ଭୁବନେଶ୍ଵର: ପୂର୍ବ ଭାରତର ସବୁଠାରୁ ଲୋକପ୍ରିୟ ଓ ପ୍ରିମିୟମ୍ ଓଭର-ଦି-ଟପ୍ (ଓଟିଟି) ଷ୍ଟ୍ରିମିଂ ପ୍ଲାଟଫର୍ମ ଆଓ ନେକ୍ସ୍ଟରେ ଜୁନ ୧୪ ତାରିଖରୁ ଉପଲବ୍ଧ ହେବ ଓଲିଉଡ ସୁପରଷ୍ଟାର ଅନୁଭବ ମହାନ୍ତିଙ୍କ ସୁପର ହିଟ୍ ଫିଲ୍ମ କୁହୁଡି’। ୨୦୨୪ ରଜରେ ବଡ଼ ପରଦାକୁ ଏହି ଫିଲ୍ମ ମାଧ୍ୟମରେ ଫେରିଥିଲେ ଅନୁଭବ ମହାନ୍ତି। ଫିଲ୍ମଟି ନିଆରା ପାରିବାରିକ କାହାଣୀ ଉପରେ ଆଧାରିତ ହୋଇଥିବା ବେଳେ ଏହି ଫିଲ୍ମଟି ଦର୍ଶକଙ୍କ ମନକୁ ଛୁଇଁ ଥିଲା।
ନିର୍ଦ୍ଦେଶକ ଅଜୟ ପାଢୀଙ୍କ ନିର୍ଦ୍ଦେଶିତ ଏହି ‘କୁହୁଡି’ ଫିଲ୍ମରେ ଅନୁଭବ ମହାନ୍ତିଙ୍କ ସହ ଅଭିନେତା ଦ୍ବିପନ୍ବିତ ଦାସମହାପାତ୍ର, ଅଭିନେତ୍ରୀ ସୁପ୍ରିୟା ନାୟକ, ପ୍ରକୃତି ମିଶ୍ର ମଧ୍ୟ ମୁଖ୍ୟ ଚରିତ୍ରରେ ନଜର ଆସିଥିଲେ। କ୍ୟାମେରା କୁଇନ ପ୍ରଡ଼କ୍ସନ ପ୍ରସ୍ତୁତ ଏହି ଓଡ଼ିଆ ଫିଲ୍ମର ପ୍ରଯୋଜନା ଦାୟିତ୍ୱରେ ଥିଲେ ହିମାଦ୍ରୀ ତନୟ ଦାସ, ନିର୍ଦ୍ଦେଶନା ଅଜୟ ପାଢ଼ୀ, ଚିତ୍ରତ୍ତୋଳନ ଅନିଲ କାକ୍କୀ କରିଥିଲେ। ଅନ୍ୟାନ୍ୟ ଭୂମିକାରେ କୁନା ତ୍ରିପାଠୀ, ସୁକୁମାର ଟୁଡୁ, ସୁଶୀଲ ମିଶ୍ର, ଶକ୍ତି ବରାଳ ଏବଂ ଦୁଇଜଣ ଶିଶୁ କଳାକାର ପିହୂ ଏବଂ ଦୀକ୍ଷା ପ୍ରମୁଖ ଅଛନ୍ତି।
‘ଓଟିଟି ପ୍ଲାଟଫର୍ମଗୁଡିକର ଲୋକପ୍ରିୟତା ବଢିବାରେ ଲାଗିଛି ଓ ଆଓ ନେକ୍ସ୍ଟ ସବୁବେଳେ ଓଡ଼ିଶାର ଦର୍ଶକଙ୍କ ମନକୁ ଛୁଇଁଲା ପରି କାହାଣୀ ଓ ବିଷୟ ବସ୍ତୁ ନିଜ ଷ୍ଟ୍ରିମିଂ ପ୍ଲାଟଫର୍ମରେ ଆଣିଥିବାରୁ ସମସ୍ତ ଓଡ଼ିଆଙ୍କ ପ୍ରିୟ ହୋଇ ପାରିଛି। ରଜ ପୂର୍ବରୁ ଏହି ଫିଲ୍ମଟି ନିଶ୍ଚୟ ଦର୍ଶକଙ୍କ ମନକୁ ଛୁଇଁବ ବୋଲି କହିଛନ୍ତି ଆଓ ନେକ୍ସ୍ଟର ପ୍ରତିଷ୍ଠାତା ତଥା ସିଇଓ କୌଶିକ ଦାସ। ଅନୁଭବ ଜଣେ ଓକିଲ ଭୂମିକାରେ ନଜର ଆସିବାକୁ ଥିବା ବେଳେ ଦ୍ବିପନ୍ବିତ ଏକ ଅଭିଯୁକ୍ତ ଭୂମିକାରେ ନଜର ଆସିଛନ୍ତି ଏହି ଫିଲ୍ମରେ। ବହୁ ପ୍ରତିକ୍ଷୀତ ଏହି ଫିଲ୍ମ ପାଇଁ ଅନୁଭବଙ୍କ ଫ୍ୟାନ ମାନେ ଏହି ଫିଲ୍ମକୁ ଭରପୁର ଭଲପାଇବା ଦେବା ସହ ଏହି ଫିଲ୍ମ ଓଡ଼ିଶାର ରଜ ବଜାରକୁ ପୂରା ସରଗରମ କରିବ ବୋଲି ସେ କହିଛନ୍ତି।
‘କୁହୁଡି’ ଏକ ପାରିବାରିକ ବିଷୟବସ୍ତୁ ଆଧାରିତ ଫିଲ୍ମ। ସତ ମିଛର କୁହୁଡି ଭିତରେ କିଭଳି କୁହୁଡି ହଟିଛି ଆଉ ସତ ସାମ୍ନାକୁ ଆସିଛି, ବିଶେଷକରି ଜଣେ ବିଚ୍ଛେଦ ବାପା ମାଆଙ୍କର ସନ୍ତାନ କାହା ପାଖରେ ରହିବାର ଆବଶ୍ୟକତା ଅଛି ନା ପିଲାର ସୁସ୍ଥ ଭବିଷ୍ୟତ ପାଇଁ ବାପା ଓ ମା’ଙ୍କୁ ଏକାଠି ରହିବାର ଅଛି ତାର ନିଷ୍ପତ୍ତି ଏହି ଫିଲ୍ମରେ ଦେଖିବାକୁ ମିଳିଛି। ସମାଜକୁ ଏକ ସୁନ୍ଦର ସଚେତନତା ଏବଂ ଶିକ୍ଷଣୀୟ ବାର୍ତ୍ତା ଦେଇ ଏହି ସିନେମାଟି ଗତିଶୀଳ ହୋଇଥିବା ହେତୁ ଷ୍ଟ୍ରିମିଂ ପ୍ଲାଟଫର୍ମ ଆଓ ନେକ୍ସ୍ଟରେ ଏକ ଅନନ୍ୟ ରେକର୍ଡ କରିବ ବୋଲି ଫିଲ୍ମର ସମସ୍ତ ସଦସ୍ୟ କହିଛନ୍ତି।