ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଆୟ ବର୍ହିଭୂତ ସଂପତ୍ତି ଠୁଳ ଅଭିଯୋଗରେ ଆଜି ବ୍ରହ୍ମପୁର ଭିଜିଲାନସ ବିଭାଗ ପକ୍ଷରୁ ବ୍ରହ୍ମପୁର ବନଖଣ୍ଡ ଏବଂ ଚିଲିକା ୱାଇଲ୍ଡ ଲାଇଫ୍ ବନଖଣ୍ଡର ଦୁଇ ଆକାଉଣ୍ଟାଣ୍ଟ ଘର ଏବଂ ବିଭିନ୍ନ ସ୍ଥାନରେ ଏକକାଳୀନ ଚଢ଼ାଉ ହୋଇଛି। ବ୍ରହ୍ମପୁର ଭିଜିଲାନସ କେସ ନଂ ୪/୨୦୨୦ରେ ଚିଲିକା ୱାଇଲ୍ଡ ଲାଇଫ୍ ଡ଼ିଭିଜନ, ବାଲୁଗାଁର ଜୁନିୟର ଆକାଉଣ୍ଟାଣ୍ଟ ନବୀନ ଚନ୍ଦ୍ର ବିଷୋୟୀଙ୍କ ବ୍ରହ୍ମପୁର ନୀଳକଣ୍ଠନଗର ତୃତୀୟ ଲାଇନ୍ ଘର, ବାଲୁଗାଁ କାର୍ଯ୍ୟାଳୟ ଚାମ୍ବର, ଚିଲିକା ଫରେଷ୍ଟ ରେଷ୍ଟ ହାଉସ୍ରେ ଏକକାଳୀନ ଚଢ଼ାଉ ହୋଇଥିଲା। ଚଢ଼ାଉ ପରେ ତାଙ୍କର ସ୍ଥାବର ଓ ଅସ୍ଥାବର ସଂପତ୍ତିର ପରିମାଣ ଭିଜିଲାନସ ବିଭାଗ ପ୍ରଦାନ କରିଛି।
ବ୍ରହ୍ମପୁର ନୀଳକଣ୍ଠନଗର ତୃତୀୟ ଗଳିରେ ଥିବା ଘରର ମୂଲ୍ୟ ୯୬ଲକ୍ଷ ୪୦ହଜାର ୫୯୮ ଟଙ୍କା, ଜଟଣି ବଡ଼ରଘୁନାଥପୁର ମୌଜାରେ ଥିବା ୨ଟି ପ୍ଲଟ୍ ଯାହାର ମୂଲ୍ୟ ୩୨ହଜାର, ୫ ଲକ୍ଷ ୯୫ହଜାର ୨ଶହ ଟଙ୍କାର ଘର ସାମଗ୍ରୀ, ୯୦ହଜାର ୫ଶହ ଟଙ୍କା ସୁନା ଏବଂ ରୂପା ଅଳଙ୍କାର, ୫ ଲକ୍ଷ ୧୦ ହଜାର ୩୯୯ ଟଙ୍କାର ବିଭିନ୍ନ ବ୍ୟାଙ୍କରେ ଡ଼ିପୋଜିଟ୍, ୧ ଲକ୍ଷ ୪୧ହଜାର ୧୭୨ ନଗଦ ଟଙ୍କା, ଗୋଟିଏ ମୋଟର ସାଇକେଲ୍ ଯାହାର ମୂଲ୍ୟ ୯୩ହଜାର ଟଙ୍କା ଆକଳନ କରାଯାଇଛି। ସମୁଦାୟ ସଂପତ୍ତି ୧ କୋଟି ୧୧ ଲକ୍ଷ ୨ହଜାର ୮୭୬ ଟଙ୍କା ଆକଳନ କରିଛି ଭିଜିଲାନସ ବିଭାଗ। ସେ ୧୯୭୯ ରୁ ଜୁନିୟର କ୍ଲର୍କ ଭାବେ ଚିଲିକା ଡ଼ିଭିଜନରେ କାର୍ଯ୍ୟରତ ଅଛନ୍ତି।
