Tag: ଗଞ୍ଜାମ ଜିଲ୍ଲା

ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଗଞ୍ଜାମ ଜିଲ୍ଲା ବଡଗଡ ଥାନା ଅର୍ନ୍ତଗତ ବାହାରପୁର ଗ୍ରାମର ଶିବ ମନ୍ଦିର ପୋଖରୀ ଭିତରକୁ ଏକ ମୋଟର କାର ଖସି ଆସ୍କା ଜୀବନ ବୀମା ଶାଖା ପରିଚାଳକ ହିମାଂଶୁ ମହାପାତ୍ରଙ୍କର ମୃତ୍ୟୁ ଘଟିଥିଲା ବେଳେ ଉନ୍ନୟନ ଅଧିକାରୀ ସୁଧାଂଶୁ ଶେଖର ସାହୁ ଗୁରୁତର ଆହତ ହୋଇ ବ୍ରହ୍ମପୁର ବଡ଼ ଡ଼ାକ୍ତରଖାନାରେ ଚିକତ୍ସିତ ହେଉଛନ୍ତି।

ଘଟଣାରୁ ପ୍ରକାଶ ଯେ ଉକ୍ତ ଗ୍ରାମର ସୁଦାମ ଚରଣ ଦାସ ନାମକ ଜଣେ ଜୀବନ ବୀମା ଏଜେଣ୍ଟଙ୍କର ଏକ ଭୋଜି କାର୍ଯ୍ୟରେ ଯୋଗ ଦେଇ ଉକ୍ତ ଦୁଇ ଫେରିବା ପାଇଁ କାର୍ କୁ ପଛକୁ ନେଉଥିବା ବେଳେ ପୋଖରୀ ଭିତରକୁ ଖସି ଯାଇଥିଲା। ଘଟଣାସ୍ଥଳରେ ଉପସ୍ଥିତ କିଛି ଲୋକ ବଡ଼ ବଡ ବଲା ଜରିଆରେ ଉକ୍ତ ଦୁଇ ଅଧିକାରୀଙ୍କୁ ବାହାର କରି ଚିକିତ୍ସା ପାଇଁ ଧରାକୋଟ ଡାକ୍ତରଖାନାରେ ଭର୍ତ୍ତି କରିଥିଲେ। କିନ୍ତୁ ଡ଼ାକ୍ତର ହିମାଂଶୁ ମହାପାତ୍ରଙ୍କୁ ମୃତ ଘୋଷଣା କରିଥିଲେ ଓ ପ୍ରାଥମିକ ଚିକିତ୍ସାପରେ ସୁଧାଂଶୁଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ବଡ଼ ଡ଼ାକ୍ତରଖାନାକୁ ସ୍ଥାନାନ୍ତରିତ କରାଯାଇଛି। ଖବର ପାଇ ପୋଲିସ, ଆସ୍କା ଜୀବନ ବୀମା କାର୍ଯ୍ୟାଳୟ କର୍ମଚାରୀ ଓ ଏଜେଣ୍ଟ୍ ମାନେ ଘଟଣାସ୍ଥଳରେ ପହଞ୍ଚିଛନ୍ତି।

ବ୍ରହ୍ମପୁର: ଗଞ୍ଜାମ ଜିଲ୍ଲା ସମଗ୍ର ଶିକ୍ଷା ଅଭିଯାନ ଆନୁକୁଲ୍ୟରେ ସ୍ଥାନୀୟ ଅନସ୍ଲୋ ସରକାରୀ ଉଚ୍ଚ ବିଦ୍ୟାଳୟ ପରିସରରେ ଶୁକ୍ରବାର ଦିନ ସୁରେନ୍ଦ୍ର ସାଏ ଦିବ୍ୟଦୃଷ୍ଟି ଯୋଜନାର ଶୁଭାରମ୍ଭ ହୋଇଯାଇଛି। ଛତ୍ରପୁର ଗୋଷ୍ଠୀ ଶିକ୍ଷାଧିକାରୀ ଦ୍ୱାରିକାନାଥ ବେହେରାଙ୍କ ପ୍ରତ୍ୟେକ୍ଷ ତତ୍ୱାବଧାନରେ ମୁଖ୍ୟ ଅତିଥି ଭାବେ ଅତିରିକ୍ତ ତହସିଲଦାର ମନୋଜ କୁମାର ପ୍ରଧାନ ଯୋଗ ଦେଇଥିବା ବେଳେ ମୁଖ୍ୟ ବକ୍ତା ବାବେ ସମଗ୍ର ଶିକ୍ଷା ଅଭିଯାନ ରେ ଜିଲ୍ଲା ଅନ୍ତଃର୍ନିବେଶୀ ଶିକ୍ଷା ସଂଯୋଜକ ତପନ କୁମାର ସାହୁ ଓ ସମ୍ମାନିତ ଅତିଥି ଭାବେ ଅନସ୍ଲୋ ସରକାରୀ ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷୟତ୍ରୀ ସୁଚିତ୍ରା ପାଣିଗ୍ରାହୀ, ଅତିରିକ୍ତ ଗୋଷ୍ଠୀ ଶିକ୍ଷାଧିକାରୀ ସଂଯୁକ୍ତା ରଥ ଯୋଗ ଦେଇଥିଲେ।

ଏହି ପରିପ୍ରେକ୍ଷୀରେ ଛତ୍ରପୁର ଉପଖଣ୍ଡ ଚିକିତ୍ସାଳୟର ଚକ୍ଷୁ ବିଷେଷଜ୍ଞ ଡାକ୍ତର ଶୀଲା ସିତାରାମ ଓ ପ୍ରଦୀପ ବେହେରା ଯୋଗ ଦେଇ ୧୫୦ ଜଣ ଛାତ୍ରଛାତ୍ରୀଙ୍କ ଚକ୍ଷୁ ପରୀକ୍ଷା କରିବା ସହିତ ଆବଶ୍ୟକୀୟ ଚିକିତ୍ସା ଯୋଗାଇ ଦେଇଥିଲେ। ଆଗାମୀ ଦିନରେ ଛତ୍ରପୁର ବ୍ଲକ ୭ ଟି ସ୍ଥାନରେ ଏଭଳି କାର୍ଯ୍ୟକ୍ରମ ଆୟୋଜନ କରାଯିବ ବୋଲି ସୂଚନା ମିଳିଛି।

ବ୍ରହ୍ମପୁର: ଓଡିଶା ମୁଖ୍ୟ ନିର୍ବାଚନ ଅଧିକାରୀଙ୍କ ନିର୍ଦ୍ଦେକ୍ରମେ ୨୯ ଅକ୍ଟୋବର ୨୦୨୪ ରୁ ୨୮ ନଭେମ୍ବର ୨୦୨୪ ପ୍ରର୍ଯ୍ୟନ୍ତ ଭୋଟର ତାଲିକାର ସ୍ବତନ୍ତ୍ର ସଂକ୍ଷିପ୍ତ ସଂଶୋଧନ ସାରିବା ପରେ ସୋମବାର ଗଞ୍ଜାମ ଜିଲ୍ଲାରେ ପ୍ରକାଶ ପାଇଛି ଚୂଡାନ୍ତ ଭୋଟର ତାଲିକା। ଜିଲ୍ଲାପାଳ ଦିବ୍ୟଜ୍ୟୋତି ପରିଡାଙ୍କ ତତ୍ତ୍ଵାବଧାନରେ ଅତିରିକ୍ତ ଜିଲ୍ଲାପାଳ ସୁଧାଂଶୁ କୁମାର ଭୋଇଙ୍କ ଅଧ୍ୟକ୍ଷତାରେ ସମସ୍ତ ରାଜନୈତିକ ଦଳ ଉପସ୍ଥିତିରେ ଏହି ଚୂଡାନ୍ତ ତାଲିକା ପ୍ରକାଶ କରିଛନ୍ତି।

