ନୂଆଦିଲ୍ଲୀ: ଝାଡଖଣ୍ଡର ବେଆଇନ ଖଣି ଦୁର୍ନୀତିରେ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ନିକଟବର୍ତ୍ତୀ ଲୋକଙ୍କ ଉପରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଚଢାଉ କରୁଛି। ଆଜି ଇଡି ମୁଖ୍ୟମନ୍ତ୍ରୀ ସୋରେନଙ୍କ ମିଡିଆ ପରାମର୍ଶଦାତା ଅଭିଷେକ ପ୍ରସାଦ ଓରଫ ପିଣ୍ଟୁ, ସାହିବଗଞ୍ଜର ଡେପୁଟି କମିଶନର ତଥା ବହୁ ଘନିଷ୍ଠ ବ୍ୟକ୍ତିଙ୍କ ଘରେ ଚଢାଉ କରିଛି। ସୂଚନାନୁସାରେ, କେନ୍ଦ୍ରୀୟ ଅନୁସନ୍ଧାନ ଏଜେନ୍ସି ଇଡି ଏକ ଡଜନରୁ ଅଧିକ ସ୍ଥାନରେ ଚଢାଉ କରିଛି।
ଯେଉଁମାନଙ୍କ ଉପରେ ଚଢାଉ କରାଯାଇଛି ସେମାନଙ୍କ ରାଜନୈତିକ ମହଲରେ ମଜବୁତ ସଂଯୋଗ ରହିଛି। ରାଞ୍ଚିର ପିସ୍କା ମୋଡରେ ରହୁଥିବା ରୋଶନ ନାମକ ଜଣେ ବ୍ୟକ୍ତିଙ୍କ ସ୍ଥାନରେ ସର୍ଚ୍ଚ ଅପରେସନ୍ ମଧ୍ୟ କରାଯାଉଛି। ବେଆଇନ ଖଣି ଦୁର୍ନୀତି ସହ ଜଡିତ ମନି ଲଣ୍ଡରିଂ ମାମଲାରେ ଇଡି କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଏହି ଚଢାଉରେ ଇଡି ଅଧିକାରୀଙ୍କ ସହ ସୁରକ୍ଷା ବାହିନୀ ମଧ୍ୟ ନଜର ଆସିଛନ୍ତି। ବିନୋଦ ସିଂ ନାମକ ଜଣେ ବ୍ୟକ୍ତିଙ୍କ ଘରେ ମଧ୍ୟ ଇଡି ଚଢାଉ କରୁଛି।
