Tag: କୃଷି ମନ୍ତ୍ରଣାଳୟ

ନୂଆଦିଲ୍ଲୀ: ରାଷ୍ଟ୍ରପତି ଦ୍ରୌପଦୀ ମୁର୍ମୁ ଆଜି କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମର, ପ୍ରହ୍ଲାଦ ସିଂ ପଟେଲ ଏବଂ ରେଣୁକା ସିଂ ସରୁତାଙ୍କ ଇସ୍ତଫା ଗ୍ରହଣ କରିଛନ୍ତି।

ବର୍ତ୍ତମାନ ନରେନ୍ଦ୍ର ସିଂ ତୋମରଙ୍କ ସ୍ଥାନରେ କେନ୍ଦ୍ର ମନ୍ତ୍ରୀ ଅର୍ଜୁନ ମୁଣ୍ଡାଙ୍କୁ କୃଷି ମନ୍ତ୍ରଣାଳୟର ଅତିରିକ୍ତ ଦାୟିତ୍ଵ ଦିଆଯାଇଛି। ଖାଦ୍ୟ ପ୍ରକ୍ରିୟାକରଣ ଶିଳ୍ପ ମନ୍ତ୍ରଣାଳୟରେ ରାଜ୍ୟ ମନ୍ତ୍ରୀ ଶୋଭା କରନ୍ଦଲାଜେଙ୍କୁ ରାଜ୍ୟ ମନ୍ତ୍ରୀର ଅତିରିକ୍ତ ଦାୟିତ୍ଵ ପ୍ରଦାନ କରାଯାଇଛି। ଜଳ ଶକ୍ତି ମନ୍ତ୍ରଣାଳୟରେ ରାଜ୍ୟ ମନ୍ତ୍ରୀ ରାଜୀବ ଚନ୍ଦ୍ରଶେଖରଙ୍କୁ ଅତିରିକ୍ତ ମନ୍ତ୍ରୀ ଦାୟିତ୍ୱ ଦିଆଯାଇଛି। ଏହା ବ୍ୟତୀତ ଆଦିବାସୀ ବ୍ୟାପାର ମନ୍ତ୍ରଣାଳୟରେ ରାଜ୍ୟ ମନ୍ତ୍ରୀ ଭାରତୀ ପ୍ରବୀଣ ପାୱାରଙ୍କୁ ଅତିରିକ୍ତ ଦାୟିତ୍ଵ ଦିଆଯାଇଛି।

ଅର୍ଜୁନ ମୁଣ୍ଡା ପୂର୍ବରୁ ଆଦିବାସୀ ବ୍ୟାପାର ମନ୍ତ୍ରୀ ଥିବାବେଳେ ଶୋଭା କରନ୍ଦଲାଜେ କୃଷି ଓ କୃଷକ କଲ୍ୟାଣ ମନ୍ତ୍ରୀ ଅଟନ୍ତି। ଏହା ବ୍ୟତୀତ ରାଜୀବ ଚନ୍ଦ୍ରଶେଖର ମଧ୍ୟ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟରେ ରାଜ୍ୟ ମନ୍ତ୍ରୀ ଅଟନ୍ତି। ଏହା ବ୍ୟତୀତ ଭାରତ ପ୍ରବୀଣ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗରେ ରାଜ୍ୟ ମନ୍ତ୍ରୀ ଭାବରେ କାର୍ଯ୍ୟ କରିସାରିଛନ୍ତି।

