ଭୁବନେଶ୍ୱର: ଗୋନାସିକା ମହୋତ୍ସବ ହେଉଛି ଆମ କଳା, ସଂସ୍କୃତି, ପରମ୍ପରା ଓ ମାନବବାଦର ଏକ ଅପୂର୍ବ ସଂଗମ। ଗୋନାସିକା ପର୍ବତମାଳା ଓ ବୈତରଣୀ ନଦୀ ଏ ମାଟିକୁ ପବିତ୍ର କରିଛି। ଗୋନାସିକା ମହୋତ୍ସବ ଆମ ସମୃଦ୍ଧ ସଂସ୍କୃତିର ପ୍ରକୃତ ନିଦର୍ଶନ ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ବୁଧବାର ସଂଧ୍ୟାରେ କେନ୍ଦୁଝର ଠାରେ ଗୋନାସିକା ମହୋତ୍ସବ ଉଦ୍ଘାଟନ କରିବା ଅବସରରେ କହିଛନ୍ତି।
ମୁଖ୍ୟମନ୍ତ୍ରୀ କହିଥିଲେ ଯେ ଆମ ଦେଶର ସଂସ୍କୃତି ଓ ପରମ୍ପରା ଅନନ୍ୟ। ଏହାକୁ ବଞ୍ଚାଇ ରଖିବା ଆମ ସମସ୍ତଙ୍କର ନୈତିକ ଦାୟିତ୍ବ। ଆଗାମୀ ଜାନୁଆରୀ ମାସରେ ଓଡିଶାରେ ପ୍ରବାସୀ ଭାରତୀୟ ଦିବସ ଅନୁଷ୍ଠିତ ହେବ। ସାରା ବିଶ୍ବରୁ ହଜାର ହଜାର ପ୍ରବାସୀ ଭାରତୀୟ ଏଥିରେ ଯୋଗ ଦେବେ। ଏହି ଅବସରରେ ଆମ ରାଜ୍ୟର ଲୋକକଳା, ସଂସ୍କୃତି ଓ ପରମ୍ପରା ବିଶ୍ବ ବିଦିତ ହେବ ବୋଲି ମୁଖ୍ୟମନ୍ତ୍ରୀ କହିଥିଲେ।
ସେ କହିଥିଲେ ଯେ ଗୋନାସିକା ମହୋତ୍ସବ ଯେବେ ଠାରୁ ଆରମ୍ଭ ହୋଲାଣି, ମୁଁ ଏହାର ଅଂଶବିଶେଷ ଭାବେ ରହିଆସିଛି। ପଦପଦବୀ ଆସିବ ଯିବ। କେନ୍ଦୁଝରର ଜଣେ ସାଧାରଣବାସୀ ଭାବେ ମୁଁ ଏହି ମହୋତ୍ସବରେ ଯୋଡି ହୋଇ ରହିଛି ଓ ରହିବି। କେନ୍ଦୁଝରର ସଂସ୍କୃତି, ଏଠାକାର ଆଦିବାସୀ ସଂସ୍କୃତି ବିନା କଳ୍ପନା କରିବା ଅସମ୍ଭବ। ଜିଲ୍ଲାର ୪୫ ପ୍ରତିଶତରୁ ଅଧିକ ଅଧିବାସୀ ହେଉଛନ୍ତି ଆଦିବାସୀ ସଂପ୍ରଦାୟର। ଜୁଆଙ୍ଗ, କୋଲ୍ହ, ଭୂୟାଁ, ସାନ୍ତାଳ, ଗୋଣ୍ଡୋ, ବାଥୁଡି, ଲୋଧା, ଭୂମିଜ ଇତ୍ୟାଦି ସଂପ୍ରଦାୟ ଜିଲ୍ଲାକୁ ସମୃଦ୍ଧ କରିଛନ୍ତି। ଏହି ମାଟିର ପରମ୍ପରା ଅନନ୍ୟ। କେନ୍ଦୁଝରର ଇଷ୍ଟଦେବୀ ଘଟଗାଁ ମା ତାରିଣୀଙ୍କ କରୁଣାରୁ ସମସ୍ତଙ୍କ ଦୁଃଖକଷ୍ଟ ଓ ବିପଦ ତାରଣ ହେଉଛି। ଏହି ମହୋତ୍ସବ ମାଧ୍ୟମରେ କେନ୍ଦୁଝର ମାଟିର କଥା, ସଂସ୍କୃତି, ଐତିହ୍ୟ ଓ ପରମ୍ପରାକୁ ଜାଣିବାର ଅବସର ଆସିଛି ଏବଂ ଲୋପ ପାଇଯାଉଥିବା କଳା ଓ ସଂସ୍କୃତିକୁ ଉଜ୍ଜିବୀତ କରିବାର ଅବସର ଆଣିଛି।
