The Samikhsya Odia
ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ବ୍ରହ୍ମପୁରରେ ଔଷଧ ଦୋକାନରୁ ବଡ ଧରଣର ଚୋରୀ ହୋଇଥିବା ଅଭିଯୋଗ ହୋଇଛି। ବିଜିପୁର ମୁଖ୍ୟ ରାସ୍ତାରେ ଥିବା ନିଉ କୃଷ୍ଣ ଚନ୍ଦ୍ର ମେଡିକାଲ ଷ୍ଟୋରରୁ ଚୋରୀ ହୋଇଥିବା ଅଭିଯୋଗ ହୋଇଛି। ଔଷଧ ଦୋକାନରୁ ନଗଦ ଏକ ଲକ୍ଷ ଟଙ୍କା, ଦୁଇଟି ଲାପଟପ ଓ ବହୁ ମୂଲ୍ୟବାନ ସାମଗ୍ରୀ ଚୋରି ହୋଇଛି। ତେବେ ଲୁଟେରାମାନେ ଦୋକାନର ସିସିଟିଭି କ୍ୟାମେରା ଭାଙ୍ଗି ଦେଇଛନ୍ତି।
ପ୍ରକାଶ ଥାଉକି ଦୋକାନ ବାହାର ପଟେ ତାଲା ପଡିଛି। କିନ୍ତୁ ପଛପଟୁ କାନ୍ଥ ଭାଙ୍ଗି ଲୁଟେରାମାନେ ଦୋକାନରୁ ଚୋରି କରିଛନ୍ତି। ଖବର ପାଇ ପୋଲିସ ଘଟଣାସ୍ଥଳରେ ସନ୍ଧାନୀ କୁକୁର ସହିତ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛନ୍ତି।
ଭୁବନେଶ୍ବର: ଏଣିକି ଡାକ୍ତରଖାନା ପରିସରରୁ ହଟିବ ଘରୋଇ ଔଷଧ ଦୋକାନ। ଏ ନେଇ ରାଜ୍ୟ ସରକାରଙ୍କ ସ୍ବାସ୍ଥ୍ୟ ବିଭାଗ ଏକ କଡା ପଦକ୍ଷେପ ଗ୍ରହଣ କରିବାକୁ ଯାଉଛି। ରାଜ୍ୟ ସରକାର ନିରାମୟ ଯୋଜନା ଅନୁସାରେ ସମସ୍ତ ସରକାରୀ ହସପିଟାଲରେ ମାଗଣା ଔଷଧ ଦେଉଛନ୍ତି। ସେଥିପାଇଁ ଏହି ଘରୋଇ ଔଷଧ ଦୋକାନର ଆବଶ୍ୟକ ନ ଥିବାରୁ ସରକାର ଏହି ପଦକ୍ଷେପ ଗ୍ରହଣ କରୁଛନ୍ତି।
ସୂଚନା ଅନୁସାରେ ରାଜ୍ୟ ସରକାର 2015 ମସିହାରୁ ହସପିଟାଲ ପରିସରରେ ଥିବା ଔଷଧ ଦୋକାନୀଙ୍କୁ ସେଠାରୁ ହଟିବା ପାଇଁ ନିର୍ଦ୍ଦେଷ ଦେଇଥିଲେ। ସେହି ଅନୁସାରେ ସେମାନଙ୍କର ଲାଇସେନସ ଆଉ ନବୀକରଣ କରାଯାଉ ନାହିଁ। ହେଲେ ରାଜ୍ୟର ପ୍ରାୟ ବହୁ ଔଷଧ ଦୋକାନୀ ହାଇକୋର୍ଟରେ କେସ କରି ଏହି ଔଷଧ ଦୋକାନ ଚଳାଉଛନ୍ତି। ବର୍ତ୍ତମାନ ସୁଦ୍ଧା ପ୍ରାୟ 111 ଟି ମାମଲା ଏହା ଉପରେ ପଡିରହିଛି।
ଏହାଦ୍ବାରା ସ୍ବାସ୍ଥ୍ୟ ବିଭାଗ କୌଣସି ପଦକ୍ଷେପ ଗ୍ରହଣ କରିପାରୁ ନାହିଁ। ତେବେ ଏହାକୁ କଡାକଡି କରିବା ପାଇଁ ପ୍ରଥମେ କୋର୍ଟ କେସ ଫଇସଲା ହେବାର ଆବଶ୍ୟକ ରହିଛି। ସେଥିପାଇଁ ବିଭାଗ ଆଡଭୋକେଟ ଜେନରାଲଙ୍କୁ ଚିଠି କରିଛନ୍ତି। ତୁରନ୍ତ ଏହି ମାମଲାର ଫଇସଲା ପାଇଁ ପଦକ୍ଷେପ ନେବାକୁ ଅନୁରୋଧ କରାଯାଇଛି।
ଭୁବନେଶ୍ବର: ଆଜି ସକାଳେ ଭୁବନେଶ୍ବରର ଏକ ଔଷଧ ଦୋକାନରେ ଭୟାବହ ଅଗ୍ନିକାଣ୍ଡ ଘଟିଯାଇଛି। ଏହି ଘଟଣାଟି ଘଟିଛି ଭୁବନେଶ୍ବରର କେସୁରିଆ ମଙ୍ଗରାଜପୁର। ତୁରନ୍ତ ସେଠାରେ ଅଗ୍ନିଶମ ଗାଡି ପହଁଚି ନିଆଁକୁ ଆୟତ କରିଥିଲା। ନଚେତ ଯେତେ ଜୋରରେ ଏହି ନିଆଁ ବାହାରିଥିଲା ବହୁତ ବଡ ଅଘଟଣ ଘଟିବାର ସମ୍ଭାବନା ରହିଥିଲା।
ଘଟଣାରୁ ଜଣାପଡିଛି ଯେ, କେଶୁରିଆ ବଜାରରେ ଏହି ଔଷଧ ଦୋକାନଟି ଅବସ୍ଥିତ। ସକାଳେ ଲୋକେ ଦୋକାନ ଭିତରୁ ଧୂଆଁ ବାହାରୁ ଥିବାର ଲକ୍ଷ୍ୟ କରି ଅଗ୍ନିଶମ ବିଭାଗକୁ ଜଣାଇଥିଲେ। ଅଗ୍ନିଶମ ଗାଡି ଆସି ନିଆଁକୁ ଆୟତ କରିଥିଲା। ଏହି ଅଗ୍ନିକାଣ୍ଡ ଦ୍ବାରା ଦୋକାନରେ ଥିବା ବହୁ ଔଷଧପତ୍ର ପୋଡି ନଷ୍ଟ ହୋଇଯାଇଛି। ତେବେ ଏଥିରେ କୌଣସି ମୃତାହତ ହୋଇ ନାହାଁନ୍ତି। ସର୍ଟ ସର୍କିଟ ଯୋଗୁଁ ଅଗ୍ନିକାଣ ଘଟିଥିବାର ଅନୁମାନ କରାଯାଉଛି।