ଚୂଡାନ୍ତ ତାଲିକା ପ୍ରକାଶ ପରେ ଜିଲ୍ଲାରେ ୧୩ଟି ନିର୍ବାଚନ ମଣ୍ଡଳୀରେ ୩୦ଲକ୍ଷ ୨୬ହଜାର ୨୨୦ ଭୋଟର ରହିଥ‌ିବା ଜିଲ୍ଲା ପ୍ରଶାସନ ପକ୍ଷରୁ କୁହାଯାଇଛି। ସେଥି ମଧ୍ୟରୁ ପୁରୁଷ ଭୋଟର ୧୫ ଲକ୍ଷ ୫୫ ହଜାର ୪୪୯, ମହିଳା ଭୋଟର ୧୪ ଲକ୍ଷ ୭୦ ହଜାର ୪୭୮, ତୃତୀୟ ଲିଙ୍ଗ ଭୋଟର ୨୯୩ , ଯୁବ ଭୋଟର (୧୮-୧୯ ବର୍ଷ) ୪୨୨୭୨ , ୮୦ ବର୍ଷରୁ ଉଦ୍ଧ ବିରଷ୍ଠ ଭୋଟର ୬୧ ହଜାର ୫୩ ଜଣ ରହିଛନ୍ତି । ୩୧୨୪ ମତଦାନ କେନ୍ଦ୍ର ରହିଥିବା ବେଳେ, ସର୍ଭିସ ଭୋଟର ୬୧୫୫ ଜଣ ରହିଛନ୍ତି।

ସ୍ବତନ୍ତ୍ର ସର୍ଭେ ବେଳେ ୨୬ ହଜାର ୪୩୧ ଭୋଟର ଯୋଡି ହୋଇଥିବା ବେଳେ ୧୩ ହଜାର ୯୬୪ଭୋଟର କଟାଯାଇଛି ବୋଲି ବୈଠକରେ କୁହାଯାଇଛି। ଜିଲ୍ଲାରେ ଲିଙ୍ଗ ଅନୁପାତ ପ୍ରତି ୧୦୦୦ ପୁରୁଷରେ ୯୪୬ ଜଣ ମହିଳା ରହିଥିବା କୁହାଯାଇଛି। ବ୍ରହ୍ମପୁର ନିର୍ବାଚନମଣ୍ଡଳୀରେ ପୁରୁଷ ଭୋଟର ଅପେକ୍ଷା ମହିଳା ଭୋଟର ଅଧୂକ।

୧ ଲକ୍ଷ ୧୨ହଜାର୮୫୬ ଜଣ ପୁରୁଷ ଭୋଟର ରହିଥ‌ିବାବେଳେ ୧ଲକ୍ଷ ୧୪ ହଜାର ୮୬୨ ଜଣ ମହିଳା ଭୋଟର ରହିଛନ୍ତି ଓ ୭୧ ଜଣ ତୃତୀୟ ଲିଙ୍ଗ।

ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଗଞ୍ଜାମ ଜିଲ୍ଲା ଚିକିଟି ବ୍ଲକ ଗୋବିନ୍ଦନଗର ପଞ୍ଚାୟତର ଗୋବିନ୍ଦ ନଗର ଗ୍ରାମର ନରସିଂହ ଦାସ ପ୍ରାୟ ୪ବର୍ଷ ତଳେ ପ୍ରାଣ ହରାଇ ଥିବା ବେଳେ ଗତ ୭ମାସ ତଳେ ତାଙ୍କ ସ୍ତ୍ରୀ ଶୈଳ ଦାସ ପ୍ରାଣ ହରାଇଛନ୍ତି। ଉଭୟଙ୍କର ଦୁଇଟି ଛୁଆଙ୍କ ଲାଳନ ପାଳନ ତାଙ୍କ ଜେଜେ ବାପା ଓ ଜେଜେ କରୁଛନ୍ତି। ଏହି ଭଳି ପରିସ୍ଥିତିରେ ସ୍ଥାନୀୟ ଲୋକ ପ୍ରତିନିଧିଙ୍କ ସହଯୋଗ ସୁଚନା ପାଇ ବ୍ରହ୍ମପୁରର ଅଗ୍ରଣୀ ସେବା ସଂଗଠନ କାହ୍ନା ଚାରିଟେବୁଲ ଟ୍ରଷ୍ଟ ସହାୟତା ର ହାତ ବଢ଼ାଇ ଏକ ମାସର ରାସନ୍ ସାମଗ୍ରୀ ଯଥା ଚାଉଳ, ନୂତନ ବସ୍ତ୍ର, ପାଠ୍ୟ ଉପକରଣ, ପନି ପରିବା ଏବଂ ଶୀତ ବସ୍ତ୍ର ପ୍ରଦାନ କରାଯାଇଛି।ଏହା ସହ କିଛି ଆର୍ଥିକ ସହାୟତା ମଧ୍ୟ କରାଯାଇଥିଲା। ଟ୍ରଷ୍ଟ ର ବହୁ ସଦସ୍ୟ ସଦସ୍ୟା ସ୍ବେଚ୍ଛାକୃତ ଭାବେ ଏହି ଅନୁଦାନ ରାଶି ପ୍ରଦାନ କରିଥିଲେ।

ଏହି କାର୍ଯ୍ୟକ୍ରମରେ ଟ୍ରଷ୍ଟ ସଭାନେତ୍ରୀ ରଞ୍ଜନା ମିଶ୍ରଙ୍କ ନେତୃତ୍ୱରେ ରବୀନ୍ଦ୍ର ନାଥ ମିଶ୍ର, ସୋନମ୍ ଦାସ, ପ୍ରିତମ୍ ଚାନ୍ଦ ତ୍ରିପାଠୀ, ବିଶ୍ଵନାଥ ପାତ୍ର, ଅଲେଖ ପାଳ, ସୁନୀଲ ମହାନ୍ତି, ସୁଦୀପ୍ତ ପଟ୍ଟନାୟକ, ସଂଯୁକ୍ତା ତ୍ରିପାଠୀ, ରିତାଞ୍ଜଳି ସ୍ୱାଇଁ, ସଞ୍ଜୟ ସାହୁ, ରାଗିଣୀ ସାହା, କେ ଗୁରୁ ମୂର୍ତ୍ତି, ସୁଜାତା ମହାପାତ୍ର, ଅଶୋକ ମହାପାତ୍ର, ସନ୍ତୋଷ ପାଣିଗ୍ରାହୀ ପ୍ରମୁଖ ଉକ୍ତ ଗ୍ରାମର ପରିବାର ସହଯୋଗ ଧନ୍ୟବାଦ ଅର୍ପଣ କରିଥିଲେ।

ବ୍ରହ୍ମପୁର: ଗଞ୍ଜାମ ଜିଲ୍ଲାରେ ଅଦିନିଆ ବର୍ଷାରେ ରମ୍ଭା ଏନ୍‌ଏସି, ଗଞ୍ଜାମ ବ୍ଳକ୍ ଓ ଏନ୍‌ଏସି ଅଧୀନ ବିଭିନ୍ନ ଗ୍ରାମାଞ୍ଚଳରେ ଧାନଫସଲ ବ୍ୟାପକ ଭାବେ ପ୍ରଭାବିତ ଅଞ୍ଚଳକୁ ଗଞ୍ଜାମ ବିଡିଓ ଅଚ୍ୟୁତାନନ୍ଦ ଜାନି ଓ ଗଞ୍ଜାମ ତହସିଲଦାର ସୁକାନ୍ତ ଚନ୍ଦ୍ର ମିଶ୍ରଙ୍କ ନେତୃତ୍ବରେ ଏକ ୧୫ ଜଣିଆ ଟିମ୍ ବିଭିନ୍ନ ଗ୍ରାମକୁ ଯାଇ ଫସଲ କ୍ଷୟକ୍ଷତି ଆକଳ କରିଛନ୍ତି। ଗଞ୍ଜାମ ବ୍ଲକ୍, ଗଞ୍ଜାମ ଏନ୍‌ଏସି ଓ ରମ୍ଭା ଏନ୍‌ଏସି ରେ ମୋଟ ୧୨ ହଜାର ୪୬୨ ହେକ୍ଟର୍‌ ଚାଷଜମି ଥିବା ବେଳେ ତନ୍ମଧ୍ୟରୁ ୮ ହଜାର ୭୮୦ ହେକ୍ଟର ଜମିରେ ଚଳିତବର୍ଷ ଧାନଚାଷ ହୋଇଛି। କିଛି ଚାଷୀ ଧାନ ଅମଳ କରି ଘରକୁ ନେଇଯାଇଥିଲେ।

