Tag: କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଳାୟ

ନୂଆଦିଲ୍ଲୀ: ମହାରାଷ୍ଟ୍ରରେ ଜିକା ଭୂତାଣୁ ସଂକ୍ରମଣର କିଛି ମାମଲା ସାମ୍ନାକୁ ଆସିବା ପରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟର ସ୍ୱାସ୍ଥ୍ୟ ସେବା ମହାନିର୍ଦ୍ଦେଶକ (ଡିଜିଏଚଏସ) ଡକ୍ଟର ଅତୁଲ ଗୋଏଲ ରାଜ୍ୟମାନଙ୍କୁ ଏକ ଉପଦେଶାବଳୀ ଜାରି କରି ଦେଶରେ ଜିକା ଭୂତାଣୁର ସ୍ଥିତି ଉପରେ ନିରନ୍ତର ନଜର ରଖିବାର ଆବଶ୍ୟକତା ଉପରେ ଆଲୋକପାତ କରିଛନ୍ତି।

ଯେହେତୁ ଜିକା ଭୁତାଣୁ ପ୍ରଭାବିତ ଗର୍ଭବତୀ ମହିଳାଙ୍କ ଭ୍ରୁଣର ମାଇକ୍ରୋସେଫାଲି ଏବଂ ସ୍ନାୟବିକ ପରିଣାମ ସହିତ ଜଡିତ, ତେଣୁ ରାଜ୍ୟ ଗୁଡ଼ିକର ଡାକ୍ତରମାନଙ୍କୁ ଅତି ସତର୍କତାର ସହିତ ଏହାର ତଦାରଖ କରିବା ପାଇଁ ପରାମର୍ଶ ଦିଆଯାଇଛି । ଜିକା ଭୂତାଣୁ ସଂକ୍ରମଣ ପାଇଁ ଗର୍ଭବତୀ ମହିଳା ମାନଙ୍କର ଯାଂଚ କରିବା, ଜିକା ଭୂତାଣୁ ଦ୍ୱାରା ସଂକ୍ରମିତ ଭାବରେ ଚିହ୍ନଟ ହୋଇଥିବା ଗର୍ଭବତୀ ମାଆଙ୍କ ଭ୍ରୂଣର ବିକାଶ ଉପରେ ନଜର ରଖିବା ଏବଂ କେନ୍ଦ୍ର ସରକାରଙ୍କ ନିର୍ଦ୍ଦେଶାବଳୀ ଅନୁଯାୟୀ ପ୍ରଭାବିତ ଅଞ୍ଚଳର ସ୍ୱାସ୍ଥ୍ୟ କେନ୍ଦ୍ର କିମ୍ବା ପ୍ରଭାବିତ ଅଞ୍ଚଳରୁ ଆସୁଥିବା ମାଆ ମାନଙ୍କର ଭଲ ଭାବରେ ଯାଂଚ କରିବାକୁ ସ୍ୱାସ୍ଥ୍ୟ କେନ୍ଦ୍ରଗୁଡ଼ିକୁ ନିର୍ଦ୍ଦେଶ ଦେବାକୁ ରାଜ୍ୟମାନଙ୍କୁ ଅନୁରୋଧ କରାଯାଇଛି । ଏଡିସ ମଶା ମୁକ୍ତ ରଖିବା ପାଇଁ ତଦାରଖ ଏବଂ କାର୍ଯ୍ୟ କରିବା ଉଦ୍ଦେଶ୍ୟରେ ଜଣେ ନୋଡାଲ ଅଫିସର ଚିହ୍ନଟ କରିବାକୁ ସ୍ୱାସ୍ଥ୍ୟ କେନ୍ଦ୍ର/ ଡାକ୍ତରଖାନାଗୁଡ଼ିକୁ ପରାମର୍ଶ ଦେବାକୁ ମଧ୍ୟ ରାଜ୍ୟମାନଙ୍କୁ ନିର୍ଦ୍ଦେଶ ଦିଆଯାଇଥିଲା ।

ଆବାସିକ ଅଞ୍ଚଳ, କର୍ମକ୍ଷେତ୍ର, ବିଦ୍ୟାଳୟ, ନିର୍ମାଣ ସ୍ଥଳ, ଅନୁଷ୍ଠାନ ଏବଂ ସ୍ୱାସ୍ଥ୍ୟ ସୁବିଧାରେ କୀଟ ବିଜ୍ଞାନ ନିରୀକ୍ଷଣକୁ ସୁଦୃଢ଼ କରିବା ଏବଂ ଭେକ୍ଟର ନିୟନ୍ତ୍ରଣ କାର୍ଯ୍ୟକଳାପକୁ ତ୍ୱରାନ୍ୱିତ କରିବା ଉପରେ ରାଜ୍ୟଗୁଡ଼ିକ ଗୁରୁତ୍ୱାରୋପ କରିବାକୁ କୁହାଯାଇଛନ୍ତି । ଜିକା ଭୂତାଣୁର ସଂକ୍ରମଣ ଅନ୍ୟ ଯେ କୌଣସି ଭୂତାଣୁ ସଂକ୍ରମଣ ପରି ହୋଇଥିବାରୁ ଏବଂ ଅଧିକାଂଶ ମାମଲା ଲକ୍ଷଣ ବିହୀନ ତଥା ସାମାନ୍ୟ ହୋଇଥିବାରୁ ଲୋକମାନଙ୍କ ମଧ୍ୟରେ ଏ ବାବଦରେ ଆତଙ୍କକୁ କମ୍ କରିବା ପାଇଁ ସାମାଜିକ ଗଣମାଧ୍ୟମ ଏବଂ ଅନ୍ୟ ପ୍ଲାଟଫର୍ମରେ ସତର୍କତାମୂଳକ ଆଇଇସି ବାର୍ତ୍ତା ମାଧ୍ୟମରେ ସଚେତନତା ସୃଷ୍ଟି କରିବା ନିମନ୍ତେ ରାଜ୍ୟଗୁଡ଼ିକୁ ଅନୁରୋଧ କରାଯାଇଛି । ଯଦିଓ ଏହା ମାଇକ୍ରୋସେଫାଲି ସହ ଜଡ଼ିତ ବୋଲି କୁହାଯାଉଛି, କିନ୍ତୁ ୨୦୧୬ ପରଠାରୁ ଦେଶରେ କୌଣସି ଜିକା ସମ୍ବନ୍ଧିତ ମାଇକ୍ରୋସେଫାଲିର ରିପୋର୍ଟ ସାମ୍ନାକୁ ଆସିନାହିଁ ।

\ଯେ କୌଣସି ସମ୍ଭାବ୍ୟ ସଂକ୍ରମଣ/ପ୍ରକୋପକୁ ଠିକ୍ ସମୟରେ ଚିହ୍ନଟ ଏବଂ ନିୟନ୍ତ୍ରଣ କରିବା ପାଇଁ ରାଜ୍ୟ କର୍ତ୍ତୃପକ୍ଷମାନଙ୍କୁ ସତର୍କ, ପ୍ରସ୍ତୁତ ଏବଂ ସମସ୍ତ ସ୍ତରରେ ଉପଯୁକ୍ତ ଲଜିଷ୍ଟିକ୍ ଉପଲବ୍ଧତା ସୁନିଶ୍ଚିତ କରିବାକୁ ପରାମର୍ଶ ଦିଆଯାଇଛି । ଏଥି ସହିତ ଏ ବାବଦରେ ସମନ୍ୱିତ ରୋଗ ନିରୀକ୍ଷଣ କାର୍ଯ୍ୟକ୍ରମ (ଆଇଡିଏସପି) ଏବଂ ନ୍ୟାସନାଲ ସେଣ୍ଟର ଫର ଭେକ୍ଟର ବର୍ଣ୍ଣ ଡିଜିଜ୍ କଣ୍ଟ୍ରୋଲ (ଏନସିଭିବିଡିସି)କୁ ତୁରନ୍ତ ରିପୋର୍ଟ କରିବାକୁ ରାଜ୍ୟମାନଙ୍କୁ ଅନୁରୋଧ କରାଯାଇଛି ।

ପୁଣେସ୍ଥିତ ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଭାଇରୋଲୋଜି (ଏନ୍‌ଆଇଭି)ରେ ଜିକା ପରୀକ୍ଷା ସୁବିଧା ଉପଲବ୍ଧ ରହିଛି । ଜାତୀୟ ରୋଗ ନିୟନ୍ତ୍ରଣ କେନ୍ଦ୍ର (ଏନସିଡିସି), ଦିଲ୍ଲୀ ଏବଂ ଇଣ୍ଡିଆନ କାଉନସିଲ ଅଫ୍ ମେଡିକାଲ ରିସର୍ଚ୍ଚ (ଆଇସିଏମଆର)ର କିଛି ଚୟନ ହୋଇଥିବା ଭୂତାଣୁ ଗବେଷଣା ଏବଂ ନିଦାନ ପରୀକ୍ଷାଗାରରେ ମଧ୍ୟ ଏହି ସୁବିଧା ଉପଲବ୍ଧ ହେଉଛି । ଏହାର ମଧ୍ୟ ଉଚ୍ଚ ସ୍ତରରେ ସମୀକ୍ଷା କରାଯାଉଛି ।

ଡିଜିଏଚଏସ୍ ମଧ୍ୟ ଏ ସମ୍ପର୍କରେ ଏପ୍ରିଲ ୨୬ ତାରିଖରେ ଏକ ଉପଦେଶାବଳୀ ଜାରି କରିଥିଲା ଏବଂ ଏନସିଭିବିଡିସି ନିର୍ଦ୍ଦେଶକ ୨୦୨୪ ଫେବୃଆରୀ ଏବଂ ଏପ୍ରିଲରେ ଭେକ୍ଟର ମଶା ଦ୍ୱାରା ସଂକ୍ରମିତ ଜିକା, ଡେଙ୍ଗୁ ଏବଂ ଚିକୁନଗୁନିଆ ଉପରେ ରାଜ୍ୟମାନଙ୍କୁ ଦୁଇଟି ଉପଦେଶାବଳୀ ଜାରି କରିଥିଲେ ।

କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ସ୍ଥିତି ଉପରେ ତୀକ୍ଷ୍ଣ ନଜର ରଖିଛନ୍ତି।

ପୃଷ୍ଠଭୂମି:

ଜିକା ଡେଙ୍ଗୁ ଓ ଚିକୁନଗୁନିଆ ଭଳି ଏଡିସ ମଶାବାହିତ ଭୂତାଣୁ ଜନିତ ରୋଗ । ଏହା ଏକ ଅଣ-ପ୍ରାଣଘାତୀ ରୋଗ । ତେବେ ପ୍ରଭାବିତ ଗର୍ଭବତୀ ମହିଳାଙ୍କ ଠାରୁ ଜନ୍ମ ହୋଇଥିବା ଶିଶୁମାନଙ୍କର ମାଇକ୍ରୋସେଫାଲି (ମୁଣ୍ଡର ଆକାର ହ୍ରାସ) ସହିତ ଜିକା ଜଡିତ , ଯାହା ଏହାକୁ ଏକ ବଡ଼ ଚିନ୍ତାର କାରଣ ଭାବରେ ପରିଣତ କରିଛି ।

୨୦୧୬ରେ ଗୁଜରାଟ ରାଜ୍ୟରୁ ଭାରତରେ ପ୍ରଥମ ଜିକା ଭୂତାଣୁ ସଂକ୍ରମଣ ମାମଲା ସାମ୍ନାକୁ ଆସିଥିଲା । ଏହାପରେ ତାମିଲନାଡୁ, ମଧ୍ୟପ୍ରଦେଶ, ରାଜସ୍ଥାନ, କେରଳ, ମହାରାଷ୍ଟ୍ର, ଉତ୍ତରପ୍ରଦେଶ, ଦିଲ୍ଲୀ ଓ କର୍ଣ୍ଣାଟକରେ ଏହି ଭୂତାଣୁ ଦ୍ୱାରା ଆକ୍ରାନ୍ତମାନେ ଚିହ୍ନଟ ହୋଇଛନ୍ତି ।

୨୦୨୪ରେ (ଜୁଲାଇ ୨ତାରିଖ ସୁଦ୍ଧା ) ମହାରାଷ୍ଟ୍ରର ପୁଣେ (୬), କୋହ୍ଲାପୁର (୧) ଏବଂ ସାଙ୍ଗମନେର (୧) ରୁ ୮ଟି ମାମଲା ସାମ୍ନାକୁ ଆସିଛି ।

