Categories
ଜାତୀୟ ଖବର ବିଶେଷ ଖବର ମନୋରଂଜନ ରାଜ୍ୟ ଖବର

ବନ୍ଦ ହେଲା ଓଡିଆ ଚ୍ୟାନେଲ କଲରସ ଓଡିଆ, ଭାୟାକମ 18 ଏବଂ ଡିଜିନି ଷ୍ଟାର ମିଶ୍ରଣ ପରେ ବଡ ପଦକ୍ଷେପ

ନୂଆଦିଲ୍ଲୀ: ବନ୍ଦ ହେଲା ଓଡିଆ ମନୋରଂଜନ ଧର୍ମୀ ଚ୍ୟାନେଲ କଲରସ ଓଡିଆ। ରିଲାଏନସ ଇଣ୍ଡଷ୍ଟ୍ରିର ଏକ କଂପାନୀ ଭାୟାକମ 18 ଅଧିନରେ ଏହି ଚ୍ୟାନେଲ ଓଡିଆରେ ପ୍ରସାରଣ ହେଉଥିଲା। ତେବେ ଏହି ଓଡିଆ ଚ୍ୟାନେଲ ଭଲ ପ୍ରଦର୍ଶନ କରି ନ ପାରିବାରୁ ଏହାକୁ ବନ୍ଦ କରିବା ପାଇଁ ନିଷ୍ପତି ନିଆଯାଇଛି। ଭାୟାକମ 18 ଏବଂ ଅନ୍ୟତମ ମିଡିଆ କଂପାନୀ ଡିଜିନି ଷ୍ଟାର ମିଶ୍ରଣ ପରେ ଏହି ପଦକ୍ଷେପ ଗ୍ରହଣ କରାଯାଇଛି।

କଲରସ ଓଡିଆର ଭୁବନେଶ୍ବରର ଖାରବେଳ ନଗରରେ ତାହାର ଅଫିସ କାର୍ଯ୍ୟ କରୁଥିଲା। ଏଥିରେ ପ୍ରାୟ 15 ଜଣ କର୍ମଚାରୀ କାମ କରୁଥିଲେ। ତେବେ କଂପାନୀ ବନ୍ଦ ଘୋଷଣା ପୂର୍ବରୁ କର୍ମଚାରୀଙ୍କୁ ଇସ୍ତଫା ଦେବା ପାଇଁ ନିର୍ଦ୍ଦେଶ ଦିଆଯାଇଥିଲା। ଫଳରେ କର୍ମଚାରୀମାନେ ଇସ୍ତଫା ଦେଇ ଫେବୃୟାରୀ 27 ତାରିଖରୁ ଆଉ ଅଫିସ ଆସି ନ ଥିଲେ। ଏହାପରେ କଂପାନୀ ଅଫିସର ସମସ୍ତ ଜିନିଷପତ୍ର କୋଲକତା ନେଇଯାଇଥିଲା।

କେବଳ କଲରସ ଓଡିଆ ନୁହେଁ ଏହି କଂପାନୀ ଅଧିନରେ ଥିବା ଅନ୍ୟତମ ଓଡିଆ ମନୋରଂଜନ ଧର୍ମୀ ଚ୍ୟାନେଲ ଷ୍ଟାର କିରଣ (ଏଚଡି) ଚ୍ୟାନେଲକୁ ମଧ୍ୟ ବନ୍ଦ କରିବା ପାଇଁ ଘୋଷଣା କରିଛି। ତେବେ ଏହି ଚ୍ୟାନେଲ ଓଡିଶାରେ ପ୍ରସାରଣ ଆରମ୍ଭ କରି ନ ଥିଲେ ମଧ୍ୟ ଏକ ଲାଇସେନସ୍ ହାସଲ କରିଥିଲା। ହେଲେ ତାହାକୁ ବନ୍ଦ କରିଦିଆଯାଇଛି। କେବଳ ଓଡିଆରେ ଷ୍ଟାର କିରଣ (ଏସଡି) ବର୍ତ୍ତମାନ ପ୍ରସାରଣ ହେଉଛି। ହେଲେ ଏହି ଚ୍ୟାନେଲର ଭବିଷ୍ୟତ କଣ ହେବ ତାହା କିଛି କହି ହେଉ ନାହିଁ। କାରଣ ଷ୍ଟାର କିରଣ ଓଡିଆର ଭୁବନେଶ୍ବରରେ ଥିବା ଅଫିସକୁ କଂପାନୀ ଦୀର୍ଘ ଦିନଠାରୁ ବନ୍ଦ କରିଦେଇଛି। ବର୍ତ୍ତମାନ କୋଲକାତାରୁ ଏହି ଚ୍ୟାନେଲ କାମ କରୁଛି।