ନୂଆଦିଲ୍ଲୀ: କୃଷି ଓ କୃଷକ କଲ୍ୟାଣ ମନ୍ତ୍ରଣାଳୟ ନୂଆଦିଲ୍ଲୀରେ ପିକ୍ସେଲ ସ୍ପେସ୍ ଇଣ୍ଡିଆ ପ୍ରାଇଭେଟ ଲିମିଟେଡ୍ ସହିତ ଏକ ବୁଝାମଣା ପତ୍ର (ଏମଓୟୁ) ସ୍ୱାକ୍ଷର କରିଛି। ଡିଆଣ୍ଡଏଫଡବ୍ଲ୍ୟୁ ସଚିବ ମନୋଜ ଅହୁଜା, ଡିଆଣ୍ଡଏଫଡବ୍ଲ୍ୟୁ ଉପସଚିବ ପ୍ରମୋଦ କୁମାର ମେହେର୍ଦ୍ଦା ଏବଂ ମନ୍ତ୍ରଣାଳୟର ଅନ୍ୟ ବରିଷ୍ଠ ଅଧିକାରୀଙ୍କ ଉପସ୍ଥିତିରେ ଏହି ଏମଓୟୁ ସ୍ୱାକ୍ଷର ହୋଇଛି।

ଏମଏନସିଏଫସି ନିର୍ଦ୍ଦେଶକ ସିଏସ୍ ମୁର୍ତ୍ତୀ ଭାରତ ସରକାରଙ୍କ ତରଫରୁ ଏବଂ ପିକ୍ସେଲ ସ୍ପେସ୍ ଇଣ୍ଡିଆ ପ୍ରାଇଭେଟ ଲିମିଟେଡର ପ୍ରମୁଖ ଅଧିକାରୀ ଅଭିଷେକ କୃଷ୍ଣନ୍ ଏମଓୟୁ ସ୍ୱାକ୍ଷର କରିଥିଲେ। ଏହାର ଲକ୍ଷ୍ୟ ହେଉଛି ପିକ୍ସେଲର ହାଇପରସ୍ପେକ୍ଟ୍ରାଲ୍ ଡାଟା ସେଟର ବ୍ୟବହାର କରି ଭାରତୀୟ କୃଷି ଇକୋସିଷ୍ଟମ୍ ତନ୍ତ୍ର ପାଇଁ ବିନା ମୂଲ୍ୟରେ ବିଭିନ୍ନ ଭୌଗୋଳିକ ସମାଧାନର ବିକାଶ କରିବା। ଏହି ପ୍ରକଳ୍ପ ଫସଲର ମ୍ୟାପିଂ କରିବା, ମୂଲ୍ୟ ନିର୍ଦ୍ଧାରଣ, ବିଭିନ୍ନ ପର୍ଯ୍ୟାୟ ଫସଲ ମଧ୍ୟରେ ବ୍ୟବଧାନ, ଫସଲ ସ୍ୱାସ୍ଥ୍ୟ ନୀରିକ୍ଷଣ ଏବଂ ମୃତ୍ତିକାରେ ଜୈଜ ଅଙ୍ଗାରକାମ୍ଳ ଆକଳନ ଉପରେ ଧ୍ୟାନ ରଖି ବିଶ୍ଲେଷଣାତ୍ମକ ମଡେଲ ଗୁଡିକ ବିକଶିତ କରିବା ପାଇଁ ପିକ୍ସେଲର ପଥ ଖୋଜୁଥିବା ଉପଗ୍ରହରୁ ପ୍ରାପ୍ତ ହାଇପରସ୍ପେକ୍ଟ୍ରାଲ୍ ଡାଟା ନମୁନାର ଲାଭ ଉଠାଇବା ଉପରେ କେନ୍ଦ୍ରୀତ। ସରକାରଙ୍କୁ ପିକ୍ସେଲ ଦ୍ବାରା ଉବଲବ୍ଧ ହାଇପରସ୍ପେକ୍ଟ୍ରାଲ୍ ତଥ୍ୟ ବ୍ୟବହାର ପଦ୍ଧତି ବିକାଶିତ କରିବାରେ ସକ୍ଷମ କରିବ। ଡିଆଣ୍ଡଏଫଡବ୍ଲ୍ୟୁ ତରଫରୁ ଏମଏନସିଏଫସି ଉପଯୁକ୍ତ ପଦ୍ଧତିର ବିକଶିତ କରିବା ଏବଂ କାର୍ଯ୍ୟକାରୀ କରିବା ପାଇଁ ପିକ୍ସେଲ ଟିମ୍ ସହିତ ସହଯୋଗ କରିବ।

