ସୀତାରାମ ଅଗ୍ରଓ୍ବାଲ
ଚିଲିକା: କରୋନା ମହାମାରୀକୁ ନେଇ ରାଜ୍ୟର ସ୍ଥିତି ସଂକଟ ଥିବାବେଳେ ଏହି ମହାମାରୀ ସମୟରେ ରାଜ୍ୟସରକାରଙ୍କ କାର୍ଯ୍ୟକଳାପକୁ ନେଇ ସାଧାରଣ ଲୋକଙ୍କ ମନରେ ସନ୍ଦେହ ସୃଷ୍ଟି ହେଉଛି। ଗତ ଦୁଇଦିନ ତଳେ ଭୁବନେଶ୍ବରସ୍ଥିତ ଖଣ୍ଡଗିରି ଅଞ୍ଚଳରୁ ସରକାରୀ କରୋନା ରିପୋର୍ଟକୁ ନେଇ ଏକ ଚାଞ୍ଚଲ୍ୟକର ତଥ୍ୟ ଶୁଣିବାକୁ ମିଳିଥିଲା। ସରକାରୀ ଟେଷ୍ଟ ରିପୋର୍ଟରେ ପଜିଟିଭ୍ ଆସିଥିବାବେଳେ ଘରୋଇ ମେଡ଼ିକାଲରେ ନେଗେଟିଭ୍ ଆସିଥିଲା। ତେବେ ସରକାରୀ ଟେଷ୍ଟିଂ ରିପୋର୍ଟରେ ଥିବା ଏହି ଗଡବଡ ପାଇଁ ସାଧାରଣ ମଣିଷ ନାହିଁ ନଥିବାର ହଇରାଣ ହେଉଛି। ଏପରି ଏକ ଘଟଣା ଚିଲିକା ନିର୍ବାଚନ ମଣ୍ଡଳୀରୁ ସାମ୍ନାକୁ ଆସିଛି। ଏହି ନିର୍ବାଚନ ମଣ୍ଡଳୀରେ କରୋନା ମହାମାରୀକୁ ନେଇ ରାଜ୍ୟ ସରକାରଙ୍କ କାର୍ଯ୍ୟକଳାପକୁ ଜନସାଧାରଣ ପ୍ରଶ୍ନ କରିଛନ୍ତି।
କରୋନା ମହାମାରୀକୁ ନେଇ କିଛି ସୁବିଧାବାଦୀ ତଥା ଅସାମାଜିକ ନେତାମାନେ ନିଜର ଫାଇଦା ଉଠାଇବାକୁ ଚେଷ୍ଟା କରୁଛନ୍ତି। କରୋନା ମହାମାରୀର ରାଜନୀତି ତଥା ବ୍ୟବସାୟୀ କରଣ କରି ଫାଇଦା ଉଠାଉଛନ୍ତି ଏବଂ ଏଥିପାଇଁ ସାଧାରଣ ଜନତା ପେଶି ହେଇଯାଉଛନ୍ତି। ଠିକ୍ ଏପରି କିଛି ଅଭିଯୋଗ କରିଛନ୍ତି ଚିଲିକା ନିର୍ବାଚନ ମଣ୍ଡଳୀର ୬ ନମ୍ବର ଜୋନ୍ ର ଜିଲ୍ଲା ପରିଷଦ ସଭ୍ୟ ଦିଲ୍ଲୀପ କୁମାର ମହାନ୍ତି ଏବଂ ଡୁଙ୍ଗମାଳ ପଞ୍ଚାୟତର ସରପଞ୍ଚ ଲକ୍ଷ୍ମୀ ସେଠି। ସରକାରୀ ଦଳର କିଛି ଅସାମାଜିକ ନେତା, କୁଜିନେତାମାନେ ନିଜ ଦଳର ପାଦ୍ରୁଭାର୍ବ ଦେଖାଇ ତଥା ନିଜର ଫାଇଦା ପାଇଁ କରୋନା ନେଗେଟିଭ୍ ରିପୋର୍ଟକୁ ପଜିଟିଭ୍ କରିଥିବାର ଅଭିଯୋଗ ହୋଇଛି। ପଜିଟିଭ୍ କହି କ୍ବାରେଣ୍ଟାଇନ୍ ରଖି ଦୁଇ ଦିନ ପରେ ନେଗେଟିଭ୍ କହି ଡିସଚାର୍ଜ କରିଦେଇଥିବା ଅଭିଯୋଗ ହୋଇଛି।