ଭାରତର ପ୍ରତିଷ୍ଠିତ ମନୋରଂଜନ କଂପାନୀ ଡିଜିନି ଷ୍ଟାର ଏବଂ ଭାୟାକମ 18 କଂପାନୀ ମିଶ୍ରଣ ହୋଇ ବର୍ତ୍ତମାନ ଜିଓଷ୍ଟାର ଭାବେ କାର୍ଯ୍ୟକରୁଛି। ଫଳରେ ଏହି ଦୁଇଟି ବଡ କଂପାନୀ ଅଧିନରେ ଥିବା ବହୁ ଚ୍ୟାନେଲକୁ ମିଶ୍ରଣ କଂପାନୀ ଜିଓଷ୍ଟାର ବନ୍ଦ କରି ଦେଇଛି। ସୂଚନା ଅନୁସାରେ ଓଡିଆର ଏହି ଦୁଇଟି ଚ୍ୟାନେଲ ସହିତ କଂପାନୀ 9 ଟି ଚ୍ୟାନେଲ ବନ୍ଦ କରିଦେଇଛି। ସେଗୁଡିକ ହେଲା Comedy Central, Vh1, Vh1 HD, MTV Beats, MTV Beats HD, Comedy Central HD,  Bindass, Colors Odia, Star Kiran HD.

ଏଗୁଡିକ ବନ୍ଦ ଘୋଷଣା କରିବା ସହିତ ଜିଓଷ୍ଟାର କଂପାନୀ ଆଉ ଆଠଟି ନୂଆ ସ୍ପୋର୍ଟସ ଚ୍ୟାନେଲ ଶୁଭାରମ୍ଭ କରିବାକୁ ଘୋଷଣା କରିଛି। ସେଗୁଡିକ ହେଲା ଷ୍ଟାର ସ୍ପୋର୍ଟସ କନ୍ନଡ, ତେଲୁଗୁ, ତାମିଲ, ଖେଲ୍, ହିନ୍ଦି ଏଚଡି। ଏଥିରେ ତେଲୁଗୁ ଓ ତାମିଲରେ ଗୋଟିଏ ଲେଖାଏଁ ଏଚଡି ଚ୍ୟାନେଲର ମଧ୍ୟ ଶୁଭାରମ୍ଭ କରାଯିବ ବୋଲି କଂପାନୀ ନିଷ୍ପତି କରିଛି।

ପୂର୍ବରୁ ଇଷ୍ଟର୍ଣ୍ଣ ମିଡିଆ ଗ୍ରୁପର ଓଡିଆ ମନୋରଂଜନ ଧର୍ମୀ ଚ୍ୟାନେଲ ମଂଜରୀ ର ପ୍ରସାରଣ ମଧ୍ୟ ବନ୍ଦ ହୋଇଯାଇଛି। ସେହିପରି ନ୍ୟୁଜ ଚ୍ୟାନେଲ ଭାବେ ଜୀ ଓଡିଶାର ମଧ୍ୟ ତାହାର ପ୍ରସାରଣ ବନ୍ଦ କରିଦେଇଛି। ବର୍ତ୍ତମାନ ଓଡିଆରେ ଯେଉଁ ମନୋରଂଜନ ଧର୍ମୀ ଓ ନ୍ୟୁଜ ଚ୍ୟାନେଲ ପ୍ରସାରଣ ହେଉଛି ସେମାନଙ୍କ ମଧ୍ୟରୁ ଅଳ୍ପ କେତୋଟିକୁ ଛାଡି ଦେଲେ ଅନ୍ୟମାନଙ୍କର ସ୍ଥିତି ଭଲ ନାହିଁ। ଫଳରେ ଓଡିଶାରେ ଟିଭି ମିଡିଆ, ବଡ ଜଟିଳ ପରିସ୍ଥିତିରେ ଗତି କରୁଛି ବୋଲି ସ୍ପଷ୍ଟ ହୋଇଛି।

