ନୂଆଦିଲ୍ଲୀ: ଭାରତୀୟ ବ୍ୟାଟ୍ସମ୍ୟାନ୍ ବିରାଟ କୋହଲିଙ୍କ ଖରାପ ଫର୍ମ ଜାରି ରହିଛି। ଆଗାମୀ ଟି-୨୦ ବିଶ୍ୱକପକୁ ଦୃଷ୍ଟିରେ ରଖି କୋହଲିଙ୍କ ଖରାପ ଫର୍ମ ସମସ୍ୟାର କାରଣ ହୋଇଛି। ଏହି ସମୟରେ ଭାରତୀୟ ଦଳ ଇଂଲଣ୍ଡ ବିପକ୍ଷରେ ୩ ଟି-୨୦ ମ୍ୟାଚ୍ ଖେଳିବ। ଇଂଲଣ୍ଡ ସିରିଜରେ ଭଲ ପ୍ରଦର୍ଶନ କରୁଥିବା ଖେଳାଳିମାନେ ଆଗାମୀ ଟି-୨୦ ବିଶ୍ୱକପ ଦଳ ପାଇଁ ସେମାନଙ୍କର ଦାବିକୁ ମଜବୁତ କରିବେ। କିନ୍ତୁ ସବୁଠାରୁ ବଡ ପ୍ରଶ୍ନ ହେଉଛି ବିରାଟ କୋହଲି ଏହି ସିରିଜରେ ତାଙ୍କ ଫର୍ମକୁ ଫେରିପାରିବେ କି?
ବାସ୍ତବରେ ଇଂଲଣ୍ଡ ବିପକ୍ଷ ଟି-୨୦ ସିରିଜ ବିରାଟ କୋହଲିଙ୍କ ପାଇଁ ଏକ ବଡ଼ ସୁଯୋଗ ବୋଲି ବିଶ୍ୱାସ କରାଯାଏ। ଯଦି ବିରାଟ କୋହଲି ଏହି ସିରିଜରେ ଭଲ ପ୍ରଦର୍ଶନ କରନ୍ତି, ତେବେ ଟି-୨୦ ବିଶ୍ୱକପକୁ ଦୃଷ୍ଟିରେ ରଖି ଭାରତୀୟ ଦଳ ପାଇଁ ଆଶ୍ବସ୍ତିକର ଖବର ହେବ। କିନ୍ତୁ ଯଦି କୋହଲିଙ୍କ ଫ୍ଲପ୍ ସୋ ଅବ୍ୟାହତ ରହେ, ତେବେ ଆଗାମୀ ଟି-୨୦ ବିଶ୍ୱକପ ପାଇଁ ଭାରତୀୟ ଚୟନକର୍ତ୍ତା ଅନ୍ୟ ଏକ ବିକଳ୍ପ ବିଚାର କରିପାରନ୍ତି। ଏହି ପରିପ୍ରେକ୍ଷୀରେ ବିସିସିଆଇର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, କୋହଲି ଦୀର୍ଘ ଦିନ ଧରି ଭାରତ ପାଇଁ ଖେଳୁଛନ୍ତି। ଏଥିରେ କୌଣସି ସନ୍ଦେହ ନାହିଁ ଯେ, ସେ ଜଣେ ମହାନ ଖେଳାଳି, କିନ୍ତୁ ବାରମ୍ବାର ଫ୍ଲପ୍ ତାଙ୍କ ପାଇଁ ସତର୍କ ଘଣ୍ଟି ବାଜୁଛି।
ସୂଚନାଯୋଗ୍ୟ ଯେ, ଚଳିତ ବର୍ଷ ଟି-୨୦ ବିଶ୍ୱକପ ଅକ୍ଟୋବର ମାସରେ ଖେଳାଯିବ। ଚଳିତ ବର୍ଷ ଅଷ୍ଟ୍ରେଲିଆ ଟି-୨୦ ବିଶ୍ୱକପ ଆୟୋଜନ କରିବ। ଗଣମାଧ୍ୟମ ରିପୋର୍ଟରେ ଏହା ଦାବି କରାଯାଉଛି ଯେ, ବିସିସିଆଇ ବର୍ତ୍ତମାନ ଟି-୨୦ ବିଶ୍ୱକପ ପାଇଁ ବିରାଟ କୋହଲିଙ୍କ ବିକଳ୍ପ ଖୋଜୁଛି, ଯେଉଁଥିପାଇଁ ବିରାଟ କୋହଲିଙ୍କ ପାଇଁ ଇଂଲଣ୍ଡ ବିପକ୍ଷ ଟି-୨୦ ସିରିଜ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି। ଏଥି ସହିତ ଇଂଲଣ୍ଡ ବିପକ୍ଷ ସିରିଜ୍ ପରେ ଭାରତୀୟ ଦଳ ୱେଷ୍ଟଇଣ୍ଡିଜ୍ ବିପକ୍ଷରେ ସୀମିତ ଓଭର ମ୍ୟାଚ୍ ଖେଳିବ।