ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ଗ୍ରହଣ କରାଯାଇଥିବା ୧୨୦୦ ରୁ ଅଧିକ ଉପହାର ସେପ୍ଟେମ୍ବର ୧୭ ତାରିଖରୁ ନିଲାମ ହେବାକୁ ଯାଉଛି। ଏଥିସହ ଏଥିରୁ ପ୍ରାପ୍ତ ଟଙ୍କା ନାମାମି ଗଙ୍ଗା ମିଶନକୁ ଦିଆଯିବ। ନ୍ୟାସନାଲ ମ୍ୟୁଜିୟମ୍ ଅଫ୍ ମଡର୍ନ ଆର୍ଟ୍ର ମହାନିର୍ଦ୍ଦେଶକ ଅଦିତ ଗଡନାୟକ କହିଛନ୍ତି ଯେ, ଏହି ନିଲାମ ୱେବ୍ ପୋର୍ଟାଲ୍ ‘pmmementos.gov.in’ ମାଧ୍ୟମରେ କରାଯିବ ଏବଂ ଅକ୍ଟୋବର ୨ ତାରିଖରେ ଶେଷ ହେବ।
ଏହି ଉପହାରଗୁଡ଼ିକୁ ସଂଗ୍ରହାଳୟରେ ରଖାଯାଇଛି। ଗଡନାୟକ କହିଛନ୍ତି ଯେ, ସାଧାରଣ ବ୍ୟକ୍ତିଙ୍କ ଠାରୁ ଭାରତର ସମୃଦ୍ଧ ସଂସ୍କୃତି ଏବଂ ଐତିହ୍ୟର ପ୍ରତିନିଧିତ୍ୱ କରୁଥିବା ବିଭିନ୍ନ ମାନ୍ୟଗଣ୍ୟ ବ୍ୟକ୍ତିଙ୍କ ଦ୍ୱାରା ପ୍ରଦାନ କରାଯାଇଥିବା ଅନ୍ୟାନ୍ୟ ଉପହାର ନିଲାମ କରାଯିବ। ଉପହାରର ମୂଳ ମୂଲ୍ୟ ୧୦୦ ଟଙ୍କାରୁ ୧୦ ଲକ୍ଷ ଟଙ୍କା ମଧ୍ୟରେ ରଖାଯାଇଛି।
ଉପହାର ତାଲିକାରେ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନଙ୍କ ଦ୍ୱାରା ଦିଆଯାଇଥିବା ରାନୀ କମଳାପତିଙ୍କ ଏକ ପ୍ରତିମୂର୍ତ୍ତି, ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଦ୍ୱାରା ହନୁମାନ ପ୍ରତିମା ଏବଂ ହିମାଚଳ ପ୍ରଦେଶ ମୁଖ୍ୟମନ୍ତ୍ରୀ ଜୟ ରାମ ଠାକୁରଙ୍କ ଦ୍ୱାରା ପ୍ରଦାନ କରାଯାଇଥିବା ଏକ ତ୍ରିଶୁଳ ଅନ୍ତର୍ଭୁକ୍ତ।
ଏଥିରେ ନ୍ୟାସନାଲ କଂଗ୍ରେସ ପାର୍ଟି ନେତା ଅଜିତ ପାୱାରଙ୍କ ଦ୍ୱାରା ଦିଆଯାଇଥିବା ଦେବୀ ମହାଲକ୍ଷ୍ମୀଙ୍କ ଏକ ପ୍ରତିମୂର୍ତ୍ତି ଏବଂ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଜଗନ୍ ମୋହନ ରେଡ୍ଡୀଙ୍କ ଦ୍ୱାରା ପ୍ରଦତ୍ତ ପ୍ରଭୁ ଭେଙ୍କଟେଶ୍ଵରଙ୍କ ଏକ କଳାକୃତି ରହିଛି। ପ୍ରଧାନମନ୍ତ୍ରୀ ମୋଦୀ ଗ୍ରହଣ କରିଥିବା ଉପହାର ନିଲାମର ଏହା ହେଉଛି ଚତୁର୍ଥ ସଂସ୍କରଣ।
ସଂଗ୍ରହାଳୟ ନିର୍ଦ୍ଦେଶକ ତେମସୁନାରୋ ଜାମିର କହିଛନ୍ତି ଯେ, ପଦକ ବିଜେତାଙ୍କ ଦସ୍ତଖତ ସହିତ ଟି-ସାର୍ଟ, ବକ୍ସିଂ ଗ୍ଲୋଭସ୍ ଏବଂ ଜାଭେଲିନ୍ ଭଳି କ୍ରୀଡା ସାମଗ୍ରୀର ଏକ ସ୍ୱତନ୍ତ୍ର ସଂଗ୍ରହ ଅଛି। ସେ କହିଛନ୍ତି ଯେ, ଏହି ଉପହାରଗୁଡ଼ିକରେ ଚିତ୍ର, ମୂର୍ତ୍ତି, ହସ୍ତଶିଳ୍ପ ଏବଂ ଲୋକକଳା ମଧ୍ୟ ଅନ୍ତର୍ଭୁକ୍ତ। ସେ କହିଛନ୍ତି ଯେ, ଅନ୍ୟ ଜିନିଷଗୁଡ଼ିକ ମଧ୍ୟରେ ଶ୍ରୀ ରାମ ମନ୍ଦିରର ମଡେଲ ଏବଂ ଅଯୋଧ୍ୟାରେ ନିର୍ମିତ କାଶୀ ବିଶ୍ୱନାଥ ମନ୍ଦିରର ମଡେଲ ରହିଛି।