ହାଇପରସ୍ପେକ୍ଟ୍ରାଲ୍ ରିମୋଟ ସେନ୍ସିଂ କୌଶଳରେ ଉପଗ୍ରହ ଦ୍ବାରା ସଂକୀର୍ଣ୍ଣ ତରଙ୍ଗ ଦୈର୍ଘ୍ୟ ବ୍ୟାଣ୍ଡର ସ୍ପେକ୍ଟ୍ରାଲ୍ ମାପ ଅନ୍ତର୍ଭୁକ୍ତ ଏବଂ ଏହି ମାପ ଫସଲ ଏବଂ ମୃତ୍ତିକାର ସ୍ୱାସ୍ଥ୍ୟ ଉପରେ ଦୃଷ୍ଟି ରଖିବା ଏବଂ ଆକଳନ କରିବା ପାଇଁ କିଛି ଅନନ୍ୟ ସୂଚକାଙ୍କ ପ୍ରଦାନ କରିଥାଏ। ଏହା ହେଉଛି କୃଷି ଉପରେ ଦୃଷ୍ଟି ରଖିବା ପାଇଁ ଅନନ୍ୟ ସାମର୍ଥ୍ୟ ସହିତ ଏକ ବିକଶିତ ପ୍ରଯୁକ୍ତିବିଦ୍ୟା। ହାଇପରସ୍ପେକ୍ଟ୍ରାଲ୍ ତଥ୍ୟ ବ୍ୟବହାର କରି କ୍ଲୋରୋଫିଲ୍ ଏବଂ ଫସଲର ଆର୍ଦ୍ରତା ସ୍ଥିତିରେ ପରିବର୍ତ୍ତନ ଚିହ୍ନଟ କରି ଫସଲ ସ୍ୱାସ୍ଥ୍ୟ ଉପରେ ଦୃଷ୍ଟି ରଖିବା ଓ ଫସଲର ସଂକଟ ପରିଚାଳନା ସମାଧାନ ଖୋଜିବାରେ କୃଷକମାନଙ୍କ ପାଇଁ ଲାଭଦାୟକ ହେବ।

ମୃତ୍ତିକାର ଜୈବ ମୂଲ୍ୟାଙ୍କନ ସହିତ ମୃତ୍ତିକାର ପୋଷକ ତତ୍ତ୍ବ ମ୍ୟାପିଂ, ହାଇପରସ୍ପେକ୍ଟ୍ରାଲ୍ ଟେକ୍ନୋଲୋଜିର ଏକ ଗୁରୁତ୍ୱପୂର୍ଣ୍ଣ ପ୍ରୟୋଗ। ସେନ୍ସର ଦ୍ୱାରା ମାପ କରାଯାଇଥିବା ମୃତ୍ତିକାର ପ୍ରତିଫଳନ, ମୃତ୍ତିକାର ଜୈବ ଅଙ୍ଗାରକାମ୍ଳର ଆକଳନ ପାଇଁ ଅଧିକ ପ୍ରତ୍ୟକ୍ଷ ଏବଂ ପ୍ରଭାବଶାଳୀ ତଥ୍ୟ ପ୍ରଦାନ କରିଥାଏ। ଏହା ହାଇପରସ୍ପେକ୍ଟ୍ରାଲ୍ ବ୍ୟବହାର କରି ଫସଲ ଉପରେ ପଡୁଥିବା ଚାପର ଶୀଘ୍ର ଚିହ୍ନଟ କରିବାରେ, କୀଟନାଶକ/ରୋଗ କିମ୍ବା ଜଳ କାରଣରୁ ଫସଲ ସଂକଟର ସଠିକ୍ ନିରାକରଣରେ ସାହାଯ୍ୟ କରିବ। ଲକ୍ଷ ଲକ୍ଷ ଚାଷୀଙ୍କୁ ଉପକୃତ କରୁଥିବା ସରକାରଙ୍କ ବର୍ତ୍ତମାନର ପରାମର୍ଶ ବ୍ୟବସ୍ଥାକୁ ମଜବୁତ କରିବା ପାଇଁ ହାଇପରସ୍ପେକ୍ଟ୍ରାଲ୍ ତଥ୍ୟ ଅନେକ ସୁଯୋଗ ପ୍ରଦାନ କରିଥାଏ।