ତେବେ ୯୦ ପ୍ରତିଶତ ଚାଷୀଙ୍କ ଧାନ ଜମିରେ ରହିଥିବା ବେଳେ ଅଦିନିଆ ବର୍ଷା କାରଣରୁ ତାହା ନଷ୍ଟ ହୋଇଯାଇଛି। ପ୍ରଥମ ପର୍ଯ୍ୟାୟରେ ଏହି ଟିମ୍ ଗଞ୍ଜାମ ବ୍ଲକ୍ ଅନ୍ତର୍ଗତ ସନ୍ତୋଷପୁର, ସାନରାମଚନ୍ଦ୍ରପୁର, ୟୁଡ଼ିଏସ୍‌ସୁର ଓ ପୋଇରା ପଞ୍ଚାୟତ ଗସ୍ତ କରି ଚାଷୀଙ୍କ ସହ ଆଲୋଚନା କରିଛନ୍ତି। ତିନିଦିନ ଧରି କ୍ଷୟକ୍ଷତି ଆକଳନ ଚାଲିବ ବୋଲି ତହସିଲଦାର ଶ୍ରୀ ମିଶ୍ର ସୂଚନା ଦେଇଛନ୍ତି।

ବ୍ରହ୍ମପୁର: ଗଞ୍ଜାମ ଜିଲ୍ଲା ବ୍ରହ୍ମପୁର ମହାନଗର ରାମଲିଙ୍ଗେଶ୍ୱର ପାର୍କ ଠାରେ ଭାରତରତ୍ନ ତଥା ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଜୀଙ୍କ ଜନ୍ମ ତିଥି ଅବସରରେ ପୂର୍ଣ୍ଣାଙ୍ଗ ପ୍ରତିମୂର୍ତ୍ତି ର ଶୁଭ ଉନ୍ମୋଚନ କଲେ ଭାରତୀୟ ଜନତା ପାର୍ଟି ର ରାଜ୍ୟ ସଭାପତି ମନମୋହନ ସାମଲ ଉନ୍ମୋଚନ କରିଛନ୍ତି। ସମଗ୍ର ବିଶ୍ବରେ ରାଷ୍ଟ୍ର ରାଷ୍ଟ୍ର ମଧ୍ୟରେ ପ୍ରେମ ଓ ବନ୍ଧୁତ୍ୱ ସ୍ଥାପନ କରି ଶାନ୍ତି ପ୍ରତିଷ୍ଠା କରିବା ଅଟଳ ବିହାରୀ ବାଜପେୟୀଙ୍କ ଏକ ମାତ୍ର ଲକ୍ଷ୍ୟ ଥିଲା। ତାଙ୍କର ୧୦୦ ତମ ଜୟନ୍ତୀ ଅବସରରେ ତାଙ୍କ ଆଦର୍ଶ କୁ ସାକାର କରିବା ଏବଂ ତାଙ୍କର ସ୍ୱପ୍ନ କୁ ସାକାର କରିବା ପାଇଁ ନିଜକୁ ସମର୍ପିତ କରିବା, ଏହି ନିତି ଆଦର୍ଶ ଘରେଘରେ, ପୁରପଲ୍ଲୀ, ସ୍କୁଲ କଲେଜ ଚାରି ଆଡ଼େ ବର୍ଷ ସାରା ବିଭିନ୍ନ ଢଙ୍ଗରେ ପାଳନ କରିବା ପାଇଁ ଭାରତୀୟ ଜନତା ପାର୍ଟି ନିଷ୍ପତ୍ତି ନେଇଛି ବୋଲି ଶ୍ରୀ ସାମଲ ମତବ୍ୟକ୍ତ କରିଥିଲେ।

ବ୍ରହ୍ମପୁର ସାଂସଦ ଡ଼ ପ୍ରଦୀପ କୁମାର ପାଣିଗ୍ରାହୀ ଉପସ୍ଥିତ ରହି ଅଟଳ ଜୀଙ୍କ ଆଦର୍ଶକୁ ଶାକାର କରିବା ପାଇଁ ସୁଶାସନ, ଏକତା ଏବଂ ପ୍ରଗତିର ନୀତି କୁ ପ୍ରତିଫଳିତ କରିବା ଉପରେ ଆମ ଦେଶର ସାମର୍ଥ଼୳ ନିର୍ଭର କରେ ଏବଂ ଅଧିକ ପରିଶ୍ରମ କରିବାକୁ ପ୍ରେରଣା ଦିଏ ବୋଲି କହିଥିଲେ ବ୍ରହ୍ମପୁର ବିଧାୟକ କେ ଅନିଲ କୁମାରଙ୍କ ପୌରହିତ୍ୟରେ ଅନୁଷ୍ଠିତ ଉନ୍ମୋଚନ ସମାରୋହରେ ଛତ୍ରପୁର ବିଧାୟକ କୃଷ୍ଣ ନାୟକ, ସରୋଜ ଦାସ,ଧର୍ମା ସ୍ଵାମୀ, ଶିବ ଯାଦବ, ଶଙ୍କର ରାଓ ଭିକି ଆଚାରି, ପ୍ରତାପ ସେଠି, ସୁବ୍ରତ ପାଳ, ଅରୁଣ ନାଇଡୁ ଜନତା ପାର୍ଟିର ବହୁ ବରିଷ୍ଠ ସଦସ୍ୟ /ସଦସ୍ୟା ଓ ବ୍ରହ୍ମପୁରର ଜନସାଧାରଣ।

ଏହି ଅବସରରେ ବିଧାୟକ ଏବଂ ସାଂସଦଙ୍କ ଗାନ୍ଧୀ ନଗର କାର୍ଯ୍ୟାଳୟ ଠାରେ ଭାରତୀୟ ଜନତା ପାର୍ଟିର କାର୍ଯ୍ୟକର୍ତ୍ତାଙ୍କୁ ଦିଗଦର୍ଶନ ଦେଇଥିଲେ। ଅବିଶ୍ରାନ୍ତ ସତ୍ତ୍ୱେ ବ୍ରହ୍ମପୁର ବାସୀ ବହୁତ ସଂଖ୍ଯାରେ ଯୋଗ ଦେଇଥିଲେ ଏବଂ ବହୁତ କମ ଦିନ ଭିତରେ ସୁନ୍ଦର ସୁଉଚ୍ଚ ବାଜପେୟୀଙ୍କ ପ୍ରତିମୂର୍ତ୍ତି ସ୍ଥାପନ କରିଥିବାରୁ ବିଭିନ୍ନ ମହଲରୁ ବିଧାୟକ କେ ଅନିଲ କୁମାରଙ୍କୁ ପ୍ରସଂଶା ଛୁଟୁଛି।

ଭୁବନେଶ୍ଵର: ଗଞ୍ଜାମ ଜିଲ୍ଲା ବ୍ରହ୍ମପୁର ସ୍ଥିତ ହିଲ୍‌ପାଟଣା ସଂସ୍କୃତିଭବନରେ ଦିବ୍ୟ ଆଧ୍ୟାତ୍ମିକ ପ୍ରବଚନ କାର୍ଯ୍ୟକ୍ରମ ସୋମବାର ସଂଧ୍ୟ ରେ ଉଦ୍‌ଘାଟିତ ହୋଇଯାଇଛି। ଏହା ଆସନ୍ତା ୨୮ ତାରିଖ ପର୍ଯ୍ୟନ୍ତ ଚାଲିବ। ପୁରୀ ଗଜପତି ମହାରାଜା ଦିବ୍ୟସିଂହ ଦେବ ମୁଖ୍ୟ ଅତିଥି ଭାବେ ଯୋଗ ଦେଇ ଏହି କାର୍ଯ୍ୟକ୍ରମକୁ ଉଦ୍‌ଘାଟନ କରିଥିଲେ। ଭୌତିକ ବିଦ୍ୟା ଶିକ୍ଷାପଦ୍ଧତିରେ ନୈତିକ ମୂଲ୍ୟବୋଧର କ୍ଷୟକୁ ନେଇ ସେ ଚିନ୍ତା ପ୍ରକଟ କରିବା ସହ ଭାରତୀୟ ବୈଦିକ ଶିକ୍ଷା ଗବେଷଣାତ୍ମକ ପ୍ରୟୋଗକୁ ଆବାହନ କରିବା ଉପରେ ଗୁରୁତ୍ବାରୋପ କରିଥିଲେ।

