ସୀତାରାମ ଅଗ୍ରୱାଲ
ଚିଲିକା: ଖୋର୍ଦ୍ଧା ଏସପିଙ୍କ ନିର୍ଦ୍ଦେଶକ୍ରମେ ଏବଂ ବାଲୁଗାଁ ଏସଡିପିଓ ଙ୍କ ତତ୍ୱାବଧାନରେ ବାଲୁଗାଁ ପୋଲିସ ନିଖୋଜ/ଅପହୃତ ନାବାଳିକାଙ୍କ ଉଦ୍ଧାର ଅପେରସନ ଜାରି ରଖିଥିବା ବେଳେ ଗତ ଚାରିଦିନ ମଧ୍ୟରେ ୩ ଜଣ ନାବାଳିକାଙ୍କୁ ଉଦ୍ଧାର କରିବାରେ ସଫଳ ହୋଇଛି। ୨୦୨୦ ରୁ ୨୦୨୨ ବର୍ଷ ମଧ୍ୟର ସମସ୍ତ ୩ ଗୋଟି ମାମଲା ବୋଲି ଜଣାପଡିଛି। ତେବେ ଉଦ୍ଧାର ନାବାଳିକାଙ୍କୁ ସେମାନଙ୍କ ପରିବାର କୁ ହସ୍ତାନ୍ତର କରାଯାଇଥିବା ବେଳେ ସେମାନଙ୍କ ସୁରକ୍ଷା ବ୍ୟବସ୍ଥା ମଧ୍ୟ କରିଛି ପୋଲିସ।
ତେବେ ବର୍ଷ ବର୍ଷ ଧରି ନିଖୋଜ ଥିବା ନାବାଳିକାଙ୍କ ଉଦ୍ଧାର କାର୍ଯ୍ୟକୁ ଆହୁରି ତ୍ୱରାନ୍ୱିତ କରିଛି ପୋଲିସ। ବାଲ୍ୟ ବିବାହ ଏବଂ ନାବାଳିକାଙ୍କ ଅପହରଣ ଏକ ଧର୍ତ୍ତବ୍ୟ ଅପରାଧ ଏବଂ ଏହି ସମ୍ବନ୍ଧରେ ଖୁବ ଶୀଘ୍ର ବାଲୁଗାଁ ପୋଲିସ ବିଭିନ୍ନ ଜନ ସଚେତନତା କାର୍ଯ୍ୟକ୍ରମ ଆୟୋଜିତ କରିବ ବୋଲି ଆଇଆଇସି ରଶ୍ମିରଞ୍ଜନ ଦାସ ସୂଚନା ଦେଇଛନ୍ତି।
ଅନୁରୂପ ଭାବେ ବାଲୁଗାଁ ଥାନରେ କୌଣସି ମହିଳା ଅଧିକାରିଣୀ ନଥିବା ବେଳେ ବାଣପୁର ଅତିରିକ୍ତ ମହିଳା ଆଇଆଇସିଙ୍କୁ ବାଲୁଗାଁକୁ ବଦଳି କରାଯାଇଥିବାରୁ ଆଇଆଇସି ଶ୍ରୀ ଦାସ ଏସଡ଼ିପିଓ ଏବଂ ଏସପିଙ୍କୁ କୃତଜ୍ଞତା ଜ୍ଞାପନ କରିଛନ୍ତି।