ନୂଆଦିଲ୍ଲୀ: କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଜଗତ ପ୍ରକାଶ ନଡ୍ଡା ଜାତୀୟ ଷ୍ଟପ୍ ଡାଇରିଆ ଅଭିଯାନ ୨୦୨୪ର ଶୁଭାରମ୍ଭ କରିଛନ୍ତି। ତାଙ୍କ ସହ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ରାଷ୍ଟ୍ର ମନ୍ତ୍ରୀ ଅନୁପ୍ରିୟା ପଟେଲ ଏବଂ  ଯାଦବ ପ୍ରତାପରାଓ ଗଣପତରାଓ ମଧ୍ୟ ଉପସ୍ଥିତ ଥିଲେ। ଏହି ଅବସରରେ ଅତିଥିମାନେ ଏହି ଅଭିଯାନ ପାଇଁ ଲୋଗୋ, ପୋଷ୍ଟର, ରେଡିଓ ସ୍ପଟ୍ ଏବଂ ଅଡିଓ ଭିଜୁଆଲ୍ ଭଳି ଆଇଇସି ସାମଗ୍ରୀ ଉନ୍ମୋଚନ କରିବା ସହ ପିଲାମାନଙ୍କୁ ଓରାଲ୍ ରିହାଇଡ୍ରେସନ୍ ସଲଟ୍ (ଓଆର୍‌ଏସ୍‌) ଏବଂ ଜିଙ୍କ୍ ଟାବଲେଟ୍ ବଣ୍ଟନ କରିଥିଲେ।

ଷ୍ଟପ୍ ଡାଇରିଆ ଅଭିଯାନ ୨୦୨୪ ର ଲକ୍ଷ୍ୟ ହେଉଛି ପିଲାଦିନର ଝାଡ଼ାବାନ୍ତି ଜନିତ ଶୂନ୍ୟ ଶିଶୁ ମୃତ୍ୟୁ ହାର ହାସଲ କରିବା। ବର୍ତ୍ତମାନର ଡାଇରିଆ ରଣନୀତିରେ ୫ ବର୍ଷରୁ କମ୍ ପିଲାଙ୍କୁ ଓଆରଏସ୍‌ର ପୂର୍ବ ସ୍ଥିତି ଏବଂ ସୀମିତ ଆଇଇସି ସହିତ ୨ ସପ୍ତାହର ଅଭିଯାନ ରହିଥିବା ବେଳେ ନୂଆ ରଣନୀତିରେ ୫ ବର୍ଷରୁ କମ୍ ବୟସର ପିଲାଙ୍କ ପାଇଁ ସହ – ପ୍ୟାକେଜିଂ ଭାବରେ ୨ଟି ଓଆରଏସ୍ ପ୍ୟାକେଟ୍ ଏବଂ ଜିଙ୍କ୍‌ର ପୂର୍ବ – ସ୍ଥିିତି ସହିତ ୨ ମାସର ଅଭିଯାନ ଅନ୍ତର୍ଭୁକ୍ତ। ଏଥିରେ ସ୍ୱାସ୍ଥ୍ୟ, ଜଳ ଓ ପରିମଳ, ଶିକ୍ଷା ଏବଂ ଗ୍ରାମୀଣ ବିକାଶ ସମେତ ଏକାଧିକ କ୍ଷେତ୍ରରେ ବିଭିନ୍ନ ପ୍ଲାଟଫର୍ମ ଏବଂ ସହଯୋଗ ମାଧ୍ୟମରେ ବ୍ୟାପକ ଆଇଇସି ମଧ୍ୟ ସାମିଲ ହେବ।

ଏହି ଅବସରରେ ଶ୍ରୀ ଜେ ପି ନଡ୍ଡା କହିଥିଲେ ଯେ ମିଶନ ଇନ୍ଦ୍ରଧନୁଷ, ରୋଟାଭାଇରସ୍ ଟିକା ଏବଂ ଏହି ଷ୍ଟପ୍ ଡାଇରିଆ ଅଭିଯାନ ମଧ୍ୟରେ ଏକ ଅନନ୍ୟ ସମ୍ପର୍କ ରହିଛି , କାରଣ ସ୍ୱାସ୍ଥ୍ୟ ମନ୍ତ୍ରୀ ଭାବରେ ମୋର ପୂର୍ବ କାର୍ଯ୍ୟକାଳ ସମୟରେ ଆରମ୍ଭ ହୋଇଥିବା ପ୍ରଥମ ପଦକ୍ଷେପ ମଧ୍ୟରେ ଏହି ସବୁ ଅଭିଯାନ ସାମିଲ ଥିଲା । ସେ କହିଛନ୍ତି ଯେ କେନ୍ଦ୍ର ସରକାରଙ୍କ ଦ୍ୱାରା ନିଆଯାଇଥିବା ବିଭିନ୍ନ ପଦକ୍ଷେପ ଡାଇରିଆ ଜନିତ ଶିଶୁ ମୃତ୍ୟୁ ହାର ହ୍ରାସ କରିବାରେ ସହାୟକ ହୋଇଛି । ୨୦୧୪ରେ ରୋଟାଭାଇରସ୍ ଟିକା ଆଣିବାରେ ଭାରତ ପ୍ରଥମ ଦେଶ ବୋଲି ସେ ଆଲୋକପାତ କରିଥିଲେ । ସେହିପରି ଜାତୀୟ ଜଳ ଜୀବନ ମିଶନ, ସ୍ୱଚ୍ଛ ଭାରତ ଅଭିଯାନ ଏବଂ ଆୟୁଷ୍ମାନ ଆରୋଗ୍ୟ ମନ୍ଦିର ନେଟୱର୍କର ସମ୍ପ୍ରସାରଣ ଦେଶରେ ଡାଇରିଆ ମାମଲା ଏବଂ ମୃତ୍ୟୁ ହାର ହ୍ରାସ କରିବାରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଛି ।

ଭାରତରେ ଝାଡ଼ାବାନ୍ତି ନିୟନ୍ତ୍ରଣ ପ୍ରୟାସକୁ ସୁଦୃଢ଼ କରିବା ପାଇଁ ଦକ୍ଷତା ବିକାଶ ପ୍ରୟାସ ବୃଦ୍ଧି ସହିତ ସ୍ୱାସ୍ଥ୍ୟକର୍ମୀମାନଙ୍କୁ ସଚେତନ କରିବା ଉପରେ ମଧ୍ୟ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ଗୁରୁତ୍ୱାରୋପ କରିଥିଲେ । ରାଜ୍ୟ ଗୁଡ଼ିକର ପ୍ରସ୍ତୁତି ସ୍ତରକୁ ପ୍ରଶଂସା କରି ଜେ ପି ନଡ୍ଡା ଜନସାଧାରଣଙ୍କ ମଧ୍ୟରେ ସଚେତନତା ବୃଦ୍ଧି ପାଇଁ ସେମାନଙ୍କୁ ଉତ୍ସାହିତ କରିଥିଲେ । ଯଦି ଆମର ସ୍ୱାସ୍ଥ୍ୟକର୍ମୀମାନେ ଦେଶର ଦୁର୍ଗମ କୋଣଅନୁକୋଣରେ ପହଞ୍ଚି ୨୨୦ କୋଟି ଡୋଜ୍ କୋଭିଡ୍ ଟିକା ଦେଇପାରିଛନ୍ତି, ତେବେ ମୁଁ ନିଶ୍ଚିତ ଯେ ଆମର ଆଗଧାଡ଼ିର ସ୍ୱାସ୍ଥ୍ୟକର୍ମୀମାନେ ଷ୍ଟପ୍ ଡାଇରିଆ ଅଭିଯାନ ସମୟରେ ମଧ୍ୟ ସମାନ ଦୃଢ଼ ବିତରଣ ବ୍ୟବସ୍ଥା ସୃଷ୍ଟି କରିପାରିବେ ।

“କେବଳ ସୁସ୍ଥ ଶିଶୁ ହିଁ ସୁସ୍ଥ ରାଷ୍ଟ୍ରକୁ ଆଗେଇ ନେଇଥାନ୍ତି” ବୋଲି ଉଲ୍ଲେଖ କରି ଶ୍ରୀ ଯାଦବ ପ୍ରତାପରାଓ ଗୁରୁତ୍ୱାରୋପ କରିଥିଲେ ଯେ , ପ୍ରଥମେ ଝାଡ଼ାବାନ୍ତିକୁ ରୋକିବା ପାଇଁ ଅଧିକ ପ୍ରୟାସ କରାଯିବା ଉଚିତ୍ । ପିଲାମାନଙ୍କୁ ଓଆରଏସ୍ ଓ ଜିଙ୍କ ବଟିକା ଯୋଗାଇବା ସହିତ ସ୍ୱଚ୍ଛତା ଏବଂ ଡାଇରିଆ ନିରାକରଣ ଲକ୍ଷ୍ୟ ସ୍ଥିର କରିବା ଉପରେ ଗୁରୁତ୍ୱ ଦେବାକୁ ସେ ଅଧିକାରୀମାନଙ୍କୁ ଅନୁରୋଧ କରିଥିଲେ ।

ଅନୁପ୍ରିୟା ପଟେଲ କହିଥିଲେ ଯେ, “ଏହା ଦୁଃଖଦାୟକ ଯେ ପିଲାଦିନର ଝାଡ଼ାବାନ୍ତି ଉଭୟ ପ୍ରତିରୋଧଯୋଗ୍ୟ ଏବଂ ନିରାକରଣଯୋଗ୍ୟ, ତଥାପି ଏହି ବିପଦ ଯୋଗୁଁ ଅନେକ ଜୀବନ ଯାଉଛି । ଝାଡ଼ାବାନ୍ତି ଜନିତ ଶୂନ୍ୟ ଶିଶୁ ମୃତ୍ୟୁ ଲକ୍ଷ୍ୟରେ ପହଞ୍ଚିବା ପାଇଁ ରାଜ୍ୟ ଓ ଅନ୍ୟ।ନ୍ୟ ଅନୁଷ୍ଠାନର ପ୍ରତିନିଧିମାନଙ୍କୁ ପୁନର୍ବାର ଉତ୍ସାହିତ କରିବା ସହ ଝାଡ଼ାବାନ୍ତି ସମ୍ପର୍କରେ ସଚେତନତା ବୃଦ୍ଧି କରିବାକ”କୁ ସେ ଅନୁରୋଧ କରିଥିଲେ ।

କେନ୍ଦ୍ର ସ୍ୱାସ୍ଥ୍ୟ ସଚିବ ଅପୂର୍ବ ଚନ୍ଦ୍ର କହିଛନ୍ତି, ଡାଇରିଆ ଏକ ସାଧାରଣ ରୋଗ । ପୂର୍ବରୁ ସରକାର ଡାଇରିଆକୁ ହ୍ରାସ କରିବା ପାଇଁ ପାକ୍ଷିକ ଅଭିଯାନ ଚଳାଇଥିଲେ , ଯାହାକୁ ଏବେ ଏକ ବ୍ୟାପକ ଏବଂ ବିସ୍ତାର ଅଭିଯାନରେ ପରିଣତ କରାଯାଇଛି ।

ସ୍ୱାସ୍ଥ୍ୟ ସେବା ମହାନିର୍ଦ୍ଦେଶକ ଡାକ୍ତର ଅତୁଲ ଗୋଏଲ କହିଛନ୍ତି ଯେ ଡାଇରିଆ ପିଲାମାନଙ୍କ ମଧ୍ୟରେ ଏକ ସାଧାରଣ ତଥା ନିରାକରଣଯୋଗ୍ୟ ରୋଗ । ଏହି ଅଭିଯାନ ଦେଶରେ ଝାଡ଼ାବାନ୍ତି ପରିଚାଳନା ରଣନୀତିକୁ ସୁଦୃଢ଼ କରିବାରେ ସହାୟକ ହେବ ବୋଲି ସେ ଆଶା ବ୍ୟକ୍ତ କରିଛନ୍ତି ।

ଏହି ଅବସରରେ ଉପସ୍ଥିତ ଥିବା ରାଜ୍ୟର ବରିଷ୍ଠ ଅଧିକାରୀମାନେ ମଧ୍ୟ ଏହି ଅଭିଯାନ ବିଷୟରେ ସେମାନଙ୍କର ଚିନ୍ତାଧାରା ଏବଂ ମତାମତ ବାଣ୍ଟିଥିଲେ । ସେମାନେ ସେମାନଙ୍କର ପ୍ରସ୍ତୁତି ସ୍ତର ବିଷୟରେ ଅପଡେଟ୍ ମଧ୍ୟ ପ୍ରଦାନ କରିଥିଲେ ଏବଂ ଏହା ଉପରେ ସେମାନଙ୍କର କିଛି ଶ୍ରେଷ୍ଠ ଅଭ୍ୟାସ ସମ୍ପର୍କରେ କହିଥିଲେ ।

ପୃଷ୍ଠଭୂମି:

ପିଲାମାନଙ୍କୁ ଲାଗି ରହିଥିବା ଝାଡ଼ାବାନ୍ତି ସମସ୍ୟାର ମୁକାବିଲା କରିବା ଏବଂ ଡାଇରିଆ କାରଣରୁ ଘଟୁଥିବା ଶୂନ୍ୟ ଶିଶୁ ମୃତ୍ୟୁ ହାର ହାସଲ କରିବା ପାଇଁ ପ୍ରୟାସ କରିବା ନିମନ୍ତେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ (ଏମ୍‌ଓଏଚଏଫଡବ୍ଲୁ) ଏହାର ଦୀର୍ଘଦିନ ଧରି ଚାଲିଥିବା ତୀବ୍ର ଡାଇରିଆ ନିୟନ୍ତ୍ରଣ ପକ୍ଷ (ଆଇଡିସିଏଫ)କୁ ଷ୍ଟପ୍ ଡାଇରିଆ ଅଭିଯାନ (ଡାଇରିଆ ବନ୍ଦ ଅଭିଯାନ) ଭାବରେ ନାମିତ କରିଛି । ୨୦୧୪ମସିହାରୁ ଆରମ୍ଭ ହୋଇଥିବା ଏହି ପଦକ୍ଷେପରେ ପ୍ରତିଷେଧକ, ସୁରକ୍ଷା ଏବଂ ଚିକିତ୍ସା (ପିପିଟି) ରଣନୀତିକୁ ବଢ଼ାଇବା ଏବଂ ଓରାଲ ରିହାଇଡ୍ରେସନ୍ ସଲ୍ୟୁସନ୍ (ଓଆରଏସ୍‌) ଏବଂ ଜିଙ୍କ୍‌ର ବ୍ୟବହାର ବୃଦ୍ଧି ଉପରେ ଗୁରୁତ୍ୱ ଦିଆଯାଇଛି । ଅଭିଯାନର ୨୦୨୪ର ସ୍ଲୋଗାନ, “ଡାଇରିଆର ରୋକଥାମ, ସଫାଇ ଅର ଓଆରଏସ୍ ସେ ରଖେ ଅପନା ଧ୍ୟାନ” (ଡାଇରିଆ ରୋକିବା, ସଫେଇ ଏବଂ ଓଆରଏସ୍ ଦ୍ୱାରା ରଖିବା ଧ୍ୟାନ) ପ୍ରତିଷେଧକ, ସ୍ୱଚ୍ଛତା ଏବଂ ଉପଯୁକ୍ତ ଚିକିତ୍ସାର ମହତ୍ତ୍ୱ ଉପରେ ଆଲୋକପାତ କରେ ।

୨୦୨୪ ଜୁନ୍ ୧୪ରୁ ୩୦ ତାରିଖ ପର୍ଯ୍ୟନ୍ତ ପ୍ରସ୍ତୁତି ପର୍ଯ୍ୟାୟ ଏବଂ ଜୁଲାଇ ପହିଲାରୁ ୩୧ ଅଗଷ୍ଟ ୨୦୨୪ ପର୍ଯ୍ୟନ୍ତ ଅଭିଯାନ ପର୍ଯ୍ୟାୟ ଭଳି ଦୁଇଟି ପର୍ଯ୍ୟାୟରେ ଡାଇରିଆ ବନ୍ଦ ଅଭିଯାନ କାର୍ଯ୍ୟକାରୀ ହେବ । ଏହି ସମୟ ମଧ୍ୟରେ ୫ ବର୍ଷରୁ କମ୍ ବୟସର ପିଲାଙ୍କୁ ଆଶା କର୍ମୀଙ୍କ ଦ୍ୱାରା ଓଆରଏସ ଏବଂ ଜିଙ୍କ ଟାବଲେଟ୍ ଥିବା ପ୍ୟାକେଟ୍ ବଣ୍ଟନ, ସ୍ୱାସ୍ଥ୍ୟକେନ୍ଦ୍ର ଏବଂ ଅଙ୍ଗନବାଡ଼ି କେନ୍ଦ୍ରରେ ଓଆରଏସ- ଜିଙ୍କ କେଣ ସ୍ଥାପନ ଏବଂ ପ୍ରଭାବଶାଳୀ ଡାଇରିଆ ପରିଚାଳନା ପାଇଁ ସମର୍ଥନ ଏବଂ ସଚେତନତା ପ୍ରୟାସକୁ ତ୍ୱରାନ୍ୱିତ କରିବା ପ୍ରମୁଖ କାର୍ଯ୍ୟକଳାପ ଅନ୍ତର୍ଭୁକ୍ତ । ଏହାବ୍ୟତୀତ ଏହି ଅଭିଯାନ ଡାଇରିଆ ମାମଲା ପରିଚାଳନା ପାଇଁ ସେବା ବ୍ୟବସ୍ଥାକୁ ସୁଦୃଢ଼ କରିବା ସହ ବ୍ୟାପକ ଯତ୍ନ ଓ ନିରାକରଣ ସୁନିଶ୍ଚିତ କରିବ ।

ଡାଇରିଆ ରୋକିବା ଅଭିଯାନର ଗୁରୁତ୍ୱପୂର୍ଣ୍ଣ କ୍ଷେତ୍ର:

– ସ୍ୱାସ୍ଥ୍ୟ ଭିତ୍ତିଭୂମିକୁ ସୁଦୃଢ଼ କରିବା: ବିଶେଷ କରି ଗ୍ରାମାଞ୍ଚଳରେ ସ୍ୱାସ୍ଥ୍ୟ ସୁବିଧାର ଉପଯୁକ୍ତ ରକ୍ଷଣାବେକ୍ଷଣ ଏବଂ ବ୍ୟବହାର ଏବଂ ଅତ୍ୟାବଶ୍ୟକ ଚିକିତ୍ସା ଯୋଗାଣ (ଓଆରଏସ, ଜିଙ୍କ)ର ଉପଲବ୍ଧତା ସୁନିଶ୍ଚିତ କରିବା ।

– ସ୍ୱଚ୍ଛ ଜଳ ଓ ପରିମଳ ବ୍ୟବସ୍ଥାରେ ଉନ୍ନତି ଆଣିବା: ନିରାପଦ ପାନୀୟ ଜଳ ଏବଂ ଉନ୍ନତ ପରିମଳ ବ୍ୟବସ୍ଥା ପାଇଁ କଠୋର ଗୁଣବତ୍ତା ନିୟନ୍ତ୍ରଣ ବ୍ୟବସ୍ଥା ଏବଂ ସ୍ଥାୟୀ ଅଭ୍ୟାସ କାର୍ଯ୍ୟକାରୀ କରିବା ।

– ପୁଷ୍ଟିସାଧନ କାର୍ଯ୍ୟକ୍ରମକୁ ପ୍ରୋତ୍ସାହନ: ଉନ୍ନତ ପୁଷ୍ଟିକର ପଦକ୍ଷେପ ମାଧ୍ୟମରେ ଡାଇରିଆ ରୋଗ ପାଇଁ ଏକ ପ୍ରମୁଖ ଯୋଗଦାନକାରୀ ପୁଷ୍ଟିହୀନତାର ସମାଧାନ ।

– ସ୍ୱଚ୍ଛତା ଶିକ୍ଷାକୁ ପ୍ରୋତ୍ସାହିତ କରିବା: ବ୍ୟାପକ ସ୍ୱଚ୍ଛତା ଶିକ୍ଷା କାର୍ଯ୍ୟକ୍ରମ ମାଧ୍ୟମରେ ବିଦ୍ୟାଳୟଗୁଡିକୁ ଆବଶ୍ୟକ ସୁବିଧା ସହିତ ସଜ୍ଜିତ କରିବା ଏବଂ ପିଲାମାନଙ୍କ ମଧ୍ୟରେ ସୁସ୍ଥ ଅଭ୍ୟାସକୁ ପ୍ରୋତ୍ସାହିତ କରିବା ।

ଡାଇରିଆର ପରିଚାଳନା ଏବଂ ପ୍ରତିରୋଧ, ଶେଷରେ ଶିଶୁ ମୃତ୍ୟୁହାର ହ୍ରାସ କରିବା ଏବଂ ସାମଗ୍ରିକ ଜନସ୍ୱାସ୍ଥ୍ୟରେ ଉନ୍ନତି ଆଣିବା ପାଇଁ ଏକ ସାମଗ୍ରିକ ଆଭିମୁଖ୍ୟ ସୃଷ୍ଟି କରିବା ଏହି ପ୍ରମୁଖ କ୍ଷେତ୍ର ଗୁଡିକର ଲକ୍ଷ୍ୟ ।

ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ପାନୀୟ ଜଳ ଓ ପରିମଳ, ମହିଳା ଓ ଶିଶୁ ବିକାଶ, ବିଦ୍ୟାଳୟ ଶିକ୍ଷା, ଗ୍ରାମ୍ୟ ଉନ୍ନୟନ ଏବଂ ନଗର ଉନ୍ନୟନ ଭଳି ବିଭିନ୍ନ ମନ୍ତ୍ରଣାଳୟ ସହିତ ଏକାଠି କାର୍ଯ୍ୟ କରୁଛି । ଏହି ବହୁ-କ୍ଷେତ୍ରୀୟ ଆଭିମୁଖ୍ୟ ଶିଶୁ ମୃତ୍ୟୁ ହାର ହ୍ରାସ କରିବା ଏବଂ ଜନସ୍ୱାସ୍ଥ୍ୟରେ ଉନ୍ନତି ଆଣିବା ପାଇଁ ଏକ ବ୍ୟାପକ ଏବଂ ପ୍ରଭାବଶାଳୀ କାର୍ଯ୍ୟକ୍ରମ ନିମନ୍ତେ ଲକ୍ଷ୍ୟ ରଖିଥିବା ଷ୍ଟପ୍ ଡାଇରିଆ ଅଭିଯାନର ଉନ୍ନତ ସମନ୍ୱୟ ଏବଂ କାର୍ଯ୍ୟକାରିତା ସୁନିଶ୍ଚିତ କରେ ।

ସଂରେଖିତ ମନ୍ତ୍ରଣାଳୟର (ପାନୀୟ ଜଳ ଓ ପରିମଳ) ମହିଳା ଓ ଶିଶୁ ବିକାଶ; ବିଦ୍ୟାଳୟ ଶିକ୍ଷା; ଗ୍ରାମ୍ୟ ଉନ୍ନୟନ ; ନଗର ଉନ୍ନୟନ) ସଚିବ; ସ୍ୱାସ୍ଥ୍ୟ ମନ୍ତ୍ରଣାଳୟର ଏଏସ୍ ଓ ଏମ୍ ଡି (ଏନ୍ ଏଚ୍ ଏମ୍ ) ଶ୍ରୀମତୀ ଆରାଧନା ପଟ୍ଟନାୟକ; ଶ୍ରୀମତୀ ଏଲ୍ ଏସ୍ ଚାଙ୍ଗସାନ୍‌, ଏଏସ୍‌, ସ୍ୱାସ୍ଥ୍ୟ ମନ୍ତ୍ରଣାଳୟ; ଶ୍ରୀମତୀ ରୋଲି ସିଂହ, ଏଏସ୍‌, ସ୍ୱାସ୍ଥ୍ୟ ମନ୍ତ୍ରଣାଳୟ; ଶ୍ରୀମତୀ ମୀରା ଶ୍ରୀବାସ୍ତବ, ଜେଏସ୍ (ଆରସିଏଚ୍‌), ସ୍ୱାସ୍ଥ୍ୟ ମନ୍ତ୍ରଣାଳୟ; ମଧ୍ୟପ୍ରଦେଶ, ତାମିଲନାଡୁ ଓ ରାଜସ୍ଥାନର ଅତିରିକ୍ତ ମୁଖ୍ୟ ଶାସନ ସଚିବ, ପ୍ରମୁଖ ଶାସନ ସଚିବ (ସ୍ୱାସ୍ଥ୍ୟ), ପ୍ରମୁଖ ଶାସନ ସଚିବ (ଚିକିତ୍ସା ଶିକ୍ଷା); ବୈଠକରେ ରାଜ୍ୟ ଓ କେନ୍ଦ୍ର ସରକାରଙ୍କ ବରିଷ୍ଠ ଅଧିକାରୀ ଏବଂ ବିକାଶ ସହଯୋଗୀ (ୟୁନିସେଫ, ୟୁଏସଏଆଇଡି, ବିଏମଜିଏଫ, ଏନଆଇପିଆଇ, ନ୍ୟୁଟ୍ରିସନ୍ ଇଣ୍ଟରନ୍ୟାସନାଲ, ଜନ୍ ସ୍ନୋ ଇଣ୍ଡିଆ ଏବଂ ଡବ୍ଲୁଏଚଓ)ର ପ୍ରତିନିଧିମାନେ ଅଂଶଗ୍ରହଣ କରିଥିଲେ ।

