ଭୁବନେଶ୍ୱର: ପରିଚାଳକମାନଙ୍କ ତାଲିମ, କ୍ରୟ, ବିକ୍ରୟ ଏବଂ ପ୍ରକ୍ରିୟାକରଣ ସହିତ ଓମ୍ଫେଡର ସାମଗ୍ରିକ ବିକାଶ ପାଇଁ ନ୍ୟାସନାଲ ଡାଏରୀ ଡେଭଲପମେଣ୍ଟ ବୋର୍ଡ (ଏନ୍ ଡି ଡି ବି) ସହ ଏମଓୟୁ ସ୍ୱାକ୍ଷର କଲା ଓମ୍ଫେଡ୍। ଚାଷ ଉପରେ ଗୁରୁତ୍ୱ ଦେଉଥିବା ରାଜ୍ୟ ସରକାର ଓମ୍ଫେଡକୁ ସଶକ୍ତ କରିବା ପାଇଁ ଜୋରଦାର୍ ଉଦ୍ୟମ ଆରମ୍ଭ କରିଦେଇଛନ୍ତି।
ଓମ୍ଫେଡକୁ ବ୍ୟାପକ କରିବାକୁ ଖୋଦ୍ ମତ୍ସ୍ୟ ଓ ପ୍ରାଣୀ ସଂପଦ ବିକାଶ ମନ୍ତ୍ରୀ ଗୋକୁଳାନନ୍ଦ ମଲ୍ଲିକଙ୍କ ପ୍ରତ୍ୟେକ୍ଷ ତତ୍ୱାବଧାନରେ ଏବେ ଉଦ୍ୟମ ଆରମ୍ଭ ହୋଇଛି। ଗୋ ପାଳନକୁ ଗୁରୁତ୍ୱ ଦେବା ସହ ଓମ୍ଫେଡ୍ କିପରି ନୂଆ ନୂଆ ଉତ୍ପାଦ ବଜାରକୁ ଆଣିବ ସେଥିପାଇଁ ଆରମ୍ଭ ହୋଇଛି ଉଦ୍ୟମ। ଉତ୍ପାଦନ ବୃଦ୍ଧି କରିବା ସହ ତାର ବିକ୍ରି ପାଇଁ ମାର୍କେଟ ସୃଷ୍ଟି କରିବାକୁ ମଧ୍ୟ ବ୍ୟାପକ ବ୍ୟବସ୍ଥା କରାଯାଉଛି।
ଏହି କ୍ରମରେ ଏବେ ରାଜ୍ୟର ବିଭିନ୍ନ ପଞ୍ଚାୟତରେ ଆରମ୍ଭ ହୋଇଛି କ୍ଷୀରଧାରା କେନ୍ଦ୍ର। ଏଠାରେ କ୍ଷୀର ସଂଗ୍ରହ ହେବା ସହ ଓମ୍ଫେଡ୍ ଉତ୍ପାଦ ଯଥା-କ୍ଷୀର, ଖଟା ଓ ମିଠା ଦହି, ରାବିଡି, ଛେନାପୋଡ, ଗୁଆ ଘିଅ, ଓମ୍ଫେଡ୍ କ୍ଷୀର ପାଉଡର, ଫେଭର ମିଲ୍କ, ଲସି ଇତ୍ୟାଦି ବିକ୍ରି କରିବାର ବ୍ୟବସ୍ଥା କରାଯାଉଛି। ଆଗାମୀ ଦିନରେ ଆହୁରି ଅନେକ ନୂତନ ଉତ୍ପାଦ ଯଥା-ପାଣି, ଚକଲେଟ ଆଦି ବଜାରକୁ ଆଣିବାକୁ ଯାଉଛି ଓମ୍ଫେଡ୍।