ବିଶ୍ଵର ପ୍ରଗତି ଯେଭଳି ଦ୍ରୁତ ଗତିରେ ବୃଦ୍ଧି ପାଉଛି, ସେଭଳି ଆଧ୍ୟାତ୍ମିକ ଜ୍ଞାନର ଉନ୍ନତି ହେବା ଆବଶ୍ୟକ ଆଧ୍ୟାତ୍ମିକ ଉନ୍ନତି ବିନା ଭୌତିକ ପ୍ରଗତିର ଆବଶ୍ୟକତା ନାହିଁ। ସେହିପରି ସରକାରଙ୍କ ଦ୍ବାରା ଯେଭଳି ବିକାଶମୂଳକ କାର୍ଯ୍ୟକ୍ରମ ଚାଲୁ ରହିଛି ସେସବୁ ଭୌତିକ ପ୍ରଗତି ହୋଇଥିବା ବେଳେ ସତ୍‌ସଙ୍ଗ ଓ ଗୀତା ଜ୍ଞାନଯଜ୍ଞରୁ ଯାହା ମିଳେ ତାହା ଆଧ୍ୟାତ୍ମିକ ଜ୍ଞାନା ବ୍ୟକ୍ତିଗତ ଜୀବନ ପାଇଁ ଗୀତାଜ୍ଞାନ ଭଳି ଆଧ୍ୟାତ୍ମିକତାର ଆବଶ୍ୟକତା ରହିଛି। ଗୀତାଜ୍ଞାନ ଠାରୁ କୌଣସି ବଡ଼ ଗ୍ରନ୍ଥ ନାହିଁ ଗୀତାଜ୍ଞାନକୁ ବାସ୍ତବରେ ପରିଣତ କରିବା ପାଇଁ ପ୍ରୟାସ ଜାରି ରହିଛି ବୋଲି ପୁରୀ ଗଜପତି ଦିବ୍ୟସିଂହ ଦେବ ମତବ୍ୟକ୍ତ କରିଛନ୍ତି।

ସମ୍ମାନିତ ଅତିଥି ଭାବେ ରାଜ୍ୟ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଯୋଗ ଦେଇ ରାଜ୍ୟ ତଥା ଜାତୀୟସ୍ତରୀୟ ଶିକ୍ଷା ପଦ୍ଧତିରେ ମୌଳିକତାର ଅଭିବୃଦ୍ଧି ଓ ଦେଶାତ୍ମବୋଧକତାର ପରିସ୍ଫୁଟନ ତଥା ଆଧ୍ୟାତ୍ମିକ ବିଦ୍ୟାର ପ୍ରସାରଣ ନିମନ୍ତେ ସଂକଳ୍ପବଦ୍ଧ ରହିଥିବା ଦର୍ଶାଇ ଏଦିଗରେ ନିଆଯାଇଥିବା ପଦକ୍ଷେପ ଉପରେ ଆଲୋକପାତ କରିଥିଲେ। ଚିନ୍ମୟ ମିସନ୍ ଦକ୍ଷିଣ ଆଫ୍ରିକାର ରାଷ୍ଟ୍ରୀୟ ମୁଖ୍ୟ ବିଶ୍ୱଶାନ୍ତି ପୁରସ୍କାର ବିଜେତା ପୂଜ୍ୟ ସ୍ବାମୀ ଅଭେଦାନନ୍ଦଜୀ ତୁଳସୀ ରାମାୟଣ ଉଦ୍ଧୃତ ଭକ୍ତିର ୯ଟି ଅଦ୍ଭୁତ ରହସ୍ୟ ଓ ଆଦିଶଙ୍କରକୃତ ଦଶ ଶ୍ଲୋକ ଉପରେ ପ୍ରକାଶ କରିଥିଲେ।

ଚିନ୍ମୟ ମିସନ୍ ପକ୍ଷରୁ ୬୧ଟି ଶିକ୍ଷାନୁଷ୍ଠାନର ୨୫, ୧୬୭ ଶିଶୁ ଏକସ୍ଥାନରେ ଭାଗବତ ଗୀତା ପାଠ କରି ଇଣ୍ଡିଆ ବୁକ୍ ଅଫ୍ ରେକର୍ଡ଼ସରେ ସ୍ଥାନ ପାଇଥିବାରୁ ସମସ୍ତ ବିଦ୍ୟାଳୟ ପ୍ରମୁଖଙ୍କୁ ସମ୍ମାନିତ କରାଯାଇଥିଲା। .

ବ୍ରହ୍ମପୁର: ଗଞ୍ଜାମ ଜିଲ୍ଲାର ପୋଲସରା ତହସିଲ ଅନ୍ତର୍ଗତ ମଥୁରା ପଞ୍ଚାୟତ ମାରଦା ମନ୍ଦିର ଠାରେ କେନ୍ଦ୍ରୀୟ ବିଦ୍ୟାଳୟ ପ୍ରତିଷ୍ଠା କରିବା ପାଇଁ ଆସିକା ସାଂସଦ ଅନୀତି ପ୍ରିୟଦର୍ଶିନୀ ପଟ୍ଟନାୟକ ଦିଲ୍ଲୀ ସ୍ଥିତ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ତାଙ୍କ ବାସଭବନରେ ଗତକାଲି ଭେଟି ଏକ ଦାବିପତ୍ର ଉପସ୍ଥାପନ କରିଛନ୍ତି।

ଦିର୍ଘ ଦିନ ଧରି ଦାବି ହୋଇ ଆସୁଥିଲେ ମଧ୍ୟ ତାହା ଏପର୍ଯ୍ୟନ୍ତ ହୋଇପାରିନାହିଁ।ଦିର୍ଘ ଦିନ ରୁ ହୋଇ ଆସୁଥିବା ଦାବି ଓ ସାଂସଦ ଙ୍କ ପ୍ରୟାସରେ କେନ୍ଦ୍ର ଶିକ୍ଷାମନ୍ତ୍ରୀଙ୍କୁ ଅବଗତ କରାଇଥିବାରୁ ପୋଲସରା ନାଗରିକ ମଞ୍ଚ ସଭାପତି ତଥା ଆଇନଜୀବୀ ପୂର୍ଣ୍ଣଚନ୍ଦ୍ର ମିଶ୍ର ଓ ସମ୍ପାଦକ ମାନସ ରଞ୍ଜନ ତ୍ରୀପାଠୀ ସହିତ ବିଭିନ୍ନ ଅନୁଷ୍ଠାନ ଓ ଅଞ୍ଚଳର ଜନସାଧାରଣଙ୍କ ପକ୍ଷରୁ ସ୍ବାଗତ କରାଯାଇଛି। ଆଗାମୀ ଦିନରେ ମାରଦା ମନ୍ଦିର ଠାରେ ଖୁବ ଶୀଘ୍ର ପ୍ରତିଷ୍ଠା ହେବାର ଆଶା ସଂଚାର ହୋଇଛି।

ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ପାଗ ପୂରା ଓଲଟି ଯାଇଛି। ଲଘୁଚାପ ଜନିତ ଅଦିନିଆ ବର୍ଷା ପଶି ଆସିଛି। ଚାଷୀ କୁଳ ଉପରେ ଦାଉ ସାଜିଛି, ଜିଲ୍ଲାରେ ଝିପି ଝିପି ବର୍ଷା ଲାଗିରହିଛି। କେଉଁଠି ଅସରାଏ, କେଉଁଠି ଲାଗି ରହିଛି ଝିପିଝିପି ବର୍ଷା। ବାତାବରଣ ପୂରା ଥଣ୍ଡା, ପ୍ରବଳ ଶୀତ।

ଗତ ୨୪ଘଣ୍ଟା ମଧ୍ୟ ରେ ଗଞ୍ଜାମ ଜିଲ୍ଲାରେ ୯. ୫ ପ୍ରତିଶତ ହାର ରେ ୨୪୪. ୭ ମିଲିମିଟର ବର୍ଷା ହୋଇଥିବା ସୂଚନା ମିଳିଛି, ଛତ୍ରପୁରରେ ୧୭. ୨ ମିଲି ମିଟର ବର୍ଷା ହୋଇଥିବା ବେଳେ ଗଞ୍ଜାମ ରେ ୧୭. ୨ମିଲି ମିଟର, ପୁରୁଷୋତ୍ତମପୁର ରେ ୧୫ ମିଲି ମିଟର କବିସୂର୍ଯ୍ୟନଗର ରେ ୧୬ ମିଲି ମିଟର ବର୍ଷା ରେକର୍ଡ ହୋଇଛି।