ଏପରିକି କରୋନା ଟେଷ୍ଟରେ ସ୍ବାବ୍ ନମୁନାକୁ ନେଇ ମଧ୍ୟ ସେ ଅଭିଯୋଗ କରିଛନ୍ତି। ତାଙ୍କ କହିବା ମୁତାବକ ୧୧ ତାରିଖ ଦିନ ତାଙ୍କ ଗଳାରୁ ସ୍ବାବ୍ ଟେଷ୍ଟ କରାଯାଇଥିବାବେଳେ ରିପୋର୍ଟରେ ତାଙ୍କୁ ୧୫ ତାରିଖ ଦିନ ନାକରୁ ସ୍ବାବ୍ ଟେଷ୍ଟ କରାଯାଇଥିଲା ବୋଲି ଉଲ୍ଲେଖ ରହିଛି। ଯଦି ସରକାରୀ କରୋନା ଟେଷ୍ଟ ରିପୋର୍ଟରେ ଅନିୟମିତତା ହେଉଛି, ତେବେ ସେମାନେ କାହାକୁ ଗ୍ରହଣ କରିବେ। ଗୋଟିଏ ପକ୍ଷରେ ସରକାର କରୋନା ପ୍ରତିରୋଧ ପାଇଁ ବଦ୍ଧ ପରିକର ଥିବାର ପ୍ରତିଶ୍ରୁତି ଦେଉଥିବାବେଳେ ଟେଷ୍ଟିଂରେ ଏଭଳି ଦାୟିତ୍ବହୀନତାକୁ ସହଜରେ ଗ୍ରହଣ କରି ହେଉନାହିଁ। ଅପରପକ୍ଷରେ ସେମାନଙ୍କୁ କ୍ବାରେଣ୍ଟାଇନ୍ରେ ରଖିଥିବା ସମୟରେ କେବଳ ପାରାସିଟାମଲ୍ ଟାବେଲ୍ଟ ଓ ଗ୍ୟାସ୍ ଟାବେଲଟ୍ ଦେଇଥିଲେ ବୋଲି ସେମାନେ କହିଛନ୍ତି। ଏପରିକି ସେମାନଙ୍କ ପାଖରେ କୌଣସି ଡାକ୍ତର କିମ୍ବା ନର୍ସ ମଧ୍ୟ ରହିନଥିଲେ। ତେବେ ନେଗେଟିଭ୍ ଲୋକଙ୍କୁ ପଜିଟିଭ୍ କହିକି ନେବା ପରେ ସେମାନଙ୍କ ପରିବାର ଉପରେ ଏକପ୍ରକାର ଚାପ ସୃଷ୍ଟି ହୋଇଛି। କରୋନା ପଜିଟିଭ୍ ଭାବି ପାଖ ପଡୋଶୀ ଏପରିକି ଦୋକାନୀମାନେ ମଧ୍ୟ ଜିନିଷ ଦେଉନଥିଲେ। ଜଣେ ସାଧାରଣ ଲୋକଙ୍କୁ ପଜିଟିଭ୍ କହିବା ପରେ ସମ୍ପୃକ୍ତ ଲୋକ ସହିତ ତା’ ପରିବାର ମଧ୍ୟ ଅନେକ ପ୍ରକାରର ମାନସିକତା ନିର୍ଯାତନାର ଶିକାର ହେଉଛି। ସେହିପରି ସାଧାରଣ ମୂଲିଆ ଶ୍ରେଣୀର ଲୋକ ମଜୁରୀ ଲାଗି ପେଟ ପୋଷିଥାଏ, ଏହିପ୍ରକାର ନେଗେଟିଭ୍ ପଜିଟିଭ୍ ଧନ୍ଦାରେ ପେଶି ହେଇ ସେ ତା’ର ଜୀବିକା ହରାଉଛି। ସ୍ବାସ୍ଥ୍ୟଗତ କ୍ଷେତ୍ରରେ ସରକାରଙ୍କର ଏଭଳି ହୀନ କାର୍ଯ୍ୟ ମଣିଷକୁ ଜୀଅନ୍ତା କଲବଲ କରିବା ଯୋଗୁଁ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
କରୋନା ଆକ୍ରାନ୍ତ ହେବା ପରେ ରୋଗୀ ସହ ରୋଗୀର ପରିବାରକୁ ଏକ ପ୍ରକାର ଘୃଣା କରିବା ଆମ ସମୟର ସବୁଠୁ ବଡ ବିଡମ୍ବନା। ତେଣୁ ସରକାରୀ ସ୍ତରରେ ଏପରି ହୀନକାର୍ଯ୍ୟ କରାନଯାଉ କିମ୍ବା ସାଧାରଣ ଲୋକଙ୍କ ଉପରେ ଦାଉ ସାଧିବା ବନ୍ଦ କରାଯାଉ ବୋଲି ନିବେଦନ କରିଛନ୍ତି ସମ୍ପୃକ୍ତ ଜିଲ୍ଲାପରିଷଦ ଦିଲ୍ଲୀପ ମହାନ୍ତି ଓ ସରପଞ୍ଚ ଲକ୍ଷ୍ମୀ ସେଠି।