ନୂଆଦିଲ୍ଲୀ: ନିକଟରେ କେତେକ ରାଜ୍ୟରେ କୋଭିଡ୍ – ୧୯ ସଂକ୍ରମଣ ବୃଦ୍ଧି ପାଉଥିବାରୁ ଭାରତରେ କୋଭିଡ୍ – ୧୯ ସ୍ଥିତି ଏବଂ କୋଭିଡ୍ – ୧୯ ର ତଦାରଖ, ନିୟନ୍ତ୍ରଣ ଏବଂ ପରିଚାଳନା ପାଇଁ ଜନସ୍ୱାସ୍ଥ୍ୟ ବ୍ୟବସ୍ଥାର ପ୍ରସ୍ତୁତିର ସମୀକ୍ଷା ନିମନ୍ତେ ଆଜି ଅନୁଷ୍ଠିତ ଏକ ଉଚ୍ଚସ୍ତରୀୟ ବୈଠକରେ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡଃ ମନସୁଖ ମାଣ୍ଡଭିୟ ଅଧ୍ୟକ୍ଷତା କରିଛନ୍ତି। ତାଙ୍କ ସହ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ରାଷ୍ଟ୍ର ମନ୍ତ୍ରୀ ପ୍ରଫେସର ଏସ୍‌. ପି. ସିଂହ ବାଘେଲ ଏବଂ ଡାକ୍ତର ଭାରତୀ ପ୍ରବୀଣ ପାୱାର, ନୀତି ଆୟୋଗର ସଦସ୍ୟ (ସ୍ୱାସ୍ଥ୍ୟ) ଡାକ୍ତର ଭି. କେ. ପଲ୍ ମଧ୍ୟ ଉପସ୍ଥିତ ଥିଲେ।

ଏହି ବୈଠକରେ ଯୋଗ ଦେଇଥିବା ରାଜ୍ୟର ମନ୍ତ୍ରୀ ମାନଙ୍କ ମଧ୍ୟରେ ମୁଖ୍ୟମନ୍ତ୍ରୀ ତଥା ସ୍ୱାସ୍ଥ୍ୟ ମନ୍ତ୍ରୀ (ଆରୁଣାଚଳ ପ୍ରଦେଶ) ଶ୍ରୀ ଆଲୋ ଲିବାଙ୍ଗ; ଶ୍ରୀ ବ୍ରଜେଶ ପାଠକ, ଉପମୁଖ୍ୟମନ୍ତ୍ରୀ ତଥା ସ୍ୱାସ୍ଥ୍ୟ ମନ୍ତ୍ରୀ (ଉତ୍ତର ପ୍ରଦେଶ); ସ୍ୱାସ୍ଥ୍ୟ ମନ୍ତ୍ରୀ (ଉତ୍ତରାଖଣ୍ଡ) ଶ୍ରୀ ଧନ ସିଂହ ରାୱତ ଶାରୀରିକ ଭାବେ ଉପସ୍ଥିତ ଥିଲେ । ଅନ୍ୟମାନଙ୍କ ମଧ୍ୟରେ ଶ୍ରୀ ଦିନେଶ ଗୁଣ୍ଡୁ ରାଓ, ସ୍ୱାସ୍ଥ୍ୟ ମନ୍ତ୍ରୀ (କର୍ଣ୍ଣାଟକ); ଶ୍ରୀ ଅନୀଲ ଭିଜ୍‌, ସ୍ୱାସ୍ଥ୍ୟ ମନ୍ତ୍ରୀ (ହରିୟାଣା); ଶ୍ରୀମତୀ ବୀଣା ଜର୍ଜ, ସ୍ୱାସ୍ଥ୍ୟ ମନ୍ତ୍ରୀ (କେରଳ), ଶ୍ରୀ ବିଶ୍ୱଜିତ ପ୍ରତାପ ସିଂହ ରାଣେ, ସ୍ୱାସ୍ଥ୍ୟ ମନ୍ତ୍ରୀ (ଗୋଆ); କେଶବ ମହାନ୍ତ ସ୍ୱାସ୍ଥ୍ୟ ମନ୍ତ୍ରୀ (ଆସାମ), ଶ୍ରୀ ବନ୍ନା ଗୁପ୍ତା, ସ୍ୱାସ୍ଥ୍ୟ ମନ୍ତ୍ରୀ (ଝାଡ଼ଖଣ୍ଡ); ବଲବୀର ସିଂହ, ସ୍ୱାସ୍ଥ୍ୟ ମନ୍ତ୍ରୀ (ପଞ୍ଜାବ); ଶ୍ରୀ ସୌରଭ ଭରଦ୍ୱାଜ, ସ୍ୱାସ୍ଥ୍ୟ ମନ୍ତ୍ରୀ (ଦିଲ୍ଲୀ);  ଡଃ (କର୍ଣ୍ଣେଲ) ଧନୀ ରାମ ଶାଣ୍ଡିଲ, ସ୍ୱାସ୍ଥ୍ୟ ମନ୍ତ୍ରୀ (ହିମାଚଳ ପ୍ରଦେଶ); ତାନାଜୀରାଓ ସାୱନ୍ତ, ସ୍ୱାସ୍ଥ୍ୟ ମନ୍ତ୍ରୀ (ମହାରାଷ୍ଟ୍ର); ଶ୍ରୀ ଦାମୋଦର ରାଜ ନରସିଂହ, ସ୍ୱାସ୍ଥ୍ୟ ମନ୍ତ୍ରୀ (ତେଲଙ୍ଗାନା); ଡାକ୍ତର ସପମ ରଞ୍ଜନ, ସ୍ୱାସ୍ଥ୍ୟ ମନ୍ତ୍ରୀ (ମଣିପୁର); ନିରଞ୍ଜନ ପୁଜାରୀ, ସ୍ୱାସ୍ଥ୍ୟ ମନ୍ତ୍ରୀ (ଓଡ଼ିଶା); ଶ୍ରୀ ରଙ୍ଗାସ୍ୱାମୀ, ପ୍ରଶାସକ (ପୁଡୁଚେରୀ); ଉପସ୍ଥିତ ଥିଲେ ।

ଚୀନ୍‌, ବ୍ରାଜିଲ, ଜର୍ମାନୀ ଏବଂ ଯୁକ୍ତରାଷ୍ଟ୍ର ଆମେରିକା ଭଳି ବିଶ୍ୱର କେତେକ ଦେଶରେ କୋଭିଡ୍ – ୧୯ ସଂକ୍ରମଣ ବୃଦ୍ଧି ପାଉଥିବାରୁ ସୃଷ୍ଟି ହୋଇଥିବା ଆହ୍ୱାନ ଉପରେ ଆଲୋକପାତ କରି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ କୋଭିଡ୍ – ୧୯ର ନୂତନ ଏବଂ ସୃଷ୍ଟି ହେଉଥିବା ଷ୍ଟ୍ରେନ୍‌ର ମୁକାବିଲା କରିବା ନିମନ୍ତେ ପ୍ରସ୍ତୁତ ରହିବା ଏବଂ ସତର୍କ ରହିବାର ମହତ୍ତ୍ୱ ଉପରେ ଗୁରୁତ୍ୱାରୋପ କରିଥିଲେ । କୋଭିଡ୍ ଏପର୍ଯ୍ୟନ୍ତ ଶେଷ ହୋଇ ନାହିଁ ବୋଲି ଦର୍ଶାଇ ସେ ରାଜ୍ୟ ଗୁଡ଼ିକୁ ଉପଯୁକ୍ତ ଜନସ୍ୱାସ୍ଥ୍ୟ ପ୍ରତିକ୍ରିୟା ଯୋଜନା କରିବା ପାଇଁ ନୂଆ କରି ସାମନାକୁ ଆସୁଥିବା କୋଭିଡ୍ – ୧୯ ମାମଲା, ଏ ସମ୍ପର୍କିତ ଲକ୍ଷଣ ଏବଂ ଗମ୍ଭୀରତା ଉପରେ ନଜର ରଖିବାକୁ ଅନୁରୋଧ କରିଥିଲେ ।

ଡ. ମାଣ୍ଡଭିୟ ଉପୁଜିଥିବା ପରିସ୍ଥିତିର ମୁକାବିଲା ପାଇଁ କେନ୍ଦ୍ର ଓ ରାଜ୍ୟ ମଧ୍ୟରେ ସାମୂହିକ ଉଦ୍ୟମର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ । ଦେଶରେ ପ୍ରସାରିତ ହେଉଥିବା ନୂଆ ଭାରିଏଣ୍ଟକୁ ଠିକ୍ ସମୟରେ ଚିହ୍ନଟ କରିବା ପାଇଁ ଭାରତୀୟ ସାର୍ସ – କୋଭ୍ – ୨ ଜିନୋମିକ୍ସ କନସୋର୍ଟିୟମ୍ (ଆଇଏନ୍‌ଏସ୍‌ଏସିଓଜି) ନେଟୱାର୍କ ଜରିଆରେ ପଜିଟିଭ୍ କେସ୍ ନମୁନାର ସମ୍ପୂର୍ଣ୍ଣ ଜିନୋମ୍ ସିକ୍ୱେନ୍ସିଂ ପାଇଁ ତଦାରଖ ବ୍ୟବସ୍ଥାକୁ ସୁଦୃଢ଼ କରିବାକୁ ସେ ନିର୍ଦ୍ଦେଶ ଦେଇଛନ୍ତି । ଏହା ଦ୍ୱାରା ଉପଯୁକ୍ତ ଜନସ୍ୱାସ୍ଥ୍ୟ ବ୍ୟବସ୍ଥା ଠିକ୍ ସମୟରେ କାର୍ଯ୍ୟକାରୀ ହୋଇ ପାରିବ ବୋଲି ସେ ଉଲ୍ଲେଖ କରିଛନ୍ତି । କୋଭିଡ୍ – ୧୯ ପଜିଟିଭ୍ ଓ ନିମୋନିଆ ଭଳି ରୋଗର ବହୁ ସଂଖ୍ୟକ ନମୁନା ପରୀକ୍ଷାକୁ ତ୍ୱରାନ୍ୱିତ କରିବା ଏବଂ ଦୈନିକ ଅଧିକ ସଂଖ୍ୟକ କୋଭିଡ୍ – ୧୯ ପଜିଟିଭ୍ ମାମଲା ଏବଂ ନିମୋନିଆ ଭଳି ରୋଗର ନମୁନାକୁ ଆଇଏନ୍‌ଏସ୍‌ଏସିଓଜି ଜିନୋମ୍ ସିକ୍ୱେନ୍ସିଂ ଲାବୋରେଟୋରି (ଆଇଜିଏସ୍‌ଏଲ୍‌) କୁ ପଠାଇବା ପାଇଁ ରାଜ୍ୟ / କେନ୍ଦ୍ରଶାସିତ ଅଞ୍ଚଳ ଗୁଡ଼ିକୁ ଅନୁରୋଧ କରାଯାଇଛି ।

କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ସମସ୍ତ ରାଜ୍ୟକୁ ସତର୍କ ରହିବା, ତଦାରଖ ବ୍ୟବସ୍ଥାକୁ ବୃଦ୍ଧି କରିବା ଏବଂ ପର୍ଯ୍ୟାପ୍ତ ପରିମାଣର ଔଷଧ, ଅକ୍ସିଜେନ ସିଲିଣ୍ଡର ଏବଂ କନ୍‌ସେଣ୍ଟ୍ରେଟର, ଭେଣ୍ଟିଲେଟର ଏବଂ ଟିକା ମହଜୁଦ ରଖିବାକୁ ଅନୁରୋଧ କରିଥିଲେ । ଏହା ସହ ପିଏସ୍‌ଏ ପ୍ଲାଣ୍ଟ, ଅକ୍ସିଜେନ କନସେଣ୍ଟ୍ରେଟର ଏବଂ ସିଲିଣ୍ଡର, ଭେଣ୍ଟିଲେଟର ଇତ୍ୟାଦିର କାର୍ଯ୍ୟକାରିତା ଆକଳନ କରିବା ପାଇଁ ଉଭୟ କେନ୍ଦ୍ର ଓ ରାଜ୍ୟ ସ୍ତରରେ ପ୍ରତି ତିନି ମାସରେ ମକ୍ ଡ୍ରିଲ୍ କରିବାକୁ ଅଧିକାରୀ ମାନଙ୍କୁ କହିଥିଲେ ଏବଂ ସର୍ବୋତ୍ତମ ଅଭ୍ୟାସ ବାଣ୍ଟିବାକୁ ପ୍ରୋତ୍ସାହିତ କରିଥିଲେ । ଶ୍ୱାସକ୍ରିୟା ପରିଚ୍ଛନ୍ନତା ଉପରେ ସଚେତନତା ସୃଷ୍ଟି କରିବା ଏବଂ ତଥ୍ୟଗତ ସଠିକ୍ ସୂଚନା ପ୍ରସାରଣ ସୁନିଶ୍ଚିତ କରିବା ଏବଂ ମିଥ୍ୟା ଖବରର ମୁକାବିଲା କରିବା ପାଇଁ ସେ ରାଜ୍ୟ ମାନଙ୍କୁ ଅନୁରୋଧ କରିଛନ୍ତି । କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ରାଜ୍ୟ / କେନ୍ଦ୍ର ଶାସିତ ଅଞ୍ଚଳ ଗୁଡ଼ିକୁ କୋଭିଡ୍ ପୋର୍ଟାଲରେ ବାସ୍ତବ ସମୟରେ ମାମଲା, ପରୀକ୍ଷା, ପଜିଟିଭିଟି ଇତ୍ୟାଦି ବିଷୟରେ ସୂଚନା ପ୍ରଦାନ କରିବାକୁ ଅନୁରୋଧ କରିଛନ୍ତି । କେନ୍ଦ୍ର ପକ୍ଷରୁ ସବୁ ପ୍ରକାର ସହଯୋଗ ଯୋଗାଇ ଦିଆଯିବ ବୋଲି ସେ ରାଜ୍ୟ ମାନଙ୍କୁ ପ୍ରତିଶ୍ରୁତି ଦେଇଛନ୍ତି ।