ସେହିଭଳି ପୋଲସରାରେ ୧୪. ୪ମିଲି ମିଟର, କୋଦଳା ରେ ୫ ମିଲି ମିଟର, ଖଲ୍ଲିକୋଟ ରେ ୫ ମିଲି ମିଟର, ହିଞ୍ଜିଳିକାଟୁରେ ୧୫ ମିଲି ମିଟର, ରଙ୍ଗେଈଲୁଣ୍ଡା ରେ ୪ ମିଲି ମିଟର, କୁକୁଡ଼ାଖଣ୍ଡି ରେ ୬ ମିଲି ମିଟର, ଚିକିଟି ରେ ୧୮. ୮ ମିଲି ମିଟର, ପାତ୍ରପୁର ରେ ୨୪ ମିଲି ମିଟର, ଦିଗପହଣ୍ଡି ରେ ୬ ମିଲି ମିଟର, ଭଞ୍ଜନଗର ରେ ୨. ୮ ମିଲି ମିଟର, ବେଲଗୁଣ୍ଠା ରେ ୩.୨ ମିଲି ମିଟର, ଜଗନ୍ନାଥପ୍ରସାଦ ରେ ୨ ମିଲି ମିଟର, ବୁଗୁଡ଼ା ରେ ୪ ମିଲି ମିଟର, ଆସ୍କା ରେ ୧୨.୬ ମିଲି ମିଟର, ଶେରଗଡ଼ ରେ ୧୬. ୫ମିଲି ମିଟର, ସୋରଡ଼ା ରେ ୭ ମିଲି ମିଟର, ଗୋପାଳପୁର ଏ ନଏସି ରେ ୫ମିଲି ମିଟର, ବିଏମସି (ଗାନ୍ଧୀନଗର ) ରେ ୧୭ମିଲି ମିଟର ଓ ବିଏମସି (ବ୍ରଜ ନଗର ) ରେ ୧୭ ମିଲି ମିଟର ବର୍ଷା ହୋଇଥିବା ସୂଚନା ମିଳିଛି।

ବ୍ରହ୍ମପୁର: ଗଞ୍ଜାମ ଜିଲ୍ଲା ଶିକ୍ଷା ବିଭାଗର ଜିଲ୍ଲା ପ୍ରକଳ୍ପ ପରିଚାଳନା ୟୁନିଟ୍ (ଡିପିଏମ ୟୁ ) ର ବୈଠକ ଜିଲ୍ଲାପାଳଙ୍କ ସଦ୍ଭାବନା ସମ୍ମିଳନୀ କକ୍ଷଠାରେ ଅତିରିକ୍ତ ଜିଲ୍ଲାପାଳ (ରାଜସ୍ୱ) ସୁଧାଂଶୁ କୁମାର ଭୋଇଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି। ଜିଲ୍ଲା ଶିକ୍ଷା ଓ ତାଲିମ୍ ଅନୁଷ୍ଠାନ ଖଲ୍ଲିକୋଟ ଗଞ୍ଜାମର ଅଧ୍ୟକ୍ଷ ଡ ସନ୍ତୋଷ କୁମାର ପରିଡା ପ୍ରଥମ ଶ୍ରେଣୀରୁ ତୃତୀୟ ଶ୍ରେଣୀ ପିଲାଙ୍କୁ କିପରି ଶିକ୍ଷାଦାନ କରାଯାଇପାରିବ ତାହା ଉପରେ ଉପସ୍ଥିତ ପ୍ରଧାନ ଶିକ୍ଷକ/ପ୍ରଧାନ ଶିକ୍ଷୟିତ୍ରୀ, ବ୍ଲକ ଶିକ୍ଷା ଅଧିକାରୀ, ସି.ଆର୍.ସି.ସି. ତଥା ସମସ୍ତ ସଭ୍ୟମାନଙ୍କୁ ଉପସ୍ଥାପନା କରିଥିଲେ। ପିଲାଙ୍କ ଭାଷା ଓ ଗଣିତ ଜ୍ଞାନର ବିକାଶ କିପରି ହୋଇ ପାରିବ ତାହାହିଁ ଥିଲା ବୈଠକର ମୂଳ ଉଦ୍ଦେଶ୍ୟ। ପିଲାଙ୍କୁ ଉତ୍ତମ ଶିକ୍ଷାଦାନ ନିମନ୍ତେ ନିପୁଣ ଓଡିଶା କାର୍ଯ୍ୟକାରୀ କରାଯାଇଛି। ସଂଖ୍ୟା ପରିଚୟ, ଶୂନ୍ୟସ୍ଥାନ ପୂରଣ, ସଂଖ୍ୟାକ୍ରମ, ଅଧଃ କ୍ରମରେ ଓ ଉର୍ଦ୍ଧ୍ବ କ୍ରମରେ ସଂଖ୍ୟା ଲିଖନ, ସଂଖ୍ୟାର କ୍ରମ ଓ ରୂପ, ସଂଖ୍ୟାର ସ୍ଥାନୀୟମାନ, ପୁସ୍ତକ ପଠନ, ଯୋଗ, ବିୟୋଗ, ଜ୍ୟାମିତିକ ଆକୃତି, ଶବ୍ଦ ସଂଯୋଜନା ଆଦି ଶିଶୁ ମାନେ କିପରି ସହଜରେ ବୁଝି କରିପାରିବେ ତାହା ଉପରେ ତାଲିମ୍ ପ୍ରଦାନ କରିଥିଲେ।

ସି.ଆର୍.ସି.ସି ମାନେ ପ୍ରତ୍ୟେକ ମାସରେ କ୍ଲଷ୍ଟର ସ୍ତରୀୟ ବୈଠକ କରି ତାଲିମ ପ୍ରଦାନ କରିବାକୁ ସ୍ଥିର କରାଯାଇଛି। ଜିଲ୍ଲାର ପ୍ରତ୍ୟେକ ବିଦ୍ୟାଳୟକୁ ଉତ୍ତମ ଶିକ୍ଷାଦାନ ନିମନ୍ତେ ଶିକ୍ଷା ଉପକରଣ ଓ ସଂଖ୍ୟା ପରିଚୟ ଉପକରଣ କିଟ୍ ପ୍ରଦାନ କରାଯିବା ପାଇଁ ସ୍ଥିର କରାଯାଇଛି। ବ୍ଲକ୍ ସ୍ତରରେ ଓ କ୍ଲଷ୍ଚର ସ୍ତରରେ ନିୟମିତ ପ୍ରଫେସନାଲ ଲର୍ଣ୍ଣିଂ କମ୍ୟୁନିଟି ବୈଠକ କରି ଶିକ୍ଷାଦାନ କିପରି କରାଯାଉଛି ଜିଲ୍ଲା ଶିକ୍ଷାଧିକାରୀ, ଜିଲ୍ଲା ଶିକ୍ଷା ଓ ତାଲିମ୍ ଅନୁଷ୍ଠାନ ଖଲ୍ଲିକୋଟ ଗଞ୍ଜାମର ଅଧ୍ୟକ୍ଷ, ଅତିରିକ୍ତ ଜିଲ୍ଲା ଶିକ୍ଷାଧିକାରୀ, ବ୍ଲକ୍ ଶିକ୍ଷାଧିକାରୀ ଏବଂ ସି.ଆର୍.ସି.ସି, ମାନେ ତାହାର ତଦାରଖ କରିବାକୁ ନିଷ୍ପତ୍ତି ନିଆଯାଇଥିଲା। ଶିକ୍ଷା ବର୍ଷକୁ 2 ଭାଗରେ ବିଭକ୍ତ କରାଯାଇଛି।

