ନିକାଲ୍ ଏଜୁକେସନ୍ ଆଣ୍ଡ ରିସର୍ଚ୍ଚ (ଆଇଟିଇଆର୍‌)ର ବିଭିନ୍ନ ବିଭାଗର ଛାତ୍ରଛାତ୍ରୀମାନଙ୍କ ମଧ୍ୟରେ ୧୧ ଟି କ୍ରିଡ଼ାକୁ ନେଇ ପ୍ରତିଯୋଗିତା କରାଯାଇଥିଲା।

ଆଇଟିଇଆର୍‌ର କମ୍ପ୍ୟୁଟର୍ ସାଇନ୍‌ସ ଆଣ୍ଡ ଇଞ୍ଜିନିୟରିଂ ବିଭାଗ ଫୁଟବଲ୍‌ରେ ବିଜୟ ହାସଲ କରିଥିବା ବେଳେ ମାଷ୍ଟର ଇନ୍ କମ୍ପ୍ୟୁଟର ଆପ୍ଲିକେସନ୍ ବିଭାଗର ପୁରୁଷ କ୍ରିକେଟ ଟାଇଟଲ୍ ହାସଲ କରିଥିଲା। ସେହିପରି ସ୍କୁଲ ଅଫ୍ ଫାର୍ମାସ୍ୟୁଟିକାଲ୍ ସାଇନ୍‌ସେସ୍ (ଏସ୍‌ପିଏସ୍‌) ମହିଳା କ୍ରିକେଟ ଫାଇନାଲରେ ବିଜୟ ହାସଲ କରିଥିଲା।

ସିଏସ୍‌ଇର ଅମ୍ଳାନ୍ ପ୍ରଧାନ ପୁରୁଷ ବିଭାଗରେ ଚେସ୍ ଚାମ୍ପିଅନ୍ ହୋଇଥିବା ବେଳେ ମହିଳାମାନଙ୍କ କ୍ଷେତ୍ରରେ ସ୍ନିଲ୍‌ର ହ୍ରିମାଦ୍ରୀ ସାଇକିଆ ବିଜୟ ହାସଲ କରିଥିଲେ। ସେହିପରି ସିଏସ୍‌ଇର ଅବିନାଶ ତ୍ରୀପାଠି ଏବଂ ସ୍ନିଲ୍‌ର ପାୟଲ ପାଣି ଯଥାକ୍ରମେ ପୁରୁଷ ଏବଂ ମହିଳା ଟେବୁଲ ଟେନିସ୍ ଚାମ୍ପିଅନ୍ ଟାଇଟଲ୍ ହାସଲ କରିଥିବା ବେଳେ ଇନ୍‌ଷ୍ଟିଚ୍ୟୁଟ୍ ଅଫ୍ ଏଗ୍ରିକଲଚରାଲ୍ ସାଇନ୍‌ସେସ୍ (ଆଇଏଏସ୍‌)ର ଅମିତୋଜ ସିଂ ସଚଦେବ ଏବଂ ଇନ୍‌ଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍‌ସେସ୍ (ଆଇଏମ୍‌ଏସ୍‌)ର ସଗୁନ୍ ବଶିଷ୍ଟ ଟେନିସ୍ ପୁରୁଷ ଓ ମହିଳା କ୍ୟାଟେଗୋରୀରେ ବିଜୟ ହାସଲ କରିଥିଲେ।

ଥ୍ରୋ ବଲ୍‌ର ଫାଇନାଲ୍‌ରେ ସମ୍ ନର୍ସିଂ କଲେଜର ଛାତ୍ରୀମାନେ ବିଜୟ ହୋଇଛନ୍ତି। ସେହିପରି ପୁରୁଷ କବାଡିରେ ଆଇବିସିଏସ୍ ଚାମ୍ପିଅନ୍ ହୋଇଥିବା ବେଳେ ମହିଳା କ୍ୟାଟେଗୋରୀରେ ଆଇଟିଇଆର୍ ବିଜୟୀ ହୋଇଛି। ଖୋ ଖୋ ରେ ଆଇବିସିଏସ୍ ଛାତ୍ରମାନେ ଚାମ୍ପିଅନ୍ ହୋଇଥିବା ବେଳେ ବାସ୍କେଟବଲ୍‌ରେ ପୁରୁଷ କ୍ୟାଟେଗୋରୀରେ ଆଇଏମ୍‌ଏସ୍ ବିଜୟୀ ହୋଇଛି ଏବଂ ମହିଳା କ୍ୟାଟେଗୋରୀରେ ସ୍ନିଲ୍ ବିଜୟ ହାସଲ କରିଛି।

ଭଳିବଲ୍‌ରେ ଆଇବିସିଏସ୍‌ର ଛାତ୍ରମାନେ ଜିତିଥିବା ବେଳେ ଏସ୍‌ପିଏସ୍ ଏବଂ ଆଇବିସିଏସ୍ ଯଥାକ୍ରମେ ପୁରୁଷ ଏବଂ ମହିଳା କ୍ୟାଟେଗୋରୀରେ ସଫ୍ଟବଲ୍ ଟାଇଟଲ୍ ହାସଲ କରିଛନ୍ତି।
ସୁନ୍ଦର ସ୍ୱାସ୍ଥ୍ର ପ୍ରତିଯୋଗିତାରେ ସାର୍ତିକ ସତ୍ୟକାମ ନାୟକ ପୁରସ୍କୃତ ହୋଇଛନ୍ତି।