ସେ ପୁଣି କହିଥିଲେ ଯେ କେନ୍ଦୁଝରର ଗମନାଗମନ ବ୍ୟବସ୍ଥାକୁ ଆହୁରି ସୁଗମ କରିବା ପାଇଁ ବାଦାମପାହାଡରୁ କେନ୍ଦୁଝର ପର୍ଯ୍ୟନ୍ତ ନୂଆ ଟ୍ରେନ ଚାଲିବ ଏବଂ ବଡବିଲ୍ରୁ ଚଣ୍ଡିଖୋଲ ପର୍ଯ୍ୟନ୍ତ ରାସ୍ତାକୁ ପ୍ରଶସ୍ତିକରଣ କରାଯାଇ ୬-ଲେନ୍ ବିଶିଷ୍ଟ କରାଯିବ। ଏହାଦ୍ବାରା ଗମନାଗମନ ସୁଗମ ହେବା ସହିତ ପର୍ଯ୍ୟଟନ ଓ ଶିଳ୍ପାୟନ ପାଇଁ ବିରାଟ ପଥ ଉନ୍ମୁକ୍ତ ହେବ। କେନ୍ଦୁଝରର ଖଣିଜ ସଂପଦର ସଦୁପୋଯୋଗ ପାଇଁ ଆଗାମୀ ଦିନରେ କେନ୍ଦୁଝରରେ ଏକ ମେଗା ଷ୍ଟିଲ ପ୍ଲାଣ୍ଟ ସ୍ଥାପନ କରାଯିବ। ଜିଲ୍ଲାର ହଜାର ହଜାର ଯୁବଗୋଷ୍ଠୀ ଏହା ମାଧ୍ୟମରେ ନିଯୁକ୍ତି ପାଇବେ। ସେ ପୁଣି କହିଥିଲେ ଯେ ଆଗାମୀ ଜାନୁଆରୀ ମାସରେ ଭୁବନେଶ୍ବରରେ ଆୟୋଜିତ ହେବ ଉତ୍କର୍ଷ ଓଡିଶା । ଏଥିରେ ରେକର୍ଡ ସଂଖ୍ୟକ ଶିଳ୍ପାନୁଷ୍ଠାନ ଅଂଶଗ୍ରହଣ କରିବେ। ଏହା ମାଧ୍ୟମରେ ରାଜ୍ୟର ଲକ୍ଷ ଲକ୍ଷ ଯୁବବର୍ଗ ରୋଜଗାର ପାଇବେ।
ଉପସ୍ଥିତ କେନ୍ଦୁଝରବାସୀଙ୍କୁ ଉଦ୍ବୋଧନ ଦେଇ ମୁଖ୍ୟମନ୍ତ୍ରୀ ଆହୁରି କହିଥିଲେ ଯେ ମହିଳା ଓ କୃଷକଙ୍କ ସଶକ୍ତିକରଣ ପ୍ରତି ଆମ ସରକାର ପ୍ରାଧାନ୍ୟ ଦେଉଛନ୍ତି। ରାଜ୍ୟରେ ସୁଭଦ୍ରା ଯୋଜନାରେ ଏବେ ୮୦ ଲକ୍ଷରୁ ଅଧିକ ମହିଳା ଉପକୃତ ହେଉଛନ୍ତି । ଆଗାମୀ ଦିନରେ ୧ କୋଟିରୁ ଅଧିକ ମହିଳା ଏଥିରେ ସାମିଲ ହୋଇ ସଶକ୍ତ ହେବେ। ସେହିଭଳି ଆମ ସରକାରଙ୍କ ଆଉ ଏକ ଯୁଗାନ୍ତକାରୀ ପଦକ୍ଷେପ ହେଉଛି ଧାନ ବିକ୍ରୀ ବାବଦକୁ କ୍ବିଣ୍ଟାଲ ପିଚ୍ଛା ୮୦୦ ଟଙ୍କା ଇନ୍ପୁଟ ସହାୟତା ପ୍ରଦାନ। ଏଥିରେ ରାଜ୍ୟର ୧୭ ଲକ୍ଷ ଚାଷୀ ଉପକୃତ ହେବେ।
କେନ୍ଦୁଝର ମାଟିର ଇତିହାସକୁ ସ୍ମରଣ କରି କହିଥିଲେ ଯେ ଏ ମାଟି ହେଉଛି ବୀରଙ୍କ ମାଟି । ଏ ମାଟିର ବୀରତ୍ବର ଗାଥା ଅନ୍ୟ ମାନଙ୍କ ପାଇଁ ଉଦାହରଣ ପାଲଟିଛି । ବିପ୍ଳବୀ ଧରଣୀଧର ନାୟକଙ୍କ ନେତୃତ୍ବରେ ଏ ମାଟିରେ ଯେଉଁ ପ୍ରଜାମୁକ୍ତି ଆନ୍ଦୋଳନ ତେଜିଆନ ହୋଇଥିଲା, ତାହା କେବଳ ଓଡିଶାରେ ନୁହେଁ, ବରଂ ଭାରତବର୍ଷର ଗଡଜାତ ଇତିହାସରେ ରାଜତନ୍ତ୍ର ବିଲୋପ ସାଧନ ଦିଗରେ ସର୍ବପ୍ରଥମ ପ୍ରଜା ଆନ୍ଦୋଳନ।