ଏକ ଉପସ୍ଥାପନା ମାଧ୍ୟମରେ , କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ସଚିବ ଶ୍ରୀ ସୁଧାଂଶ ପନ୍ତ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀଙ୍କୁ ବିଶ୍ୱ କୋଭିଡ୍ ୧୯ର ସ୍ଥିତି ଏବଂ ଘରୋଇ ପରିସ୍ଥିତି ବିଷୟରେ ଅବଗତ କରାଇଥିଲେ । ବିଶ୍ୱ ସ୍ଥିତି ତୁଳନାରେ ଭାରତରେ ସକ୍ରିୟ କୋଭିଡ୍ ମାମଲା ଯଥେଷ୍ଟ କମ୍ ଥିବା ବେଳେ ଗତ ଦୁଇ ସପ୍ତାହ ମଧ୍ୟରେ ସକ୍ରିୟ ମାମଲା ୬ ଡିସେମ୍ବର ୨୦୨୩ ରେ ୧୧୫ ଥିବା ବେଳେ ଆଜି ସୁଦ୍ଧା ୬୧୪କୁ ବୃଦ୍ଧି ପାଇଛି । ଏହା ମଧ୍ୟ ଉଲ୍ଲେଖ କରାଯାଇଛି ଯେ ୯୨.୮% ମାମଲା ହୋମ୍ ଆଇସୋଲେସନରେ ରହିଛି, ଯାହା ସାମାନ୍ୟ ଅସୁସ୍ଥତାକୁ ସୂଚାଉଛି । କୋଭିଡ୍ – ୧୯ କାରଣରୁ ଡାକ୍ତରଖାନାରେ ଭର୍ତ୍ତି ହେବା ହାରରେ କୌଣସି ବୃଦ୍ଧି ପରିଲକ୍ଷିତ ହୋଇ ନାହିଁ, ଡାକ୍ତରଖାନାରେ ଭର୍ତ୍ତି ହୋଇଥିବା ମାମଲା ଗୁଡିକ ଅନ୍ୟାନ୍ୟ କାରଣରୁ ହୋଇଥାଏ – କୋଭିଡ୍ -୧୯ ଏକ ଆନୁଷଙ୍ଗିକ ଅନୁସନ୍ଧାନ । କେରଳ, ମହାରାଷ୍ଟ୍ର, ଝାଡ଼ଖଣ୍ଡ ଓ କର୍ଣ୍ଣାଟକ ଭଳି କିଛି ରାଜ୍ୟରେ ଦୈନିକ କୋଭିଡ୍ – ୧୯ ପଜିଟିଭିଟି ହାର ବୃଦ୍ଧି ପାଇଛି ।

ସାର୍ସ – କୋଭ୍ – ୨ର ନୂଆ ଜେଏନ୍‌. ୧ ଭାରିଆଣ୍ଟ ବିଷୟରେ ସୂଚନା ପ୍ରଦାନ କରାଯାଇଥିଲା ଯେ ଏହି ଭାରିଏଣ୍ଟ ବର୍ତ୍ତମାନ ତୀବ୍ର ବୈଜ୍ଞାନିକ ଯାଞ୍ଚ ରେ ଅଛି, କିନ୍ତୁ ଏହା ତ୍ୱରିତ ଚିନ୍ତାର କାରଣ ନୁହେଁ । ଜେଏନ୍‌. ୧ କାରଣରୁ ଭାରତରେ କୌଣସି କ୍ଲଷ୍ଟରିଂ ମାମଲା ଦେଖିବାକୁ ମିଳିନାହିଁ ଏବଂ ସମସ୍ତ ମାମଲା ସାମାନ୍ୟ ବୋଲି ଜଣାପଡିଛି ଏବଂ ସେମାନେ ସମସ୍ତେ ବିନା କୌଣସି ଜଟିଳତାରେ ସୁସ୍ଥ ହୋଇଛନ୍ତି ।

ଡାକ୍ତର ଭି. କେ. ପଲ୍ କୋଭିଡ୍ ସଂକ୍ରମଣ ବୃଦ୍ଧି ଏବଂ ଏକ ନୂତନ ଭାରିଆଣ୍ଟର ଆବିର୍ଭାବ ଯୋଗୁଁ ସୃଷ୍ଟି ହୋଇଥିବା ଆହ୍ୱାନର ମୁକାବିଲା ପାଇଁ ଏକ ସମ୍ପୂର୍ଣ୍ଣ ସରକାରୀ ଆଭିମୁଖ୍ୟର ଆବଶ୍ୟକତାକୁ ଦୋହରାଇ ଥିଲେ । ସେ ସୂଚନା ଦେଇଛନ୍ତି ଯେ ଭାରତରେ ବୈଜ୍ଞାନିକ ସମୁଦାୟ ଏହି ନୂତନ ଭାରିଆଣ୍ଟ ଉପରେ ତୀକ୍ଷ୍ଣ ଅନୁସନ୍ଧାନ କରୁଛନ୍ତି କିନ୍ତୁ ରାଜ୍ୟ ଗୁଡ଼ିକ ପରୀକ୍ଷାକୁ ତ୍ୱରାନ୍ୱିତ କରିବା ଏବଂ ସେମାନଙ୍କର ନିରୀକ୍ଷଣ ବ୍ୟବସ୍ଥାକୁ ସୁଦୃଢ଼ କରିବାର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ ।

ସ୍ୱାସ୍ଥ୍ୟ ଗବେଷଣା ବିଭାଗର ସଚିବ ତଥା ଆଇସିଏମ୍‌ଆର୍‌ର ଡିଜି ଡାକ୍ତର ରାଜୀବ ବହଲ ସୂଚନା ଦେଇଛନ୍ତି ଯେ ଆଇସିଏମ୍‌ଆର୍ ବର୍ତ୍ତମାନ ନୂତନ ଜେଏନ୍‌. ୧ ଭାରିଆଣ୍ଟର ଜିନୋମ ସିକ୍ୱେନ୍ସିଂ ଉପରେ କାମ କରୁଛି । କୋଭିଡ୍ – ୧୯ ସ୍ଥିତି ଉପରେ ନଜର ରଖିବା ଏବଂ ଆରଟି – ପିସିଆର ପରୀକ୍ଷା ବଢ଼ାଇବାକୁ ସେ ରାଜ୍ୟ ଗୁଡ଼ିକୁ ଅନୁରୋଧ କରିଥିଲେ ମଧ୍ୟ ଆତଙ୍କିତ ହେବାର କୌଣସି କାରଣ ନାହିଁ ବୋଲି ସେ ଉଲ୍ଲେଖ କରିଛନ୍ତି । ରାଜ୍ୟ ସ୍ୱାସ୍ଥ୍ୟ ମନ୍ତ୍ରୀମାନେ କେନ୍ଦ୍ରରୁ ମିଳିଥିବା ସହାୟତା ଏବଂ ମାର୍ଗଦର୍ଶନକୁ ପ୍ରଶଂସା କରିଛନ୍ତି । କେତେକ ରାଜ୍ୟରେ ବୃଦ୍ଧି ପାଉଥିବା ସଂକ୍ରମଣକୁ ଦୃଷ୍ଟିରେ ରଖି ପରୀକ୍ଷଣ ଓ ନିୟନ୍ତ୍ରଣ  ବ୍ୟବସ୍ଥା ବଢ଼ାଇବାକୁ ସେମାନେ ପ୍ରତିଶ୍ରୁତି ଦେଇଛନ୍ତି ।

ବୈଠକରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ଅତିରିକ୍ତ ସଚିବ ଶ୍ରୀମତୀ ଏଲ୍ ଏସ୍ ଚାଙ୍ଗସାନ୍‌; ସ୍ୱାସ୍ଥ୍ୟ ମନ୍ତ୍ରଣାଳୟ, ଆଇସିଏମଆର ଏବଂ ଏନସିଡିସିର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।

ନୂଆଦିଲ୍ଲୀ: କେରଳରେ ପୁଣି ଥରେ କରୋନା ମାମଲା ବୃଦ୍ଧି ପାଉଛି। କେବଳ ସୋମବାର ଦିନ କୋଭିଡ-୧୯ ର ୧୧୧ ଟି ନୂଆ ମାମଲା ଚିହ୍ନଟ ହୋଇଛି। କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ ବର୍ତ୍ତମାନ ରାଜ୍ୟରେ ଚିକିତ୍ସିତ ହେଉଥିବା ରୋଗୀଙ୍କ ସଂଖ୍ୟା ୧,୬୩୪ କୁ ବୃଦ୍ଧି ପାଇଛି।

ଏହା ବ୍ୟତୀତ କେରଳର କରୋନା କାରଣରୁ ଜଣେ ବ୍ୟକ୍ତି ମଧ୍ୟ ପ୍ରାଣ ହରାଇଛନ୍ତି। ଏହା ସହିତ ଗତ ତିନି ବର୍ଷ ମଧ୍ୟରେ ରାଜ୍ୟରେ କରୋନା ଭାଇରସ ଯୋଗୁଁ ମୃତ୍ୟୁ ସଂଖ୍ୟା ୭୨ ହଜାର ୫୩ କୁ ବୃଦ୍ଧି ପାଇଛି। ଏହି ସମୟରେ କେନ୍ଦ୍ର ସରକାର ଭୟଭୀତ ନହେବାକୁ ପରାମର୍ଶ ଦେଇଛନ୍ତି ଏବଂ ସତର୍କ ରହିବାକୁ କହିଛନ୍ତି।

ନୂଆଦିଲ୍ଲୀ: “ଜନ ଭାଗୀଦାରୀ ଓ ମିଶନ ମୋଡରେ ପ୍ରଣୟନ ହେଉଥିବା ଅଭିଯାନ ଜରିଆରେ ବୈଶ୍ବିକ ଲକ୍ଷ୍ୟ ଠାରୁ ତିନି ବର୍ଷ ଆଗରୁ ୨୦୨୭ ସୁଦ୍ଧା ଲିମ୍ଫାଟିକ୍ ଫାଇଲେରିଆସିସକୁ ଦୂର କରିବା ପାଇଁ ଭାରତ ପ୍ରତିଶ୍ରୁତିବଦ୍ଧ” । କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡ ମନସୁଖ ମାଣ୍ଡଭୀୟ ଆଜି ଜାତୀୟ ସାମୂହିକ ଔଷଧ ପ୍ରୟୋଗ (ଏମଡିଏ)ର  ବାର୍ଷିକ କାର୍ଯ୍ୟକ୍ରମର ଦ୍ୱିତୀୟ ପର୍ଯ୍ୟାୟକୁ ଉଦ୍‌ଘାଟନ କରିବା ଅବସରରେ ଏହା କହିଛନ୍ତି । ଏହି ଅବସରରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟର ରାଷ୍ଟ୍ର ମନ୍ତ୍ରୀ ଭାରତୀ ପ୍ରବୀଣ ପାୱାର , ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟର ରାଷ୍ଟ୍ର ମନ୍ତ୍ରୀ ପ୍ରଫେସର ଏସ୍‌. ପି. ସିଂହ ବାଘେଲ ମଧ୍ୟ ଉପସ୍ଥିତ ଥିଲେ।