ତେବେ ଓମ୍ଫେଡକୁ କିପରି ଆହୁରି ସଶକ୍ତ କରାଯାଇ ପାରିବ, ସେ ସଂପର୍କରେ ଅଧିକ ତଥ୍ୟ ତଥା ଜ୍ଞାନ କୌଶଳ ସଂପର୍କରେ ଅବଗତ ହେବା ପାଇଁ ମତ୍ସ୍ୟ ଓ ପ୍ରାଣୀ ସଂପଦ ବିକାଶ ମନ୍ତ୍ରୀ ଗୋକୁଳାନନ୍ଦ ମଲ୍ଲିକଙ୍କ ନେତୃତ୍ୱରେ ଏକ ଟିମ୍ ଗୁଜୁରାଟର ଆନନ୍ଦଠାରେ ଥିବା ଭାରତ ସରକାରଙ୍କ ସ୍ୱୀକୃତି ପ୍ରାପ୍ତ ନ୍ୟାସନାଲ ଡାଏରୀ ଡେଭଲପମେଣ୍ଟ ବୋର୍ଡ (NDDB) ପରିଦର୍ଶନରେ ଯାଇଛନ୍ତି। ଏହି ଟିମରେ ଓମ୍ଫେଡ୍ ଅଧ୍ୟକ୍ଷ କିଶୋର ଚନ୍ଦ୍ର ପ୍ରଧାନୀ, ଓମ୍ଫେଡର ପରିଚାଳନା ନିର୍ଦ୍ଦେଶକ ବିଜୟ ଅମୃତା କୁଲାଙ୍ଗେଙ୍କ ସହ ଓମ୍ଫେଡ୍ ଓ ମତ୍ସ୍ୟ ଓ ପ୍ରାଣୀ ସଂପଦ ବିକାଶ ବିଭାଗର ବରିଷ୍ଠ ଅଧିକାରୀମାନେ ଯାଇଛନ୍ତି।
ଓମ୍ଫେଡ୍ ଚାଷୀମାନଙ୍କର ଏକ ସମବାୟ ସଂସ୍ଥା। ଚାଷୀମାନେ କିପରି ଅଧିକରୁ ଅଧିକ ଲାଭ ପାଇପାରିବେ ସେଥିପାଇଁ ଓମ୍ଫେଡ୍ ଉଦ୍ୟମ ଜାରି ରଖିଛି। କେବଳ ସେତିକି ନୁହେଁ ଖାଉଟିମାନେ ଯେପରି ଉତ୍ତମମାନର ଦୁଗ୍ଧଜାତୀୟ ଖାଦ୍ୟ ପଦାର୍ଥ ପାଇପାରିବେ, ସେଥିପାଇଁ ମଧ୍ୟ ଗୁରୁତ୍ୱର ସହ କାମ କରୁଛି। ଓମ୍ଫେଡ୍ ଉତ୍ପାଦନର ଗୁଣବତ୍ତାରେ କୌଣସି ସାଲି କରାଯିବ ନାହିଁ। ଓମ୍ଫେଡର ଉତ୍ପାଦନ ଓ ବିକ୍ରି ବୃଦ୍ଧି ପାଇଲେ, ରାଜ୍ୟର ଆର୍ଥିକ ବିକାଶରେ ଏକ ପ୍ରମୁଖ ଯୋଗଦାନ ହେବ। କେବଳ ସେତିକି ନୁହେଁ, ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି ହେବ ବୋଲି କହିଛନ୍ତି ଓମ୍ଫେଡ୍ ପରିଚାଳନା ନିର୍ଦେଶକ ଶ୍ରୀ ବିଜୟ ଅମୃତା କୁଲାଙ୍ଗେ।
ଦୁଇ ଦିନିଆ ଗସ୍ତରେ ଯାଇଥିବା ଏହି ପ୍ରତିନିଧିମଣ୍ଡଳୀ ଆସନ୍ତା କାଲି ଭୁବନେଶ୍ୱରରେ ପହଞ୍ଚିବେ।
