ରାଉରକେଲା: ଏକ ଭାରତ ଶ୍ରେଷ୍ଠ ଭାରତ – ଯୁବା ସଂଗମ କାର୍ଯ୍ୟକ୍ରମ ଅଧୀନରେ ଓଡ଼ିଶାର ୩୧ ଜଣ ଛାତ୍ରଛାତ୍ରୀ ସପ୍ତାହବ୍ୟାପୀ ଗସ୍ତ କାର୍ଯ୍ୟକ୍ରମରେ ସିକ୍କିମ ଅଭିମୁଖେ ଯାଇଛନ୍ତି। ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିଥିବା ଛାତ୍ରଛାତ୍ରୀମାନେ ହାଓଡ଼ା ଇସ୍ପାତ ଏକ୍ସପ୍ରେସ ଜରିଆରେ ରାଉରକେଲା ଜଙ୍କସନରୁ ସିକ୍କିମ ଅଭିମୁଖେ ଯାତ୍ରା ଆରମ୍ଭ କରିଥିଲେ।
ଓଡ଼ିଶାର ବିଭିନ୍ନ ସ୍ଥାନରୁ ଏହି ପ୍ରତିନିଧି ଦଳରେ ସାମିଲ ହୋଇଥିବା ଛାତ୍ରଛାତ୍ରୀମାନେ ସିକ୍କିମ ଗସ୍ତ ଅବସରରେ ସେଠାକାର ପରମ୍ପରା, ପର୍ଯ୍ୟଟନ, ବିକାଶ, ପ୍ରଯୁକ୍ତି ଓ ଜନସମ୍ପର୍କ ବିଷୟରେ ଜାଣିବାର ସୁଯୋଗ ପାଇବେ। ସିକ୍କିମ ଗସ୍ତ ଅବସରରେ ଓଡ଼ିଶାର ଯୁବପ୍ରତିନିଧିମାନେ ସେଠାକାର ବିଭିନ୍ନ ପର୍ଯ୍ୟଟନ ସ୍ଥଳୀ, ଜୈବିକ କୃଷି ୟୁନିଟ୍ ଏନଜିଓ ସଂସ୍ଥା ପରିଦର୍ଶନ କରିବେ। ଟେମି ଚା’ ବଗିଚା, ଚାରଧାମ, ବୁଦ୍ଧପାର୍କ, ଜ୍ଞାଥାଙ୍ଗ ଗ୍ରାମ, ନେସନାଲ ଇନଷ୍ଟିଚ୍ୟୁଟ୍ ଅଫ ତିବେଟୋଲୋଜି, ରାଜଭବନ, ନାମଚି ଲୋକାଲ ମାର୍କେଟ ଆଦି ସ୍ଥାନ ଛାତ୍ରଛାତ୍ରୀମାନେ ବୁଲି ଦେଖିବେ। ଏନଆଇଟି ସିକ୍କିମର ଛାତ୍ରଛାତ୍ରୀଙ୍କ ସହିତ ସେମାନେ ସାଂସ୍କୃତିକ କାର୍ଯ୍ୟକ୍ରମ, କ୍ରୀଡ଼ା ସମେତ ବିଭିନ୍ନ କାର୍ଯ୍ୟକଳାପରେ ଯୋଗ ଦେବେ। ଓଡ଼ିଶାର ଛାତ୍ର ପ୍ରତିନିଧି ଦଳ ସିକ୍କିମ ରାଜ୍ୟପାଳ ଲକ୍ଷ୍ମଣ ପ୍ରସାଦ ଆଚାର୍ଯ୍ୟଙ୍କୁ ମଧ୍ୟ ଭେଟିବାର କାର୍ଯ୍ୟକ୍ରମ ରହିଛି।
ସିକ୍କିମ ଗସ୍ତ କରୁଥିବା ଛାତ୍ରଛାତ୍ରୀଙ୍କ ପାଇଁ ଏକ ନୈଶ୍ୟଭୋଜି ଏବଂ ସଚେତନତା କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଏଥିରେ ଏନଆଇଟି ରାଉରକେଲାର ନିର୍ଦ୍ଦେଶକ ପ୍ରଫେସର କେ. ଉମାମହେଶ୍ବର ରାଓ, ଛାତ୍ର କଲ୍ୟାଣ ଡିନ୍ ଏସ. ଜେନା, ରେଜିଷ୍ଟ୍ରାର ପ୍ରଫେସର ରୋହନ ଧିମାନ, ଏକଭାରତ ଶ୍ରେଷ୍ଠ ଭାରତ କାର୍ଯ୍ୟକ୍ରମର ନୋଡାଲ ଅଧିକାରୀ ପ୍ରଫେସର ୱିନୀ ରାଉତରାୟ ପ୍ରମୁଖ ଯୋଗ ଦେଇଥିଲେ।