ଡିଆଣ୍ଡଏଫଡବ୍ଲ୍ୟୁର ସଚିବ, କହିଛନ୍ତି ଯେ ଯୁବ ଷ୍ଟାର୍ଟଅପ୍ କମ୍ପାନୀ ସହିତ ଏହିପରି ସହଯୋଗ ଓ ସମନ୍ବୟ ଦ୍ବାରା ଉନ୍ନତ ଉପଗ୍ରହ ଇମେଜିଙ୍ଗ ଟେକ୍ନୋଲୋଜିର ବ୍ୟବହାର କରି ଏକ ଅଭିନବ ଗୌଗୋଳିକ ସମାଧାନର ବିକଶିତ କରିବା​‌​‌ରେ ବହୁତ ସହାୟତା ମିଳିବ। ଏହି ନୂତନ ପ୍ରଯୁକ୍ତି ବିଦ୍ୟା ମାନୁଆଲ ସର୍ବେକ୍ଷଣ ଏବଂ ମାପ ଉପରେ ନିର୍ଭରଶୀଳତା ହ୍ରାସ କରିବ, ଯାହା ସମୟ ସାପେକ୍ଷ ଏବଂ ଏଥିରେ ତ୍ରୁଟି ରହିବାର ସମ୍ଭାବନା ବହୁତ କମ୍ ଥାଏ।

ନୂଆଦିଲ୍ଲୀ/ଭୁବନେଶ୍ୱର: ପତିତ ଜମିର ପୁନରୁଦ୍ଧାର କରି ତାହାକୁ ଚାଷ ଉପଯୋଗୀ କରିବା ସହ ଆଧୁନିକ ପ୍ରଣାଳିରେ ଚାଷ କାର୍ଯ୍ୟ କରିବା ପାଇଁ କେନ୍ଦ୍ର ଶିକ୍ଷା, ଦକ୍ଷତା ବିକାଶ ଏବଂ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କୃଷି ମନ୍ତ୍ରଣାଳୟ ଓ ଅନ୍ତରାଷ୍ଟ୍ରୀୟ ଫସଲ ଅନୁସନ୍ଧାନ ସଂସ୍ଥାନ(ଆଇସିଆରଆଇଏସଏଟି)ର ବରିଷ୍ଠ ଅଧିକାରୀଙ୍କ ସହ ସମୀକ୍ଷା କରିଛନ୍ତି।

ଓଡ଼ିଶାର ଖଣି ବହୁଳ ଅଞ୍ଚଳ ଗୁଡ଼ିକରେ ପୁରୁଣା ଖଣି ଓ ଖାଦାନ, ବର୍ତ୍ତମାନର ପାଉଁଶ ଗଦା ଏବଂ ପ୍ରଦୂଷଣ ଯୋଗୁଁ ବହୁ ଜମି ଯାହା ପୂର୍ବରୁ ଚାଷ ଉପଯୋଗୀ ଥିଲା ବର୍ତ୍ତମାନ ସମୟରେ ପତିତ ଜମିରେ ପରିବର୍ତ୍ତିତ ହୋଇଛି। ଏହି ସମସ୍ୟାର ଏକ ସ୍ଥାୟୀ ସମାଧାନ ଉଦ୍ଦେଶ୍ୟରେ ମନ୍ତ୍ରୀ ଶ୍ରୀ ପ୍ରଧାନ, କୃଷି ମନ୍ତ୍ରଣାଳୟ ତଥା ଆଇସିଆରଆଇଏସଏଟିର ଧ୍ୟାନ ଆକର୍ଷଣ କରିଥିଲେ। ପରୀକ୍ଷାମୂଳକ ଭାବେ ଏହି ଗବେଷଣା କେନ୍ଦ୍ର ଅନୁଗୋଳ ଜିଲ୍ଲାର ତାଳଚେର ବଲଣ୍ଡା ଅଞ୍ଚଳରେ ପତିତ ଜମି ପୁନରୁଦ୍ଧାର ପ୍ରକଳ୍ପ ହାତକୁ ନେବା ଦିଗରେ ଆଲୋଚନା କରାଯାଇଛି।

