ରେଢ଼ାଖୋଲ (କନ୍ଦର୍ପ ବେହେରା): ସମ୍ବଲପୁର ଜିଲ୍ଲା ରେଢ଼ାଖୋଲ ବ୍ଲକ କନ୍ଧରା ଗ୍ରାମ ସ୍ଥିତ ଭୀମ ଭୋଇ ସ୍ମୃତି ପୀଠ ଠାରେ ମଙ୍ଗଳବାର ଦିନ ରାଉରକେଲା ମହର୍ଷି ବ୍ୟାସଦେବ ରାଷ୍ଟ୍ରୀୟ ପ୍ରାଚ୍ୟ ବିଦ୍ୟା ପ୍ରତିଷ୍ଠାନ ଦ୍ଵାରା ଉତ୍କଳ ପୀଠ, ତିରୁପତି ରାଷ୍ଟ୍ରୀୟ ସଂସ୍କୃତ ବିଶ୍ବବିଦ୍ୟାଳୟ ଏବଂ ଅର୍ଜୁନ ସ୍ନାତକ ମହାବିଦ୍ୟାଳୟ କଦଳିଗଡ ର ମିଳିତ ଆନୁକୁଲ୍ୟରେ ଜଗନ୍ନାଥ ସଂସ୍କୃତି ଏବଂ ପଶ୍ଚିମ ଓଡ଼ିଶା ର ଶକ୍ତି ତତ୍ତ୍ଵ ବିଷୟରେ ଏକ ଦିବସୀୟ ଜାତୀୟ ଆଲୋଚନା ଚକ୍ର ଅନୁଷ୍ଠିତ ହେଇଯାଇଛି। ଏଥିରେ ଅର୍ଜୁନ ଡିଗ୍ରୀ କଲେଜ୍ ର ଅଧ୍ୟକ୍ଷ ଅଖିଳେନ୍ଦ୍ର ଶାସନୀ ସ୍ଵାଗତ ଭାଷଣ ପ୍ରଦାନ କରିବା ସହ ଅତିଥି ମାନଙ୍କୁ ଛାତ୍ର ଛାତ୍ରୀ ମାନେ ପୁଷ୍ପ ଗୁଚ୍ଛ ଏବଂ ଉତ୍ତରୀୟ ପ୍ରଦାନ କରି ସ୍ଵାଗତ କରିଥିଲେ। ଉକ୍ତ ଆଲୋଚନା ଚକ୍ରରେ ମୁଖ୍ୟ ଅତିଥି ଭାବେ ରାଷ୍ଟ୍ରୀୟ ସଂସ୍କୃତ ବିଶ୍ବବିଦ୍ୟାଳୟ ଏବଂ କିସ୍ ବିଶ୍ଵବିଦ୍ୟାଳୟ ର ପୂର୍ବତନ କୁଳପତି ପ୍ରଫେସର ହରେକୃଷ୍ଣ ଶତପଥୀ ଯୋଗଦାନ କରି ପଶ୍ଚିମ ଓଡ଼ିଶା ର ଦୈବୀ ଶକ୍ତି ତତ୍ତ୍ଵ ବିଷୟରେ ଆଲୋକପାତ କରିଥିଲେ।
ପ୍ରଫେସର୍ ଶତପଥୀ କହିଥିଲେ ଯେ ଦୈବୀ ଶକ୍ତି ବିନା ଜଗନ୍ନାଥ ସଂସ୍କୃତି ଅସମ୍ପୂର୍ଣ୍ଣ। ପଶ୍ଚିମ ଓଡ଼ିଶାର ଆଦିବାସୀ ସମ୍ପ୍ରଦାୟ ଲୋକ ଦୈବୀ ଶକ୍ତି ଙ୍କୁ ଆରାଧନା କରି ତାଙ୍କର ଜୀବନ ଚର୍ଯ୍ୟା ପରି ପାଳନ କରୁଥିଲେ। ପଶ୍ଚିମ ଓଡ଼ିଶାରେ ଶକ୍ତି ତତ୍ତ୍ଵ ବିଷୟରେ ଅଧିକ ଗବେଷଣା କରି ଏହାର ପ୍ରଚାର ପ୍ରସାର ନିମନ୍ତେ ପୁସ୍ତକ ପ୍ରକାଶନ କରିବା ପାଇଁ ପ୍ରତିଶ୍ରୁତି ଦେଇଛନ୍ତି।
ସମ୍ମାନିତ ଅତିଥି ଭାବେ ରାଷ୍ଟ୍ରୀୟ ସଂସ୍କୃତ ବିଶ୍ବବିଦ୍ୟାଳୟ, ତିରୁପତି ରେ ସ୍ଥାପିତ ଉତ୍କଳ ପୀଠ ର ନିର୍ଦ୍ଦେଶକ ପ୍ରଫେସର୍ ଜ୍ଞାନରଞ୍ଜନ ପଣ୍ଡା ଆଲୋଚନା ଚକ୍ର ର ବୈଶିଷ୍ଟ ଏବଂ ଉଦ୍ଦେଶ୍ୟ ବିଷୟରେ ଆଲୋକପାତ କରିଥିଲେ। ଏଥିରେ ବକ୍ତା ଭାବରେ ଭୀମଭୋଇ ଡିଗ୍ରୀ କଲେଜ୍ ର ଅଧ୍ୟାପକ ଡଃ ଭୋଜରାଜ୍ ଏବଂ ବୌଦ୍ଧ ପଞ୍ଚାୟତ କଲେଜ୍ ର ପ୍ରାଧ୍ୟାପକ ଡଃ ପ୍ରତାପ ରଥ ସ୍ଥାନୀୟ ଦୈବୀ ପୀଠ ସହ ଜଗନ୍ନାଥ ସଂସ୍କୃତି ବିଷୟରେ ସମ୍ୟକ୍ ସୂଚନା ପ୍ରଦାନ କରିଥିଲେ। ଶେଷରେ ଅଧ୍ୟାପକ ବୈନେତେୟ ସାହୁ ଧନ୍ୟବାଦ୍ ଦେଇଥିଲେ।