“ଜନଭାଗିଦାରୀ,  ‘ସମ୍ପୂର୍ଣ୍ଣ ସରକାର’ ଏବଂ  ‘ସମଗ୍ର ସମାଜ’ ଆଭିମୁଖ୍ୟ ମାଧ୍ୟମରେ ଆମେ ଦେଶରୁ ଏହି ରୋଗକୁ ଦୂର କରିବାରେ ସକ୍ଷମ ହୋଇ ପାରିବା”  ବୋଲି କେନ୍ଦ୍ର ମନ୍ତ୍ରୀ ଗୁରୁତ୍ୱାରୋପ କରି କହିଛନ୍ତି । ଅଗଷ୍ଟ ୧୦, ୨୦୨୩ ଅର୍ଥାତ୍ ଆଜି ଠାରୁ ଆରମ୍ଭ ହୋଇଥିବା ଦ୍ୱିତୀୟ ପର୍ଯ୍ୟାୟରେ ୯ଟି ରାଜ୍ୟ (ଆସାମ, ବିହାର, ଛତିଶଗଡ଼, ଝାଡ଼ଖଣ୍ଡ, କର୍ଣ୍ଣାଟକ, ମହାରାଷ୍ଟ୍ର, ଓଡ଼ିଶା, ତେଲଙ୍ଗାନା ଓ ଉତ୍ତର ପ୍ରଦେଶ)ର ୮୧ଟି ଜିଲ୍ଲାକୁ ସାମିଲ କରାଯିବ ।

ଉଦଘାଟନୀ ଉତ୍ସବରେ ଛତିଶଗଡ଼ ଉପମୁଖ୍ୟମନ୍ତ୍ରୀ ଶ୍ରୀ   ଟି. ଏସ୍‌. ସିଂହଦେଓ, ଉତ୍ତର ପ୍ରଦେଶର ଉପମୁଖ୍ୟମନ୍ତ୍ରୀ ବ୍ରିଜେଶ ପାଠକ, ଓଡ଼ିଶାର ସ୍ୱାସ୍ଥ୍ୟ ମନ୍ତ୍ରୀ ନିରଞ୍ଜନ ପୂଜାରୀ, ଆସାମର ସ୍ୱାସ୍ଥ୍ୟ ମନ୍ତ୍ରୀ କେଶବ ମହାନ୍ତ ଓ ଝାଡ଼ଖଣ୍ଡର ସ୍ୱାସ୍ଥ୍ୟ ମନ୍ତ୍ରୀ ବନ୍ନା ଗୁପ୍ତା ଭର୍ଚୁଆଲ (ଆଭାସୀ) ମୋଡରେ ଯୋଗ ଦେଇଥିଲେ ।

ସମାବେଶକୁ ସମ୍ବୋଧିତ କରି ଡଃ  ମାଣ୍ଡଭୀୟ ଗୁରୁତ୍ୱାରୋପ କରିଥିଲେ ଯେ , “କରାଯାଉଥିବା ପ୍ରୟାସ ଗୁଡିକ  କେବଳ ଔଷଧ ସେବନ ମଧ୍ୟରେ ସୀମିତ ରହିବା ଉଚିତ ନୁହେଁ, ବରଂ ମଶା ମାଧ୍ୟମରେ ରୋଗ ବିସ୍ତାରକୁ ଦୂର କରିବାରେ ମଧ୍ୟ ସାହାଯ୍ୟ କରିବା ଉଚିତ, ଯାହା ବିନା ଆମର ଲକ୍ଷ୍ୟ ହାସଲ ଦିଗରେ ଅଗ୍ରଗତି ଯଥେଷ୍ଟ ସୀମିତ ରହିବ”।

ସମସ୍ତଙ୍କ ପାଇଁ ଏକ ସୁସ୍ଥ ରାଷ୍ଟ୍ର ସୁନିଶ୍ଚିତ କରିବା ନିମନ୍ତେ ରାଜ୍ୟ ଓ କେନ୍ଦ୍ର ସରକାରଙ୍କ ମଧ୍ୟରେ ସମନ୍ୱୟ ବୃଦ୍ଧି ଉପରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ମଧ୍ୟ ଗୁରୁତ୍ୱାରୋପ କରିଥିଲେ । ନି –  କ୍ଷୟ ମିତ୍ରଙ୍କ ଉଦାହରଣ ଦେଇ ସ୍ୱାସ୍ଥ୍ୟ କ୍ଷେତ୍ରରେ ଜନ ଆନ୍ଦୋଳନ ଅଭିଯାନର ସଫଳତା ବିଷୟରେ ଉଲ୍ଲେଖ କରି ଡଃ ମାଣ୍ଡଭୀୟ ଆଲୋକପାତ କରିଥିଲେ ଯେ  “ତୃଣମୂଳ ସ୍ତରରୁ ଆରମ୍ଭ କରି ସମସ୍ତ ଅଂଶୀଦାର ମାନଙ୍କ ସମ୍ପୃକ୍ତି ଦ୍ୱାରା ଏହି ମିଶନରେ ସଫଳତା ହାସଲ କରିବାରେ ସାମୂହିକ ସଂପୃକ୍ତି ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ । ଜନ ଆନ୍ଦୋଳନର ବ୍ୟାପକ ପହଂଚ ଉପରେ ଆଲୋକପାତ କରି ସ୍ୱାସ୍ଥ୍ୟ ମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ, ସଚେତନତା ସୃଷ୍ଟି ପଦକ୍ଷେପକୁ ସାମିଲ କରିବା ଏବଂ ଗ୍ରାମ ମାନଙ୍କରେ, ପଂଚାୟତରେ ଯୋଗାଯୋଗ ଅଭିଯାନକୁ ସୁନିଶ୍ଚିତ କରିବା ଦ୍ୱାରା ଏହି ଆନ୍ଦୋଳନ ସମଗ୍ର ଦେଶରେ ବ୍ୟାପକ ରୂପରେ ପହଂଚିବାରେ ସହାୟକ ହେବ ।

ଏଥି ପାଇଁ କରାଯାଉଥିବା ପ୍ରୟାସ ଗୁଡିକୁ ଆହୁରି ସୁଦୃଢ଼ କରିବା ନିମନ୍ତେ ଏହି ରୋଗର ନିରାକରଣ ପାଇଁ ସ୍ୱାସ୍ଥ୍ୟ କର୍ମୀ କିମ୍ବା ସ୍ୱାସ୍ଥ୍ୟ ସେବା ସହିତ ଜଡିତ ପେସାଦାରଙ୍କ ସମ୍ମୁଖରେ ଔଷଧ ସେବନ ଉପରେ ଅଧିକ ଗୁରୁତ୍ୱ ଦିଆଯିବା ଉଚିତ ବୋଲି ଡଃ ମାଣ୍ଡଭୀୟ ପରାମର୍ଶ ଦେଇଥିଲେ ।

ଏହି ଅବସରରେ ଡେଙ୍ଗୁ ଜ୍ୱରର ଚିକିତ୍ସା ପରିଚାଳନା  ୨୦୨୩ ଏବଂ ଚିକୁନଗୁନିଆ ଜ୍ୱରର ଚିକିତ୍ସା ପରିଚାଳନା ନିମନ୍ତେ ଜାତୀୟ ନିର୍ଦ୍ଦେଶାବଳୀକୁ  ଡାକ୍ତର ମାଣ୍ଡଭୀୟଙ୍କ ଦ୍ୱାରା  ଶୁଭ ଉନ୍ମୋଚନ କରାଯାଇଥିଲା ।

ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟର ସଚିବ ସୁଧାଂଶ ପନ୍ତ କହିଛନ୍ତି, ଫାଇଲେରିଆ ବିରୋଧରେ ସାମୂହିକ  ଔଷଧ ପ୍ରୟୋଗ ଅଭିଯାନର ଶୁଭାରମ୍ଭ ଆମ ଦେଶର ସ୍ୱାସ୍ଥ୍ୟ କାର୍ଯ୍ୟସୂଚୀରେ ଏକ ଗୁରୁତ୍ୱପୂର୍ଣ୍ଣ ମୁହୂର୍ତ୍ତ ଅଟେ । ଲିମ୍ଫାଟିକ୍ ଫାଇଲେରିଆସିସ୍‌କୁ ସମ୍ପୂର୍ଣ୍ଣ ନିର୍ମୂଳ କରିବା ପାଇଁ ଆମର ପ୍ରୟାସରେ, ସ୍ଥାନୀୟ ଜିଲ୍ଲାଗୁଡ଼ିକ କ୍ରମାଗତ ଭାବରେ ଦୃଢ଼ ଏମଡିଏ କଭରେଜ୍ ହାସଲ କରିବା ମଧ୍ୟ ବହୁତ ଜରୁରୀ । ଆମର ସାମୂହିକ ସଂକଳ୍ପ ଲିମ୍ଫାଟିକ୍ ଫାଇଲେରିଆସିସ୍‌କୁ ଉଚ୍ଛେଦ କରି ସ୍ଥାନୀୟ ଅଞ୍ଚଳରେ ସାଧାରଣ ଲୋକମାନଙ୍କ ଜୀବନରେ ପରିବର୍ତ୍ତନ ଆଣିବାରେ ସହାୟକ ହେବ” ।

ଏହି ବୈଠକରେ ସ୍ୱାସ୍ଥ୍ୟ ସେବା ମହାନିର୍ଦ୍ଦେଶକ, ପ୍ରମୁଖ ସଚିବ ଓ  ୯ଟି ରାଜ୍ୟର ମିଶନ ନିର୍ଦ୍ଦେଶ. ଡ. ଅତୁଲ ଗୋଏଲ, ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟର ଅତିରିକ୍ତ ସଚିବ ତଥା ମିଶନ ନିର୍ଦ୍ଦେଶକ (ଏନ୍‌ଏଚ୍‌ଏମ୍‌), ଲାମଚୋଙ୍ଗୋଇ ସୁଇଟି ଚାଙ୍ଗସାନ୍‌, ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟର ଯୁଗ୍ମ ସଚିବ ରାଜୀବ ମାଝୀ, ଆନୁଷଙ୍ଗିକ ମନ୍ତ୍ରଣାଳୟର ଯୁଗ୍ମ ସଚିବ ଡାକ୍ତର ତନୁ ଜୈନ, ଜାତୀୟ ଭେକ୍ଟରବାହିତ ରୋଗ ନିୟନ୍ତ୍ରଣ କେନ୍ଦ୍ରର ନିର୍ଦ୍ଦେଶିକା, ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ, କର୍ଣ୍ଣାଟକ ରାଜ୍ୟର ସ୍ୱାସ୍ଥ୍ୟ ଓ ପରିବାର କଲ୍ୟାଣ ସେବା ନିର୍ଦ୍ଦେଶାଳୟର ନିର୍ଦ୍ଦେଶିକା ଡ. ଏମ୍ ଇନ୍ଦୁମତୀ, ୯ଟି ରାଜ୍ୟର ବରିଷ୍ଠ ଆଞ୍ଚଳିକ ନିର୍ଦ୍ଦେଶକ ଏବଂ ଆଞ୍ଚଳିକ ନିର୍ଦ୍ଦେଶକ ଏବଂ ବରିଷ୍ଠ ସରକାରୀ ଅଧିକାରୀମାନେ ଉପସ୍ଥିତ ଥିଲେ ।

ନୂଆଦିଲ୍ଲୀ: କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ଡକ୍ଟର ମନସୁଖ ମାଣ୍ଡଭୀୟଙ୍କ ଦ୍ୱାରା ଲିଖିତ ପ୍ରବନ୍ଧ “ୱାନ ୱାର୍ଲଡ, ୱାନ ହେଲ୍‍ଥ” କୁ ପ୍ରଧାନମନ୍ତ୍ରୀଙ୍କ ଦପ୍ତର ସେୟାର କରିଛି।

କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀଙ୍କ ଏକ ଟୁଇଟ୍‍କୁ ସେୟାର କରି ପ୍ରଧାନମନ୍ତ୍ରୀଙ୍କ ଦପ୍ତର ଟୁଇଟ୍‍ କରିଛି;

https://twitter.com/PMOIndia/status/1667059358407200768?ref_src=twsrc%5Etfw%7Ctwcamp%5Etweetembed%7Ctwterm%5E1667059358407200768%7Ctwgr%5Eb80c7f79a5d03ffde171028bca48d80fe3f2ffab%7Ctwcon%5Es1_&ref_url=https%3A%2F%2Fpib.gov.in%2FPressReleasePage.aspx%3FPRID%3D1931250

“କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ମନସୁଖ ମାଣ୍ଡଭୀୟ କୋଭିଡ ମହାମାରୀ ସମୟରେ ବିଭିନ୍ନ ପ୍ଲାଟଫର୍ମ ଯଥା କୋ ୱିନ୍‍ ଏବଂ ଇ-ସଞ୍ଜିବନୀ କିଭଳି ଟୀକା ପ୍ରଦାନ ସହିତ ସ୍ୱାସ୍ଥ୍ୟ ସେବା କ୍ଷେତ୍ରରେ ଗେମ୍‍ ଚେଞ୍ଜର ହୋଇଥିଲା ତାହା ଉପରେ ଲେଖିଛନ୍ତି।

ନୂଆଦିଲ୍ଲୀ: ଭାରତରେ ଡ୍ରୋନ୍ ପାରିବେଶିକ ବ୍ୟବସ୍ଥା ବିସ୍ତାର କରିବାର ଜାତୀୟ ମିଶନ୍‌କୁ ଜାରି ରଖି, ଭାରତୀୟ ଚିକିତ୍ସା ଅନୁସନ୍ଧାନ ପରିଷଦ (ଆଇସିଏମ୍‌ଆର), କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଏହାର ଆଇଡ୍ରୋନ୍ ପଦକ୍ଷେପ ଅନୁଯାୟୀ ଡ୍ରୋନ୍ ଦ୍ୱାରା ରକ୍ତ ବ୍ୟାଗ୍ ପହଂଚାଇବାର ଏକ ପରୀକ୍ଷଣ ସଫଳତାପୂର୍ବକ ଶେଷ କରିଛି।

ଆଇସିଏମଆର, ଲେଡି ହାର୍ଡିଙ୍ଗ ମେଡିକାଲ କଲେଜ (ଏଲଏଚଏମସି), ନୂଆଦିଲ୍ଲୀ, ଗଭର୍ଣ୍ଣମେଂଟ ଇନଷ୍ଟିଚ୍ୟୁଟ ଅଫ ମେଡିକାଲ ସାଇନ୍ସ (ଜିଆଇଏମଏସ), ଗ୍ରେଟର ନୋଏଡା, ଏବଂ ଜେପି ଇନଷ୍ଟିଚ୍ୟୁଟ୍ ଅଫ୍ ଇନଫରମେସନ୍ ଟେକ୍ନୋଲୋଜି (ଜେଆଇଆଇଟି), ନୋଏଡାର ମିଳିତ ଉଦ୍ୟମରେ ଦେଶରେ ଏକ ପଥ ଭଙ୍ଗକାରୀ ଯଥାର୍ଥକରଣ ଅଧ୍ୟୟନର ଏକ ଅଂଶ ଭାବରେ ଏହି ପରୀକ୍ଷା ପ୍ରଥମ ଥର ପାଇଁ କରାଯାଇଛି। ଉଦ୍‌ଘାଟନୀ ପରୀକ୍ଷଣ ଉଡ଼ାଣରେ ଦୃଷ୍ଟିର ଚାକ୍ଷୁଷ ରେଖାରେ ଜିଆଇଏମ୍‌ଏସ୍ ଏବଂ ଏଲ୍‌ଏଚ୍‌ଏମ୍‌ସିରୁ ୧୦ ୟୁନିଟ୍ ପୁରା ରକ୍ତ ନମୁନା ନିଆ ଯାଇଥିଲା।

ଏଲ୍‌ଏଚ୍‌ଏମ୍‌ସି ଏବଂ ଜିଆଇଏମ୍‌ଏସ୍‌କୁ ରକ୍ତ ବ୍ୟାଗ ଯୋଗାଣ ଏବଂ ନମୁନାର ପରୀକ୍ଷା ପାଇଁ କେନ୍ଦ୍ର ଭାବରେ ଅନ୍ତର୍ଭୁକ୍ତ କରାଯାଇଥିବାବେଳେ ଜେଆଇଆଇଟି ଡ୍ରୋନ୍ ସର୍ଟ ପାଇଁ କାର୍ଯ୍ୟନ୍ୱୟନ କେନ୍ଦ୍ର ଭାବରେ କାର୍ଯ୍ୟ କରୁଛି। ପ୍ରୋଟୋକଲ୍ ବିକାଶ, ଅଧ୍ୟୟନର ପରିକଳ୍ପନା, କାର୍ଯ୍ୟାନ୍ୱୟନ ଏବଂ ପ୍ରକଳ୍ପର ସମନ୍ୱୟ ଆଇସିଏମଆର – ମୁଖ୍ୟାଳୟର ବୈଜ୍ଞାନିକମାନେ କରୁଛନ୍ତି।

ମାନନୀୟ ପ୍ରଧାନମନ୍ତ୍ରୀଙ୍କର ଭାରତରେ ଡ୍ରୋନ୍ ପାରିବେଶିକ ବ୍ୟବସ୍ଥାର ବିସ୍ତାର କରିବାର ଦୃଷ୍ଟିକୋଣ କୃଷି, ପ୍ରତିରକ୍ଷା, ବିପର୍ଯ୍ୟୟ ପ୍ରଶମନ ଏବଂ ସ୍ୱାସ୍ଥ୍ୟ କଲ୍ୟାଣ ଭଳି ବିଭିନ୍ନ କ୍ଷେତ୍ରରେ ଡ୍ରୋନର ଅଭିନବ ବ୍ୟବହାର ପାଇଁ ଏକ ଆଧାର ପ୍ରଦାନ କରିଛି। ଡ୍ରୋନ୍ ନିୟମ ୨୦୨୨ରେ କୋହଳ ସହିତ, ଗବେଷକ ଏବଂ ଡ୍ରୋନ୍ ଅପରେଟର ମାନଙ୍କ ପାଇଁ ଡ୍ରୋନ୍ ଭଳି ନୂତନ ପ୍ରଯୁକ୍ତି ବିଦ୍ୟାକୁ ଅନ୍ତର୍ଭୁକ୍ତ କରାଯାଇଛି।

ସ୍ୱାସ୍ଥ୍ୟସେବା ଉଦ୍ଦେଶ୍ୟରେ ଡ୍ରୋନ୍ ବ୍ୟବହାର କରିବାରେ ଆଇସିଏମ୍‌ଆର ଏକ ଅଗ୍ରଣୀ ସଂସ୍ଥା ହୋଇ ପାରିଛି ଏବଂ ଏହା ମଣିପୁର ଏବଂ ନାଗାଲାଣ୍ଡର ଦୁର୍ଗମ ଅଞ୍ଚଳରେ ଚିକିତ୍ସା ସାମଗ୍ରୀ, ଟିକା ଏବଂ ଔଷଧ ବିତରଣକୁ ସଫଳତାର ସହ ପରିଚାଳନା କରିଛି। ଡ୍ରୋନ୍ ଆଧାରିତ ରକ୍ତ ବିତରଣ ଦେଶ ମଧ୍ୟରେ ଶେଷ ମାଇଲ୍ ପର୍ଯ୍ୟନ୍ତ ରକ୍ତ ଯୋଗାଣ କରିବାରେ ଲାଗୁଥିବା ସମୟ ପରିମାଣକୁ ହ୍ରାସ କରିବ।

ଆୟୋଜନର ମହତ୍ତ୍ୱ ଉପରେ ଆଲୋକପାତ କରି, ଆଇସିଏମଆର ମହାନିର୍ଦ୍ଦେଶକ ଡକ୍ଟର ରାଜୀବ ବହଲ ଗୁରୁତ୍ୱାରୋପ କରି କହିଛନ୍ତି ଯେ ଏହି ‘ଆଇ – ଡ୍ରୋନ୍‌’ର ବ୍ୟବହାର ପ୍ରଥମ ଥର ପାଇଁ ଆଇସିଏମ୍‌ଆର୍ ଦ୍ୱାରା କୋଭିଡ୍ ୧୯ ମହାମାରୀ ସମୟରେ ଅଗମ୍ୟ ଅଂଚଳରେ ଟିକା ବଣ୍ଟନ ଉଦ୍ଦେଶ୍ୟରେ କରା ଯାଇଥିଲା। ଆଜି, ଆମେ ରକ୍ତ ଏବଂ ରକ୍ତ ସମ୍ବନ୍ଧୀୟ ଉତ୍ପାଦ ପରିବହନ କରୁଛୁ, ଯାହା କମ୍ ତାପମାତ୍ରାରେ ରଖାଯିବା ଉଚିତ୍। ପରୀକ୍ଷଣ ପରେ, ଆମେ ଜାଣିଲୁ ଯେ କେବଳ ତାପମାତ୍ରା ବଜାୟ ରଖିବା ନୁହେଁ, ପରିବହନ ହେଉଥିବା ଦ୍ରବ୍ୟର ମଧ୍ୟ କୌଣସି କ୍ଷତି ହୋଇ ନାହିଁ। ଆମେ ଆମ୍ବୁଲାନ୍ସ ମାଧ୍ୟମରେ ଅନ୍ୟ ଏକ ନମୁନା ପଠାଇଛୁ ଏବଂ ଯଦି ଦୁଇଟି ଉପାୟ ବ୍ୟବହାର କରି ପଠାଯାଇଥିବା ନମୁନାରେ କୌଣସି ପାର୍ଥକ୍ୟ ନାହିଁ, ତେବେ ଏହି ଡ୍ରୋନ୍ ସମଗ୍ର ଭାରତରେ ବ୍ୟବହୃତ ହେବ। ”

ସେ ଆହୁରି ମଧ୍ୟ କହିଛନ୍ତି ଯେ “ଆହ୍ୱାନର ନକ୍ସାକରଣ ଉପରେ ସ୍ପଷ୍ଟତା ଏବଂ ସମ୍ଭାବ୍ୟ ସମାଧାନ ଗୁଡିକ ଚିହ୍ନଟ କରିବାରେ ଗବେଷଣା କ୍ଷେତ୍ରରେ ସ୍ୱଦେଶୀ ଦକ୍ଷତା ବିକାଶ କରି ଏବଂ ମୁଖ୍ୟ ସ୍ରୋତରେ ନବସୃଜନ ଏବଂ ପ୍ରଯୁକ୍ତି ବିଦ୍ୟାର ଆରମ୍ଭ କରି ହାସଲ କରାଯାଇପାରିବ। ଡିଜିଟାଲୀକରଣ, ଟୀକାର ଦକ୍ଷତାର ସହିତ ଉତ୍ପାଦନ ଏବଂ ଦ୍ରୁତ ବିତରଣ ବ୍ୟବସ୍ଥାର ବିକାଶ ସହିତ ଭାରତ ଏକ ବର୍ଷ ମଧ୍ୟରେ ୯୦% କଭରେଜ୍ ହାସଲ କଲା। ଟେକ୍ନୋଲୋଜିର ବୃଦ୍ଧି ହେଉଛି ଏକ ତ୍ୱରାନ୍ୱିତକାରୀ ପ୍ରକ୍ରିୟା ଯାହା ମାନନୀୟ ପ୍ରଧାନମନ୍ତ୍ରୀଙ୍କ ଦ୍ୱାରା ପରିକଳ୍ପିତ ଏକ ବିକଶିତ ରାଷ୍ଟ୍ର ହେବାର ମାନ୍ୟତା ହାସଲ କରିବାକୁ ଧୀରେ ଧୀରେ ଭାରତକୁ ଆଗେଇ ନେଉଛି।

ଏହି ଯଥାର୍ଥକରଣ କାର୍ଯ୍ୟ ସମୟରେ ବୈଜ୍ଞାନିକମାନେ ବିଶେଷ ରୂପରେ ଦୁର୍ଗମ ଅଞ୍ଚଳରେ ତଥା ଭାରତର ଜନଗହଳିପୂର୍ଣ୍ଣ ମହାନଗରୀୟ ସହରରେ ରକ୍ତ ଏବଂ ରକ୍ତ ସମ୍ବର୍କିତ ଦ୍ରବ୍ୟ ଗୁଡିକର ଠିକ୍ ସମୟରେ ବିତରଣରେ ଆହ୍ୱାନଗୁଡିକୁ ଚିହ୍ନଟ କରିଥିଲେ ଏବଂ ଡ୍ରୋନ୍ ଆନ୍ଦୋଳନର ପ୍ରଭାବ କାରଣରୁ ରକ୍ତ ଭଳି ଅତି ସହଜରେ ନଷ୍ଟ ହୋଇଯାଉଥିବା ଶରୀରିକ ତରଳ ପଦାର୍ଥର ଗୁଣବତ୍ତା ଏବଂ ଅଖଣ୍ଡତାକୁ ଆକଳନ କରିଥିଲେ।