ସେହିପରି ଆୟ ବର୍ହିଭୂତ ମାମଲା ୫/୨୦୨୦ ୱାରେଣ୍ଟରେ ବ୍ରହ୍ମପୁର ବନଖଣ୍ଡ ତଥା ବ୍ରହ୍ମପୁର ଡ଼ିଏଫ୍ଓ ଅଫିସରେ କାର୍ଯ୍ୟରତ ଜୁନିୟର ଆକାଉଣ୍ଟାଣ୍ଟ ସୂର୍ଯ୍ୟ ନାରାୟଣ ତ୍ରିପାଠୀଙ୍କ ବ୍ରହ୍ମପୁର କମାପଲ୍ଲୀ ନୃସିଂହ ମନ୍ଦିର ସାହିରେ ଥିବା ତିନି ମହଲା ଘର, ବ୍ରହ୍ମପୁର ତହସିଲ୍, ଆଙ୍କୁଲି ମୌଜା ବାବାଜୀ ଢ଼ାବା ନିକଟରେ ଥିବା ଆସିଆନା ଆପର୍ଟମେଣ୍ଟର ଫ୍ଲାଟ୍, ବ୍ରହ୍ମପୁର ଅଫିସ୍ ଚାମ୍ବରରେ ବ୍ରହ୍ମପୁର ଭିଜିଲାନସ ବିଭାଗ ପକ୍ଷରୁ ଏକକାଳୀନ ଚଢ଼ାଉ ହୋଇଥିଲା।
ସ୍ଥାବର ସଂପତ୍ତି ମଧ୍ୟରେ ନୃସିଂହ ମନ୍ଦିର ସାହିରେ ଥିବା ତିନି ମହଲା ଘର ଯାହାର ମୂଲ୍ୟ ୩୬ ଲକ୍ଷ ୫୨ହଜାର ୩୧୨ ଟଙ୍କା, ଆସିଆନା ଆପାର୍ଟମେଣ୍ଟରେ ଥିବା ପ୍ଲାଟ୍ର ମୂଲ୍ୟ ୧୨ଲକ୍ଷ ୩୮ହଜାର ୫୨୦ ଟଙ୍କା, ଆଙ୍କୁଲି ମୌଜାରେ ଥିବା ଏକ ଜାଗା ଯାହାର ମୂଲ୍ୟ ୧ଲକ୍ଷ ୧୭ହଜାର ୬୮୩ ଟଙ୍କା, ପଥରା ମୌଜାରେ ଥିବା ଏକ ଜାଗା ଯାହାର ମୂଲ୍ୟ ୨ ଲକ୍ଷ ୮୩ହଜାର ୩୫୦ ଟଙ୍କା ଆକଳନ କରାଯାଇଛି। ଅସ୍ଥାବର ସଂପତ୍ତି ଭାବେ ୨ ଲକ୍ଷ ୮୭ହଜାର ୮୫୦ ଟଙ୍କାର ଘର ସଜ୍ଜା ତଥା ଘର ଉପକରଣ, ୩ ଲକ୍ଷ ୨୧ହଜାର ୫୬୮ ଟଙ୍କାର ବିଭିନ୍ନ ବ୍ୟାଙ୍କ ଡ଼ିପୋଜିଟ୍, ୩୯ହଜାର ୬୫୦ ନଗଦ ଟଙ୍କା ଜବତ ହୋଇଛି।
ସମୁଦାୟ ସଂପତ୍ତିର ପରିମାଣ ୫୯ ଲକ୍ଷ ୭୦ହଜାର ୯୯୩ ଟଙ୍କା ଆକଳନ କରାଯାଇଛି। ଶ୍ରୀ ତ୍ରିପାଠୀ ୧୯୯୩ ମସିହାରେ ଚାକିରି ଜୀବନ ଆରମ୍ଭ କରି ସେ ବ୍ରହ୍ମପୁର ଡ଼ିଏପ୍ଓ ଅଫିସ୍ରେ ଜୁନିୟର ଆସିଷ୍ଟାଣ୍ଟ ଭାବେ କାର୍ଯ୍ୟରଥ ଅଛନ୍ତି। ଉଭୟ ମାମଲାରେ ଅଧିକ ଅନୁସନ୍ଧାନ ଜାରି ରହିଥିବା ଭିଜିଲାନସ ଏସ୍ପି ସୂଚନା ଦେଇଛନ୍ତି।