ନୂଆଦିଲ୍ଲୀ: ୨୦୭୫ ସୁଦ୍ଧା ଭାରତ ବିଶ୍ୱର ଦ୍ୱିତୀୟ ବୃହତ୍ତମ ଅର୍ଥନୀତି ହୋଇପାରେ। ଗ୍ଲୋବାଲ ଇନଭେଷ୍ଟମେଣ୍ଟ ବ୍ୟାଙ୍କ ଗୋଲ୍ଡମ୍ୟାନ୍ ସାକ୍ସ ଏହାର ଏକ ରିପୋର୍ଟରେ ପୂର୍ବାନୁମାନ କରିଛି। ରିପୋର୍ଟରେ କୁହାଯାଇଛି ଯେ, ଦୀର୍ଘ ସମୟ ଧରି ଭାରତୀୟ ଅର୍ଥନୀତି ଜାପାନ ଏବଂ ଜର୍ମାନୀର ଅର୍ଥନୀତିକୁ ବହୁ ପଛରେ ପକାଇବ। କିନ୍ତୁ ଆମେରିକାର ଅର୍ଥନୀତିକୁ ମଧ୍ୟ ପଛରେ ପକାଇ ଚାଇନା ପରେ ଭାରତ ଦ୍ୱିତୀୟ ବୃହତ୍ତମ ଅର୍ଥନୀତି ହେବ।
ଗୋଲ୍ଡମ୍ୟାନ୍ ସାକ୍ସ ରିପୋର୍ଟରେ କହିଛି ଯେ, ୨୦୭୫ ସୁଦ୍ଧା ଚାଇନା ୫୭ ଟ୍ରିଲିୟନ ଡଲାର ସହିତ ବିଶ୍ୱର ବୃହତ୍ତମ ଅର୍ଥନୀତି ହେବ ଏବଂ ୫୨.୫ ଟ୍ରିଲିୟନ ଡଲାର ସହିତ ଭାରତ ଦ୍ୱିତୀୟ ସ୍ଥାନରେ ରହିବ। ୫୧.୫ ଟ୍ରିଲିୟନ ଡଲାର ସହିତ ଆମେରିକାର ଅର୍ଥନୀତି ତୃତୀୟ ବୃହତ୍ତମ ହେବ। ୩୦.୩ ଟ୍ରିଲିୟନ ଡଲାର ସହିତ ୟୁରୋ କ୍ଷେତ୍ର ଏବଂ ୭.୫ ଟ୍ରିଲିୟନ ଡଲାର ସହିତ ଜାପାନ ପଞ୍ଚମ ବୃହତ୍ତମ ଅର୍ଥନୀତି ହେବ।
ଗୋଲ୍ଡମ୍ୟାନ୍ ସାକ୍ସର ରିପୋର୍ଟ ଅନୁଯାୟୀ, ବଢୁଥିବା ଜନସଂଖ୍ୟା ବ୍ୟତୀତ ଏହା ନବସୃଜନ ପ୍ରଯୁକ୍ତିବିଦ୍ୟା, ଅଧିକ ପୁଞ୍ଜି ବିନିଯୋଗ ଏବଂ ଶ୍ରମିକ ଉତ୍ପାଦନରେ ବୃଦ୍ଧି ସହିତ ଏହି ଆକଳନ କରାଯାଉଛି। ଆସନ୍ତା ଦୁଇ ଦଶନ୍ଧି ମଧ୍ୟରେ ଏହି ଅଞ୍ଚଳର ଅନ୍ୟ ଅର୍ଥନୀତି ମଧ୍ୟରେ ଭାରତର ନିର୍ଭରଶୀଳତା ଅନୁପାତ ସର୍ବନିମ୍ନ ହେବ ବୋଲି ଗୋଲ୍ଡମ୍ୟାନ୍ ସୋକ୍ସ ରିସର୍ଚ୍ଚର ଭାରତ ଅର୍ଥନୀତିଜ୍ଞ ଶାନ୍ତନୁ ସେନଗୁପ୍ତା କହିଛନ୍ତି। ଯେକୌଣସି ଦେଶର ନିର୍ଭରଶୀଳତା ଏହାର କାର୍ଯ୍ୟରତ ଜନସଂଖ୍ୟାର ଅନୁପାତ ଉପରେ ନିର୍ଭର କରେ। ଯଦି ନିର୍ଭରଶୀଳ ଅନୁପାତ କମ୍, ଏହା ଅନୁମାନ କରାଯାଏ ଯେ ସେଠାରେ ଅଧିକ କାର୍ଯ୍ୟରତ ଲୋକ ଅଛନ୍ତି ଯେଉଁମାନେ ଯୁବକ ଏବଂ ବୃଦ୍ଧଙ୍କୁ ସମର୍ଥନ କରିବାକୁ ସକ୍ଷମ ହେବେ। ରିପୋର୍ଟ ଅନୁଯାୟୀ, ବୃହତ ଅର୍ଥନୀତି ମଧ୍ୟରେ ଭାରତରେ ନିର୍ଭରଶୀଳଙ୍କ ଅନୁପାତ ସର୍ବନିମ୍ନ ହେବ।
ଏଭଳି ପରିସ୍ଥିତିରେ ଭାରତ ପାଇଁ ଉତ୍ପାଦନ କ୍ଷମତା ବୃଦ୍ଧି, ସେବା ଶିଳ୍ପ ବୃଦ୍ଧି ଏବଂ ଭିତ୍ତିଭୂମି ବିକାଶ ପାଇଁ ସବୁଠାରୁ ବଡ ସୁଯୋଗ ମିଳିବ। ରିପୋର୍ଟ ଅନୁଯାୟୀ, ସଡକ ଏବଂ ରେଳ ପରି ଭିତ୍ତିଭୂମି ଉପରେ ଭାରତ ସରକାର ସର୍ବାଧିକ ଗୁରୁତ୍ୱ ଦେଇଛନ୍ତି। ଭିତ୍ତିଭୂମିରେ ପୁଞ୍ଜି ବିନିଯୋଗକୁ ପ୍ରୋତ୍ସାହିତ କରିବା ପାଇଁ ସରକାର ୫୦ ବର୍ଷ ଧରି ରାଜ୍ୟମାନଙ୍କୁ ସୁଧମୁକ୍ତ ଋଣ ପ୍ରଦାନ କରିଛନ୍ତି। ଗୋଲ୍ଡମ୍ୟାନ୍ ସାକ୍ସ ବିଶ୍ବାସ କରେ ଯେ, ଘରୋଇ କ୍ଷେତ୍ର ପାଇଁ ଉତ୍ପାଦନ ଏବଂ ସେବା କ୍ଷମତା ବୃଦ୍ଧି ପାଇଁ ଏକ ବଡ଼ ସୁଯୋଗ ଅଛି, ଯାହା ଦ୍ଵାରା ସର୍ବାଧିକ ନିଯୁକ୍ତି ସୁଯୋଗ ସୃଷ୍ଟି ହୋଇପାରିବ ଏବଂ ବୃହତ ଶ୍ରମଶକ୍ତି ନିୟୋଜିତ ହୋଇପାରିବ।
ଏହାପୂର୍ବରୁ ଏସ ଆଣ୍ଡ ପି ଏବଂ ମୋର୍ଗାନ ଷ୍ଟାନଲି ସେମାନଙ୍କ ରିପୋର୍ଟରେ କହିଛନ୍ତି ଯେ, ୨୦୩୦ ସୁଦ୍ଧା ଭାରତ ବିଶ୍ୱର ତୃତୀୟ ବୃହତ୍ତମ ଅର୍ଥନୀତି ହେବ।