Tag: କୋଶଳୀ ଭାଷା

ଭୁବନେଶ୍ବର: ଦୀର୍ଘ ଦୁଇଦିନ ଧରି ବିଧାନସଭାର ଶୀତ ଅଧିବେଶନ ଅଚଳ ହେବା ପରେ ଆଜି ସ୍ବାଭାବିକ ହୋଇଛି। ଆଜି ସକାଳୁ ପ୍ରଶ୍ନଉତ୍ତର କାର୍ଯ୍ୟକ୍ରମ ଠିକରେ ଚାଲିଥିଲା। ପ୍ରଥମେ ଶକ୍ତି ବିଭାଗର ପ୍ରଶ୍ନଉତ୍ତର କାର୍ଯ୍ୟକ୍ରମ ଥିଲା। ଏହାପରେ ଶିଳ୍ପ ବିଭାଗର ପ୍ରଶ୍ନଉତ୍ତର ଚାଲିଥିଲା। ଏହାର ଉତ୍ତର ରଖିଥିଲେ ଶିଳ୍ପ ମନ୍ତ୍ରୀ ପ୍ରତାପ ଦେବ।

ତେବେ ଗୃହରେ ଏହି ପ୍ରଶ୍ନ ଉତ୍ତର କାର୍ଯ୍ୟକ୍ରମରେ ଏକ ରୋଚକ ଦୃଶ୍ୟ ଦେଖିବାକୁ ମିଳିଥିଲା। ତାହା ହେଲା କଂଗ୍ରେସ ବିଧାୟକ ଦଳର ନେତା ନରସିଂହ ମିଶ୍ର କୋଶଳୀ ଭାଷାରେ ପ୍ରଶ୍ନ ପଚାରିଥିଲେ। ଏହାର ଉତ୍ତର ଶିଳ୍ପ ମନ୍ତ୍ରୀ ପ୍ରତାପ ଦେବ ମଧ୍ୟ ସେହି କୋଶଳୀ ଭାଷାରେ ପ୍ରଦାନ କରିଥିଲେ।

ଭୁବନେଶ୍ବର: ବିଧାନସଭାରେ କୋଶଳୀ ଭାଷାରେ ବିଭିନ୍ନ ତଥ୍ୟ ରଖିବା ପାଇଁ ଅନୁମତି ଦିଆଯାଉ ବୋଲି ଆଜି ବାଚସ୍ପତିଙ୍କୁ ଜଣାଇଛନ୍ତି ବିଧାୟକ ନରସିଂହ ମିଶ୍ର। ଆସନ୍ତାକାଲି ବିଧାନସଭା ଥିବାରୁ ଆଜି ସର୍ବଦଳୀୟ ବୈଠକ କରାଯାଇଥିଲା। ବାଚସ୍ପତିଙ୍କ ଅଧ୍ୟକ୍ଷତାରେ ଏହି ବୈଠକ କରାଯାଇଥିଲା। ଏଥିରେ କଂଗ୍ରେସ ବିଧାୟକ ନରସିଂହ ମିଶ୍ର ଏହି ଦାବୀ ରଖିଥିଲେ।

ବର୍ତ୍ତମାନ କୋଶଳୀମାନେ ସ୍ବତନ୍ତ୍ର ରାଜ୍ୟ ପାଇଁ ଆନ୍ଦୋଳନ କରୁଥିବା ବେଳେ ନରସିଂହ ମିଶ୍ରଙ୍କ ବିଭିନ୍ନ ବକ୍ତବ୍ୟ ବିବାଦୀୟ ହେଉଛି। ପୂର୍ବରୁ ସେ ସିନେମା କଳିକୁ ନେଇ ଓଡିଶା ଦୁଇ ଭାଗ ହୋଇଯିବ ବୋଲି ନରସିଂହ କହିଥିଲେ। ଏବେ ବିଧାନସଭାରେ କୋଶଳୀ ଭାଷାରେ ତଥ୍ୟ ରଖିବାକୁ ଅନୁମତି ମାଗିବା ଘଟଣା ପୁଣି ବିବାଦୀୟ ହୋଇପଡିଛି।

ତେବେ ବିଧାନସଭାରେ ଏହି ଭାଷାର କ୍ଷୀପ୍ରଲେଖକ ନ ଥିବାରୁ ତାହା କହିବା ପାଇଁ ଅନୁମତି ଦିଆଯାଇପାରିବ ନାହିଁ ବୋଲି ବାଚସ୍ପତି ଜଣାଇଥିଲେ। କାରଣ ସେହି ଭାଷାରେ ଗୃହର ବିବରଣୀରେ ସ୍ଥାନ ନ ପାଇଲେ ତାହା କହିବାର କୌଣସି ମୂଲ୍ୟ ରହିବ ନାହିଁ। ପରବର୍ତ୍ତି ସମୟରେ ଏହା ଉପରେ ବିଚାର କରାଯିବ ବୋଲି ବାଚସ୍ପତି ଜଣାଇଥିଲେ।