ଭୁବନେଶ୍ବର: ଲଗାତର ତିନିଦିନ ଧରି ରାଜ୍ୟରେ ପ୍ରବଳ ବର୍ଷା ଯୋଗୁଁ ବର୍ତ୍ତମାନ ରାଜ୍ୟରେ ପ୍ରବାହିତ ବିଭିନ୍ନ ନଦୀ ଫୁଲିବାକୁ ଆରମ୍ଭ କଲାଣି। ପୂର୍ବରୁ ରାସ୍ତାଘାଟରେ ପାଣି ଜମି ବନ୍ୟା ପରିସ୍ଥିତି ସୃଷ୍ଟି କରିିଥିଲା। ହେଲେ ବର୍ତ୍ତମାନ ପୁରା ବନ୍ୟା ଆଶଙ୍କା ସୃଷ୍ଟି ହେଲା। ଫଳରେ ନଦୀବନ୍ଧ ନିକଟସ୍ଥା ଅଞ୍ଚଳବାସୀ ବର୍ତ୍ତମାନ ଭୟଭୀତ ଅବସ୍ଥାରେ ରହିଛନ୍ତି।
ସୂଚନା ଅନୁସାରେ ଓଡିଶାର ଅନ୍ୟତମ ପ୍ରମୁଖ ନଦୀ ବୈତରଣୀରେ ବର୍ତ୍ତମାନ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଭଦ୍ରକ ଜିଲ୍ଲାରେ ଗତ ୨୪ ଘଣ୍ଟା ଧରି ଉପର ମୁଣ୍ଡରେ ଲଗାଣ ବର୍ଷା ଲାଗି ରହିବା ଯୋଗୁ ବୈତରଣୀ ନଦୀରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଆଖୁଆପଦା ଠାରେ ୧୯.୧୬ମିଟର ବନ୍ୟାଜଳ ପ୍ରବାହିତ ହେଉଛି। ଏଠାରେ ୧୭.୮୩ ମିଟର ବିପଦ ସଙ୍କେତ ରହିଛି।
ସେହିପରି ବଂଶଧରାରେ ମଧ୍ୟ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଗଜପତି ଜିଲ୍ଲାରେ ପ୍ରବଳ ବର୍ଷା ପାଇଁ ଏପରି ପରିସ୍ଥିତି ସୃଷ୍ଟି ହୋଇଛି। ବଂଶଧରାର କାଶୀନଗରଠାରେ ବିପଦ ସଙ୍କେତ ୫୪.୬୦ ମିଟର ଥିବା ବେଳେ ଏବେ ସେଠାରେ ୫୫.୧୦ ମିଟର ଜଳ ପ୍ରବାହିତ ହେଉଛି। ବର୍ତ୍ତମାନ ସୁଦ୍ଧା ଉପରମୁଣ୍ଡରେ ବର୍ଷା ଲାଗିରହିଥିବାରୁ ଜଳସ୍ତର ବୃଦ୍ଧି ପାଇବାରେ ଲାଗିଛି।
ରାଜ୍ୟର ଅନ୍ୟତମ ଦ୍ବିତୀୟ ବୃହତ୍ତମ ନଦୀ ବ୍ରାହ୍ମଣୀର ଅବସ୍ଥା ଧିରେଧିରେ ଭୟଙ୍କର ହେବାରେ ଲାଗିଛି। ଏହି ନଦୀ ସହିତ ସଂଯୋଗ ହୋଇଥିବା ଛୋଟ ନଦୀଗୁଡିକ ଫୁଲୁଥିବାରୁ ବ୍ରାହ୍ମଣୀର ଜଳସ୍ତର ମଧ୍ୟ ବୃଦ୍ଧି ପାଇବାରେ ଲାଗିଛି। ଫଳରେ ସମଲ ବ୍ୟାରେଜ କର୍ତ୍ତୃପକ୍ଷ ଆଜି ୭ଟି ଗେଟ ଖୋଲି ପାଣିକୁ ନିଷ୍କାସନ କରୁଥିବା ଜଣାପଡିଛି।
ତେବେ ମହାନଦୀ ଅବସ୍ଥା ମଧ୍ୟ ଭୟଙ୍କର ହେବାରେ ଲାଗିଛି। ମହାନଦୀର ବନ୍ୟାଜଳ ମଧ୍ୟ ବିଭିନ୍ନ ସ୍ଥାନରେ ପ୍ରବେଶ କରିସାରିଲାଣି। ଏହାର ତଳମୁଣ୍ଡରେ ଥିବା ଲୋକମାନେ ଭୟଭୀତ ହୋଇ ରହିଛନ୍ତି। ଗୋଦାବରୀ ନଦୀରେ ଜଳସ୍ତର ବଢିବା ଫଳରେ ମାଲକାନଗିରି ଜିଲ୍ଲା ମୋଟୁ ଅଞ୍ଚଳରେ ବନ୍ୟା ଆଶଙ୍କା ଦେଖାଦେଇଛି। ମୋଟୁ ସୀମାନ୍ତରେ ଥିବା ସାବେରୀ ନଦୀର ପାଣି ଏବେ ଗାଁ ମୁହାଁ ହେବାରେ ଲାଗିଛି।
ତେବେ ପ୍ରବଳ ବର୍ଷା ଯୋଗୁଁ ବିଭିନ୍ନ ସ୍ଥାନରେ ଲୋକମାନେ ଜଳଘେରିରେ ରହିଛନ୍ତି। ସେମାନଙ୍କୁ ବୋଟ ସାହାଯ୍ୟରେ ଓଡ୍ରାଫ ଟିମ ଉଦ୍ଧାର କାର୍ଯ୍ୟରେ ଲାଗଛନ୍ତି। କେତେକ ଅଞ୍ଚଳରେ ତଳିଆ ଲୋକଙ୍କୁ ସେଠାରୁ ସ୍ଥାନାନ୍ତରିତ ମଧ୍ୟ କରାଯାଉଛି। ଉଦ୍ଧାର କାର୍ଯ୍ୟ କରିବା ପାଇଁ ଅଗ୍ନଶମ, ଓଡ୍ରାଫ ଏବଂ ଏନଡିଆରଏଫ ମୁତୟନ କରାଯାଇଛି। କେତେକ ଜିଲ୍ଲାର ଜିଲ୍ଲାପାଳ ଏହି ସଂପର୍କିତ ଅଧିକାରୀଙ୍କ ଛୁଟି ବାତିଲ କରିଛନ୍ତି।