Categories
ଜାତୀୟ ଖବର ବିଶେଷ ଖବର ମନୋରଂଜନ

ଓଡିଆ ମନୋରଂଜନ ଜଗତରେ ସୃଷ୍ଟି ହେବ ହଇଚଇ, ଷ୍ଟାର ଟିଭି ଆଣୁଛି ଦୁଇଟି ନୂଆ ଓଡିଆ ଚ୍ୟାନେଲ

ନୂଆଦିଲ୍ଲୀ, ଓଡିଶା ମନୋରଂଜନ ଜଗତରେ ଆସିଛୁ ଆଉ ଏକ ବଡ ବିପ୍ଲବ। ତାହା ହେଲା ଦେଶର ନାମଜାଦା ମନୋରଂଜନ ଧର୍ମି ଟିଭି କଂପାନୀ ‘ଷ୍ଟାର ଇଣ୍ଡିଆ’ ଓଡିଶାରେ ଖୋଲୁଛି ଦୁଇଟି ନୂଆ ଚ୍ୟାନେଲ। ତାହାର ନାମ ହେଲା ‘ଷ୍ଟାର କିରଣ’ ଏବଂ ‘ଷ୍ଟାର କିରଣ ଏଚଡି’। ଏହି ଦୁଇଟି ଚ୍ୟାନେଲକୁ ଭାରତ ସରକାରଙ୍କ ସୂଚନା ଓ ପ୍ରସାରଣ ବିଭାଗ ତରଫରୁ ଲାଇସେନସ ପ୍ରଦାନ କରାଯାଇଛି।

ଷ୍ଟାର ଟିଭି ବର୍ତ୍ତମାନ ବିଶ୍ବର ନାମଜାଦା ଟେଲିଭିଜନ କଂପାନୀ ଡିଜିନ୍ ଦ୍ବାରା ପରିଚାଳିତ ହେଉଛି। ଏହି କଂପାନୀକୁ ଚାରୋଟି ଚ୍ୟାନେଲ ପାଇଁ ଲାଇସେନସ ମିଳିଛି। ଓଡିଶା ପାଇଁ ଏହି ଦୁଇଟି ସହିତ ଷ୍ଟାର ସ୍ପୋର୍ଟସ ୱାନ ତେଲୁଗୁ ଏବଂ ଷ୍ଟାର ଗୋଲ୍ଡ ଫାମିଲି ଲାଇସେନସ ହାସଲ କରିଛି।

ଏହି ଦୁଇଟି ଚ୍ୟାନେଲ ପାଇଁ ଲାଇସେନସ ମିଳିବା ପୂର୍ବରୁ କଂପାନୀ ଏହାର ପ୍ରସ୍ତୁତି ଆରମ୍ଭ କରିସାରିଛି। ଏ ନେଇ କଂପାନୀର କୋଲକାତା ଏବଂ ମୁମ୍ବାଇ ଅଧିକାରୀମାନେ ଦୁଇଥର ଓଡିଶା ଆସି ଓଡିଆ ଟେଲିଭିଜନ ପ୍ରଯୋଜକଙ୍କ ସହିତ ଆଲୋଚନା କରି ସାରିଲେଣି। କଣ ଏବଂ କି ପ୍ରକାରର ନୂଆ ନୂଆ କାର୍ଯ୍ୟକ୍ରମ ଓ ଧାରାବାହିକ ହେବ ସେ ନେଇ ବୈଠକ ହୋଇ ସାରିଛି। ଫଳରେ କଂପାନୀ ଏକ ବ୍ୟବସାୟିକ ଢଙ୍ଗରେ ଚ୍ୟାନେଲ ଆରମ୍ଭ କରିବା ବୋଲି ଜଣାପଡିଛି।

ବର୍ତ୍ତମାନ ଓଡିଶାରେ ପାଞ୍ଚୋଟି ମନୋରଂଜନ ଧର୍ମି ଚ୍ୟାନେଲ ପ୍ରସାରଣ ହେଉଛି। ସେଗୁଡିକ ହେଲା ଜୀ ସାର୍ଥକ, ତରଙ୍ଗ ଟିଭି, ମଞ୍ଜରୀ ଟିଭି, କଲରସ ଓଡିଆ ଏବଂ ସିଦ୍ଧାର୍ଥ ଟିଭି। ସେଥିମଧ୍ୟରୁ କେବଳ ଜୀ ସାର୍ଥକ ଏବଂ କଲରସ ଓଡିଆ ହେଉଛି ଜାତୀୟ ସ୍ତରର ମନୋରଂଜନ ଧର୍ମି ଚ୍ୟାନେଲ। ଓଡିଶାରେ ଷ୍ଟାରର ଏହି ଦୁଇଟି ନୂଆ ଚ୍ୟାନେଲର ପ୍ରସାରଣ ଆରମ୍ଭ ହେଲେ ଏହି ସଂଖ୍ୟା ସାତ ହେବ।

