ନୂଆଦିଲ୍ଲୀ: ନୂଆଦିଲ୍ଲୀ ସ୍ଥିତ ଓଡିଆ ବୁଦ୍ଧିଜୀବୀ ଫୋରମ ଦି ଇଣ୍ଟେଲେକ୍ଟସ ଦ୍ଵାରା ଆୟୋଜିତ ଅଷ୍ଟମ ଆନ୍ତର୍ଜାତୀୟ ମାତୃଭାଷା ସମ୍ମିଳନୀ ଗତକାଲି ଉଭୟ ବାସ୍ତବ ଓ ଆଭାସୀ ମାଧ୍ୟମରେ ଉଦଘାଟିତ ହୋଇଯାଇଛି। ସମ୍ମିଳନୀର ଆବାହକ ତଥା ସଂଗଠନର ଅଧ୍ୟକ୍ଷ ଦେବେନ୍ଦ୍ର ନାଥ ରାଉତଙ୍କ ଆବାହକତ୍ୱରେ ବିଶିଷ୍ଟ ସାହତ୍ୟିକ ପଦ୍ମ ଭୂଷଣ ଡ଼ଃ ରମାକାନ୍ତ ରଥଙ୍କ ଦ୍ଵାରା ପ୍ରଦୀପ ପ୍ରଜ୍ବଳନ କରାଯାଇ ଓଡ଼ିଆ ଭରଚୁଆଲ ଏକାଡେମୀର ପ୍ରେକ୍ଷାଳୟରେ ଶୁଭାରମ୍ଭ କରାଯାଇଛି।
ଅନ୍ୟମାନଙ୍କ ମଧ୍ୟରେ ବିଶିଷ୍ଟ ଚିନ୍ତକ ଡ଼ଃ ଭଗବାନ ପ୍ରକାଶ, ଭାଷାବିତ୍ ପଦ୍ମଶ୍ରୀ ଡ଼ଃ ଦେବୀ ପ୍ରସନ୍ନ ପଟ୍ଟନାୟକ, ବରିଷ୍ଟ ସାହିତ୍ୟିକ ରାଜନେତା ଡ଼ଃ ପ୍ରସନ୍ନ ପାଟସାହାଣୀ, କେନ୍ଦ୍ର ସାହିତ୍ୟ ଏକାଡେମରେ ଓଡ଼ିଆ ଭାଷାର ଆବାହକ ଡ଼ଃ ବିଜୟାନନ୍ଦ ସିଂ, ଓଡ଼ିଶା କମ୍ପ୍ୟୁଟର ଆପ୍ଲିକେସନ୍ ସେଣ୍ଟର ର ପ୍ରଭାରୀ ମଧୁମିତା ରାଉତ ଓ ଓଡ଼ିଶା ସାହିତ୍ୟ ଏକାଡେମୀ ର ସଚିବ ପ୍ରବୋଧ କୁମାର ରାଉତ ଏହି ଉଦଘାଟନୀ ସମାରୋହରେ ଯୋଗଦେଇ ଥିଲେ। ଇତ୍ୟ ଅବସରରେ ଓଡ଼ିଆ ସାହିତ୍ୟକୁ ଜୀବନବ୍ୟାପୀ ଅବଦାନ ପାଇଁ ଆମ ଗୌରବ ସମ୍ମାନ-୨୦୨୨ ପ୍ରଦାନ କରାଯାଇଥିଲା। ଭାଷା ଓ ସାହିତ୍ୟ ସହଜ, ସରଳ ଓ ବୋଧଗମ୍ୟ ହୋଇ ପାରିଲେ ସାଧାରଣ ପାଠକ ଗ୍ରହଣ କରିବା ସହିତ ମାତୃଭାଷା ସମୃଦ୍ଧ ହେବ ବୋଲି ଡ଼ଃ ରଥ ମତ ରଖିଥିଲେ।
ଏହି ମାତୃଭାଷା ମହାକୁଂଭ ଦୁଇ ଦିନ ଧରି ପାଳନ କରାଯିବ। ଓଡ଼ିଆ ଭାଷା ସହିତ ସମସ୍ତ ଭାରତୀୟ ଶାସ୍ତ୍ରୀୟ ଭାଷା ଓ ଲୋକପ୍ରିୟ ଭାଷାର ବିଶେଷଜ୍ଞ ମାନେ ଯୋଗଦେଇ ମାତୃଭାଷାର ବିଭିନ୍ନ ଦିଗ ବିଷୟରେ ଆଲୋଚନା କରିବେ। ଏଥି ସହିତ ଓଡ଼ିଆ ଭାଷାକୁ ସମୃଦ୍ଧ କରିବା ପାଇଁ ବିଭିନ୍ନ କ୍ଷେତ୍ରରେ ବିଶେଷ ଅବଦାନ ରଖିଥିବା ବିଶିଷ୍ଟ ବ୍ୟକ୍ତିତ୍ଵଙ୍କୁ ସମ୍ମାନିତ କରାଯିବ ବୋଲି ଆବାହକ ଶ୍ରୀ ରାଉତ ପ୍ରକାଶ କରିଛନ୍ତି। ଓଡିଆ ଭର୍ଚୁଆଲ ଏକାଡେମୀ ଓ ଓଡ଼ିଶା ସାହିତ୍ୟ ଏକାଡେ଼ମୀ ସହଯୋଗରେ ଆୟୋଜିତ ଏହି କାରଯ୍ୟକ୍ରମରେ ୩୦ଟି ଦେଶରୁ ବିଶିଷ୍ଟ ଓଡିଆ ବ୍ୟକ୍ତିତ୍ବ ମାନେ ଯୋଗ ଦେଇଥିଲେ।