ମୁଖ୍ୟମନ୍ତ୍ରୀ କହିଥିଲେ ଯେ ଆମ ପାଖରେ ପର୍ଯ୍ୟାପ୍ତ ସୁଯୋଗ ଅଛି ଆମ ଜିଲ୍ଲାର ଥିବା ସମସ୍ତ ସମ୍ଭାବନାକୁ ଉଚିତ ମାର୍ଗରେ ନେଇ ସ୍ବପ୍ନ ପୂରଣ କରିବାକୁ । ଏଥିପାଇଁ ମୁଁ ଦିନରାତି କାମ କରିବି।
ଉଦ୍ଘାଟନୀ ସମାରୋହକୁ ଜିଲାପାଳ ବିଶାଲ ସିଂହ ଅଧ୍ୟକ୍ଷତା କରି ସ୍ୱାଗତ ଅଭିଭାଷଣ ପ୍ରଦାନ କରିଥିବା ବେଳେ ଜଙ୍ଗଲ, ପରିବେଶ, ଜଳବାୟୁ ପରିବର୍ତ୍ତନ ଓ ଶ୍ରମ ମନ୍ତ୍ରୀ ଗଣେଶରାମ ସିଂ ଖୁଣ୍ଟିଆ, ଘସିପୁରା ବିଧାୟକ ବଦ୍ରି ନାରାୟଣ ପାତ୍ର, ତେଲକୋଇ ବିଧାୟକ ଡାକ୍ତର ଫକୀର ମୋହନ ନାୟକ, ପାଟଣା ବିଧାୟକ ଅଖିଳ ଚନ୍ଦ୍ର ନାୟକ, ଚମ୍ପୁଆ ବିଧାୟକ ସନାତନ ମହାକୁଡ, ଆନନ୍ଦପୁର ବିଧାୟକ ଅଭିମନ୍ୟୁ ସେଠୀ, ଜିଲାପରିଷଦ ସଭାପତି ସାଗରିକା ସାହୁ, ଆରକ୍ଷୀ ଅଧିକ୍ଷକ ନିତିନ କୁଶଲକର, କେନ୍ଦୁଝର ବନଖଣ୍ଡ ଅଧିକାରୀ ଧନରାଜ ଏଚ.ଡି ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇ ୫ ଦିନବ୍ୟାପୀ ଏହି ମହୋତ୍ସବର ସଫଳତା କାମନା କରିଥିଲେ । ଏହି ଅବସରରେ ‘ପ୍ରଜାପତିର ହସ’ କବିତା ସଙ୍କଳନକୁ ମଞ୍ଚାସୀନ ଅତିଥିଗଣ ଉନ୍ମୋଚନ କରିଥିଲେ । ସୁବ୍ରତ ସ୍ୱାଇଁଙ୍କ ଦ୍ୱାରା ଲିଖିତ କେନ୍ଦୁଝର ଉପରେ ପର୍ଯ୍ୟବେସିତ ଥିମ ସଙ୍ଗ ଉଦଘାଟିତ ହୋଇଥିଲା। ଶେଷରେ ଜିଲା ସଂସ୍କୃତି ଅଧିକାରୀ ରମେଶ ଚନ୍ଦ୍ର ନାୟକ ଧନ୍ୟବାଦ ଅର୍ପଣ କରିଥିଲେ। ମହୋତ୍ସବ ପ୍ରଥମ ସନ୍ଧ୍ୟାରେ ଡ୍ରୋନ ଓ ଲେଜର ସୋ’ ମୁଖ୍ୟ ଆକର୍ଷଣ ସାଜିଥିବା ବେଳେ ଦାମାହୁଦାର ଲୋକକଳା ସାନ୍ତାଳି ନୃତ୍ୟ, କଟକର ଶାଶ୍ୱତ ଯୋଶୀଙ୍କ ଓଡିଶୀ ନୃତ୍ୟ, ଶଶାଙ୍କ ଓ ବର୍ଣ୍ଣାଳୀ ହୋତାଙ୍କ ଓଲହିଉଡ ନାଇଟ୍ ଏବଂ ସମ୍ବଲପୁରର ଦୁର୍ଗା ଦାସ ଓ ସାଥୀ କଳାକାରଙ୍କ ଦ୍ୱାରା ସମ୍ବଲପୁରୀ ନୃତ୍ୟ ପରିବେଷଣ ସାଙ୍ଗକୁ ଡ୍ରୋନ ସୋ ଓ ଲେଜର ସୋ ପ୍ରବଳ ଶୀତ ସତ୍ତ୍ବେ ଦର୍ଶକଙ୍କୁ ରୋମାଂଚିତ କରି ଶେଷ ଯାଏଁ ବାନ୍ଧି ରଖିଥିଲା।