ଦୀର୍ଘବର୍ଷ ଧରି ଓଡିଶାର ମନୋରଂଜନ ବଜାରରେ ଜୀ ସାର୍ଥକ ଏବଂ ତରଙ୍ଗ ଟିଭି ସେମାନଙ୍କ ଆଧିପତ୍ୟ ବିସ୍ତାର କରି ରହିଛନ୍ତି। ଅନ୍ୟ ଚ୍ୟାନେଲଗୁଡିକ ସେହିପରି ଆକର୍ଷଣୀୟ କାର୍ଯ୍ୟକ୍ରମ ଦେବାରେ ବିଫଳ ହୋଇଛନ୍ତି। କଲରସ ଓଡିଆ ଭାରତର ନାମଜାଦା ଭାୟାକମ-18 କଂପାନୀର ହୋଇଥିଲେ ମଧ୍ୟ କର୍ତ୍ତୁପକ୍ଷ ଓଡିଆ ଚ୍ୟାନେଲ ପ୍ରତି ସେମିତି ଗୁରୁତ୍ବ ପ୍ରଦାନ କରୁ ନାହଁନ୍ତି। ଫଳରେ ଓଡିଆ ଦର୍ଶକଙ୍କୁ ନୂଆନୂଆ କାର୍ଯ୍ୟକ୍ରମ ଦେବାରେ ଏହି ଚ୍ୟାନେଲଟି ମଧ୍ୟ ବିଫଳ ହୋଇଛି। ସେହିପରି ଓଡିଶା ମିଡିଆ ଜଗତର ନାମାଜାଦା ବ୍ୟକ୍ତିତ୍ବ ସୌମ୍ୟରଂଜନ ପଟ୍ଟନାୟକଙ୍କ ଦ୍ବାରା ପରିଚାଳିତ ମଂଜରୀ ଟିଭି ମଧ୍ୟ ଭଲ ପ୍ରଦର୍ଶନ କରିପାରୁ ନାହିଁ।

ଓଡିଶାର ମନୋରଂଜନ ଶିଳ୍ପର ଅନ୍ୟତମ ପ୍ରମୁଖ ବ୍ୟକ୍ତିତ୍ବ ସୀତାରାମ ଅଗ୍ରୱାଲା ମଧ୍ୟ ନୂଆ ଚ୍ୟାନେଲ ବଜାରକୁ ଆଣିଛନ୍ତି। ଯାହାର ନାମ ରହିଛି ସିଦ୍ଧାର୍ଥ ଟିଭି। ପୂର୍ବରୁ ସୀତାରାମ ସାର୍ଥକ ଟିଭି ପ୍ରତିଷ୍ଠା କରି ବେଶ୍ ଲୋକପ୍ରିୟ କରାଇ ପାରିଥିଲେ। ଯାହା ପରବର୍ତ୍ତି ସମୟରେ ଜୀ ଏଣ୍ଟରଣ୍ଟେନମେଣ୍ଟ କଂପାନୀକୁ ବିକ୍ରି କରିଦେଲେ। ବର୍ତ୍ତମାନ ଏହା ‘ଜୀ ସାର୍ଥକ’ ଭାବେ ପ୍ରସାରଣ ହେଉଛି। ତେବେ ସୀତାରାମଙ୍କ ସିଦ୍ଧାର୍ଥ ଟିଭି ନୂଆ ଭାବେ ବଜାର ପ୍ରବେଶ କରିଥିବାରୁ ଏହା ଲୋକପ୍ରିୟତା ହାସଲ କରିବା ଅପେକ୍ଷାରେ ରହିଛି।

ତେବେ ଏସବୁ ପ୍ରତିଯୋଗୀତା ଭିତରେ ଷ୍ଟାର କିରଣ ନିଶ୍ଚିତ ଭାବେ ଓଡିଶା ମନୋରଂଜନ ବଜାରରେ ହଇଚଇ ସୃଷ୍ଟି କରିବ ବୋଲି ଆଶା କରାଯାଉଛି। ଅନ୍ୟପକ୍ଷରେ ଷ୍ଟାର କିରଣ ଏଚଡି ଚ୍ୟାନେଲ ଓଡିଶା ବଜାର ପାଇଁ ଏକ ନୂଆ ଇତିହାସ ସୃଷ୍ଟି କରିବ। କାରଣ ବର୍ତ୍ତମାନ ଜାତୀୟ ତଥା ଅନେକ ଆଞ୍ଚଳିକ ଭାଷାରେ ଏଚଡି ବା ହାଇ ଡେଫିନେସନ ଚ୍ୟାନେଲ ରହିଥିଲେ ମଧ୍ୟ ଓଡିଶାରେ ଏହା ନାହିଁ। ଷ୍ଟାର କିରଣ ଏଚଡି ଚ୍ୟାନେଲ ନିଶ୍ଚିତ ଭାବେ ଓଡିଶା ଦର୍ଶକଙ୍କୁ ଏକ ନୂଆ ସ୍ବାଦ ପ୍ରଦାନ କରିବ।

(ଏଥିରେ ବ୍ୟବହାର କରାଯାଇଥିବା ଫଟୋଟି ସୋସିଆଲ ମିଡିଆରୁ ସଂଗ୍ରହ କରାଯାଇଛି। ଏହା କଂପାନୀ ଘୋଷିତ ଲୋଗୋ ନୁହେଁ)