ଭୁବନେଶ୍ୱର: ପ୍ରଦେଶ କଂଗ୍ରେସ କାର୍ଯ୍ୟାଳୟରେ ପିସିସି ସଭାପତି ଶ୍ରୀ ଶରତ ପଟ୍ଟନାୟକଙ୍କ ଅଧ୍ୟକ୍ଷତାରେ ଅଣ ବିଜେପି ଓ ଅଣ ବିଜେଡ଼ି ରାଜନୈତିକ ଦଳ ଗୋଷ୍ଠିର ନେତୃବୃନ୍ଦ ମାନଙ୍କର ଏକ ବୈଠକ ଅନୁଷ୍ଠିତ ହୋଇଯାଇଛି।
ଉକ୍ତ ବୈଠକରେ ନେତୃବୃନ୍ଦଙ୍କ ପରାମର୍ଶ କ୍ରମେ ୧୬ ଟି ବିରୋଧି ରାଜନୈତିକ ଦଳର ପ୍ରତିନିଧି ମାନଙ୍କୁ ନେଇ ଏକ ୧୭ ଜଣିଆ ସଂଯୋଜନା କମିଟି ଗଠନ କରାଯାଇଛି। କମିଟିରେ ପିସିସି ସଭାପତି ଶ୍ରୀ ଶରତ ପଟ୍ଟନାୟକ ଅଧ୍ୟକ୍ଷ ରହିଥିବା ବେଳେ ପୂର୍ବତନ ପିସିସି ସଭାପତି ଶ୍ରୀ ପ୍ରସାଦ ହରିଚନ୍ଦନ ସଂଯୋଜକ ଏବଂ ସମସ୍ତ ମେଂଟଭୁକ୍ତ ରାଜନୈତିକ ଦଳମାନଙ୍କର ନେତୃବୃନ୍ଦ ସଭ୍ୟ ଭାବେ ରହିଛନ୍ତି।
ବିଜେଡ଼ି ଓ ବିଜେପିର ଜନ ବିରୋଧି ନୀତି ବିରୁଦ୍ଧରେ ଜନଆନ୍ଦୋଳନ କରିବା ପାଇଁ ଏହି ବୈଠକରେ ନିଷ୍ପତି ନିଆଯାଇଛି। ରାଜ୍ୟରେ ଆକାଶଛୁଆଁ ଦରବୃଦ୍ଧି, ଉତ୍କଟ ବେକାରୀ ସମସ୍ୟା, ବ୍ୟାପକ ଦୁର୍ନୀତି, ଚାଷ ଓ ଚାଷୀ ସମସ୍ୟା, ନାରି ନିର୍ଯ୍ୟାତନ ଆଦିକୁ ନେଇ ଆନ୍ଦୋଳନ କରାଯିବ।
ବଢ଼ି ଚାଲିଥିବା ଜନଆକ୍ରୋଶକୁ ଆନ୍ଦୋଳନର ରୂପ ଦେବାପାଇଁ ଆଗାମୀ ପ୍ରଥମ ସପ୍ତାହରେ ରାୟଗଡ଼ାଠାରେ ଓ ଦ୍ୱିତୀୟ ସପ୍ତାହରେ ରାଉରକେଲା ଠାରେ ଜନଆକ୍ରୋଶ ସମାବେଶ ଆୟୋଜନ କରାଯିବା ପାଇଁ ବୈଠକରେ ନିଷ୍ପତି ନିଆଯାଇଛି। ସେହିଭଳି ଡିସେମ୍ବର ମାସ ପ୍ରଥମ ସପ୍ତାହରେ ସମ୍ବଲପୁରଠାରେ ଓ ଦ୍ୱିତୀୟ ସପ୍ତାହରେ ବାଲେଶ୍ୱରଠାରେ ମଧ୍ୟ ଜନ ଆକ୍ରୋଶ ସମାବେଶ ଆୟୋଜନ କରାଯିବ।
ଆଜିର ବୈଠକରେ ଅନ୍ୟମାନଙ୍କ ମଧ୍ୟରେ ସିପିଆଇ ରାଜ୍ୟ ସଂପାଦକ ଅଭୟ ସାହୁ, ସିପିଆଇଏମ ରାଜ୍ୟ ସଂପାଦକ ଅଳିକିଶୋର ପଟ୍ଟନାୟକ, ସୁରେଶ ପାଣିଗ୍ରାହୀ, ସିପିଆଇ (ଏମଏଲ) –ଏଲ ର ସଂପାଦକ ଯୁଧିଷ୍ଠୀର ମହାପାତ୍ର, ପୂର୍ବତନ ବିଧାୟକ ରାଧାକାନ୍ତ ସେଠୀ, ଅଲଇଣ୍ଡିଆ ଫରୱାର୍ଡ ବ୍ଲକର ରାଜ୍ୟ ସଂପାଦକ ଜ୍ୟୋତିରଞ୍ଜନ ମହାପାତ୍ର ଯୋଗ ଦେଇଥିଲେ।
ସେହିପରି ଜେଡିୟୁର ରାଜ୍ୟ ସଭାପତି ଚିତରଞ୍ଜନ ମହାନ୍ତି, ସିପିଆଇ (ଏମଏଲ) – ରେର୍ଡଷ୍ଟାର, ରାଜ୍ୟ ସଂପାଦିକା ପ୍ରମିଳା ବେହେରା, ଏନସିପି ରାଜ୍ୟ ସଭାପତି ବିକ୍ରମ ସ୍ୱାଇଁ, ଆରପିଆଇ ରାଜ୍ୟ ମୁଖ୍ୟ ସେକ୍ ଅବଦୁଲ ୱାଲି, ଆମଆଦମି ପାର୍ଟିର ପ୍ରତିନିଧି ସୁଦିପ୍ତ ଦାସ, ସୌମ୍ୟ ରଞ୍ଜନ ସ୍ୱାଇଁ, ସମାଜବାଦୀ ପାର୍ଟିର ସାଧାରଣ ସଂପାଦକ ସଂଜୟ ନାୟକ, ତୃଣମୂଳ କଂଗ୍ରେସର ପ୍ରତିନିଧି ନନ୍ଦନ ପାଲ, ସମତାକ୍ରାନ୍ତି ଦଳର ପ୍ରଭାତ ସାମନ୍ତରାୟ, ଆରଜେଡିର ହେମନ୍ତ କୁମାର ପ୍ରମୁଖ ୧୬ଟି ଦଳର ନେତୃବୃନ୍ଦ ବୈଠକରେ ଯୋଗଦେଇଥିଲେ ।