ଏଲ୍‌ଏଚ୍‌ଏମ୍‌ସି, ଜିଆଇଏମ୍‌ଏସ୍ ଏବଂ ଜେଆଇଆଇଟିର ଅନୁସନ୍ଧାନକାରୀମାନେ ଏହି ଅଧ୍ୟୟନରେ ପ୍ୟାକ୍ ହୋଇଥିବା ଲାଲ ରକ୍ତ କଣିକା, ଜମାଟ ହୋଇରହିଥିବା ତାଜା ପ୍ଲାଜମା, ପ୍ଲେଟଲେଟର ଗୁଣବତ୍ତାକୁ ମାନ୍ୟ କରିବା ପାଇଁ ଆଗକୁ ଡ୍ରୋନ୍ ଉଡ଼ାଣକୁ ସଂଚାଳିତ କରିବେ। ଏହି ଅଧ୍ୟୟନର ଫଳାଫଳଗୁଡ଼ିକ ରକ୍ତ ଉତ୍ପାଦ ଉପରେ ଡ୍ରୋନ୍ ପରିବହନର ପ୍ରଭାବକୁ ପରୀକ୍ଷା କରିବା ପାଇଁ ଭାରତରୁ ବୈଜ୍ଞାନିକ ପ୍ରମାଣ ପ୍ରଦାନ କରିବ। ଏହି ଅଧ୍ୟୟନ ରକ୍ତ ବ୍ୟାଗ ଏବଂ ଉପାଦାନ ପହଂଚାଇବା ପାଇଁ ବ୍ୟାପକ ପ୍ରୟୋଗତା ଏବଂ ଡ୍ରୋନ୍ ବ୍ୟବହାର ପାଇଁ ଏସ୍‌ଓପିର ବିକାଶକୁ ଆଗେଇ ନେବ। ଏଥିସହ, ଦେଶର ଦୂର ସ୍ଥାନ ଗୁଡିକରେ ତାପମାତ୍ରା ସମ୍ବେଦନଶୀଳ ରକ୍ତ ପଦାର୍ଥ ପାଇଁ ଡ୍ରୋନ୍ ପରିବହନ ପଦ୍ଧତି ଭାବରେ ବ୍ୟବହୃତ ହେବ କି ନାହିଁ ଏହାର ଉତ୍ତର ପ୍ରଦାନ କରିବ।

ନୂଆଦିଲ୍ଲୀ: ଗୋଟିଏ ଦିନରେ ଭାରତରେ କରୋନା ଭାଇରସ ସଂକ୍ରମଣର ୭ ହଜାର ୫୩୩ ଟି ନୂଆ ମାମଲା ସାମ୍ନାକୁ ଆସିଛି। ଗତ ୨୪ ଘଣ୍ଟା ମଧ୍ୟରେ ଏହି ଭାଇରସରୁ ୧୧ ହଜାର ୪୭ ଜଣ ଲୋକ ଆରୋଗ୍ୟ ଲାଭ କରିଛନ୍ତି। ଯାହା ପରେ ସମୁଦାୟ ସୁସ୍ଥ ରୋଗୀଙ୍କ ସଂଖ୍ୟା ୪ କୋଟି ୪୩ ଲକ୍ଷ ୪୭ ହଜାର ୨୪ କୁ ବୃଦ୍ଧି ପାଇଛି। କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ଵାରା ସକାଳ ଆଠଟାରେ ପ୍ରକାଶିତ ତଥ୍ୟ ଅନୁଯାୟୀ ବର୍ତ୍ତମାନ ଦେଶରେ ୫୩ ହଜାର ୮୫୨ ଜଣ ଲୋକ କରୋନା ଜୀବାଣୁ ସଂକ୍ରମଣରେ ଚିକିତ୍ସିତ ହେଉଛନ୍ତି।

ନୂଆଦିଲ୍ଲୀ: କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ୱାରା ପ୍ରକାଶିତ ତଥ୍ୟ ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ ଦେଶରେ ୯ ହଜାର ୬୨୯ ନୂତନ କରୋନା ମାମଲା ଚିହ୍ନଟ ହୋଇଛି। ଏହା ସହିତ ଦେଶରେ ସକ୍ରିୟ ମାମଲା ୬୧ ହଜାର ୧୩ କୁ ବୃଦ୍ଧି ପାଇଛି। ଗତ ୨୪ ଘଣ୍ଟା ମଧ୍ୟରେ ୧୧ ହଜାର ୯୬୭ ଲୋକ କରୋନାରୁ ଆରୋଗ୍ୟ ଲାଭ କରିଛନ୍ତି। ଏହି ଜୀବାଣୁରୁ ମୁକ୍ତି ପାଇଥିବା ମୋଟ ଲୋକଙ୍କ ସଂଖ୍ୟା ୪ କୋଟି ୪୩ ଲକ୍ଷ ୨୩ ହଜାର ୪୫ କୁ ବୃଦ୍ଧି ପାଇଛି।

ନୂଆଦିଲ୍ଲୀ: କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ଵାରା ପ୍ରକାଶିତ ତଥ୍ୟ ଅନୁଯାୟୀ ଆଜି ଭାରତରେ ୧୧ ହଜାର ୬୯୨ ଟି ନୂଆ କରୋନା ଆକ୍ରାନ୍ତ ଚିହ୍ନଟ ହୋଇଥିବା ଜଣାପଡିଛି। ଏହା ସହିତ ଦେଶରେ ସକ୍ରିୟ କରୋନା ମାମଲା ୬୬ ହଜାର ୧୭୦ କୁ ବୃଦ୍ଧି ପାଇଛି। କରୋନା କାରଣରୁ ୨୮ ଜଣଙ୍କ ମୃତ୍ୟୁ ହେତୁ ଦେଶରେ କରୋନା କାରଣରୁ ମୃତ୍ୟୁ ସଂଖ୍ୟା ୫,୩୧,୨୫୮ କୁ ବୃଦ୍ଧି ପାଇଛି।

ମନ୍ତ୍ରଣାଳୟ କହିଛି ଯେ, କୋଭିଡ ମାମଲା ୪ କୋଟି ୪୮ ଲକ୍ଷ ୬୯ ହଜାର ୬୮୪ ରେକର୍ଡ କରାଯାଇଛି। ଗତ ୨୪ଘଣ୍ଟା ମଧ୍ୟରେ, କରୋନାରୁ ୧୦ ହଜାର ୭୮୦ ଲୋକ ଉଦ୍ଧାର ହୋଇଛନ୍ତି। ତେବେ ମୋଟ ସୁସ୍ଥ ହୋଇଥିବା ଲୋକଙ୍କ ସଂଖ୍ୟା ୪ କୋଟି ୪୨ ଲକ୍ଷ ୭୨ ହଜାର ୨୫୬ କୁ ବୃଦ୍ଧି ପାଇଛି। ମନ୍ତ୍ରଣାଳୟର ୱେବସାଇଟ୍ ଅନୁଯାୟୀ ଦେଶବ୍ୟାପୀ ଟୀକାକରଣ ଅଭିଯାନ ଅଧୀନରେ ଦେଶରେ ବର୍ତ୍ତମାନ ପର୍ଯ୍ୟନ୍ତ ୨୨୦.୬୬ କୋଟି ଡୋଜ କୋଭିଡ ଟିକା ଦିଆଯାଇଛି।

ନୂଆଦିଲ୍ଲୀ: ଗତ ୨୪ ଘଣ୍ଟା ମଧ୍ୟରେ ସାରା ଦେଶରେ ୧୦ ହଜାର ୫୪୨ ଟି ନୂଆ କରୋନା ମାମଲା ରୁଜୁ ହୋଇଛି। କିନ୍ତୁ ଗତକାଲି କରୋନାର ୭ ହଜାର ୬୩୩ ନୂତନ ମାମଲା ପଞ୍ଜିକୃତ ହୋଇଥିଲା। ତେବେ ଆଜି କରୋନାର ନୂତନ ମାମଲାରେ ବୃଦ୍ଧି ଘଟିଛି। ଏଭଳି ପରିସ୍ଥିତିରେ କରୋନାର ବୃଦ୍ଧି ସଂକ୍ରମଣ ପୁଣି ଥରେ ମୁଣ୍ଡବିନ୍ଧା ବଢାଇ ଦେଇଛି।

କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ସୂଚନା ଅନୁଯାୟୀ, ଭାରତର ସକ୍ରିୟ ମାମଲା ବର୍ତ୍ତମାନ ୬୩ ହଜାର ୫୬୨ ରେ ପହଞ୍ଚିଛି। ଗତ ୨୪ ଘଣ୍ଟା ମଧ୍ୟରେ ୮ ହଜାର ୧୭୫ ଲୋକ ସୁସ୍ଥ ହୋଇଛନ୍ତି, ଏହା ପରେ କରୋନାରୁ ସୁସ୍ଥ ହୋଇଥିବା ଲୋକଙ୍କ ସଂଖ୍ୟା ୪ କୋଟି ୪୨ ଲକ୍ଷ ୫୦ ହଜାର ୬୪୯ କୁ ବୃଦ୍ଧି ପାଇଛି।

ନୂଆଦିଲ୍ଲୀ: ଦେଶରେ ବଢୁଥିବା କରୋନା ଜୀବାଣୁ ପୁଣି ଥରେ ଭୟଭୀତ କରିବାକୁ ଲାଗିଛି। ଗତ ୨୪ ଘଣ୍ଟା ମଧ୍ୟରେ ଭାରତରେ ୧ ହଜାର ୧୫୧ ନୂତନ ମାମଲା ରିପୋର୍ଟ ହୋଇଛି। ଏହା ସହିତ ଦେଶରେ ଏପର୍ଯ୍ୟନ୍ତ ସଂକ୍ରମିତ ଲୋକଙ୍କ ସଂଖ୍ୟା ୪ କୋଟି ୪୭ ଲକ୍ଷ ୯ ହଜାର ୬୭୬ କୁ ବୃଦ୍ଧି ପାଇଛି। ଏଥି ସହିତ ଚିକିତ୍ସିତ ହେଉଥିବା ରୋଗୀଙ୍କ ସଂଖ୍ୟା ୧୧ ହଜାର ୯୦୩ କୁ ବୃଦ୍ଧି ପାଇଛି।

ବୁଧବାର ସକାଳ ଆଠଟାରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ଵାରା ପ୍ରକାଶିତ ଅଦ୍ୟତନ ତଥ୍ୟ ଅନୁଯାୟୀ ଦେଶରେ ସଂକ୍ରମଣ ହେତୁ ୫ ଲକ୍ଷ ୩୦ ହଜାର ୮୪୧ ଜଣ ମୃତ୍ୟୁବରଣ କରିଛନ୍ତି।

ତେବେ ଏପର୍ଯ୍ୟନ୍ତ ସମୁଦାୟ ୪ କୋଟି ୪୧ ଲକ୍ଷ ୬୬ ହଜାର ୯୨୫ ଲୋକ ସଂକ୍ରମଣମୁକ୍ତ ହୋଇଛନ୍ତି।

ନୂଆଦିଲ୍ଲୀ: ଗତ ୨୪ ଘଣ୍ଟା ମଧ୍ୟରେ ଭାରତରେ ୧୮୯୦ ଟି କରୋନା ଆକ୍ରାନ୍ତ ହୋଇଛି, ଯାହା ଗତ ୧୪୯ ଦିନ ମଧ୍ୟରେ ସର୍ବାଧିକ। ଏହା ପରେ ଚିକିତ୍ସିତ ହେଉଥିବା ରୋଗୀଙ୍କ ସଂଖ୍ୟା ୯୪୩୩ କୁ ବୃଦ୍ଧି ପାଇଲା। କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଏହି ସୂଚନା ଦେଇଛି। ଗତ ବର୍ଷ ଅକ୍ଟୋବରରେ ଦେଶରେ ଗୋଟିଏ ଦିନରେ ୨୨୦୮ ଟି ମାମଲା ରୁଜୁ ହୋଇଥିଲା।

ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି ଯେ, ଆଉ ୭ ଜଣ ସଂକ୍ରମିତ ଲୋକଙ୍କ ମୃତ୍ୟୁ ହେତୁ ମୃତ୍ୟୁ ସଂଖ୍ୟା ୫ ଲକ୍ଷ ୩୦ ହଜାର ୮୩୧ କୁ ବୃଦ୍ଧି ପାଇଛି। ‘

ଏଥି ସହିତ ଦେଶରେ କୋଭିଡ-୧୯ ର ମୋଟ ମାମଲା ୪ କୋଟି ୪୭ ଲକ୍ଷ ୪ ହଜାର ୧୪୭ କୁ ବୃଦ୍ଧି ପାଇଛି। ବର୍ତ୍ତମାନ ସୁଦ୍ଧା ୪ କୋଟି ୪୧ ଲକ୍ଷ ୬୩ ହଜାର ୮୮୩ ଲୋକ ସଂକ୍ରମଣରୁ ଆରୋଗ୍ୟ ଲାଭ କରିଛନ୍ତି।