ପ୍ରଥମଟି ବିଦ୍ୟାଳୟ ପ୍ରସ୍ତୁତି କାର୍ଯ୍ୟକ୍ରମ ଯାହାକି ପିଲା ମାନଙ୍କୁ ଓ୍ବାର୍କ ବୁକ୍ ଯୋଗାଇ ଦିଆଯିବା ସହିତ କ୍ରିୟାକଳାପ ମାଧ୍ୟମରେ ପୂର୍ବ ପାଠର ଆଲୋଚନା କରାଯିବ। ଦ୍ବିତୀୟଟି ଗ୍ରେଡ୍ ଲେବୁଲ୍ ପ୍ୟାକେଜ୍। ଏଥିରେ ପିଲାଙ୍କୁ ବିଷୟ ଭିତ୍ତିକ ଶିକ୍ଷାଦାନ କରାଯିବା ସହ ପିଲାଙ୍କ ଶିକ୍ଷା କ୍ଷେତ୍ରରେ କିପରି ଉନ୍ନତି ହୋଇଛି ତାହାର ମୂଲ୍ୟାଙ୍କନ କରାଯିବ। ଗୁଣାତ୍ମକ ଶିକ୍ଷାର ମାନ ବୃଦ୍ଧି ନିମନ୍ତେ ଏଫ୍.ଏଲ୍.ଏନ୍. ( ଫାଉଣ୍ଡେସନ୍ ଲିଟେରାସି ଆଣ୍ଡ ନ୍ୟୁମେରାଶି ) ହବ୍ ଛତ୍ରପୁରର କୌଣସି ଏକ ବିଦ୍ୟାଳୟରେ ସ୍ଥାପନ କରାଯିବା ପାଇଁ ସ୍ଥିର କରାଯାଇଛି।

ବୈଠକରେ ଜିଲ୍ଲା ଶିକ୍ଷାଧିକାରୀ ଅମୀତା ପଟ୍ଟନାୟକ, ଜିଲ୍ଲା ମଙ୍ଗଳ ଅଧିକାରୀ, ଜିଲ୍ଲା ସମାଜ ମଙ୍ଗଳ ଅଧିକାରୀ ଆବିଦା ପରବୀନ୍, ଛତ୍ରପୁର ବ୍ଲକ୍ ଶିକ୍ଷାଧିକାରୀ, ଜିଲ୍ଲା ଶିକ୍ଷା ଓ ତାଲିମ୍ ଅନୁଷ୍ଠାନ ଖଲ୍ଲିକୋଟ ଗଞ୍ଜାମର ଡ. ନିହାରିକା ସାମନ୍ତରାୟ, ଶୈକ୍ଷିକ ସଂଯୋଜକ ଡ ସନ୍ତୋଷ କୁମାର ପଣ୍ଡା, ସି.ଆର୍.ସି.ସି. ରାଜପୁର ଲକ୍ଷ୍ମଣ ସେଠୀ, ବକ୍ସିପଲ୍ଲୀ ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ କୈଳାଶ ଶବର, କତୁରୁ ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ କୈଳାଶ ଚନ୍ଦ୍ର ବେହେରା, ସମନ୍ବୀତ ଶିଶୁ ବିକାଶ ପ୍ରକଳ୍ପ ଅଧିକାରୀ, କ୍ୟୁରେସ୍ ପ୍ରକଳ୍ପ ପରିଚାଳକ, ଛତ୍ରପୁର ରାମ କୃଷ୍ଣ ପଣ୍ଡା ଓ ଅନ୍ୟାନ୍ୟ ଅଧିକାରୀଗଣ ଉପସ୍ଥିତ ଥିଲେ।

ଛତ୍ରପୁର: ବାଲ୍ୟ ବିବାହକୁ ପ୍ରତିହତ କରିବାକୁ ଅନେକ ଆଇନ ଓ ବ୍ୟବସ୍ଥା ରହିଥିଲେ ମଧ୍ୟ ବାଲ୍ୟ ବିବାହ ସଂପୂର୍ଣ୍ଣ ଭାବେ ବନ୍ଦ ହୋଇ ପାରିନାହିଁ। ଏବେବି କେଉଁଠି ନା କେଉଁଠି ଲୁଚା ଛପାରେ ବାଲ୍ୟ ବିବାହ ହେଉଛି। ଗଞ୍ଜାମ ଜିଲ୍ଲାରେ ବାଲ୍ୟ ବିବାହ, କନ୍ୟା ଭୃଣ ହତ୍ୟା, ଶିଶୁ ଶ୍ରମିକ ରୋକିବା ଉପରେ ପ୍ରଶାସନ ପକ୍ଷରୁ ବିଭିନ୍ନ ପଦକ୍ଷେପମାନ ଗ୍ରହଣ କରାଯାଉଛି।

ଗଞ୍ଜାମ ଜିଲାରେ ୮ ବର୍ଷ ମଧ୍ୟରେ ୧୦୧୦ଟି ବାଲ୍ୟ ଲ୍ୟବିବାହ ରୋକାଯାଇ ଥିବା ବେଳେ ଚଳିତ ବର୍ଷ ଅକ୍ଟୋବର ମାସ ସୁଦ୍ଧା ୫୫ଟି ବାଲ୍ୟ ବିବାହ ରୋକାଯାଇଥୂବା ଜିଲ୍ଲା ପ୍ରଶାସନ ପକ୍ଷରୁ ସୂଚନା ମିଳିଛି। ଜିଲ୍ଲା ପ୍ରଶାସନ ବାଲ୍ୟ ବିବାହ ଓ ଶିଶୁ ଶ୍ରମିକ ନିରାକରଣ ସମ୍ବନ୍ଧରେ ବିଭିନ୍ନ କାର୍ଯ୍ୟକ୍ରମ ହାତକୁ ନେଇଥିବା ସତ୍ତ୍ୱେ ଏବେ ବି ଗଞ୍ଜାମ ଜିଲ୍ଲାରେ ବାଲ୍ୟ ବିବାହ ଲୋପ ପାଇପାରୁନାହିଁ।

ବ୍ରହ୍ମପୁର: ଗଞ୍ଜାମ ଜିଲ୍ଲା ଚିକିଟି ବ୍ଲକ ପିତାତଳି ପଞ୍ଚାୟତ ଜଗନ୍ନାଥପୁର ଗ୍ରାମର ଦୁଇ ଜଣ ମହିଳା ଭୁବନେଶ୍ୱର ପାଚିକା ସଙ୍ଘର ସଭାରେ ଯୋଗ ଦେବାକୁ ଯିବା ପାଇଁ ସୁରଳ ରେଳଷ୍ଟେସନରେ ଟ୍ରେନରେ ଚଢ଼ୁଥିବାବେଳେ ଏଭଳି ଅଭାବନୀୟ ଘଟଣା ଘଟିଛି। ଉଭୟ ଟ୍ରେନରେ ଚଢ଼ୁଥିବାବେଳେ ଭାରସାମ୍ୟ ହରାଇ ଖସି ପଡ଼ିଥିଲେ। ଘଟଣାସ୍ଥଳରେ ଉଭୟଙ୍କର ଶୋଚନୀୟ ମୃତ୍ୟୁ ଘଟିଛି।

ଉଭୟ ମହିଳା ଜଗନ୍ନାଥପୁର ସ୍କୁଲର ପାଚିକା ସହାୟିକା ଭାବେ କାର୍ଯ୍ୟ କରୁଥୁଲେ। ଜଣଙ୍କ ନାଁ ପାର୍ବତୀ ଗୌଡ଼ ହୋଇଥିବାବେଳେ ଅନ୍ୟଜଣଙ୍କ ନାଁ ଝୁନୁ ଗୌଡ ବୋଲି ଜଣାପଡ଼ିଛି। ଏ ନେଇ ଆରପିଏଫରେ ମାମଲା ରୁଜୁ ହେବାସହ ଶବ ବ୍ୟବଛେଦ ପାଇଁ ପଠାଯାଇଛି। ଏହି ଦୁଃଖଦ ଘଟଣା ସାରା ଚିକିଟି ବ୍ଲକରେ ଶୋକର ଛାୟା ଖେଳାଇଦେଇଛି।

ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଚଳିତ ବର୍ଷ ପଞ୍ଜିକୃତ ସମସ୍ତ ଚାଷୀଙ୍କ ଠାରୁ ଯେପରି ସୁରୁଖୁରୁରେ ଧାନ କିଣା ଯିବ ସେଥିପାଇଁ ପ୍ରଶାସନ ପକ୍ଷରୁ ପ୍ରସ୍ତୁତିକୁ ଜୋରଦାର କରାଯାଇଛି। ଆଜି ଏନେଇ ଗଞ୍ଜାମ ଜିଲ୍ଲାର ଭଞ୍ଜନଗର ନିୟନ୍ତ୍ରିତ ବଜାର କମିଟି ପ୍ରାଙ୍ଗଣରେ ଏକ କୃଷକ ପ୍ରଚାର ରଥ ଶୁଭାରମ୍ଭ ହୋଇଛି। ଉପଜିଲ୍ଲାପାଳ ଅନିଲ କୁମାର ସେଠୀ ମୁଖ୍ୟ ଅତିଥି ଭାବେ ଯୋଗ ଦେଇ ସବୁଜ ପତାକା ଦେଖାଇ ଉକ୍ତ ରଥକୁ ଶୁଭାରମ୍ଭ କରିଛନ୍ତି। ଉକ୍ତ ରଥ ଆଜି ଠାରୁ ଉପଖଣ୍ଡର ବିଭିନ୍ନ ଗାଁ ପରିକ୍ରମା କରି ଚଳିତବର୍ଷର ଧାନ କିଣା ବାବଦରେ ଚାଷୀମାନଙ୍କୁ ସଚେତନ କରିବ।

ଏହା ସହ ଚାଷୀ ଯେପରି ମଣ୍ଡିକୁ ଖାଦ୍ୟ ଉପଯୋଗୀ, ଶୁଖିଲା, ପରିସ୍କାର, ସମରଙ୍ଗୀ, ସମଆକାର, ଏକ କିସମ ହୋଇଥିବା ସହ ପୋକରା ଦୁର୍ଗନ୍ଧ ଓ ବିଷାକ୍ତ ପଦାର୍ଥ ମୁକ୍ତ ହୋଇଥିବା ଧାନ ଧରି ଆଣିବା ସହ ୨୩୦୦ ଟଙ୍କାର ସର୍ବନିମ୍ନ ସହାୟକ ମୂଲ୍ୟ ଓ ୮୦୦ ଟଙ୍କାର ଇନପୁଟ୍ ସହାୟତା ପାଇବେ ସେ ନେଇ ପ୍ରଚାର ମାଧ୍ୟମରେ ଅବଗତ କରାଯିବ। ପ୍ରଚାର ରଥ ଶୁଭାରମ୍ଭ ସମୟରେ ଆରଏମସି ସଂପାଦକ ସୁମନ୍ତ କୁମାର ସାହୁଙ୍କ ସମେତ ଆରଏମସିର ସମସ୍ତ କର୍ମଚାରୀ ଉପସ୍ଥିତ ଥିଲେ।

ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଗଞ୍ଜାମ ଜିଲ୍ଲା କବିସୂର୍ଯ୍ୟ ନଗର ଥାନା ଅର୍ନ୍ତଗତ ମୋହନାପଲୀ ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ଯେଉଁଠାରେ ଲକ୍ଷ୍ମୀ ବସ୍ ଓଲଟି ୩ ଗୁରୁତର ଆହତ ହୋଇଛନ୍ତି। ଗୁରୁତର ଅବସ୍ଥାରେ ୩ ମହିଳା କବିସୂର୍ଯ୍ୟ ନଗର ଡାକ୍ତରଖାନାରେ ଚିକିତ୍ସିତ ହେଉଛନ୍ତି।

ସୁଚନା ଅନୁଯାୟୀ, ଏହି ଗାଁ ରୁ ଯାତ୍ରୀବାହୀ ଲକ୍ଷ୍ମୀ ବସ୍ କବିସୂର୍ଯ୍ୟ ନଗର ଅଭିମୁଖେ ଯାଉଥିବା ବେଳେ ମୋହନାପଲୀ ଗ୍ରାମରେ ରାସ୍ତାକଡ଼ ବିଲ ଭିତରକୁ ଓଲଟି ପଡ଼ିଥିଲା। ଉକ୍ତ ଗାଡିରେ ଯାତ୍ରା କରୁଥିବା ୧୦ ଜଣଙ୍କ ମଧ୍ୟରୁ ୩ ଜଣ ଗୁରୁତର ଆହତ ହୋଇଛନ୍ତି।

ଖବର ପାଇ ଗାଁ ଲୋକ, ସରପଞ୍ଚ ଓ ସମିତି ସଭ୍ୟ ପ୍ରମୁଖ ଘଟଣାସ୍ଥଳରେ ପହଞ୍ଚି ଆହତ ଯାତ୍ରୀମାନଙ୍କୁ ଉଦ୍ଧାର କରି ଡାକ୍ତରଖାନାକୁ ପଠାଇ ଥିଲେ। ଅନ୍ୟପକ୍ଷରେ କବିସୂର୍ଯ୍ୟ ନଗର ଥାନା ପୋଲିସ୍ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି।

ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଗଞ୍ଜାମ ଜିଲ୍ଲା ବ୍ରହ୍ମପୁର ସ୍ଥିତ ଏମକେସିଜି ମେଡିକାଲ କଲେଜର ପ୍ରସୂତି ଓ ସ୍ତ୍ରୀ ରୋଗ ବିଭାଗ ଆଉଟ୍ ଡୋରରେ ପ୍ରଧାନମନ୍ତ୍ରୀ ସୁରକ୍ଷିତ ମାତୃତ୍ଵ ଅଭିଯାନ (ପିଏମଏସଏମଏ) କକ୍ଷ ଉଦଘାଟିତ ହୋଇଛି। ଡିନ୍ ତଥା ଅଧ୍ୟକ୍ଷା ଡା. ସୁଚିତ୍ରା ଦାସ, ରେଜିଷ୍ଟ୍ରାର ସଂଗ୍ରାମ ପଣ୍ଡା, ପ୍ରସୂତି ବିଭାଗ ମୁଖ୍ୟ ପ୍ରଫେସର ଡା. ସଂଘମିତ୍ରା ମହାପାତ୍ର, ଏନ୍‌ଏଚ୍ଏମର ବିଭାଗ ସରୋଜ ପାଣିଗ୍ରାହୀ ପ୍ରମୁଖ ଉପସ୍ଥିତ ଥିଲେ।

ମାତୃ ଓ ଶିଶୁ ମୃତ୍ୟୁହାର କମ କରିବା ଲକ୍ଷ୍ୟରେ ପ୍ରତ୍ୟେକ ମାସ ୯ ତାରିଖରେ ଗର୍ଭବତୀଙ୍କୁ ମାଗଣା ଓ ଗୁଣଯୁକ୍ତ ଚିକିତ୍ସା ସେବା ଯୋଗାଇବା ହେଉଛି ଏହି ଅଭିଯାନର ମୂଳ ଲକ୍ଷ୍ୟ।

ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଗଞ୍ଜାମ ପୁଲିସ ଜିଲ୍ଲାରେ ଇନ୍‌ସ୍ପେକ୍ଟର୍‌ ସ୍ତରରେ ୫ ଜଣଙ୍କୁ ଅଦଳବଦଳ କରାଯାଇଅଛି। ଜିଲ୍ଲା ପୁଲିସ ମୁଖ୍ୟାଳୟରେ ଥିବା ଆଇଆଇସି ଦୀପ୍ତିରଂଜନ ବେହେରାଙ୍କୁ ପାଟପୁର ଥାନାକୁ ବଦଳି ହୋଇଛି।

ସେହିପରି ମୁଖ୍ୟାଳୟରେ ଥିବା ରେବତି ଶବର ଙ୍କୁ ତାରସିଂ ଥାନା, ପାଟପୁର ଥାନାରେ କାର୍ଯ୍ୟରତ ସବ୍ୟସାଚୀ ମଲ୍ଲଙ୍କୁ ଚମାଖଣ୍ଡି ଥାନାକୁ ବଦଳି କରାଯାଇଛି। ଚମାଖଣ୍ଡି ଥାନାରେ କାର୍ଯ୍ୟରତ ଇନ୍‌ସ୍ପେକ୍ଟର୍ ଦୀପିକା ଦେବୀ ରାୟଙ୍କୁ କୋଟିନଡ଼ା ଥାନା ଓ ତାରସିଂ ଥାନାରେ କାର୍ଯ୍ୟରତ ଇନ୍‌ସ୍ପେକ୍ଟର୍ ବିଜୟ କୁମାର ସ୍ବାଇଁଙ୍କୁ ଛତ୍ରପୁର ସ୍ଥିତ ମୁଖ୍ୟାଳୟକୁ ବଦଳି କରାଯାଇଛି।

ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଗଞ୍ଜାମ ଜିଲ୍ଲା ଆଥଲେଟିକ୍ ଆସୋସିଏସନ୍ ଦ୍ଵାରା ବ୍ରହ୍ମପୁର ମହାତ୍ମାଗାନ୍ଧୀ ଖେଳପଡିଆ ଠାରେ ଆୟୋଜିତ ବକ୍ସିଂ ପୁରୁଷ ଓ ମହିଳା ଚୟନ ଶିବିର ରେ ଦୁଇ ଦଳଙ୍କ ଚୟନ ହୋଇଯାଇଛି। ଏହି ଶିବିରକୁ ମହାତ୍ମାଗାନ୍ଧୀ ଷ୍ଟାଡିୟମ୍ ଇନ୍ ଚାର୍ଜ ସଞ୍ଜୀବ କୁମାର ସାହୁ, ଗଞ୍ଜାମ ଜିଲ୍ଲା ବକ୍ସିଂ ସମ୍ପାଦକ କେ ପ୍ରଭାକର ରାଓ, ବକ୍ସିଂ କୋଚ୍ ରିଫେରୀ ଜଜ୍ ଲଡୁ କିଶୋର ସାହୁ, ଅନ୍ତର୍ଜାତୀୟ ରିଫେରୀ ଜଜ୍ ତଥା ସ୍ଥାନୀୟ କୋଚ୍ ଶ୍ରୀ ଶିଶିର କୁମାର ପାଣିଗ୍ରାହୀ, ଶିବ ପାତ୍ର,ଉପସ୍ଥିତ ରହି ଏହି ଶିବିରକୁ ସୂଚାରୁ ରୂପେ ପରିଚାଳନା କରିଥିଲେ।

ପୁରୁଷ ଦଳରେ ଏସ୍ ସାଇ ପ୍ରତାପ, ଏସ୍ ସାଇ କୁମାର, ପ୍ରବୀଣ କୁମାର ସେଠୀ ,ବି ନୀଳକଣ୍ଠ , ଏସ୍ ମୁରଲୀ ,ବିପିନି ଗୌଡ଼ , ଆଦିତ୍ୟ ମହାନ୍ତି ଚୟନ ହୋଇଥିବା ବେଳେ ଆଉ ଅତିରିକ୍ତ ୪ ଜଣ ବକ୍ସରଙ୍କୁ ରଖାଯାଇଛି। ସେହିପରି ମହିଳା ଦଳରେ ଏ ରିତୁ ରାଓ, ଜ୍ୟୋତି ବେହେରା, ସୃତିଶା ପାଣିଗ୍ରାହି, ଆୟୁଷ୍ମିତା ପାଣିଗ୍ରାହି, ସୁନିତା ଗୌଡ଼, ମନସ୍ଵିନୀ ସାବତ ପ୍ରମୁଖ ସ୍ଥାନ ପାଇଛନ୍ତି।

ଭୁବନେଶ୍ଵର: ସରକାରଙ୍କ ଆଳୁ ମିଶନ୍ ଯୋଜନାରେ ଗଞ୍ଜାମ ଜିଲ୍ଲାର ପାତ୍ରପୁର ବ୍ଲକ୍‌ରେ ମଧ୍ୟ ଆଳୁଚାଷ ପାଇଁ ପ୍ରସ୍ତୁତି ଆରମ୍ଭ ହୋଇଛି। ଏଥିପାଇଁ ଗତକାଲି ଅପରାହ୍ନରେ ବ୍ଲକ୍‌କୁ ୬୦୦ ବସ୍ତା ବିହନ ଆସିଛି। ବ୍ଲକର ତଣ୍ଡିପୁର, ପଦାଦିଗି, ଭୀମପୁର, ସୁରଙ୍ଗୀ, ଆଙ୍କୁଲି, ଖାରିଆଗୁଡ଼ା ଓ ସୁବର୍ଣ୍ଣପୁର ପ୍ରମୁଖ ଗ୍ରାମର ଚାଷୀଙ୍କୁ ଏହି ବିହନ ଯୋଗାଇ ଦିଆଯାଉଥିବା ସୂଚନା ମିଳିଛି।

ଉକ୍ତ ଗ୍ରାମ ଗୁଡ଼ିକରେ ଆଳୁ ସମେତ ପନିପରିବା ଚାଷ ପାଇଁ ପରିବେଶ ଓ ଜମିର ମାଟି ଅନୁକୂଳ ରହିଛି। ଉଦ୍ୟାନ ବିଭାଗ ପକ୍ଷରୁ ୨୦୨୪-୨୫ ବର୍ଷ ପାଇଁ ୦.୯ ହେକ୍ଟର୍ ଚାଷ ଜମି ପାଇଁ ୫ ପ୍ୟାକେଟ୍ ଆଳୁ ବିହନ ଯୋଗାଇ ଦିଆଯିବ। ଏହି ବାବଦକୁ ଚାଷୀ ୫ ହଜାର ୨ ଶହ ଟଙ୍କା ଜମା କରିବେ। ସବ୍‌ସିଡ଼ି ବାବଦକୁ ୨୬ ଟଙ୍କା ଫେରି ପାଇବେ।

ଉକ୍ତ ସମଗ୍ର ଗ୍ରାମରେ ଆଳୁଚାଷ ହେଲେ କମ୍ ଦରରେ ଆଳୁ ବିକ୍ରି ହେବ ବୋଲି ଅନୁମାନ କରାଯାଉଛି। ପୂର୍ବରୁ ପଦାଦିଗି ଗ୍ରାମ ସମେତ ବିଭିନ୍ନ ଗ୍ରାମରେ ଫୁଲକୋବି, ଫଳକୋବି, ବନ୍ଧାକୋବି, ଚମାଟୋ, ବାଇଗଣ, ଭେଣ୍ଡି, ଲଙ୍କା, ଦେଶୀଆଳୁ ଓ ସାରୁ ଏବଂ ବିଭିନ୍ନ ପନିପରିବା ଚାଷ ହେଉଛି।

ଚଳିତ ବର୍ଷ ଆଳୁଚାଷ ହେଲେ ଚାଷୀ ଅଧିକ ଲାଭବାନ୍ ହେବେ ବୋଲି ଆଶା କରାଯାଉଛି।

ବ୍ରହ୍ମପୁର: ଗଞ୍ଜାମ ଜିଲ୍ଲା ବ୍ରହ୍ମପୁର ଠାରେ ଆଜି ପୂର୍ବାହ୍ନ ରେ ବ୍ରହ୍ମପୁର ପୋଲିସ୍ ଜିଲ୍ଲା ର ହେଡ୍ କ୍ୱାଟରରେ ଏକ ଆଭାସୀ କୋର୍ଟ କୁ ଦକ୍ଷିଣାଞ୍ଚଳ ଡ଼ିଆଇଜି ଡକ୍ଟର ସାର୍ଥକ ଷଡ଼ଙ୍ଗୀ ଉଦ୍ଘାଟନ କରିଛନ୍ତି। ତାଙ୍କ ସହ ବ୍ରହ୍ମପୁର ଆରକ୍ଷୀ ଅଧିକ୍ଷକ ଶ୍ରବଣା ବିବେକମ ଉପସ୍ଥିତ ରହିଥିଲେ। ଏହା ଦ୍ଵାରା ପୋଲିସ୍ ଅଧିକାରୀ ମାନେ ଓଡ଼ିଶାର ବିଭିନ୍ନ କୋର୍ଟ ରେ ସାକ୍ଷ୍ୟ ପ୍ରଦାନ କରିବାରେ ଉପକୃତ ହୋଇପାରିବେ ଏବଂ ବହୁ ମୂଲ୍ୟବାନ ସମୟକୁ ବଞ୍ଚାଇପରିବେ।