ଶ୍ରୀ ପ୍ରଧାନ ଟ୍ୱିଟ୍ କରି ସୂଚନା ଦେଇଛନ୍ତି ଯେ ତାଳଚେରର ବଲଣ୍ଡା ଅଂଚଳରେ ବୈଜ୍ଞାନିକ ପଦ୍ଧତିରେ ପତିତ ଜମିର ପୁନରୁଦ୍ଧାର କରି ତାହାକୁ ଚାଷ ଉପଯୋଗୀ କରିବା ଦିଗରେ ବୈଠକରେ ଆଲୋଚନା କରାଯାଇଛି। ଏହି ବୈଠକରେ ଆଇସିଆରଆଇଏସଏଟି ଦ୍ୱାରା ବୈଜ୍ଞାନିକ ଉପାୟରେ ଚାଷ କାର୍ଯ୍ୟ କରିବା ଦିଗରେ ଏକ ପ୍ରେଜେଂଟେସନ ମଧ୍ୟ ଦିଆଯାଇଥିଲା ଦୀର୍ଘ ଦିନ ର କୋଇଲା ଉତ୍ତୋଳନ ଏବଂ ବର୍ତ୍ତମାନର ପାଉଁଶ ପୋଖରୀ ଜନିତ ପ୍ରଦୂଷଣ ର ସମସ୍ୟାକୁ ସମାଧାନ ସହ ଜମି କୁ ବର୍ତ୍ତମାନ ଚାଷ ଉପଯୋଗୀ କରିବା ପାଇଁ ଏହି ପ୍ରକଳ୍ପ ଏକ ନୂତନ ପଦକ୍ଷେପ। ଏହାସହ ଚାଷ ସହ ଜଡ଼ିତ ଆନୁଷଙ୍ଗିକ କାର୍ଯ୍ୟର ବିକାଶ ତଥା ଚାଷୀଙ୍କ ଆୟକୁ ବୃଦ୍ଧି କରିବା ପାଇଁ ଗୁରୁତ୍ୱ ଦିଆଯାଇଛି।

ପତିତ ଜମି ପୁନରୁଦ୍ଧାର ସହ ସ୍ଥାନୀୟ ଅଂଚଳରେ ଚାଷ ଏବଂ ଚାଷ ସାମଗ୍ରୀର ଉତ୍ପାଦନକୁ ବୃଦ୍ଧି କରିବା ପାଇଁ ନୂତନ ପ୍ରଯୁକ୍ତିବିଦ୍ୟାର ବ୍ୟବହାର ନେଇ ଯୋଜନା କରାଯିବ। ଜଙ୍ଗଲଜାତ ଦ୍ରବ୍ୟର ବିକାଶ, ଚାଷୀଙ୍କ ସହ ବଜାର ସଂଯୋଗୀକରଣ, ଚାଷୀଙ୍କ ଜୀବିକାକୁ ଉନ୍ନତ କରିବା ତଥା କୃଷି ଉତ୍ପାଦକ ସଂଗଠନ(ଏଫପିଓ) ମାଧ୍ୟମରେ ଚାଷୀ ମାନଙ୍କୁ କୁଶଳୀ କରିବା ପାଇଁ ପ୍ରଶିକ୍ଷଣ ଦେବା ଦିଗରେ ମଧ୍ୟ ଉକ୍ତ ଆଲୋଚନା କରାଯାଇଥିବା କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ସୂଚନା ଦେଇଛନ୍ତି।