ଏନଆଇଟି ନିର୍ଦ୍ଦେଶକ କହିଥିଲେ ଯେ, ଯୁବସଂଗମ କାର୍ଯ୍ୟକ୍ରମ ଯୁବ ଛାତ୍ରଛାତ୍ରୀମାନଙ୍କୁ ବିଚାର ଓ ଜ୍ଞାନ ବିନିମୟ କରିବା ଲାଗି ଏକ ଅସାଧାରଣ ସୁଯୋଗ ଆଣି ଦେଇଛି । ଗସ୍ତ ଅବସରରେ ଓଡ଼ିଶାର ସଂସ୍କୃତି ଓ ପରମ୍ପରାର ପ୍ରଚାରପ୍ରସାର କରିବାକୁ ସେ ଛାତ୍ରଛାତ୍ରୀଙ୍କୁ ପରାମର୍ଶ ଦେଇଥିଲେ।
ପ୍ରଫେସର ରୋହନ ଧିମାନ ଏଭଳି କାର୍ଯ୍ୟକ୍ରମ ଆୟୋଜନ ଲାଗି ଭାରତ ସରକାରଙ୍କ ବିଭିନ୍ନ ମନ୍ତ୍ରଣାଳୟ ପ୍ରତି କୃତଜ୍ଞତା ବ୍ୟକ୍ତ କରିଥିଲେ। ନୋଡାଲ ଅଧିକାରୀ ପ୍ରଫେସର ୱିନୀ ରାଉତରାୟରେ ଗସ୍ତରେ ସାମିଲ ହୋଇଥିବା ଛାତ୍ରଛାତ୍ରୀଙ୍କୁ ସଠିକ ପରାମର୍ଶ ଦେବା ସହିତ ଏସଓପି ସମ୍ପର୍କରେ ଅବଗତ କରାଇଥିଲେ। ସୁଖଦ ଏବଂ ଅନୁଭୂତିପୂର୍ଣ୍ଣ ଗସ୍ତ ପାଇଁ ସେ ସମସ୍ତଙ୍କୁ ଶୁଭେଚ୍ଛା ଜଣାଇଥିଲେ।
ସିକ୍କିମ ଗସ୍ତ କରୁଥିବା ଛାତ୍ରଛାତ୍ରୀଙ୍କ ମଧ୍ୟରେ ସାମିଲ ଥିବା ବିଟେକ୍ ଛାତ୍ର ସ୍ନେହାଶିଷ ସାହୁ ଖୁସି ବ୍ୟକ୍ତ କରିଛନ୍ତି। ସେ କହିଛନ୍ତି ଯେ ସିକ୍କିମର ପ୍ରାକୃତିକ ସୌନ୍ଦର୍ଯ୍ୟକୁ ଉପଭୋଗ କରିବାକୁ ସମସ୍ତେ ଅଗ୍ରହୀ ଅଛନ୍ତି। ଏହି ସାତଦିନିଆ ଗସ୍ତର ଅନୁଭୂତି ଆମ ପାଇଁ ଅମୂଲ୍ୟ ସ୍ମୃତି ବୋଲି ସେ କହିଛନ୍ତି।
ସୂଚନା ଯୋଗ୍ୟ ଯେ, ଏକ ଭାରତ ଶ୍ରେଷ୍ଠ ଭାରତ କାର୍ଯକ୍ରମ ଅଧୀନରେ ଯୁବା ସଂଗମ କାର୍ଯ୍ୟକ୍ରମ ଆୟୋଜନ କରାଯାଉଛି। ଏଥିରେ ଭାରତ ସରକାରଙ୍କ ଶିକ୍ଷା, ସଂସ୍କୃତି, ପର୍ଯ୍ୟଟନ, ରେଳ, ସୂଚନା ଓ ପ୍ରଯୁକ୍ତି, ଯୁବ ବ୍ୟାପାର ଓ କ୍ରୀଡ଼ା, ସ୍ବରାଷ୍ଟ୍ର, ଉତ୍ତର-ପୂର୍ବ କ୍ଷେତ୍ର ବିକାଶ ବିଭାଗ ଏବଂ ଆଇଆରସିଟିସି ଆଦି ବିଭିନ୍ନ ମନ୍ତ୍ରଣାଳୟ/ବିଭାଗ ସହଭାଗୀ ରହିଛନ୍ତି। ଯୁବା ସଂଗମ କାର୍ଯ୍ୟକ୍ରମର ପାଇଲଟ୍ କାର୍ଯ୍ୟକ୍ରମରେ ପ୍ରାୟ ୧୦୦୦ ଯୁବକଯୁବତୀ ଅଂଶଗ୍ରହଣ କରିବେ। ଉତ୍ତର ପୂର୍ବାଞ୍ଚଳ ରାଜ୍ୟର ଯୁବବର୍ଗଙ୍କ ସହିତ ଭାରତର ଅବଶିଷ୍ଟ ଭାଗର ଯୁବପିଢ଼ିଙ୍କ ସମ୍ପର୍କ ଯୋଡ଼ିବା ଏହି କାର୍ଯ୍ୟକ୍ରମର ଉଦ୍ଦେଶ୍ୟ। ଓଡ଼ିଶାର ଯୁବା ସଂଗମ ଦଳର ସିକ୍କିମ ଗସ୍ତ ଆସନ୍ତା ୮ ତାରିଖରେ ଶେଷ ହେବ।